Sunday, February 5, 2023
- ማስታወቂያ -
- ማስታወቂያ -

ከሰባት ቢሊዮን ብር በላይ ወጪ የተገነባው የንግድ ባንክ ሕንፃ ተጠናቀቀ

- ማስታወቂያ -

ተዛማጅ ፅሁፎች

  • በዘመናዊ ጥበብ የታነፀው ባለ 48ቱ ፎቅ ሕንፃ ከአንድ ሳምንት በኋላ ይመረቃል

በርዝማኔውና በአገሪቱ የሕንፃ ግንባታ ታሪክ ከፍተኛ ወጪ የወጣበት፣ እንዲሁም በዘመናዊ ጥበብ የታነፀው የኢትዮጵያ ንግድ ባንክ ሕንፃ ግንባታ በመጠናቀቁ በይፋ ሊመረቅ ነው፡፡

ከኢትዮጵያ ንግድ ባንክ የተገኘው መረጃ እንደሚያመለክተው፣ በኢትዮጵያ ብቻ ሳይሆን በምሥራቅ አፍሪካ ረዥሙ በመሆን የሚጠቀሰው የባንኩ ሕንፃ በይፋ የሚመረቀው ከአንድ ሳምንት በኋላ ነው፡፡ ጥር 21 ቀን 2007 ዓ.ም. 48 ፎቆች ያሉት የኢትዮጵያ ንግድ ባንክ አዲሱ ሕንፃ ግንባታ ሲጀመር ግንባታው 5.2 ቢሊዮን ብር እንደሚጠናቀቅ ታሳቢ ተደርጎ ቢሆንም፣ በአሁኑ ጊዜ ግን አጠቃላይ ወጪው ከሰባት እስከ ከስምንት ቢሊዮን ብር ሊደርስ እንደሚችል ተገምቷል፡፡

የሕንፃው ግንባታ ከተያዘለት ጊዜ በላይ መውሰዱ፣ የግንባታ ዕቃዎች መጨመር፣ የምንዛሪ ተመን ጭማሪና ሌሎች ተያያዥ ወጪዎች የግንባታውን ወጪ ከታሰበው በላይ እንዲሆን እንዳደረጉት ለማወቅ ተችሏል፡፡ ከዚህም በተጨማሪ የዲዛይን ለውጥ ተደርጎ አዳዲስ ሥራዎች የታከሉ በመሆናቸው፣ መጀመርያ ከተያዘው ዋጋ በላይ ጭማሪ ማስከተሉ ተጠቁሟል፡፡

የሕንፃው ግንባታ ሲጀመር 46 ፎቆች ይኖሩታል ተብሎ የነበረ ቢሆንም፣ ግንባታው ከተጀመረ በኋላ ግን ሁለት ፎቆች ተጨምረዋል፡፡ እነዚህ ተጨማሪ ሁለት ፎቆች ከ32 ሚሊዮን ብር በላይ ወጪ ጠይቀዋል ተብሏል፡፡ ከተጨማሪዎቹ ፎቆች 47ኛው ለሬስቶራንት አገልግሎት፣ 48ኛው ደግሞ አዲስ አበባን ከአራቱም አቅጣጫ ለማሳየት እንደገና ዲዛይን ተደርጎ ተገንብተዋል፡፡

በአገሪቱ የሕንፃ ግንባታ ታሪክ በዚህን ያህል ወጪ የወጣበት ሕንፃ እንደሌለ የታወቀ ሲሆን፣ እስካሁን ኢትዮጵያ ውስጥ ከፍተኛ ወጪ ወጥቶበት የተገነባ እንደሆነ የሚጠቀሰው የአፍሪካ ኅብረት ሕንፃ ነው፡፡

የአፍሪካ ኅብረት ሕንፃ ሲገነባ 200 ሚሊዮን ዶላር የወጣበት ሲሆን፣ በወቅቱ የምንዛሪ ዋጋ  2.5 ቢሊዮን ብር አካባቢ የፈጀ ነበር፡፡ የኢትዮጵያ ንግድ ባንክ 48 ፎቆች ካሉት የዋናው ሕንፃው በተጨማሪ፣ ስድስትና ስምንት ፎቆች ያሏቸው ሁለት ተደራቢ ሕንፃዎችን ያካተተ ሲሆን፣ አንደኛው ተደራቢ ሕንፃ የስብሰባ አዳራሾችን የያዘ ነው፡፡ ሌላው ተደራቢ የሕንፃ ክፍል ደግሞ ለተለያዩ የንግድ ሥራዎች ማለትም ሬስቶራንቶችን፣ የንግድ ሱቆችንና ስድስት ያህል ሲኒማ ቤቶችን ያካተተ መሆኑ ተገልጿል፡፡  

ዋናው ባለ48 ፎቅ ሕንፃ ከሦስተኛ እስከ 46ኛ ያለው ለባንኩ ዋና መሥሪያ ቤት ግልጋሎት የሚውል እንደሆነ፣ አንደኛውና ሁለተኛው የሕንፃው ፎቆች ደግሞ የባንኩን ታሪክ የሚያመላክቱ የማሳያ ሥፍራዎች እንደሚሆኑ፣ ከምድር በታች አራት ፎቆች  ደግሞ ለ1,500 መኪኖች ማቆሚያነት ያገለግላሉ ተብሏል፡፡ 

የንግድ ባንክን ሕንፃ ግንባታ ያከናወነው የቻይና መንግሥት ኮንስትራክሽን ኢንጂነሪነግ ኮርፖሬሽን ነው፡፡ የማማከር አገልግሎቱን እየሰጠ ያለው ደግሞ አዲስ አበባ ዩኒቨርሲቲ ነው፡፡ የቻይናው ሥራ ተቋራጭ በአዲስ አበባ ከተማ የተገነባውን የአፍሪካ ኅብረት ሕንፃ የገነባ ሲሆን፣ በቅርቡ 60 ፎቆች የሚኖሩትን የአቢሲንያ ባንክ ሕንፃ እንዲገነባ የተመረጠ መሆኑ ይታወቃል፡፡ በአሁኑ ወቅት አደይ አበባ ስታዲዮምን እየገነባ ያለው ይኼው ሥራ ተቋራጭ ነው፡፡

አዲሱ የንግድ ባንክ ሕንፃ ወደ ላይ 209 ሜትር ርዝማኔ ሲኖረው፣ የተገነባውም በ165,476 ካሬ ሜትር ቦታ ላይ ነው፡፡ ንግድ ባንክ ከአገሪቱ የባንክ ኢንዱስትሪ ገበያ አብላጫውን እጅ በመያዝ በ2013 የሒሳብ ዓመት ከታክስ በፊት 20.3 ቢሊዮን ብር ያተረፈ ሲሆን፣ አጠቃላይ ተቀማጭ የገንዘብ መጠኑ ደግሞ 735 ቢሊዮን ብር መድረሱን ማስታወቁ አይዘነጋም፡፡ በፋይናንስ ኢንዱስትሪው ውስጥ 80 ዓመታት ያስቆጠረው የኢትዮጵያ ንግድ ባንክ፣ በአሁኑ ወቅት አጠቃላይ የሀብት መጠኑ ከአንድ ትሪሊዮን ብር በላይ ደርሷል፡፡ የባንኩ ቅርንጫፎች ደግሞ ከ1,700 በላይ ሲሆኑ፣ የባንኩ አስቀማጭ ደንበኞች ቁጥር ከ31.4 ሚሊዮን በላይ ነው፡፡   

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች