Wednesday, October 5, 2022
ሌሎች ዓምዶች
    - Advertisement -
    - Advertisement -
    ስፖርትብቸኛው የኦሊምፒክ ባለወርቅ ሰለሞን ባረጋ ቃል የተገባለትን ሽልማት አላገኘም

    ብቸኛው የኦሊምፒክ ባለወርቅ ሰለሞን ባረጋ ቃል የተገባለትን ሽልማት አላገኘም

    ቀን:

    የፓራሊምፒክ ባለድሏ ሽልማቷን ተረክባለች ተብሏል

    በቶኪዮ ኦሊምፒክ ብቸኛውን የወርቅ ሜዳሊያ ያጠለቀው ሰለሞን ባረጋ፣ እስካሁን ከመንግሥት ቃል የተገባለትን ሽልማት አለማግኘቱ ተገለጸ፡፡

    የባህልና ስፖርት ሚኒስቴር (የቀድሞ ስፖርት ኮሚሽን) በበኩሉ፣ በሥልጣን ሽግሽግ ምክንያት መዘግየቱ ካልሆነ በስተቀር ሽልማቱ እንዳልቀረ ይገልጻል፡፡

    በኮቪድ-19 ወረርሽኝ ምክንያት ለአንድ ዓመት እንዲራዘም ከተደረገ በኋላ፣ ባለፈው ክረምት በተካሄደው የቶኪዮ ኦሊምፒክ ላይ የተሳተፈው የኢትዮጵያ አትሌቲክስ ቡድን፣ ብቸኛውን የወርቅ ሜዳሊያ በ10 ሺሕ ሜትር ያስመዘገበው ሰለሞን ባረጋ መሆኑ ይታወቃል፡፡ በቀድሞ ስፖርት ኮሚሽን አቅራቢነት ከመንግሥት ቃል የተገባለትን ሽልማት አለማግኘቱ የሪፖርተር ምንጮች ገልጸዋል፡፡

    በወቅቱ ሰለሞን ባረጋ ላስመዘገበው የወርቅ ሜዳሊያ መንግሥት የሦስት ሚሊዮን ብር ግምት ያለው ዘመናዊ የቤት አውቶሞቢል እንደሚሸለም ቃል እንደተገባለት የሚናገሩት የሪፖርተር ምንጮች አትሌቱ ሽልማቱን እስካሁን አላገኘም፡፡

    ከቶኪዮ ኦሊምፒክ በኋላ በተካሄደው ፓራሊምፒክ በ1,500 ሜትር በዓይነ ሥውራን ጭላንጭል ባሸናፊነቷ የወርቅ ሜዳሊያ ያጠለቀችው ትዕግሥት ገዛኸኝ ግን ከውድድሩ በኋላ ቃል የተገባላትን የገንዘብ ሽልማት የወሰደች ስለመሆኑ ጭምር ምንጮች ለሪፖርተር ገልጸዋል፡፡

    ለሰለሞን ባረጋ ቃል የተገባው ሽልማት የተወሰነው በቀድሞ ስፖርት ኮሚሽን ዘመን ሲሆን፣ መንግሥት በቅርቡ ባዋቀረው ካቢኔ መሠረት ጉዳዩ የሚመለከተው ባህልና ስፖርት ሚኒስቴር በበኩሉ በሰጠው ምላሽ፣ በመንግሥት የሥልጣን ሽግሽግ ምክንያት መዘግየቱ ካልሆነ በቀር ሽልማቱ አልቀረም ብሏል፡፡

    በሚኒስቴሩ የትምህርት ሥልጠናና ውድድር ዳይሬክተር ወ/ሮ አበባ አማረ አትሌቱ ቃል የተገባለትን ሽልማት እንደሚያገኝ ነው ለሪፖርተር የተናገሩት፡፡

    ከሰለሞን ባረጋ ሽልማት ጋር በተገናኘ ለአትሌቱ ቅርበት ያላቸው ምንጮች እንደሚገልጹት ከሆነ፣ የኦሊምፒክ ባለድሉ ፍላጎት ሽልማቱ በገንዘብ ተቀይሮ እንዲሰጠው ይፈልጋል፡፡  

    ኢትዮጵያ በቶኪዮ ኦሊምፒክ ከሰለሞን ባረጋ የወርቅ ሜዳሊያ ሌላ ለሜቻ ግርማ በ3,000 ሜትር የብር፣ እንዲሁም በሴቶች 10,000 ሜትር በለተሰንበት ግደይና በ5,000 ሜትር በጉዳፍ ፀጋይ አማካይነት ሁለት የነሐስ ሜዳሊያዎችን ማስመዝገቧ ይታወሳል፡፡

    - Advertisement -

    ይመዝገቡ

    spot_img
    spot_img