Tuesday, January 31, 2023
- ማስታወቂያ -
- ማስታወቂያ -

ኢትዮጵያ ከአጎዋ ገበያ መሰረዟን ተከትሎ የተጋረጠው አደጋና የመንግሥት ውጥን መፍትሔዎች

- ማስታወቂያ -

ተዛማጅ ፅሁፎች

የኢትዮጵያ መንግሥት ለመጀመርያ ጊዜ በዓለም ገበያ (በዩሮ ቦንድ) አንድ ቢሊዮን ዶላር የዕዳ ሰነድ ለሽያጭ በማቅረብ የሰበሰበውን የውጭ ምንዛሪ ካፒታል እንዲሁም ከዓለም ባንክ ያገኛቸውን ብድሮች በመጠቀም በተለያዩ የአገሪቱ አካባቢዎች ኢንዱስትሪ ፓርኮችን በመገንባት ጥቅም ላይ እንዲውሉ ማድረጉ ይታወቃል። 

ኢንዱስትሪ ፓርኮቹ በአዲስ አበባ፣ አዳማ፣ ሐዋሳ፣ ኮምቦልቻ፣ ባህር ዳር፣ ድሬዳዋ፣ ደብረ ብርሃን፣ ጅማ፣ ሰመራና መቀሌን በመሳሰሉ ከተሞች ተቋቋመው አገልግሎት መስጠት ከጀመሩ ዓመታት ተቆጥረዋል። 

መንግሥት በብድር የተገኘ ከፍተኛ መዋዕለ ንዋይን እነዚህን የኢንዱስትሪ ፓርኮች የገነባበት መሠረታዊ ምክንያት የአገሪቱን የኢኮኖሚ መዋቅር በከፍተኛ ፍጥነት ከግብርና ወደ ኢንደስትሪ ለማሸጋገር መሆኑ ይነገራል። በዚህ የመንግሥት ውጥን መሠረት የኢኮኖሚ መዋቅሩን ወደ ኢንዱስትሪ ማሸጋገር ጊዜ የማይሰጥ አንገብጋቢ ጉዳይ በመሆኑ የአገር ውስጥ ባለሀብቶች ለዚህ ተግባር ብቁ እስኪሆኑ መጠበቅ የታሰበውን ሽግግር በፍጥነት ለማሳካት ጠቃሚ ሆኖ አላኘውም፡፡

በመሆኑም የውጭ ቀጥታ ኢንቨስትመንት በብዛት ወደ ኢትዮጵያ በማስገባት የታቀደውን የኢኮኖሚ የመዋቅር ሽግግር ማሳካት ቀዳሚ ትኩረት ተሰጥቶታል፡፡ የውጭ ባለሀብቶችን በብዛት ወደ ኢትዮጵያ እንዲገቡ ለማድረግ ደግሞ የኢንቨስትመንት ማነቆዎችን መፍታት ዓይነተኛ መፍትሔ እንደሆነ ታምኖበት የኢንዱስትሪ ፓርኮችን በተለያዩ የአገሪቱ አካባቢዎች እንዲቋቋሙ ተደርጓል።

የውጭ ኩባንያዎች ጊዜ ሳያባክኑና በቢሮክራሲ ማነቆዎች ሳይሰናከሉ በቀጥታ ወደ ምርት እንዲገቡ ለማድረግ መንግሥት ከፍተኛ መዋዕለ ንዋዩን ኢንዱስትሪ ፓርኮቹን ለማቋቋም ከማዋሉ በተጨማሪ ለኢንዱስትሪ ዘርፍ አስፈላጊ የሆኑ ኤሌክትሪክ ኃይልን ጨምሮ መሰል አገልግሎቶችን በማሟላት ለአገልግሎት ያበቃቸው የኢንዱስትሪ ፓርኮች እንደ ውጥኑ በርካታ ዓለም አቀፍ ኩባንያዎችን መሳብና በቅጥታ ወደ ምርት እንዲገቡ አስችሏል።

በዚህም ጠቃሚ የውጭ ምንዛሪ ለአገሪቱ ማስገኘት ከማቻሉ ባለፈ ለበርካታ ሺሕ ኢትዮጵያውያን የሥራ ዕድል መፍጠር ተችሏል።

የኢንዱስትሪ ፓርኮቹን ግንባታ እንዲሁም በኢንዱስትሪ ፓርኮቹ የሚገቡ የውጭ ኩባንያዎችን እንዲያከናውን የኢንዱስትሪ ፓርኮች ልማት ኮርፖሬሽን ... 2014  በመንግሥት የተቋቋመ ሲሆን፣ ኮርፖሬሽኑ የአገር ውስጥና የውጭ ባለሀብቶች በዘርፉ እንዲሰማሩ የሚደረገውን ጥረት በበላይነት ከመምራት በተጨማሪ የኢንዱስትሪ ፓርኮቹን የማስተዳደር ኃላፊነትም ተጥሎበታል። 

ግንባታቸው ተጠናቆ ወደ ምርት ተግባር ከተሸጋገሩት የኢንዱስትሪ ፓርኮች መካከል የሐዋሳ ኢንዱስትሪያል ፓርክ በቀዳሚነት ይጠቀሳል። በሐዋሳ ኢንዱስትሪያል ፓርክ የማምረቻ ሼድ ወስደው በሥራ ላይ የሚገኙት ኩባንያዎች በአብዛኛው በጨርቃ ጨርቅ ምርቶች ላይ የተሰማሩ ናቸው። 

በሐዋሳ ኢንዱስሪት ፓርክም ሆነ በሌሎች አካባቢዎች የተቋቋሙ ኢንዱስትሪ ፓርኮች ውስጥ በጨርቃ ጨርቅና ልብስ ስፌት ዘርፍ የተሰማሩት ስመ ጥር የአውሮፓና የኤዥያ ኩባንያዎች ወደ ኢትዮጵያ ለመግባት እንዲወስኑ ካደረጓቸው መሠረታዊ ጉዳዮች አንዱ በኢትዮጵያ አነስተኛ የማምረቻ ወጪ መኖሩና ኢትዮጵያ ከቀረጥና ኮታ ነፃ የአሜሪካን ገበያ እንዲጠቀሙ ከተፈቀደላቸው የአፍሪካ አገሮች አንዷ መሆኗ በዋነኝነት ይጠቀሳሉ።

በመሆኑም በኢትዮጵያ ኢንዱስትሪ ፓርኮች የከተሙት ብዙኃኑ ኩባንያዎች የገበያ መዳረሻቸውን በአገረ አሜሪካ አድርገዋል። ፋብሪካዎች የአገሪቱን የወጪ ንግድ ዕድገት ለማገዝና የቴክኖሎጂ ሽግግር በመፍጠር ረገድ የየራሳቸውን አስተዋጽኦ ሲያበረክቱ ቢቆዩም፣ ኢትዮጵያ ላለፉት ሃያ ዓመታት በአገር ውስጥ የሚመረቱ ምርቶችን ወደ አሜሪካ ገበያ፣ ያለ ታሪፍና ኮታ እንድታስገባ ከአሜሪካ መንግሥት ከተሰጣት  የንግድ  ተጠቃሚነት  ዕድል፣   አፍሪካ  ግሮውዝ  ኤንድ  ኦፖርቹኒቲ  አክት (አጎዋ) ... ከጃንዋሪ 2022 ጀምሮ ተሰርዛለች።

በሰሜን ኢትዮጵያ ከተከሰተው ጦርነት ጋር በተያያዘ ኢትዮጵያ ተጠቃሚ ከሆነችበት የአጎዋ ሥርዓት ውጪ በመሆኗ ሸቀጦችን ወደ አሜሪካ ከቀረጥ ነፃ የመላክ ዕድሏን ማጣቷ በኢንዱስትሪ ፓርኮቿ የከተሙ ድርጅቶች አደጋ ተጋርጦባቸዋል። ከድርጅቶቹ ባለፈም የኢትዮጵያ የኢኮኖሚ ውጥን ሳይሳካ መሰናክል እንዲገጥመውና በእነዚህ ድርጅቶች የተቀጠሩ በበርካታ አሥር ሺዎች የሚቆጠሩ ሠራተኞች ዕጣ ፈንታም አደጋ ውስጥ ወድቋል።

በአጎዋ አማካይነት ወደ አሜሪካ የተለያዩ የአልባሳት ምርቶችን ከሚልኩ ፋብሪካዎች መካከል ብዙኃኑ የሚገኙት በሐዋሳ ኢንዱስትሪ ፓርክ ሲሆን፣ ድርጅቶቹ ከፍተኛ ቁጥር ያላቸውን ሠራተኞች ቀጥረው የሚያሠሩ ናቸው።

ሪፖርተር በጉዳዩ ላይ ያነጋገራቸው የጨርቃ ጨርቅ፣ቆዳናልብስ ስፌት ሠራተኛ ማኅበራት ኢንዱስትሪ ፌዴሬሽን ፕሬዚዳንት የሆኑት አቶ አንገሶም ገብረ ዩሐንስ፣ የአጎዋ ተፅዕኖ በዋነኛነት በጨርቃ ጨርቅ፣ በቆዳውና በጋርመንት ኢንዱስትሪው ላይ በተለይም በሠራተኞች ላይ ተዕኖው የጎላ እንደሆነ ገልጸዋል፡፡ በተለይ በሐዋሳ ኢንዱስትሪ ፓርክ ከአጎዋ የገበያ ዕድል መዘጋት ጋር በተገናኘ የሚፈጠረው ተፅዕኖን ለመገምገምና መፍትሔ ለመተለም የተወሰኑ እንቅስቃሴዎች መደረጋቸውን ተናግረዋል፡፡

ከመስከረም አንስቶ እስከ መጋቢት 2014 ዓ.ም. በኢንዱስትሪ ፓርኩ ውስጥ ማኅበራትን በማደራጀት፣ ባለሀብቶችን በማነጋገር እንደቆዩ የገለጹት አቶ አስገዶም፣ ነገር ግን የአጎዋ የገበያ ዕድል ክልከላ በትክክል ተግባራዊ መሆን ከጀመረበት ወር አንስቶ በኩባንያዎች ላይ የተጋረጠው ሥጋት በጣም እየሰፋየሠራተኛውም የሥራ ዋስትና አደጋ ላይ እየወደቀ መምጣቱን ፕሬዚዳንቱ ጨምረው ገልጸዋል፡፡

ከመጋቢት 10 ቀን 2014 .. ጀምሮ በኢንዱስትሪ ፓርኩ እንደነበሩ ያስታወቁት አቶ አንገሶም፣ በዚህም ሒደት ውስጥ ካረጋገጧቸው ጉዳዮች ውስጥ በኢንዱስትሪ ፓርኩ ውስጥ የሚገኘው የአሜሪካ ድርጅት ፒቪኤች ሙሉ በሙሉ ዘግቶ መውጣቱን ተናግረዋል፡፡ ይህ ድርጀት 1,400 የሚደርሱ ሠራተኞች እንደነበሩት የተገለጸ ሲሆን፣ እነዚህን ሠራተኞች በመሉ አሰናብቶ ዘግቶ እንደወጣ አቶ አንገሶም አስረድተዋል፡፡

ኤፒክ የሚባለው ሌላው ድርጅት 2,100 ያህል ሠራተኞች ያሉት ሲሆን፣  600 የሚደርሱ ሠራተኞችን በየካቲት ወር መጨረሻ መቀነሱን የሚናገሩት ፕሬዝዳንቱበመጋቢት ወርም ተጨማሪ 600 ሠራተኞችን እንደሚቀንስ መረዳታቸውን ተናግረዋል።

ኤፒክ የተባለው ድርጅት ሌላ ተጨማሪ ትዕዛዝ ካላገኘ በስተቀር ከሚቀጥለው ዓመት ጥር አንስቶ በሥሩ የቀሩትን 900 ሠራተኞች ይዞ መቀጠል እንደማይችልም መረዳታቸውንም ገልጸዋል። በአሁኑ ወቅት ድርጅቱ በእጁ ላይ ያለውን የምርት ትዕዛዝ ባሉት 900 ሠራተኞች በዘጠኝ ወራት ማድረስ እንደሚችል ገልጸው፣ ኩባንያው ተጨማሪ ትዕዛዝ ካላገኘ ኩባንያውም ሆነ ሠራተኞቹ መቀጠል እንደማይችሉ የጨርቃ ጨርቅ፣ቆዳናልብስ ስፌት ሠራተኛ ማኅበራት ኢንዱስትሪ ፌዴሬሽን ባደረገው ምልክታ እንደተረጋገጠ ተመላክቷል፡፡

በተጨማሪም ሌላ ሦስተኛ ድርጅት እንዲሁ በሚያዝያ ወር 2014 ዓ.ም. ዘግቶ እንደሚወጣ የተገለጸ ሲሆን፣ አንድ ሌላ ተጨማሪ ድርጅትም እንደዚሁ የተጋረጠውን አደጋ ተቋቋሙ ለመቀጠል ምን ያህል ሠራተኛ መቀነስና ምን ያህሉን ይዞ ማቆየት እንዳለበት ጥናት በማካሄድ ላይ እንደሆነ አቶ አስገዶም ሰሞኑን በተካሄደው የኢትዮጵያ ሠራተኛ ማኅበራት ኮንፌዴሬሽን (ኢሠማኮ) 48 መደበኛ ስብሰባ ላይ ገልጸዋል፡፡

‹‹እንደ ሠራተኛ ማኅበራት ኮንፌዴሬሽን የሚያሳስበን ይህ የአጎዋ ተጠቃሚነት ጉዳይ በአንድም ሆነ በሌላ መልኩ መፍትሔ ካላገኘ፣ በአጠቃላይ 35 ሺሕ የሚደርስ ሠራተኛ ቁጥር ባለው ኢንዱስትሪ ፓርክ አስካሁን 2,000 የሚደርስ ሠራተኛ የተቀነሰ ሲሆን፣ በዚህ ወርም ይህንን ያህል ቁጥር እየቀነሰ በዓይናችን እያየን የሚዘጋበት ደረጃ እንዳይደርስ ነው፤›› ብለዋል፡፡

በፓርኩ ውስጥ በትክክል እየሠሩ ከቆዩት ድርጅቶች ጥቂቶቹ ብቻ የቻይና ድርጅቶች እንደሆኑ የተገለጸ ሲሆን፣ በቻይና ባለሀብቶች ሥር የሚተዳደሩት ድርጅቶች ምርታቸውን ወደ ቻይና አገር ስለሚልኩ የዚህ ሥጋት እንደሌለባቸው ተገልጿል፡፡ ሆኖም ሌሎቹ ድርጅቶች በዓይን እየታዩ የሚዘጉበት ሁኔታ እንደሚፈጠር ሠራተኞች ዕንባ እያፈሰሱ ጭምር እንደሚናገሩ አቶ አንገሶም አስረድተዋል፡፡

የሠራተኛው መቀነስ እንዳለ ሆኖ የኑሮ ውድነቱና የዋጋ ግሽበቱ በተጨባጭ የአማካይ መደበኛ ደመወዛቸው አንድ ሺሕ ብር እንደሆነ በተረጋገጠው የኢንዱስትሪ ፓርክ ሠራተኞች ላይ የሚያሳድረው ተፅዕኖ ትልቅ ሥጋት እንዳሳደረ ተመላክቷል። ኢሠማኮ በዚህ ጉዳይ ላይ የአቋም መግለጫ አውጥቶ ለሚመለተው የመንግሥት አካል ከማሳወቅ ባለፈ የአስቸኳይ መፍትሔ ካላስገኘ በስተቀር እነዚህ ሠራተኞች አደጋ ውስጥ መውደቃቸው አይቀሬ እንደሆነም ተጠቁሟል፡፡

ኮምቦልቻ የኢንዱስትሪ ፓርክ ተመሳሳይ ችግሮች አንደሚስተዋሉ ያስታወቁት አቶ አንገሶም፣ ሆኖም ከሐዋሳ ኢንዱስትሪ ፓርክ ጋር ሲነፃፀር የተሻለ እንደሆነ ተናግረዋል፡፡ በተለይ ኮምቦልቻ በሰሜኑ ጦርነት የደረሰው ጉዳት የፈጠረው ጫና እንደፈተነው የተገለጸ ሲሆን፣ በተለይ በፓርኩ ውስጥ የሚገኝ አንድ ድርጅት ለሁለት ወራት ያህል ለሠራተኞች ደመወዝ ሳይከፍል ቆይቶ መጨረሻ ላይ በተደረጉ ንግግሮች ለመክፈል እንደቻለ፣ ነገር ግን በሥራው ላይ ለመቆየት ዋስትና እንዲሰጠው ጥያቄ ማቅረቡን ገልጸዋል። 

አቶ አንገሶም እንዳስታወቁት በአንድም ይሁን በሌላ መንገድ የኢንዱስትሪ ፓርኮች በአብዛኛው በሚባል ደረጃ ከዚህ ከአጎዋ ጋር የሚያገናኝ ትስስር ስላላቸው፣ ይህ የአጎዋ ችግር መፍትሔ ካላገኘ በሺዎች የሚቆጠሩ ሠራተኞት ህልውና አደጋ ላይ እንደሚወድቅ ኢትዮጵያም ከዘርፉ የምታገኘው የውጭ ምንዛሪ ስለሚያሽቆለቁልፍተኛ ችግር ሊከሠት እንደሚችል ሥጋታቸውን ተናግረዋል፡፡ 

በኢንዱስትሪ ፓርኮቹ ውስጥ በሚገኙት ፋብሪካዎች በየዕለቱ በሚሊዮን ዶላር የሚያወጣ ምርት እንደሚመረትና እነዚህ ምርቶች የውጭ ገበያ ማጣታቸው ለአገሪቱ ጥልቅ አደጋ መሆኑ አይቀሬ ነው ተብሏል፡፡ ይህም ሠራተኛው ከሥራ ገበታው ላይ መነሳቱ ብቻም ሳይሆን ኢትዮጵያ ማግኘት የሚገባትን የውጭ ምንዛሪ ማግኘት አለመቻሏ የሚያሠጋና የሚያሳስብ ነው፡፡

ከኢንቨስትመንት ኮሚሽንም ሆነ ከኢንዱስትሪ ፓርኮች ልማት ኮርፖሬሽንና ከሌሎች ባለድርሻ አካላት ጋር ንግግሮች መደረጉን የተናገሩት አቶ አንገሶም፣ ከሁሉም ጋር በነበረው ንግግር የአጎዋ ጉዳይ ፈጣን መፍትሔ ማግኘት እንዳለበት መግባባት ላይ መደረሱን ተናግረዋል፡፡ 

ኢንዱስትሪ ፓርኮች በመሠረታዊነት ሲቋቋሙ መሠረታዊ እምነታቸው አጎዋ ዕድል እንደነበረ የተነገረ በመሆኑ ይህንን የገበያ ዕድል መልሶ ማግኘት አሊያም አጎዋን የሚተካ ሌላ አማሬጭ መገኘት እንዳለበት መክረዋል፡፡ ይህ ካልሆነ ግን እንደ አገር አደጋ ውስጥ እየተገባ መሆኑ በግልጽ መታወቅ እንዳለበት ተመላክቷል፡፡

የጨርቃ ጨርቅ፣ቆዳናልብስ ስፌት ሠራተኛ ማኅበራት ኢንዱስትሪ ኮንፌዴሬሽኑ ማድረግ ከሚችላቸው ጉዳዮች ውስጥ ተጨባጭ ሁኔታውን፣ የችግሩን መጠን፣ አንገብጋቢነቱን ማሳየት እንደሆነ ያስታወቁት አቶ አንገሶም፣ ‹‹የሠራተኛው የሥራ ዋስትና መታደግ መቻል አለበት፣ መንግሥትም ማግኘት የሚገባውን የውጭ ምንዛሪ ማግኘት ያለበት ሲሆን፣ በአጠቃላይ ሠራተኞቹ ከሥራ ከወጡ በኋላ ምንድነው የሚሆኑት? የሚለውን በጥልቀት ማሰብ ይጠይቃል፤›› ብለዋል፡፡

ሪፖርተር በጉዳዩ ዙሪያ ያነጋገራቸው የኢንዱስትሪ ፓርኮች ልማት ኮርፖሬሽን የማርኬቲንግና የኮሙዩኒኬሽን ኃላፊ አቶ ሔኖክ አሥራት በበኩላቸው፣ ከአጎዋ ጋር ተያይዞ በሐዋሳ ኢንዱስትሪ ፓርክ ሥራውን ያቆመ ብሎም ሠራተኛ የቀነሰ ድርጅት አለመኖሩን ይገልጻሉ።

ፒቪኤች የሚባው ኩባንያ ከኮቪድ-19 ወረርሽኝ ጋር ተያይዞ ከአጎዋ ውሳኔ ቀደም ብሎ መልቀቂያ ማስገባቱን የተናገሩት አቶ ሔኖክ፣ ድርጅቱ በራሱ ምክንያት እንጂ ከአጎዋ ክልከላ ጋር ተያይዞ እንዳልወጣ ከግንዛቤ ሊወሰድ እንደሚገባ ይከራከራሉ፡፡ ሆኖም ፒቪኤች የተባለው ድርጅት ትቶት የወጣውን ማቴሪያል ሙሉ በሙሉ ወደ ሌላ ድርጅት እንዲዘዋወር መወሰኑንና ይህ ድርጅትም በቅርቡ ሥራ እንደሚጀምር አቶ ሔኖክ አክለው ተናግረዋል። 

ኤፒክ የሚባለው ሌላው ኩባንያ የገጠመውን በተመለከተ በሰጡት ማብራሪያ  ኩባንያው ማስፋፊያ ለማካሄድ በነበረው ውጥን መሠረት ለማስፋፊያው የቀጠራቸውን 300 የማይበልጡ ሠራተኞች ከማስፋፊያ ፕሮጀክቱ ለሌላ ጊዜ እንዲተላለፍ በመወሰኑ ሠራተኞቹ መቀነሳቸውን ገልጸዋል። ሆኖም በመደበኛነት የቀጠራቸው 1,500 በላይ ሠራተኞች በሥራ ገበታቸው ላይ እንደሚገኙ ያስታወቁት አቶ ሔኖክ፣ ‹‹ከአጎዋ ጋር ተያይዞ የትኛውም ኢንዱስትሪ ፓርክ ላይ ምንም ዓይነት ሠራተኛ አልተቀነሰም፤›› ብለዋል፡፡

ኢትዮጵያ ከአጎዋ ታግዳለች ማለት ምርቶቿን ወደ አሜሪካ ገበያ አትልክም ማለት እንዳልሆነ የሚገልጹት ኃላፊው፣ አሁን ያሉት ድርጅቶች የሚጠበቀውን ታክስ እየከፈሉ ሥራቸውን በመደበኛ ሁኔታ እየቀጠሉ መሆናቸውን ተናግረዋል፡፡ ሆኖም ለእነዚህ ባለሀብቶች ማበረታቻዎችን ከማቅረብ አኳያ በመንግሥት እየተሠሩ የሚገኙ ጥናቶች እንዳሉ ገልጸዋል፡፡

በፓርኮቹ ውስጥ የሚገኙት ድርጅቶች ታክስ ከፍለው ምርታቸውን ለአሜሪካ ገበያ ማቅረባቸው የሚያዋጣቸው እንደሆነ የተናገሩት አቶ ሔኖክ፣ ‹‹ሐሳቡ በቀላል መንገድ ሲገለጽ የትርፍ ትርፍ ሲያገኙ የነበሩት ድርጅቶች አሁን ትርፍ ያገኛሉ እንደማለት ነው፤›› ብለዋል፡፡

የአጎዋ ዕድልን ዳግም ለማስመለስ በኮርፖሬሽንም ሆነ በሚመለከታቸው የመንግሥት ተቋማት በኩል እየተሠሩ የሚገኙ ሥራዎች እንዳሉ የተነገረ ሲሆን፣ እነዚህ እንቅስቃሴዎች በጎ ተስፋ ይዘው ይመጣሉ የሚል ዕምነት እንዳለ ተነግሯል፡፡

ትልቅ የገበያ አማራጭ ያላቸውን አገሮች ብቻም ሳይሆን የአገር ውስጥ የገበያ አማራጮችን መመልከት ትኩረት የተደረገበት ጉዳይ እንደሆነ የተናገሩት ኃላፊው፣ ሌላው ቻይና የሰጠችውን እንደ አጎዋ ዓይነት ከቀረጥ ነፃ ምርትን የማቅረብ መብት በተለይም የተወሰኑ ኢንዱስትሪ ፓርኮችን ወደ አግሮ ኢንዱስትሪ ፓርክ ተቀይረው በቻይና ገበያ ውስጥ ለማስገባት የተጀመሩ  ሥራዎች መኖራቸውን ተናግረዋል።

ኢንዱትሪ ፓርኮች መገንባት ከጀመሩበት ጊዜ አንስቶ ትልልቅ ወጪዎች እንደወጡባቸው የጠቆሙት አቶ ሔኖክ፣ የወጣውን ወጪ ለመመለስ ሥራዎችን በተገቢው መልኩ መሥራት እንደሚገባ ተናግረዋል። ፓርኮቹ ከተቋቋሙበት ጊዜ አንስቶ ለመጀመርያ ጊዜ በሚያስብል ደረጃ በተያዘው ዓመት አጋማሽ ከኪሳራ ወጥተው 32 ሚሊዮን ብር ማትረፍ መቻላቸውንና በበጀት ዓመቱ መጨረሻ የተሻለ አፈጻጸም እንደሚኖራቸው ተጠቁሟል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች