Monday, December 5, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ጤና ሚኒስቴር የግል ሕክምና ተቋማት የአገልግሎት ዋጋን ይፈትሽልን

    ከአገልግሎት አሰጣጥ ጋር በተያያዘ ዘርፈ ብዙ ችግሮች አሉባቸው ተብለው ከሚጠቀሱት ተቋማት መካከል የጤና ተቋማት ተጠቃሾች ናቸው፡፡ በተለይ የግል የሕክምና ተቋማት ላይ የሚቀርቡ ሮሮዎች በርከት እያሉ መጥተዋል፡፡ እንደ አዲስ አበባ ባሉ ከተሞች የግል ጤና ተቋማት ለሚሰጡት ለአገልግሎት እየጠየቁ የሚገኙት ዋጋ ‹‹የማይቀመስ›› ከመባል አልፎ ልክ የሌለው ወደመሆን ተሸጋግሯል ሊባል የሚችል ነው፡፡  

    በተለይ በሆስፒታል ደረጃ አገልግሎት የሚሰጡ የግል ተቋማት አልጋ ይዞ ለመታከምም ሆነ ለሌሎች የሕክምና አገልግሎቶቻቸው ከካርድ ጀምሮ የሚጠይቁት ዋጋ በምን ዓይነት ስሌት ተሰልቶ የሚጠየቅ እንደሆነ ግራ የሚያጋባ ከሆነ ውሎ አድሯል፡፡

    ከአንዳንድ የግል ሆስፒታሎች የሚሰማውና በገሃድ እየታየ እንዳለው መቶ ሺሕ ብሮች ተከፍሏቸው በወጉ ማከም ያልቻሉትን ታማሚ አስከሬን ለመውሰድ በሺዎች የሚቆጠር ገንዘብ እየተጠየቀበት ነው፡፡ ነገረ ሥራቸው ብር ለመሰብሰብ ቆርጠው የተነሱ እያስመሰላቸው ነው፡፡ ሰውን ለማዳን ካለባቸው ኃላፊነት በላይ ጥቅማቸውን በማስቀደም እየፈጸሙ ያሉትን ያልተገባ ተግባር ሃይ የሚል በመጥፋቱ ሁኔታውን እያባሰው ነው፡፡

    አንድ ታማሚ ለሕክምና ሲገባ ማስያዝ አለበት ተብሎ የሚጠየቀው የገንዘብ መጠን ያስደነግጣል፡፡ ይህንን ለመገመት የሚያስቸግር ገንዘብ ተጠይቆም ታማሚውን ማዳን ቢችሉ እንኳን ምንም አልነበረም፡፡ ግን እየሆነ ያለው ያን ያህል ገንዘብ የተወሰደበት ሕክምና ያለምንም ውጤት ሲቀር በደላቸውን እጥፍ ድርብ ያደርገዋል፡፡ ይህ በተደጋጋሚ የሚስተዋል ከመሆኑም በላይ ለአገልግሎቶቻቸው የሚጠይቁት ገንዘብም በመርህ ላይ ያልተመሠረተ ወጥነት የሌለው የሆነበቱ አንዱ ምክንያት አገልግሎታቸው የተመሠረተው ገንዘብ ላይ በመሆኑ ነው፡፡

    ከዚህ ውጪ ሌላ ምክንያት ሊሰጠው አይችልም፡፡ አንዳንዴ እንደ ታማሚው የመክፈል አቅም እየታየ የአገልግሎት ዋጋቸውን የሚያሰሉም አሉ፡፡ አሁን አሁንማ አንድ ተኝቶ ታካሚ ሲገባ ሕመሙ ምንም ይሁን ምን ‹‹ማስያዣ›› እየተባለ እንደ ቀልድ የሚጠየቀው የገንዘብ መጠን በ10 ሺዎች ብር ነው፡፡ ይህ ብቻ አይደለም ሕመምተኛው ለቀናት አልጋ ከያዘ ተጨማሪ ገንዘብ እንዲያስቀምጥ ይገደዳል፡፡ ተሳክቶለት አንድ ሁለት ቀናት ቆይቶ ከሕመሙ ያገገመ ካለ የተያዘውን ብር ላለመመለስ ይፈጸማሉ የተባሉ ያልተገቡ ተግባሮችም እነዚህ ተቋማት በብርቱ እየታወቀሱበት ያለ ጉዳይ ነው፡፡

    ኢትዮጵያ ውስጥ የሚሰጠው ሕክምና እንዴት ይህንን ያህል ወጪ ሊጠይቅ ቻለ ለሚለው ጥያቄ መልስ ለማግኘት ይከብዳል፡፡

    የቸገረው የሚጠየቀውን በመቶ ሺሕ ብሮች የሚገመት ገንዘብ ሊከፍል ይችላል፡፡ ሆኖም ይህ እየተለመደ ያለ የተጋነነ ዋጋ ይዘው በአግባቡ ሊያገለግሉ የሚችሉ የሕክምና ተቋማትንም እየበረዙ ነው፡፡

    በጉዳዩ ላይ በደንብ እንነጋገር ከተባለ አንድ የግል የጤና ተቋም መቶና ሁለት መቶ ሺሕ ብር ተከፍሎት የሚሰጠው ሕክምና ምን ያህል የተለየ ሆኖ ነው ብለን ስንጠይቅ የተለየ ነገር ያለመኖሩ እንረዳለን፡፡

    ይህ በግልጽ የሚታወቅ ነው፡፡ ነገር ግን እነዚህን ተቋማት ምን እየሠሩ ነው? እንዴትስ ይህንን ያህል ዋጋ ይጠይቃሉ? በእርግጥስ በኢትዮጵያ በመቶ ሺሕ ብሮች የሚወጣበት ሕክምና አግባብነት ምን ያህል ነው? ብሎ የሚጠይቅ ቢኖር ይህ ሁሉ በደል ባልተፈጠረ ነበር፡፡

    አንዳንዴ በመንግሥት ሆስፒታል መቶ ብር ባልሞላ ዋጋ የሚሰጥ ሕክምናና  በግል ተቋማት ውስጥ እስከ መቶ ሺሕ ብሮች ዋጋ የሚጠየቅበት አግባብ ምንድነው? የሚሰጠው ሕክምና ያን ያህል ወጪ የሚጠይቅ ነው ወይ? እውነት ግራ ያጋባል፡፡

    ይህ የብዙዎች እንቆቅልሽ ከሆነ የሰነባበተ ሲሆን አሁን ላይ ደግሞ እየገነነ እየመጣ ነው፡፡ የበዛ ብር መጠየቅ ከሕመም የሚፈውስ የሚመስላቸው ወገኖችም እንደው ካሻሉልኝ ብለው ንብረት ሁሉ ሸጠው ዕድላቸውን ሲሞክሩ ይታያል፡፡ እንዲህም አድርገው ያልሆነላቸው ቤት ይቁጠራቸው፡፡

    ስለዚህ ይህ መሠረታዊ የሆነ የአገልግሎት ዘርፍ ተማሩ በሚባሉ አካላት እንዲህ ያለ ያልተገባ በደል ሲፈጸምበት እንደማየት የሚያሳዝን ነገር የለም፡፡ በደሃይቱ አገር በመቶ ሺሕ ብሮች የሚቆጠር የሕክምና ወጪ መሸፈን የሚችለው የኅብረተሰብ ክፍል ምን ያህል ነው ተብሎ አይጠየቅም፡፡ ነገር ግን እነዚህ ተቋማት እየጠየቁ ያሉት ገንዘብ ከአገሪቷ አቅም በላይ ነው፡፡ ችግሩ የተጋነነ ዋጋ መጠየቁ ብቻ አይደለም፣ በአንዳንዱ ሆስፒታል ገብቶ መውጣት አዳጋች እየሆነ መምጣቱም ነው፡፡

    ስለዚህ የእነዚህ ተቋማት የአገልግሎት ዋጋ ተመን፣ የአገልግሎት አሰጣጥና አጠቃላይ የሥራ ሒደታቸው በደንብ መፈተሽ አለበት፡፡ እንዲህ ያሉ ተቋማት ሕዝብን መድረስ ካለባቸው የአገሪቷን አቅም ያገናዘበ ዋጋ ሊኖራቸው ይገባል፡፡ የሚቋቋሙ የግል ሆስፒታሎች ሁሉ ገንዘብ ያለውን ብቻ ለማከም መሆን የለበትም፡፡ በሌላ በኩልም የነፃ ገበያ ቢሆን እንኳን ሁሉም ነገር ልክና ደረጃ ሊኖረው ስለሚገባ በተለይ ጉዳዩ በቀጥታ የሚመለከተው የጤና ሚኒስቴር እነዚህን ተቋማት ፈትሾ የሚጠየቀው ገንዘብ አግባብ መሆን አለመሆኑን ለይቶ ተመጣጣኝ የሆነ ዋጋ እንዲኖር ማድረግ ይኖርበታል፡፡ የባለሙያዎቻቸውን አቅም መፈተሽ ይገባል፡፡ አክሞ የማዳን አቅማቸውም መመዘንና መለየት አለበት፡፡ ሌላው ቀርቶ አንድ ታማሚ በመቶ ሺሕ ብሮች የሚጠይቁ የሕክምና ተቋማት ለሠራተኞቻቸው ምን ያህል ይከፍላሉ ብሎ መጠየቁም ብዙ ነገሮችን ያመላክታልና እነዚህ ከአገርም ከኅብረተሰቡም አቅም በላይ የሚጠይቁ የጤና ተቋማትን ማከም ያስፈልጋል፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት