Sunday, February 5, 2023
- ማስታወቂያ -
- ማስታወቂያ -

አንድ ቢሊዮን ብር ግምት ያላቸው 300 ሺሕ ዘመናዊ የንብ ቀፎዎች ለአርስ አደሮች ተሠራጩ

- ማስታወቂያ -

ተዛማጅ ፅሁፎች

በማርና ጨርቃ ጨርቅ ዘርፎች 365 ደረጃዎች ፀደቁ

ግብርና ሚኒስቴር በማር ምርት ላይ የሚስተዋሉ የጥራት ችግሮችን ለመፍታት ያስችላሉ ያላቸውንና አንድ ቢሊዮን ብር ያህል የሚያወጡ 300 ሺሕ ዘመናዊ የንብ ቀፎዎች ለአርሶ አደሮች መሠራጨታቸውን ግብርና ሚኒስቴር አስታወቀ፡፡

በማር ምርት ላይ የአመራረትና የማጓጓዝ ሒደቱ ዘመናዊ ባለመሆኑ የምርቱ ጥራት ዝቅተኛ እንዲሆንና በዓለም አቀፍ ገበያ ላይም በሚገባው ዋጋ እንዳይሸጥ እያደረገው እንደሚገኝ፣ በግብርና ሚኒስቴር የማርና የሃር ሀብት ልማት ዳይሬክተር አቶ አብርሃም ዘውዴ ገልጸዋል። የማር ምርት ለውጭ አገሮች የሚያቀርቡ ላኪዎችም በማር ምርት ላይ ከፍተኛ የጥራት ችግር መኖሩን ይስማማሉ።

 በማርና ሰም ምርቶች ላይ የተሰማራው ግሪን ፌስ ትሬዲንግ የፋይናንስ ኃላፊ ወ/ሮ መሠረት ታምራት፣ ከገበሬዎች በሚሰበሰቡ ምርቶች ላይ ከፍተኛ የጥራት ችግር መኖሩን፣ ለዚህም የአመራረትና የትራንስፖርት ሒደቱ ዘመናዊ ባለመሆኑ የተፈጠረ እንደሆነ ገልጸዋል።

በተጨማሪም ወደ ውጭ ለመላክ ሲፈለግ በአገር ውስጥ የማር ናሙና ለማስፈተሽ ከአንድ ወር በላይ እንደሚጠብቁ፣ ይህም ምርቱን በሚፈለገው ጊዜ ወደ ውጭ ለመላክ አስቸጋሪ እንዳደረገባቸው ገልጸው ጀርመን ናሙና በመላክ እንደሚያስፈትሹና ለተጨማሪ ወጪ እንደሚዳረጉም አስረድተዋል፡፡

በኢትዮጵያ ከ80 በመቶ በላይ የሚሆነው የማር ምርት በባህላዊ ቀፎዎች አማካኝነት የሚመረት በመሆኑ፣ በጥራቱ ላይ ከፍተኛ ችግር እንዲፈጠር ማድረጉን አቶ አብርሃም ተናግረዋል።

ይህንን ችግር ለመፍታትም ግብርና ሚኒስቴር ዘመናዊ የንብ ቀፎዎችን ለአናቢዎች እንደሚያሠራጭና ወደ ዘመናዊ አሠራር እንዲሸጋገሩ እንደሚያግዝ ገልጸው፣ ባለፉት ስድስት ወራትም እያንዳንዳቸው እስከ 3,500 ብር የሚያወጡ 300 ሺ ዘመናዊ የንብ ቀፎዎችን ለገበሬዎች ማሠራጨቱን ተናግረዋል፡፡ በ2014 በጀት ዓመት በአጠቃላይ አንድ ሚሊዮን ዘመናዊ የንብ ቀፎዎችን ለማሠራጨት መታቀዱን፣ በቀጣይ ቀሪዎቹን የማምረትና የማሠራጨት ሥራው እንደሚቀጥል አክለዋል።

በባህላዊ የንብ ቀፎ አማካኝነት በዓመት ከአሥር ኪሎ ግራም ያነሰ ማር እየተመረተ እንደሚገኝ የገለጹት አቶ አብርሃም፣ በዘመናዊ ቀፎዎች ሲመረት የምርት መጠኑ ከእጥፍ በላይ ከፍ እንደሚል አብራርተዋል።

በዓለም አቀፍ ገበያ አንድ ኪሎ ግራም ማር እስከ አራት ዶላር የሚሸጥ ሲሆን፣ የኢትዮጵያ ማር ግን በዋጋ የተሻለና እስከ ስምንት ዶላር እየተሸጠ እንደሚገኝ ገልጸው ጥራቱ ቢሻሻል አሁን ካለውም በላይ በተሻለ ዋጋ መሸጥ እንደሚችል አስረድተዋል።

በሌላ በኩል በግብርና ውስጥ በማር፣ በአትክልትና ፍራፍሬ፣ እንዲሁም በቆዳና ጨርቃ ጨርቅ ዘርፎች በአጠቃላይ 365 ደረጃዎች መፅደቃቸውን የኢትዮጵያ ደረጃዎች ኤጀንሲ አስታውቋል።

የፀደቁት ደረጃዎች በማር 34፣ በጨርቃ ጨርቅ 183፣ በቆዳ 134፣ እንዲሁም በኬሚካል ዘርፍ 14 መሆናቸውን በኢትዮጵያ ደረጃዎች ኤጀንሲ የደረጃ ዝግጅት ዳይሬክተር አቶ ይልማ መንግሥቱ ገልጸዋል።

ደረጃዎቹ በፈቃደኝነት ላይ ተመሥርተው የሚተገበሩ መሆናቸውን፣ ደረጃዎቹ መዘጋጀታቸው በተለይ በማር ምርት ላይ የሚነሳውን የማሸግና የማጓጓዝ ችግር ለመቆጣጠር እንደሚያግዝ አቶ ይልማ አክለዋል።

ወደ ውጭ ለሚላኩ የማር ምርቶች ፍተሻ በአገር ውስጥ የማይደረግ በመሆኑ የመላክ ሒደቱን እያጓተተብን ነው በማለት ላኪዎች ላነሱት ቅሬታ፣ በኢትዮጵያ ደረጃዎች ኤጀንሲ የደረጃ ዝግጅት ዳይሬክተሩ አቶ ይልማ መንግሥቱ የፍተሻ ላቦራቶሪ መሣሪያዎችን ሥራ ለማስጀመር ዕቃ የማሟላትና የገጠማ ሥራዎች እየተከናወኑ መሆኑናቸውን ገልጸው፣ በተወሰነ ደረጃም ቢሆን ችግሩ እንደሚፈታ ጠቁመዋል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች