Sunday, February 5, 2023
- ማስታወቂያ -
- ማስታወቂያ -

በ300 ሚሊዮን ዶላር ሊገነቡ የነበሩ ሁለት ኃይል ማመንጫ ፕሮጀክቶች ስምምነት ሊቋረጥ ነው

- ማስታወቂያ -

ተዛማጅ ፅሁፎች

በአፋርና በሶማሌ ክልሎች በ300 ሚሊዮን ዶላር ሊገነቡ የነበሩት የጋድና የዲቼቶ ኃይል ማመንጫ ፕሮጀክቶች ስምምነት ሊቋረጥ መሆኑን፣ የገንዘብ ሚኒስቴር አስታወቀ፡፡

 እ.ኤ.አ በ2019 ይፋ ከተደረጉ የኃይል ማመንጫ ፕሮጀክቶች መካከል የሆኑት እነዚህ ሁለት ፕሮጀክቶች፣ እያንዳንዳቸው 150 ሚሊዮን ዶላር እንደሚያስፈልጋቸው ተገልጾ ነበር፡፡

በመንግሥትና በግሉ ዘርፍ አጋርነት ለመሥራት የታቀዱት ፕሮጀክቶቹ 250 ሜጋ ዋት ኃይል የማመንጨት አቅም አላቸው፡፡ በኅዳር ወር 2019 ደግሞ ለእነዚህ ፕሮጀክቶች ግንባታ የወጣውን ዓለም አቀፍ ጨረታ ‹‹ኤሲደብሊውኤ (ACWA) ፓወር›› የተሰኘ የሳዑዲ ዓረቢያ ኩባንያ ያሸነፈ ሲሆን፣ ኩባንያው በተሰጠው የስድስት ወራት ጊዜ ውስጥ ስምምነቶችን ከኢትዮጵያ መንግሥት ጋር አድርጎ ወደ ሥራ እንዲገባ የሚጠበቅበት ቢሆንም፣ በተባለው ጊዜ ወደ ሥራ ሳይገባ መቅረቱን  በገንዘብ ሚኒስቴር የመንግሥት የግል አጋርነት ዋና ዳይሬክተር አቶ ጥላሁን ታደሰ ለሪፖርተር ገልጸዋል፡፡

ድርጅቱ ስምምነቶችን በተሰጠው ጊዜ ውስጥ ባለማጠናቀቁ በተደጋጋሚ የጊዜ ማራዘሚያ እንደተሰጠው የገለጹት ዋና ዳይሬክተሩ፣ በተሰጠው የጊዜ ማራዘሚያም  የተጠየቀውን መሥፈርቶች አሟልቶ ወደ ሥራ መግባት አለመቻሉን አክለዋል፡፡

መሥፈርቱን ላለማሟላትም የኮቪድ 19 መከሰትን ተከትሎ አበዳሪ ባንኮች ገንዘብ ሊለቁለት እንዳልቻሉ እንደ ምክንያት ማቅረቡን፣ ከኢትዮጵያ መንግሥትም ተጨማሪ ጊዜ ወስዶ ስምምነቶችን እንዲጨርስ ተፈቅዶለት እንደነበር አቶ ጥላሁን ገልጸዋል፡፡ ነገር ግን በድጋሚ ስምምነቶችን ሳይፈጽም በመቆየት በኢትዮጵያ የተከሰተውን ጦርነት እንደ ምክንያት በማቅረብ፣ ገንዘብ ለማግኘት መቸገሩን ኩባንያው ማሳወቁን ተናግረዋል፡፡ በመጨረሻም የጊዜ ማራዘሚያ ጥያቄውን በመተው ኢትዮጵያ ወደ ነበረችበት ሰላም እስክትመለስና ከአበዳሪ ባንኮች ገንዘብ እስኪገኝ ድረስ ፕሮጀክቶቹ እንዲቋረጡ በደብዳቤ መጠየቁን አስረድተዋል፡፡

የቀረበውን ጥያቄ መሠረት በማድረግም የመንግሥት የግል አጋርነት ቦርድ ውይይት ሲያደርግበት ቆይቶ ተጨምሪ ማራዘሚያ ከመስጠት ይልቅ፣ ከኩባንያው ጋር ያለው ውል እንዲቋረጥ መወሰኑን ተናግረዋል፡፡

ለጋድና ለዲቼቶ ኃይል ማመንጫዎች በወጣው ጨረታ መሠረት ለውድድር ከቀረቡ 12 ድርጅቶች መካከል አሸናፊ የነበረው ‹‹ኤሲደብሊውኤ ፓወር›› የተሰኘው ኩባንያ፣ ለአንድ ኪሎ ዋት በሰዓት 2.5260 ዶላር ለማስከፈል በማቅረቡ እንደነበር ይታወሳል፡፡

ጋድና ዲቼቶ ኃይል ማመንጫዎችን ጨምሮ ለኃይል ምንጭነት ከታቀዱት ስምንት ፕሮጀክቶች መካከል ሌሎች ሁለት ፕሮጀክቶች በጨረታ ሰነድ ዝግጅት ላይ መሆናቸውን የገለጹት አቶ ጥላሁን በመቀሌ፣ በሑመራና በመተማ አካባቢ የነበሩ ፕሮጀክቶች ባለው የፀጥታ ችግር ምክንያት ምንም ዓይነት እንቅስቃሴ እንዳልተደረገባቸው አስረድተዋል፡፡

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች