Monday, December 5, 2022
ሌሎች ዓምዶች
    - ማስታወቂያ -
    - ማስታወቂያ -

    የኅብረት ሥራ ኮሚሽን ለበጋ ስንዴ ግብይት ሦስት ቢሊዮን ብር ለማቅረብ ማቀዱን አስታወቀ

    - ማስታወቂያ -

    ተዛማጅ ፅሁፎች

    የኢትዮጵያ ኅብረት ሥራ ኮሚሽን የመሰብሰቢያ ጊዜው የደረሰውን የበጋ ስንዴ ምርት በኅብረት ሥራ ማኅበራት በኩል ግብይቱ እንዲፈጸም፣ ለማኅበራቱ ብድር የሚሆን ሦስት ቢሊዮን ብር ለማቅረብ ማቀዱን አስታወቀ፡፡ ኮሚሽኑ የበጋ ስንዴ ግዢ ላይ የማኅበራቱን የፋይናንስ አቅም ይቀርፋል ያለውን ይኼንን ገንዘብ ለማግኘት ከባንኮች ጋር ንግግር እያደረገ መሆኑን ገልጿል፡፡

    ከቅርብ ጊዜ ወዲህ የመንግሥትን ከፍተኛ ትኩረት ያገኘው የበጋ ወቅት መስኖ ስንዴ ልማት፣ ዘንድሮ 404,900 ሄክታር መሬት ተሸፍኖበታል፡፡ በዚህ የመሬት ሽፋን ላይ እየተመረተ ካለው ስንዴ 16 ሚሊዮን ኩንታል ምርት ይገኛል ተብሎ የሚጠበቅ ሲሆን፣ ከዚህ ውስጥ 9.63 ሚሊዮን ኩንታል የሚሆነው የስንዴ ምርት ለገበያ ይቀርባል፡፡

    በመጀመሪያ ዙር የበጋ መስኖ ልማት ተመርቶ ለገበያ ከሚቀርበው የስንዴ ምርት ውስጥ 1.3 ሚሊዮን ኩንታል የሚሆነው በኅብረት ሥራ ማኅበራት በኩል ገበያ ይቀርባል ተብሎ እንደሚጠበቅ የኢትዮጵያ ኅብረት ሥራ ምክትል ኮሚሽነር አቶ አብዲ ሙመድ ተናግረዋል፡፡ አቶ አብዲ በኦሮሚያ፣ አማራ፣ ደቡብና ሲዳማ ክልሎች የሚገኙ 47 የኅብረት ሥራ ዩኒየኖች በዚህ ሥራ ላይ እንደሚሳተፉም ገልጸዋል፡፡

    በኮሚሽኑ የኅብረት ሥራ ግብይት ዳይሬክተር ወ/ሮ ይርጋዓለም እንየው እንደተናገሩት፣ በእነዚህ ማኅበራት በኩል ወደ ገበያ የሚሰበሰበው የስንዴ ምርት እንደ ብሔራዊ አደጋ ሥጋት አመራር ኮሚሽን፣ የኢትዮጵያ ንግድ ሥራዎች ኮርፖሬሽንና የኢንዱስትሪ ግብዓቶች ልማት ድርጅት ላሉ የመንግሥት የልማት ድርጅቶች እንዲሁም ለማቀነባበሪያ ፋብሪካዎች የሚቀርብ ነው፡፡

    ኮሚሽኑ ማኅበራቱ የስንዴ ምርት የማሰባሰብና የመሸጥ ሒደቱ ላይ ያጋጥማቸዋል ብሎ ከለያቸው ችግሮች ውስጥ፣ ቀዳሚው የስንዴ ምርት በሚፈለገው መጠን ከአርሶ አደሩ ለማሰባሰብ የሚያስችል የግብይት ፋይናንስ አቅርቦት እጥረት ነው፡፡

    ኮሚሽኑ ባደረገው ጥናት መሠረት ማኅበራቱ 188.4 ሚሊዮን ብር አቅም ያላቸው ሲሆን፣ ከገንዘብ ቁጠባና ብድር ኀብረት ሥራ ማኅበራት ደግሞ 38.5 ሚሊዮን ብር ማግኘት ይቻላል፡፡ ይሁንና ግብይቱን ለማካሄድ ተጨማሪ 3.3 ቢሊዮን ብር ከሌሎች የፋይናንስ ተቋማት መገኘት እንዳለበት ወ/ሮ ይርጋለም ተናግረዋል፡፡ 

    ኃላፊዋ ለሪፖርተር እንደተናገሩት ይኼንን ያህል ገንዘብ ለማግኘት ከኢትዮጵያ ንግድ ባንክና የኢትዮጵያ ልማት ባንክ ጋር በከፍተኛ ኃላፊዎች ደረጃ ንግግር በመካሄድ ላይ ነው፡፡ በተጨማሪም እንደ አዋሽ፣ ኦሮሚያ ኅብረት ሥራ፣ ዓባይ ካሉ የግል ባንኮችም ገንዘብ ለማግኘት ንግግር ተካሂዷል፡፡ እንደ ዳይሬክተሯ ገለፃ አንዳንዶቹ የግል ባንኮች የተመረጡት የኅብረት ሥራ ማኅበራቱ ሀብታቸውን በባንኮቹ ውስጥ የሚያስቀምጡ በመሆኑ ነው፡፡

    ከፋይናንስ አቅርቦቱ ባሻገር የስንዴ ምርት ማከማቻ መጋዘን ጥበት ችግር ሊገጥም ይችላል የሚል ሥጋት አለ፡፡ ኮሚሽኑ ይኼንን ችግር ለመፍታት ማኅበራቱ ምርቶቻቸውን በፍጥነት እየሸጡ እንዲያቃልሉና በአቅራቢያቸው ያሉ መጋዘኖችን እንዲዋሱ ለማድረግ ማሰቡን አስታውቋል፡፡

    በተጨማሪም ኮሚሽኑ ሕገወጥ የግብይት ተዋናዮች የስንዴን ምርት ከማሳ ጀምሮ በማሰባሰብና የአቅርቦት እጥረት በመፍጠር የምርት ዋጋን ማናር ችግር እንዲሁም የአምራች ኢንዱስትሪና ሌሎች አገራዊ ገዥዎች ቀጥተኛ ትስስር ደረጃ ላይሆን ይችላል የሚል ሥጋቶች አሉት፡፡

    እነዚህን ችግሮች ለመፍታት የሕገወጥ ንግድ ቁጥጥረን ማጠናከር፣ የአምራችና ኢንዱስትሪዎች የቀጥታ ትስስሩን አጠናክሮ ማስቀጠልና ከባለድርሻ አካላት ጋር ያለ ቅንጅታዊ አሠራሮችን በማጠናከር በመፍትሔነት ተቀምጠዋል፡፡

    ኮሚሽኑ በመጀመሪያ ዙር በጋ መስኖ ልማት ተመርቶ የሚቀርበውን የስንዴ ምርት ገበያን ለማሳለጥ በኮሚሽነሯ ወ/ሮ ፍሬዓለም ሽባባው የሚመራ ግበረኃይል ማቋቋሙን አስታውቋል፡፡

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች