Friday, December 2, 2022
ሌሎች ዓምዶች
    - ማስታወቂያ -
    - ማስታወቂያ -

    የአፋር ጨው ማምረቻ ድርጅት ፈቃድ እንዳይታደስ የአፋር ክልል መንግሥት ጠየቀ

    - ማስታወቂያ -

    ተዛማጅ ፅሁፎች

    በኢትዮጵያ የማዕድን፣ ነዳጅና ባዮፊውል ኮርፖሬሽን 83 በመቶ ድርሻ የተመሠረተው የአፋር ጨው ማምረቻ አክሲዮን ማኅበር፣ በአፋር ክልል አፍዴራ የተሰጠው የጨው ማምረት ፈቃድ እንዳይታደስ የአፋር ክልላዊ መንግሥት ጠየቀ።

    ጥያቄውን ያቀረቡት የክልሉ ፕሬዚዳንት አቶ አወል አርባ እንደሆኑ የሪፖርተር ምንጮች ገልጸዋል። 

    የክልሉ ፕሬዚዳንት አቶ አወል ጥያቄውን ያቀረቡት ለማዕድን ሚኒስቴር መሆኑን የገለጹት ምንጮች፣ የአፋር ጨው ማምረቻ አክሲዮን ማኅበር ላለፉት ሃያ ዓመታት በአፋር ክልል ጨው ለማምረት ሲጠቀምበት የነበረው የማዕድን ፈቃድ በመጪው ሰኔ 2014 ዓ.ም. እንደሚጠናቀቅ በማመልከት፣ የማዕድን ሚኒስቴር የማኅበሩን ፈቃድ ለተጨማሪ ጊዜ እንዳያድስ መጠየቃቸውን ገልጸዋል።

    ለአክስሲዮን ማኅበሩ የተሰጠው የማዕድን ፈቃድ ጊዜ ሲጠናቀቅ ይዞታው ለክልሉ እንዲመለስ፣ በይዞታው ላይ ጨው የማምረት አዲስ የማዕድን ፈቃድ ለአፋር ልማት ድርጅት እንዲሰጥ ጥያቄያቸውን አቅርበዋል። 

    የፌዴራል መንግሥት የልማት ድርጅት የሆነው የኢትዮጵያ የማዕድን፣ ነዳጅና ባዮፊውል ኮርፖሬሽን በአፋር ጨው ማምረቻ አክሲዮን ማኅበር ላይ 83 በመቶ ድርሻ በመያዝ ወሳኝ ባለድርሻ ሲሆን፣ ቀሪው 17 በመቶ የሕወሓት ኢንዶውመንት የሆነው ኢፈርትና ሌሎች ባለድርሻዎች የተያዘ መሆኑን መረጃዎች ያመለክታሉ። 

    አክሲዮን ማኅበሩ በአፋር ክልል አፍዴራ በ1,000 ሔክታር ላይ የሚገኝ የጨው ክምችትን ለማምረት፣ የዛሬ ሃያ ዓመት የማዕድን ፈቃድ ማግኘቱን ለመረዳት ተችሏል። 

    ይሁን እንጂ የአክሲዮን ማኅበሩ ይዞታ በተለያዩ ምክንያቶች ተሸርሽሮ፣ በአሁኑ ወቅት በ300 ሔክታር ይዞታ ላይ ብቻ ጨው እያመረተ እንደሚገኝ መረጃዎች ያመለክታሉ።

    የአክሲዮን ማኅበሩ ጨው ለማምረት የተሰጠው የሃያ ዓመት ፈቃድ በመጪው ሰኔ ወር 2014 ዓ.ም. እንደሚያበቃ የተገነዘበው የአፋር ክልል መንግሥት የአክሲዮን ማኅበሩ ፈቃድ እንዳይታደስ ያቀረበው ጥያቄ፣ በክልሉ ከሚገኘው ጨው ሀብት የክልሉ ሕዝብና መንግሥት ተጠቃሚነታቸው መረጋገጥ አለበት የሚል ነው። 

    ‹‹በአፋር ጨው አክሲዮን ማኅበር ላለፉት ሃያ ዓመታት የተያዘው የጥሬ ጨው ማምረቻ ቦታ ለክልሉ ልማት፣ በተለይም ለሕዝቡ ምንም ዓይነት ፋይዳ ሳይሰጥ የክልሉ ሕዝብ ያለው አንዱ ሀብት ጨው ሆኖ ሳለ የበይ ተመልካች ሆኖ ቆይቷል፤›› ሲሉ የክልሉ ፕሬዚዳንት አቶ አወል ለማዕድን ሚኒስቴር በጻፉት ደብዳቤ ገልጸዋል።

    ሪፖርተር የተመለከተው ይህ የክልሉ ፕሬዚዳንት ደብዳቤ፣ ‹‹በአሁኑ ወቅት የብልፅግና መንግሥት›› ለክልሎች እየሰጠ ባለው ከፍተኛ ድጋፍ በአፋር ክልል ከእንስሳት እርባታና ግብርና ቀጥሎ በማዕድን ሥራዎች ላይ የክልሉን ወጣት በማደራጀት፣ ወጣቱን የልማቱና የዕድገቱ አካል ለማድረግ ከፍተኛ እንቅስቃሴ ውስጥ መሆኑን ይጠቅሳል።

    ‹‹ስለሆነም በሰኔ ወር 2014 ዓ.ም. የሚያበቃው የአፋር ጨው አክሲዮን ማኅበር ማምረቻ ቦታ ለአፋር ልማት ይወል ዘንድ ለአፋር ልማት ማኅበር እንዲተላለፍ፤›› ሲሉ የክልሉ ፕሬዚዳንት ለማዕድን ሚኒስቴር በጻፉት ደብዳቤ ጠይቀዋል።

    የአክሲዮን ማኅበሩ አመራሮች ሰኞ ሚያዝያ 10 ቀን 2014 ዓ.ም. ከማዕድን ሚኒስቴር ጋር መወያየታቸውን የሪፖርተር ምንጮች ገልጸዋል። 

    ይሁን እንጂ የአክሲዮን ማኅበሩ የሥራ ኃላፊዎች በክልሉ መንግሥት ስለቀረበው ጥያቄ መረጃው ቢኖራቸውም፣ ጉዳዩ ጥንቃቄን የሚሻ እንደሆነ በመግለጽ ማብራሪ ከመስጠት መቆጠብን መምረጣቸውን ሪፖርተር ለመገንዘብ ችሏል።

    ከተደጋጋሚ ጥረት በኋላ የአክሲዮን ማኅበሩ የንግድ መምርያ የሥራ ኃላፊ የሆኑት አቶ ተስፋዬ አበራ ለሪፖርተር በሰጡት ምላሽ፣ ‹‹በእኛ በኩል የፈቃድ ዕድሳት ጥያቄ አቅርበናል፤›› ብለዋል።

    የፈቃድ ዕድሳት ጥያቄ ቀርቦ መሟላት የሚገባቸውን በማሟላት ሒደት ላይ መሆናቸውንም ገልጸዋል። 

    አንድ የማዕድን ሚኒስቴር የሥራ ኃላፊ ለሪፖርተር በሰጡት ምላሽ፣ የክልሉ መንግሥት ጥያቄ ለሚኒስቴሩ መቅረቡን አረጋግጠዋል። የክልሉ መንግሥት ያቀረበውን ጥያቄ የማዕድን ሚኒስቴር ተመልክቶ ወቅቱ ሲደርስ ምላሽ እንደሚሰጥበት ምንጮች ገልጸዋል።

    የፌዴራል መንግሥት በአፋር ጨው ማምረቻ አክሲዮን ማኅበር ላይ ያለውን 83 በመቶ ድርሻ የሚያስተዳድረው የኢትዮጵያ ማዕድን ነዳጅና ባዮፊዩል ኮርፖሬሽን ሲሆን፣ ይህ ኮርፖሬሽን በ16.7 ቢሊዮን ብር የተፈቀደ ካፒታል በ2012 ዓ.ም. በድጋሚ መቋቋሙ ይታወሳል።

    ለኮርፖሬሽኑ ከተፈቀደው ካፒታል ውስጥ 4.17 ቢሊዮን ብሩ በዓይነትና በጥሬ ገንዘብ የተከፈለ መሆኑን ማቋቋሚያ አዋጁ ቢገልጽም፣ የተከፈለ ካፒታሉ ግን እስካሁን ድረስ ተሟልቶ ባለመከፈሉ ኮርፖሬሽኑ ችግር ውስጥ እንደገባ ከወር በፊት መዘገባችን ይታወሳል።

    ከዚህ በተጨማሪ የማዕድን ሚኒስቴር በኮርፖሬሽኑ ሥር የሚገኘውን የቀንጢቻ ታንታለም የማዕድን ምርት ፈቃድና በሥሩ ያለውን የአዶላ ወርቅ ልማት ድርጅት ፈቃድ በዚህ ዓመት በመሰረዝ፣ ይዞታውን በኦሮሚያ ክልል ለተመሠረተው የኦሮሚያ ማይኒንግ አክሲዮን ማኅበር አስተላልፏል።

    በዚህም ምክንያት ኮርፖሬሽኑ ከፍተኛ ፈተና ውስጥ መውደቁን፣ የኮርፖሬሽኑ የኮሙዩኒኬሽን መምርያ ተወካይ አቶ ባጫ ፋጂ ከወር በፊት ለሪፖርተር ተናግረው ነበር። 

    የአፋር ጨው አክሲዮን ማኅበርን ፈቃድ ላይ የቀረበውን ጥያቄ በተመለከተ፣ ከኮርፖሬሽኑ ተጨማሪ መረጃ ለማግኘት የተደረገው ጥረት አልተሳካም።

    spot_img
    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -

    በብዛት ከተነበቡ ፅሁፎች