Friday, December 2, 2022
ሌሎች ዓምዶች
    - Advertisment -
    - Advertisment -

    ጦርነት ልጆቼን ጐድቷቸዋል!

    በሳህሉ ባዬ

    ባለፋት ሦስት ዓመታት በተለያዩ የአገራችን ክፍሎች የሚኖሩ ሕፃናት የኮሮና ወረርሽኝ፣ የግጭትና የጦርነት ሰለባዎች እንደሆኑ ሁሉ በወልዲያ፣ በላሊበላና በሰቆጣ ከተሞች ነዋሪ የሆኑ የህሊና ልጆቼም ለከፋ አካላዊ፣ ማኅበራዊ፣ ሥነልቦናዊ፣ ስሜታዊና አእምሯዊ ችግሮች ተጋልጠው ነበር።

     ከጓደኞቻቸው ጋር የመጫወት መብታቸው ተገፎና ደስታቸው ተዘርፎ ለበርካታ ወራት በቤት ውስጥ ተወስነው ነበር። ለጉልበት ብዝበዛ፣ ለአካላዊና ሥነልቦናዊ ጥቃቶች ተጋልጠው ነበር። የትምህርት እጦት፣ እንክብካቤ ያለማግኘትና የደኅንነት ሥጋት ገጥሟቸው ነበር። አንዳንዶቹ ከመኖሪያ ቀያቸው ተፈናቅለው ነበር። የሐዘንና የጭንቀት ሰለባ ሆነው ነበር። የቅርብ ዘመዶቻቸው ኑሯቸውን መምራት ባለመቻላቸው ወደ ከፋ ድህነት ተገፍተው ነበር። የመከራ ገፈት ቀማሾች በመሆን የመከራውን ጊዜ አሳልፈዋል።

    ከጦርነቱ በኋላ በጦርነት ምክንያት ስለደረሱባቸው በደሎች ልጆቼ ድምፃቸውን እሰምተውኛል። በዙሪያቸው ያለችው ዓለም ወዴት እያመራች እንደሆነ ማወቅ ተስኗቸዋል። ግራ ገብቷቸዋል። ቀጣዩ ዓለም ምን እንደሚሆን እያሰቡ ነው። ያ ክፉ ጊዜ የስቃይ ግግር ሆኖባቸው አልፏል። ችግሮቻቸው ውስብስብ ነበሩ። ያ ክፉ ጊዜ ለልጆች እጅግ አስፈሪና ፈታኝ ጊዜ ነበር። 

    ጦርነት አዳጊ ጭንቅላት ይበላል። ለጭንቀት፣ ለድብርት፣ ለትካዜ ለተወሳሰቡ አእምሯዊ ጤና ችግሮችና ለከፍተኛ ድካም ያጋልጣል። መጠንቀቅ ያለብን ስህተት እንዳንደግም ነው። እንደ መንግሥትና ማኅበረሰብ የመፍትሔ ዕርምጃዎች አሁን መውሰድ ካልጀመርን ሰነባብቶ ተሻጋሪ አስከፊ መዘዝ መከሰቱ አይቀሬ ነው። የሕፃናትን የአእምሮ ጤና ችላ ስንል የመማር፣ የመሥራትና የመገንባት አቅም ይዳከማል። በጊዜ ችግሩን ማከም ያሻል።

    ችግሩን ለማከም ማኅበረሰብ አቀፍ ግንዛቤ መፍጠር ጠቃሚ ነው። ለወላጆች፣ ለአሳዳጊዎችና ለተንከባካቢዎች ስለ ሕፃናት አእምሮ ጤና አጠባበቅ መሠረታዊ ግንዛቤ ማስጨበጫ ትምህርቶች ማዳረስ ወቅቱ የሚፈልገው ጉዳይ ነው። በአሁኑ ወቅት በዓለም ዙሪያ በ116 አገሮች የታለሙ ማኅበረሰብ አቀፍ ዘመቻዎች በመከናወን ላይ ይገኛሉ። እኛስ? መረጃ ያለው ቢያሳውቀን እኛም የሙያ ትብብር ለማድረግ ዝግጁ ነን። 

    በተመሳሳይ ሁኔታ ድርጅታችን የበኩሉን ሙያዊ ተሳትፎ ለማበርከት አቅዶ በመንቀሳቀስ ላይ ይገኛል። ለመተግበር ያቀድናቸው መሠረታዊ ማኅበረሰብ አቀፍ የአእምሮ ጤና እንክብካቤና የጦርነት ሰለባ ሕፃናት የማኅበረ ሥነልቦና ድጋፍ ሥልጠናዎች (Basic Mental Health Training እና Resilience and Psychosocial Support for Children Victims of War) እንዲሳካ ድጋፍ ማድረግ የምትሹ በጐ አሳቢዎች ኑ አብረን እንሥራ።

    ጦርነት ይብቃ – ሰላም ይውረድ!! መልካም፣ መልካሙን ለሕፃናት!!!

    ከአዘጋጁ፡- ጸሐፊው የሕፃናት አስተዳደግ ስፔሻሊስትና ፕሮጀክት ማናጀር ሲሆኑ፣ በትምህርት ዝግጅታቸው፣ ‹‹MA in Chid Development, BA in Psychology, MBA & IDPM in Project Management›› አግኝተዋል፡፡  ጽሑፉ የእሳቸውን አመለካከት ብቻ የሚያንፀባርቅ መሆኑን እየገለጽን፣ በኢሜይል አድራሻቸው [email protected] ማግኘት ይቻላል፡፡

    spot_imgspot_img
    - Advertisment -

    በብዛት የተነበቡ ፅሁፎች

    Related Articles