Wednesday, October 5, 2022
ሌሎች ዓምዶች
    - Advertisement -
    - Advertisement -
    ዜናበአፋር ክልል በአምስት ወረዳዎች ከባድ ጦርነት እየተካሄደ መሆኑ ተገለጸ

    በአፋር ክልል በአምስት ወረዳዎች ከባድ ጦርነት እየተካሄደ መሆኑ ተገለጸ

    ቀን:

    በአፋር ክልል ሰሜናዊ ክፍል በሚገኘው በቀድሞ ስሙ ዞን ሁለት እየተባለ በሚጠራው ኪልበት ረሱ ዞን አምስት ወረዳዎች የሚካሄደው ከባድ ውጊያ መፋፋሙን ክልሉ አስታወቀ፡፡

    የክልሉ መንግሥት ኮሙዩኒኬሽን ጉዳዮች ቢሮ ኃላፊ አቶ አህመድ ከሎይታ፣ በዞኑ ባሉ አምስት ወረዳዎች ውጊያ መቀጠሉን ለሪፖርተር ገልጸዋል፡፡ የሕወሓት ሠራዊት ከክልሉ ጋር ወደሚያዋስነው የአፋር ክልል ኪልበት ረሱ ዞን ዘልቆ በመግባት ወረራ መፈጸሙን የአፋር ክልል መንግሥት ከሳምንታት በፊት ነበር ያስታወቀው፡፡

    የሕወሓት ኃይል በከፈተው አዲስ ወረራ ለጂቡቲ ወደብና ለአፍዴራ የጨው ማምረቻ አካባቢ ወሳኝ መገንጠያ የሆነቸውን የሰርዶ ከተማ ለመያዝ አቅዶ መነሳቱን፣ የአፋር ክልል መንግሥት አስታውቋል፡፡ ሕወሓት በበርሃሌ በከፈተው ውጊያ ከ3,000 በላይ ሠራዊት እንዳጣ ያስታወቁት የመንግሥት የክልሉ ኮሙዩኒኬሽን ኃላፊ አቶ አህመድ ከሎይታ፣ ‹‹ነገር ግን ይህ ሳይበቃው በአባላ፣ በኢረብቲ፣ በኮነባና በመጋሌ ወረዳዎችም ጦርነት ከፍቶብናል፤›› በማለት ለሪፖርተር ተናግረዋል፡፡

    አቶ አህመድ አክለውም፣ በአፋር ክልል በአጠቃላይ በጦርነቱ የተፈናቀሉ ዜጎች ቁጥር ከ400 ሺሕ በላይ መድረሱንና ክልሉ ከፍተኛ ድጋፍ እንደሚያስፈልገው ተናግረዋል፡፡

    ጦርነቱ ከሚካሄድባቸው አካባቢዎች ለተፈናቀሉ ተጎጂዎች የሰብዓዊ ዕርዳታ ለማከፋፈል ወደ አካባቢው ከሰሞኑ መጓዛቸውን የሚናገሩት የሰብዓዊ ዕርዳታ ድጋፍ አስተባባሪው አቶ አሎ ያዮ በበኩላቸው፣ ‹‹የፌዴራል መንግሥትና ሌሎች ክልሎች ለአፋር ክልል ድጋፍ ካላደረጉ ችግሩ አስከፊ ወደ መሆን ይሸጋገራል፤›› ሲሉ ለሪፖርተር ገልጸዋል፡፡ ዕርዳታ በማስተባበርና በአፋር ጉዳዮች ዙሪያ የማኅበራዊ አንቂነት ሥራ የሚሠሩት አቶ አሎ፣ ወደ አካባቢው ተጉዘው ያዩት ነገር አሰቃቂ መሆኑን አስረድተዋል፡፡

    ‹‹በዱብቲ ሆስፒታል ሰውነታቸው የተቃጠለ ሕፃናትን ሲታከሙ ዓይቻለሁ፡፡ ከመጋሌ ወረዳ የተፈናቀሉ ዜጎችን አግኝቼ የሆነውን ጠይቄያለሁ፡፡ ሕወሓት በእኩለ ሌሊት በከባድ መሣሪያዎች በታገዘ በከፈተው ጥቃት በርካታ ሰዎች ሕይወታቸውን ለማትረፍ በየአቅጣጫው መሸሻቸውን ነግረውኛል፡፡ በዚህ የተነሳ ከአምስት ልጆቿ ጋር የተጠፋፋች እናት አጋጥማኛለች፡፡ በአፋር ክልል ላይ የተከፈተውን የሕወሓት ጥቃት እንደ አገር ተጋግዘን መመከት ካልቻልን ችግሩ ይሰፋል፤›› ሲሉ ነው አቶ አሎ የጉዳዩን አሳሳቢነት ያብራሩት፡፡

    እንደ አቶ አሎ እምነት ሕወሐት ቸል ከተባለ ጥቃቱን በማስፋት ወደ ጂቡቲ ወደብ ወሳኝ መተላለፊያ የሆነችውን ሰርዶ ከተማ ሊቆጣጠር የሚችልበት ዕድል ይኖራል፡፡  

    - Advertisement -

    ይመዝገቡ

    spot_img
    spot_img