Thursday, May 30, 2024
- ማስታወቂያ -
- ማስታወቂያ -

ሲንቄ ባንክ የቦርድ ሊቀመንበሩን በፕሬዚዳንትነት ሰየመ

spot_img

ተዛማጅ ፅሁፎች

በቅርቡ ከማይክሮ ፋይናንስ ተቋምነት ወደ ባንክ የተሸጋገረው ሲንቄ ባንክ የቦርድ ሊቀመንበር ሆነው ሲያገለግሉ የቆዩትን የኬኛ ቢቨሬጅ አክሲዮን ማኅበር ዋና ሥራ አስፈጻሚ በመሆን ሲያገለግሉ የነበሩትን አቶ ንዋይ መገርሳን የባንኩ ፕሬዚዳንት አድርጎ ሾሟል፡፡

የኢትዮጵያ ብሔራዊ ባንክም በሲንቄ ባንክ ቦርድ የቀረበውን የአቶ ንዋይን ሹመት አፅድቆ ለባንኩ አሳውቋል፡፡ ሲንቄ ባንክ ከአንድ ዓመት በፊት ወደ ባንክ ሲያድግ፣ ባንኩን በተጠባባቂ ፕሬዚዳንትነት ሲመሩ የቆዩት አቶ ዘውዴ ተፈራ በባንኩ ቦርድ ውሳኔ መሠረት የቺፍ ኦፕሬቲንግ ኦፊሰር በመሆን እንዲያገለግሉ የመደባቸው መሆኑንም ያገኘነው መረጃ ያመለክታል፡፡

አቶ ዘውዴ የባንኩ የመጀመርያ ፕሬዚዳንት ሆነው እንዲሾሙለት ለብሔራዊ ባንክ ጥያቄ አቅርቦ እንደነበር ምንጮች ገልጸው፣ ብሔራዊ ባንክ ግን የእሳቸውን ሹመት ሳይቀበለው በመቅረቱ ባንኩ አቶ ንዋይን እንዳጨና ሹመታቸውን እንዳፀደቀ ለማወቅ ተችሏል፡፡

አዲሱ የሲንቄ ባንክ ፕሬዚዳንት አቶ ንዋይ፣ በባንክ ኢንዱስሪው ውስጥ ከ15 ዓመታት በላይ ልምድ ያላቸው፣ በተለያዩ የቢዝነስ ተቋማት ውስጥም በኃላፊነት ቦታዎችና በቦርድ አባልነት ያገለገሉና እያገለገሉ ያሉ ናቸው፡፡

የአቶ ንዋይ የሥራ ልምድን ከተመለከተው መረጃ መረዳት እንደተቻለው፣ ከመሯቸው ትልልቅ ኩባንያዎች መካከል የኬኛ ቢቨሬጅ ዋና ሥራ አስፈጻሚ በመሆን ማገልገላቸው ተጠቃሽ ነው፡፡ ከፋይናንስ ዘርፉ ጋር በተያያዘም በባንኮች በተለያዩ የኃላፊነት ቦታዎች ላይ የሠሩት አቶ ንዋይ፣ በተለይ በኦሮሚያ ባንክ ውስጥ በከፍተኛ የሜኔጅመንት አባልነት አገልግለዋል፡፡ በዚህም ከሰባት ዓመታት በላይ በባንኩ ውስጥ ሠርተዋል፡፡ በንብ ባንክም ከሰባት ዓመታት በላይ ማገልገላቸው ተጠቅሷል፡፡

ከዚህም ሌላ አሁን ወደ ባንክ የተሸጋገረውን የኦሮሚያ ብድርና ቁጠባ ተቋም በቦርድ ሊቀመንበርነት ሲያገለግሉም ነበር፡፡ ባንኩ እሳቸውን ለፕሬዚዳንትነት ካጫቸው በኋላ፣ የቦርድ ሊቀመንበርነቱን አዲስ ለተመረጡት አቶ ቶሎሳ ገደፋ አስረክበዋል፡፡

አቶ ንዋይ በሌሎች ሰባት ተቋማት ውስጥ በቦርድ አባልነት ያገለገሉ ሲሆን፣ ከእነዚህም ውስጥ የገዳ ትራንስፖርት አክሲዮን ማኅበር፣ የሸገር ማይክሮ ፋይናንስ ኢንስቲትዩት፣ የኦሮሚያ ኮንስትራክሽን ኮርፖሬሽንና የኦሮ ፍሬሽ ፍሩት ኤንድ ቬጅቴብል ቢዝነስ አክሲዮን ማኅበር ተጠቃሾች ናቸው፡፡

አቶ ንዋይ በቢዝነስ ሊደርሽፕ ከአዲስ አበባ ዩኒቨርሲቲ፣ በዴቨሎፕመንት ኢኮኖሚክስ ከቅድስት ማርያም ዩኒቨርሲቲ፣ በኢኮኖሚክስ ከመቀሌ ዩኒቨርሲቲ፣ የመጀመርያና ሁለተኛ ዲግሪ ያላቸው ሲሆን፣ በአሁኑ ወቅትም በአዲስ አበባ ዩኒቨርሲቲ የሕግ የሦስተኛ ዓመት ተማሪ ናቸው፡፡

ሲንቄ ባንክ ባለፈው ዓመት ግንቦት 2013 ዓ.ም. ወደ ባንክ መሸጋገሩን ይፋ ሲያደርግ፣ በሰባት ቢሊዮን ብር ካፒታል መመሥረቱና ኢንዱስትሪውን የተቀላቀለውም ከ15 ቢሊዮን ብር በላይ ሀብት ይዞ እንደሆነ መገለጹ አይዘነጋም፡፡

ከ24 ዓመታት በላይ በማይክሮ ፋይናንስ ተቋምነት በኦሮሚያ ክልል የብድርና ቁጠባ አገልግሎት ሲሰጥ የቆየ ሲሆን፣ እስካሁን ሲገለገልባቸው የነበሩ 400 ቅርንጫፎቹን ለባንክ አገልግሎት አመቻችቶ ወደ ሥራ የሚያስገባ ስለመሆኑም ታውቋል፡፡  

በቦሌ ማተሚያ ቤት አካባቢም ባለ ሰባት ወለል የዋና መሥሪያ ቤት ሕንፃ በመገንባት ላይ መሆኑን ያገኘነው መረጃ ያስረዳል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች