Tuesday, October 4, 2022
ሌሎች ዓምዶች
    - ማስታወቂያ -
    - ማስታወቂያ -

    የቻይናን ከቀረጥ ነፃ ዕድል ለመጠቀም የተወሰኑ ፓርኮችን በአግሮ ኢንዱስትሪ ለመቀየር ሐሳብ ቀረበ

    - ማስታወቂያ -

    ተዛማጅ ፅሁፎች

    ኢትዮጵያ ከአጎዋ ዕድል ከተሰረዘች በኋላ አማራጭ የገበያ መዳረሻዎችን እያሰሰ የሚገኘው፣ የኢንዱስትሪ ፓርኮች ልማት ኮርፖሬሽን፣ ቻይና የሰጠችውን መሰል ዕድል ለመጠቀም የተወሰኑ ኢንዱስትሪ ፓርኮችን ወደ አግሮ ኢንዱስትሪ ፓርኮች ለመቀየር እንዳሰበ ተገለጸ፡፡

    የአጎዋ ዕድልን ዳግም ለማስመለስ በኮርፖሬሽኑ የሚሠራው ሥራ እንደተጠናከረ የተገለጸ ሲሆን፣ በቅርቡ ቻይና ለኢትዮጵያ የሰጠችውን እንደ አጎዋ ዓይነት የአግሮ ፕሮሰሲንግ ምርቶች ከቀረጥ ነፃ በቻይና ገበያ ውስጥ ገብተው እንዲሸጡ የተሰጠው ዕድል ይገኝበታል፡፡

    የኢንዱስትሪ ፓርኮች ልማት ኮርፖሬሽን የማርኬቲንግና የኮሙዩኒኬሽን ኃላፊ አቶ ሔኖክ አስራት ለሪፖርተር እንዳስታወቁት፣ ትልልቅ የገበያ አማራጭ ያላቸውን አገሮች ብቻም ሳይሆን፣ የአገር ውስጥ የገበያ አማራጮችን መመልከት ትኩረት የተደረገበት ጉዳይ እንደሆነ ተናግረዋል፡፡

    ከዚህ ባሻገር ቻይና የሰጠችውን እንደ አጎዋ ዓይነት ከቀረጥ ነፃ ምርትን የማቅረብ ዕድል፣ በተለይም የተወሰኑ ኢንዱስትሪ ፓርኮችን ወደ አግሮ ኢንዱስትሪ ፓርክ ተቀይረው፣ የግብርና ውጤት ምርቶችን በማምረት በቻይና ገበያ ውስጥ ለመግባት የታቀዱ ሥራዎች እንደሚገኙ ኃላፊው ገልጸዋል፡፡

    አብዛኞቹ በኢትዮጵያ ውስጥ የሚገኙት ኢንዱስትሪ ፓርኮች በጨርቃ ጨርቅና ጋርመንት ላይ ትኩረት አድርገው የሚሠሩ ሲሆኑ፣ ከእነዚህ ውስጥ የተወሰኑትን ኢንዱስትሪ ፓርኮች ወደ አግሮ ኢንዱስትሪ ፓርክ ተቀይረው ወይም ማሻሻያ ተደርጎባቸው በቻይና ገበያ ውስጥ ለመግባትና ሥራዎችን ለመሥራት እናስባለን ብለዋል፡፡ የተጀመሩ ሥራዎችም እንደሚገኙ እንዲሁ አስታውቀዋል፡፡

    በቀጣይ የሌሎች አገሮች ባለሀብቶች ገበያቸውን ይዘው መጥተው ኢትዮጵያ ውስጥ መዋለ ንዋያቸውን እንዲያፈሱ ትልልቅ ሥራዎች እየተሠሩ እንደሆነ ያስረዱት አቶ ሔኖክ፣ ‹‹በዚህም ስኬታማ እንሆናለን የሚል እምነት አለን፤›› ብለዋል፡፡

    ኢንዱስትሪ ፓርኮችን እንዴት አድርገን በደንብ እንጠቀማለን? የሚለውን በተለይ በትኩረት እየሠራንበት እንገኛለን ያሉት ኃላፊው፣ ወደ ፊት ሰፊ የገበያ መዳረሻ ይሆናሉ የሚባሉትን ቻይና፣ ህንድና ባንግላዴሽ ሌሎችም የአውሮፓ፣ የሩቅ ምሥራቅ አገሮችን ተደራሽ ለማድረግ እንቅስቃሴ መጀመሩን ገልጸዋል፡፡

    ለአብነትም በቅርቡ በተባበሩት ዓረብ ኤምሬትስ የተደረገ ኤክስፖ እንደነበረ የገለጹት አቶ ሔኖክ፣ በዚያም ላይ የኢንዱትሪ ፓርክ ልማት ኮርፖሬሽን አመራሮች እንደተሳተፉ ተናግረው፣ ከሰሞኑም በህንድ በተከናወነ በኢትዮጵያ ያለውን ኢንቨስትመንት አማራጭ ለማስተዋወቅ ያለመ ፎረም ላይ ተሳትፎ እንደተደረገ ተናግረዋል፡፡

    በህንድ፣ኢትዮጵያ ኤምባሲ፣ የኢትዮጵያ ኢንቨስትመንት ኮሚሽንና የኢንዱስትሪ ፓርኮች ልማት ኮርፖሬሽን በጋራ ባዘጋጁት የኢንቨስትመንት ፎረም ላይ በፋርማሲዩቲካል፣ በቴክስታይል፣ እንዲሁም በአግሮ ኢንዱስትሪ የኢንቨስትመንት አማራጮች ላይ ከህንድ ባለሀብቶች ጋር ውይይት እንደተካሄደ ተመላክቷል፡፡

    ከሳምንት አስቀድሞ በኢትዮጵያ የቻይና አምባሳደር የሐዋሳ ኢንዱስትሪ ፓርክን የሥራ እንቅስቃሴ መመልከታቸው የሚታወስ ሲሆን፣ ይህም የቻይና ባለሀብቶችን ወደ ኢትዮጵያ በማምጣት በተለያዩ የኢንቨስትመንት አማራጮች እንዲሳተፉ ለማስቻል የሚረዳ እንደሆነ ተገልጾ ነበር፡፡

    - Advertisement -spot_img

    የ ጋዜጠኛው ሌሎች ፅሁፎች