Thursday, September 29, 2022
ሌሎች ዓምዶች
    - ማስታወቂያ -
    - ማስታወቂያ -

    የራይድ ታክሲ አገልግሎት ታሪፍ በመንግሥት የማይተመን ከሆነ የነዳጅ ድጎማ ተጠቃሚ አይሆኑም

    - ማስታወቂያ -

    ተዛማጅ ፅሁፎች

    ድጎማው ሲነሳ ነዳጅ በሊትር ከ60 ብር ሊያልፍ ይችላል ተብሏል

    በተለምዶ ራይድ ወይም የሳሎን ታክሲ አገልግሎት ሰጪዎች የሚያስከፍሉት ታሪፍ በመንግሥት የማይወሰን ከሆነ የነዳጅ ድጎማ ተጠቃሚ እንደማይሆኑ ተጠቆመ።

    ለሕዝብ ፋይዳ ካላቸው የትራንስፖርት ሰጪዎች በስተቀር፣ ለሁሉም ተሽከርካሪዎች የሚነሳው የነዳጅ ድጎማ ከሁለት ወራት ተኩል በኋላ ተግባራዊ የሚደረግ ሲሆን፣ ከዚያም የነዳጅ ዋጋ በዓለም አቀፍ ገበያው የሚተመን ይሆናል።

    የታለመ የነዳጅ ዋጋ ድጎማ ተግባራዊ የሚደረግ ሲሆን፣ በተመረጡ የትራንስፖርት አገልግሎት ላይ የሚውል፣ በጊዜ የተገደበ ድጋፍ እንደሆነ በንግድና ቀጣናዊ ትስስር ሚኒስቴር ተዘጋጅቶ በሚኒስትሮች ምክር ቤት የፀደቀው የውሳኔ ሐሳብ ያሳያል።

    የአዲሱን አሠራር ሒደት የሚተነትነው የውሳኔ ሐሳብ የማዘጋጀት ሒደቱ ላይ የተሳተፉና ስማቸው እንዳይገለጽ የጠየቁ የሚኒስቴር መሥሪያ ቤቱ የሥራ ኃላፊ ለሪፖርተር እንደገለጹት፣ የነዳጅ ድጎማው በተመረጡ ተሽከርካሪዎች ላይ መተግበር ያስፈለገው የመንግሥት ወጪ ለመቀነስና አነስተኛ ገቢ ያላቸውን ዜጎች ለመርዳት እንደሆነ ተናግረዋል።

    የሥራ ኃላፊው ለሪፖርተር እንደተናገሩት ከመንግሥት ሥምሪት ውጭ የሆኑ ታሪፋቸውም በገበያ የሚመራ ተሽከርካሪዎች የድጎማው አካል የማይሆኑ ሲሆን፣ ይህም ምንም እንኳን መካከለኛ ገቢ ያላቸው ዜጎች ላይ መጠነኛ ጫና ያሳድራል የሚል ፍራቻ ቢጭርም አስፈላጊ ውሳኔ መሆኑን አክለዋል።

    ሪፖርተር ከውሳኔ ሐሳብ መረዳት እንደቻለው ድጎማው ሲነሳ የዓለም ነዳጅ ውጤቶች ገበያ ሁኔታን ያገናዘበ የችርቻሮ መሸጫ ዋጋ ማስተካከያ የሚደረግ ሲሆን፣ ይህም ከአምስት ዓመታት ላልበለጠ ጊዜ ተግባራዊ ይደረጋል።

    በውሳኔው መሠረት በመንግሥት ቁጥጥር ሥር በሚሆን ታሪፍና ሥምሪት ለመሥራት ከተስማሙ የትራንስፖርት ሰጪዎች በተጨማሪ፣ በማኅበር ታቅፈው የሕዝብ ትራንስፖርት አገልግሎቶች የሚሰጡ አሽከርካሪዎች ተጠቃሚ ይሆናሉ።

    የሕዝብ ትራንስፖርት አገልግሎት የሚሰጡ ባለሦስት እግር ተሽከርካሪዎች፣ ኮድ 1 እና 3 ሚኒባሶች፣ የከተማ አውቶብሶች፣ አገር አቋራጭ የሕዝብ ማመላለሻ ተሽከርካሪዎችና የመጫን አቅማቸው እስከ 47 የሆኑ የሕዝብ ትራንስፖርት ሰጪዎች የድጎማው ተጠቃሚ ይሆናሉ።

    የሳሎን ታክሲ አገልግሎት ሰጪዎች መካከል የሆነው የዛይ ራይድ መሥራችና ዋና ሥራ አስኪያጅ የሆኑት አቶ ሀብታሙ ታደሰ፣ ድጎማው መሰል አገልግሎት ሰጪዎችን ባለማካተቱ ቅር እንደተሰኙ የተናገሩ ሲሆን፣ የትራንስፖርት እጥረትን ሊያባብስ እንደሚችል አስጠንቅቀዋል።

    አቶ ሀብታሙ እንደተናገሩት የትራንስፖርት እጥረት ሳይቀረፍ የራይድ ታክሲ አገልግሎት ከድጎማው ተጠቃሚ እንዳይሆን ማድረግ ያለውን ችግር ከማባባስ ባሻገር በዚህ አገልግሎት ሰጪዎች የሚሰበሰበውን የታክስ መጠን ሊቀንሰው እንደሚችልና የዘርፉን ዕድገት ሊያቀጭጨው እንደሚችል ሥጋታቸውን ለሪፖርተር አጋርተዋል።

    ባለፉት አምስት ዓመታት ከ40 በላይ የሳሎን ታክሲ አገልግሎት ሰጪዎች ገበያውን የተቀላቀሉ ሲሆን፣ ከ30 ሺሕ በላይ ተሽከርካሪዎች በሥራቸው አቅፈዋል ተብሎ ይገመታል። በአሁን ወቅት በአማካይ አሥር ብር በኪሎ ሜትር ያስከፍላሉ።

    ድጎማው ሲነሳ አንድ ሊትር ነዳጅ አሁን ባለው ዓለም አቀፍ የነዳጅ ዋጋ መሠረት ከ60 ብር በላይ የሚደርስበት ዕድል ሰፊ በመሆኑ የታሪፍ ማስተካከያ ማድረጋቸው የማይቀር መሆኑን የሚያነሱት አቶ ሀብታሙ ይህም ወደ ሌሎች ዘርፍ ሊዛመት ስለሚችል ዋጋ ግሽበትን ሊያባብስ ይችላል ብለዋል።

    በተመሳሳይ የራይድ ታክሲ ባለቤት የሆኑት አቶ ተመስገን አራጌ የተባሉ ግለሰብ በበኩላቸው መንግሥት ድጎማውን ካነሳ በዘርፉ የተሰማሩ አሽከርካሪዎች ከገበያ ሊወጡ የሚችሉበት ዕድል ሰፊ መሆኑን የተናገሩ ሲሆን፣ መንግሥት ውሳኔውን በድጋሚ ሊያጤነው እንደሚገባ ተናግረዋል።

    - Advertisement -spot_img

    የ ጋዜጠኛው ሌሎች ፅሁፎች