Sunday, February 5, 2023
- Advertisment -
- Advertisment -

የብልፅግና ጉባዔ ፋይዳ የሚለካው በቃሉ ሳይሆን በተግባሩ ነው!

ገዥው ብልፅግና ፓርቲ ለሦስት ቀናት የሚያቆየውን ጉባዔ እያገባደደ ነው፡፡ ይህንን ጉባዔ የአንድ ፓርቲ ጉዳይ ነው ብሎ ችላ ማለት አያስፈልግም፡፡ ምክንያቱም ፓርቲው ራሱ ከፈጠረው ችግር በተጨማሪ፣ የዘመናት ችግሮችን የተሸከመች አገር እየመራ ነውና፡፡ ስለዚህም ብልፅግና በዚህ ጉባዔ አማካይነት ራሱን እንደ ንስር አድሶ ይነሳል? ወይስ እንደ ቀድሞ ወላጁ ኢሕአዴግ በስብሶ ራሱን ያጠፋል? የሚለውን ወቅታዊና አንገብጋቢ ጥያቄ በማንሳት መነጋገር አስፈላጊ ነው፡፡ በጉባዔው ፓርቲው በአደረጃጀትና በአሠራር ራሱን የሚያጠናክርበት፣ እንዲሁም የኢትዮጵያን ሁለንተናዊ ብልፅግና ሊያረጋግጡ የሚችሉ ጠንካራ የፓርቲ አመራሮች የሚመረጡበት እንደሚሆን ተነግሯል፡፡ ከጉባዔው በኋላም ብልፅግና የመረጠውን ሕዝብ ለማገልገል ካለፈው ስህተቱ በመማርና ጠንካራ ጎኖችን በማስቀጠል፣ በዋናነት በነገ ላይ ትኩረት አድርጎ የአስተሳሰብና የተግባር አንድነቱን ያጠናክራል ተብሏል፡፡ ብልፅግና ለሕዝቡ የሚጠቅሙ ውሳኔዎችን አስተላልፋለሁ ሲል በሕዝቡ ውስጥ በርካታ የሚብላሉ ጥያቄዎች አሉ፡፡ ከጥያቄዎቹ መካከል የአገሩ ሰላምና ደኅንነት መቃወስ፣ በገዛ አገሩ በማንነቱ ምክንያት መጠቃት፣ የኑሮ ውድነት፣ የሕገወጥነት መስፋፋት፣ የመንግሥት ሹማምንትን በሥልጣን መባለግና የመሳሰሉት ይጠቀሳሉ፡፡ የብልፅግና አባላትና አመራሮች ውስጣዊ አንድነት ሳይኖራቸው አገር መምራታቸውም ያሳስበዋል፡፡

ኢትዮጵያ እጅግ ፈታኝ በሆነ አስቸጋሪ ጊዜ ውስጥ ሆና በተካሄደው የሰኔ 2013 ዓ.ም. ጠቅላላ ምርጫ፣ የኢትዮጵያ ሕዝብ ለአገሩ ዘለቄታዊ ደኅንነትና ጥቅም ሲል ብልፅግናን መምረጡ አይዘነጋም፡፡ ሕዝብ በአርቆ አሳቢነት ከራሱ በላይ አገሩን አስቀድሞ እዚህ ውሳኔ ላይ ሲደርስ፣ ከምንም ነገር በላይ ያስተዋለው አገሩ ያለችበትን አጣብቂኝ እንደነበር ይታወሳል፡፡ ነገር ግን ብዙዎቹ የብልፅግና ሰዎች የሕዝብን አርቆ አሳቢነት ተገዳድረዋል፡፡ የኢትዮጵያዊነት የዘመናት የአብሮነት የጋራ እሴትን በብሔርተኝነት በመለወጥ ኢትዮጵያውያን በፈለጉት ሥፍራ እንዳይሠሩ፣ እንዳይንቀሳቀሱና በእኩልነት እንዳይስተናገዱ በማድረግ የዜግነት ደረጃ አውጥተዋል፡፡ አንዱን ባለቤት ሌላውን መጤ አድርገዋል፡፡ የሕዝቡን ሰላም ማስጠበቅ አቅቷቸው ለዜጎች ዕልቂት፣ መፈናልና መጎዳት ምክንያት ሆነዋል፡፡ ፓርቲው ከላይ ተንጠልጥሎ የተቀመጠ ይመስል በታችኛው መዋቅር ሳይቀር አስከፊ ድርጊቶች እየተፈጸሙ ነው፡፡ በላይኛው መዋቅርም ቢሆን በፓርቲው አመራሮች መካከል የሚስተዋለው ሽኩቻ፣ ኢትዮጵያን ተስፋ ቢስ የሚያደርጉ ክስተቶች እንዲፈጠሩ አድርጓል፡፡ በክልሎች አመራሮች መካከል ባለው አለመተማመን ምክንያት የፀጥታ ኃይሎች ሳይቀሩ ይጋጫሉ፡፡ በዚህ ሳቢያ የሕዝቡ ሰላም እየተቃወሰ ነው፡፡

በብልፅግና ፓርቲ ውስጥ በጣም አደገኛ የሆነው ሌላው ክስተት ከፍተኛ ዝርፊያ ውስጥ መሰማራት ነው፡፡ በኔትወርክ የተደራጁ ኃይሎች ከታችኛው የቀበሌ መዋቅር ጀምሮ እስከ ላይኛው መዋቅር ድረስ በመሬት ወረራ፣ በጉቦ፣ በመንግሥት ገንዘብና ሀብት ዘረፋ፣ ከግዥ ሕግ ውጪ ያለ ጨረታ ኮንትራቶች በመስጠት፣ የመንግሥት ገቢ በአግባቡ እንዳይሰበሰብ በማድረግ፣ ግብርና ቀረጥ ከሚያጭበረብሩ ጋር በመመሳጠርና በመሳሰሉት ሕገወጥ ድርጊቶች አገር እያደሙ ናቸው፡፡ ከትንሹ ሹም ጀምሮ የአገሪቱ አቅም ከሚፈቅደው በላይ በቅንጦት መኖሪያ ቤቶችና ተሽከርካሪዎች መንደላቀቅ፣ ለቡድን አጋሮች ልዩ ጥቅሞችን ማስከበር፣ እንዲሁም ሕግ ከሚፈቅደው ውጪ ጥቅም የሚገኝባቸውን ቦታዎች በብሔርተኝነት መቀራመትና መሰል አስከፊ ድርጊቶች ተበራክተዋል፡፡ ከዚህም ባለፈ የባንክ ብድር፣ የውጭ ምንዛሪና ከቀረጥ ነፃ ዕድሎችን ለግብረ አበሮች ማመቻቸት ድረስ የዘለቀ አጋባሽነትም በስፋት ይስተዋላል፡፡ ይህ አደገኛ ድርጊት አገር እንደሚያጠፋ የተገነዘቡ ወገኖች በተለያዩ መንገዶች ለማሳሰብ ቢሞክሩም፣ የፓርቲው አመራሮችም ሆኑ ሌሎች በየደረጃው የሚመለከታቸው ደንታ የሰጣቸው አይመስሉም፡፡ በዘመነ ኢሕአዴግ ይስተዋሉ የነበሩ አስከፊ ድርጊቶች አሁንም መቀጠላቸው ብዙዎችን ማስኮረፉ ይታወቃል፡፡ ለለውጡ መንግሥት በስፋት ድጋፋቸውን ይሰጡ የነበሩ ወገኖች በከፍተኛ ሁኔታ ድጋፋቸውን ለማቆማቸው አንዱ ገፊ ምክንያት ይህ ነው፡፡

ኢትዮጵያን በዚህ አስቸጋሪ ጊዜ ውስጥ ለመምራት ታሪካዊ አጋጣሚ የተፈጠረለት ብልፅግና ሌላው የሚወቀስበት ጉዳይ፣ ታይቶ የማይታወቅ የሕዝብ ድጋፍ ጎርፎለት አገርን አረጋግቶ መምራት አለመቻሉ ነው፡፡ ብልፅግና ኢትዮጵያዊነትን የሚያቀነቅን ፓርቲ እንደሆነ በተደጋጋሚ በአመራሮቹ አማካይነት ቢወተውትም፣ ውስጡን ባለመጥራቱና በአክራሪ ብሔርተኞች በመሞላቱ ቃልና ተግባሩ ሊግባቡ አልቻሉም፡፡ በሰሜን ኢትዮጵያ የተካሄደው ኃይለኛ ደም አፋሳሽ ጦርነት በአግባቡ ሳይቋጭ መቅረቱ፣ ለዚህ ጦርነት መቀስቀስ ምክንያት ሊሆኑ ይችላሉ የተባሉ ተጠርጣሪዎች ክስ መቋረጥ፣ ኦነግ ሸኔ ከመንግሥት አቅም በላይ እንዳልሆነ እየታወቀ ንፁኃን በማንነታቸው ሲጨፈጨፉ ተገቢው ዕርምጃ አለመውሰዱና የኢትዮጵያን ሰላም በፍጥነት ማረጋገጥ አለመቻሉም ተጨማሪ የብሶት ምንጭ ናቸው፡፡ በተለይ ኦነግ ሸኔን የሚደግፉ አመራሮች የተሰገሰጉበት ብልፅግና ኢትዮጵያን እንዳያፈራርስ የሚሠጉም አሉ፡፡ በሕዝቡ ውስጥ ከሚብሰለሰሉ ጉዳዮች ውስጥ አንዱ፣ የብልፅግና ሹማምንት የሚናገሩትንም ሆነ የሚያቀርቡትን ሪፖርት አለማመን ነው፡፡ ከሰሜን ኢትዮጵያ ጦርነት እስከ ተለያዩ ጉዳዮች ድረስ በፓርቲውም ሆነ በሚመራው መንግሥት የሚወጡ መግለጫዎች፣ ወጥነትና ተዓማኒነት እንደሚጎድላቸው በተለያዩ መንገዶች ሲገለጹ ነበር፡፡ መተማመን በሌለበት ደግሞ አገር መምራት አይቻልም፡፡

በአሁኑ ጊዜ የሕዝቡ ሌላው አንገብጋቢ ችግር የኑሮ ውድነት ነው፡፡ ለችግሩ መባባስ ምክንያቱ በዕውቀት ላይ የተመሠረተ ፖሊሲና ስትራቴጂ መንደፍ አለመቻል ነው፡፡ የብልፅግና ርዕዮተ ዓለማዊ መሠረት በግልጽ ምን እንደሆነ ባለመታወቁ፣ ለማኅበራዊና ለኢኮኖሚያዊ ችግሮች ማቃለያ የሚያወጣው ፖሊሲና በእሱ ላይ የሚመሠረተው ዕቅድ ፋይዳ አዋጭ ለመሆኑ ማረጋገጫ የለም፡፡ አብዛኛው ሕዝብ በየዕለቱ በሚያጋጥሙት የዋጋ ጭማሪዎች ሳቢያ ኑሮውን መምራት ተስኖታል፡፡ የአገሪቱ ኢኮኖሚ በምን ዓይነት መለኪያ 6.1 በመቶ እያደገ እንደሆነ አይታወቅም፡፡ አገሪቱም ሆነች ዓለም ያለችበት ነባራዊ ሁኔታ ይህንን የዕድገት መጠን አይደግፍም፡፡ የዚህ ዕድገት ነፀብራቅ ሊሆን የሚገባው የኑሮ መሻሻል ብዙኃኑ ሕዝብ ውስጥ ጨርሶ አይታይም፡፡ የሚታየው እንደ ሰደድ እሳት የሚያስፈራ መከራና የኢኮኖሚ ቀውስ ነው፡፡ የዋጋ ግሽበቱን መንግሥትም ሆነ ሌሎች የንግድ ተዋናዮች መጋራት ሲገባቸው፣ በአሁኑ ጊዜ በቀጥታ እያረፈ ያለው ሕዝቡ ላይ ስለሆነ የኑሮ ውድነት እያንገበገበው ነው፡፡ በዚህ ላይ መንግሥት የራሱን ወጪ የሚሸፍንበት የገንዘብ ፖሊሲ ማስተካከያ ካልተደረገለት፣ መጪው ጊዜ የበለጠ ከባድ ይሆናል፡፡ ብልፅግና ነባራዊ ሁኔታውን የሚመጥን የፖሊሲ ዕርምጃ ይጠበቅበታል፡፡ ካልሆነ ግን ውጤቱ ከሚታሰበው በላይ አደገኛ ነው፡፡

ብልፅግና በጉባዔው ከውስጥ ጉዳዩ ባለፈ አገሪቱ ያለችበትን አደገኛ ሁኔታ ቢያገናዝብ ይበጃል፡፡ ኢትዮጵያ ሰላም አጥታ ወደ ልማት መሰማራት አትችልም፡፡ ፓርቲው ራሱ ውስጣዊ ሰላም አጥቶ ሊመራትም አይችልም፡፡ ለሰላም፣ ለልማት፣ ለዕድገት፣ ለማኅበራዊ ፍትሕና ለእኩልነት ራዕይ የሌላቸው ሰዎች የበዙበት ፓርቲ ራሱን መለወጥ ካልቻለ ውጤቱ አደገኛ ነው፡፡ ከክፋት፣ ከሴራ፣ ከአሻጥር፣ ከዝርፊያ፣ ከራዕይ አልባነትና ከሕገወጥነት ጋር ድርና ማግ የሆኑ የፓርቲ አመራሮችና አባላት ተስፋ ያስቆርጣሉ እንጂ ፋይዳ የላቸውም፡፡ በብልፅግና ውስጥ የሚስተዋሉ አጓጉል ድርጊቶችና የሕግ ጥሰቶች ለአገር ህልውና አደገኛ በመሆናቸው፣ ቁርጠኛ ውሳኔ ላይ ካልተደረሰ ፓርቲውንም ሆነ አገሪቱን ይዘው ይጠፋሉ፡፡ ከቀድሞው ኢሕአዴግ አባልና አጋር ድርጅቶች ማጣሪያ ሳይደረግላቸው በቀጥታ ብልፅግናን ከተቀላቀሉ አባላትና አመራሮች፣ ቀላል የማይባል ቁጥር ያላቸው በፅንፈኛ ብሔርተኝነትና በዘረፋ ተደራጅተው አገር ሲያምሱ ዝም ማለት መዘዙ የከፋ ነው፡፡ በመላ አገሪቱ የነገሠው ሕገወጥነትና ሰላም አልባነት ፈጣን መፍትሔ ይፈልጋል፡፡ የኢትዮጵያ ሕዝብ የእዚህን ጉባዔ ውሳኔዎች የሚከታተለው የአገሩን ዕጣ ፈንታ እያሰበ እንደሆነ ይታወቅ፡፡ የብልፅግና ጉባዔ ፋይዳ የሚለካው በቃሉ ሳይሆን በተግባሩ ነው!    

በብዛት የተነበቡ ፅሁፎች

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

ከውጭ ይገቡ የነበሩ 38 ዓይነት ምርቶች እንዳይገቡ ዕግድ ተጣለ

የኢትዮጵያ ብሔራዊ ባንክ 38 ከውጪ የሚገቡ ምርቶች ላይ ዕገዳ...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

ኢትዮጵያ በ2023 የሚኖራት የውጭ ምንዛሪ ክምችት ለ18 ቀናት ግዢ መፈጸሚያ ብቻ እንደሚሆን አይኤምኤፍ ተነበየ

ኢትዮጵያ በ2023 የሚኖራት የውጭ ምንዛሪ ክምችት ለ0.6 ወር ወይም...
- Advertisment -

ትኩስ ፅሁፎች

የኢትዮጵያ ኦርቶዶክስ ተዋሕዶ ቤተ ክርስቲያንና የመንግሥት ውዝግብ

የጠቅላይ ሚኒስትር ዓብይ አህመድ (ዶ/ር) መንግሥት ባለፉት አራት ዓመታት...

የኢትዮጵያ ካፒታል ገበያ ምሥረታ ዝግጅቶችና ከገበያው የሚጠበቁ ዕድሎች

ኢትዮጵያ ከ50 ዓመት በኋላ ዳግም የምታስጀምረውን የካፒታል ገበያ ዘመኑን...

አዲሱ የብሔራዊ ባንክ ገዥ ትኩረት የሚያደርጉባቸውን ቀዳሚ ጉዳዮች ይፋ አደረጉ

አዲሱ የኢትዮጵያ ብሔራዊ ባንክ ገዥ ትኩረት አድርገው የሚሠሩባቸውን ቀዳሚ...

መንግሥት የደቡብ ሱዳን ታጣቂዎች ድንበር ጥሰው የሚያደርሱትን ጥቃት እንዲያስቆም ተጠየቀ

የሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ...

አዲስ ሲኖዶስ አቋቁመዋል በተባሉና በኦሮሚያ መንግሥት ላይ ክስ ለመመሥረት...
spot_img

ተዛማጅ ፅሁፎች

ኢትዮጵያ ከገባችበት አረንቋ ውስጥ በፍጥነት ትውጣ!

የአገር ህልውና ከሕዝብ ሰላምና ደኅንነት ጋር በእጅጉ የተቆራኘ ነው፡፡ አገር ሰላም ውላ ማደር የምትችለው ደግሞ የሕዝብ ደኅንነት አስተማማኝ ሲሆን ነው፡፡ ሕዝብና መንግሥት በአገር ህልውና...

የፈተናው ውጤት የፖለቲካው ዝቅጠት ማሳያ ነው!

በ12ኛ ክፍል መልቀቂያ ፈተና ከአጠቃላይ ተፈታኞች ውስጥ 3.3 በመቶ ያህሉ ብቻ ማለፋቸው፣ የአገሪቱን የትምህርት ጥራት ደረጃ በሚገባ ያመላከተ መስተዋት እንደሆነ አድርጎ መቀበል ተገቢ ነው፡፡...

የምግብ ችግር አገራዊ ሥጋት ስለደቀነ ፈጣን ዕርምጃ ይወሰድ!

ኢትዮጵያ ውስጥ የሰው ልጆችን አቅም በብርቱ እየፈተኑ ያሉ በርካታ ችግሮች አሉ፡፡ ከችግሮቹ ብዛት የተነሳ አንዱን ከሌላው ለማስቀደም የማይቻልበት ደረጃ ላይ የተደረሰ ቢሆንም፣ የምግብና የሰላም...