Wednesday, May 29, 2024
- ማስታወቂያ -
- ማስታወቂያ -

ዳሸን ባንክ  ‹‹ዱቤ ፔይ›› የተሰኘ አዲስ የብድር አገልግሎት ይፋ አደረገ

spot_img

ተዛማጅ ፅሁፎች

በኢትዮጵያ የባንክ ኢንዱስትሪ ውስጥ አዳዲስ አገልግሎቶች እየቀረቡ ነው፡፡ በተለይ ከቴክኖሎጂ ጋር በማስተሳሰር የሚሰጡ አገልግሎቶች ከሌላው ጊዜ በተሻለ ለገበያ እየቀረቡ፣ ደንበኞችም እየተገለገሉባቸው ይገኛሉ፡፡

ዘመናዊ የባንክ አገልግሎትን ከማስፋት አንፃር በሥራ ላይ እየዋሉ ካሉ የካርድና መሰል ኤሌክትሮኒክስ አገልግሎቶች ባሻገር አብዛኛውን የኅብተሰብ ክፍል ለመድረስ ባንኮች ቴክኖሎጂን በመጠቀም የብድር አገልግሎት ለማቅረብ የሚያስችሉ አሠራሮችን ለማቅረብ ዝግጅት እያደረጉ ሲሆን፣ አንዳንዶቹም እነዚህን ቴክኖሎጂዎች እያቀረቡ ነው፡፡ 

ከእነዚህ ባንኮች አንዱ የሆነው ዳሸን ባንክ ቴክኖሎጂን መሠረት በማድረግ በተለምዶ ይሰጥ የነበረውን የዱቤ አገልግሎት በቴክኖሎጂ በማዘመን ወደ ሥራ ለመግባት ዝግጅቱን ማጠናቀቁን በይፋ አስታውቋል፡፡

‹‹ዱቤ ፔይ›› የሚል መጠሪያ የተሰጠው ይህ አዲስ አገልግሎት ‹‹ኤግል ላይን ሲስተም ቴክኖሎጂ›› ከተባለ አገር በቀል ኩባንያ ጋር በመተባበር የሚቀርብ ነው፡፡ ዳሸን ባንክና ኤግል ላይን ሲስተም ይህንን አገልግሎት በጋራ ለመሥራት የሚያስችላቸውን ስምምነት ባለፈው ሳምንት በሸራተን ሆቴል በተፈራረሙበት ወቅት እንደተገለጸውም፣ አዲሱ አገልግሎት በባንክ ኢንዱስትሪ ውስጥ ብቻ ሳይሆን፣ በአጠቃላይ በግብይት ሥርዓቱ ውስጥ ዓይነተኛ ለውጥ ያመጣል ተብሎ ታምኖበታል፡፡ 

ማንኛውም የባንኩ ደንበኛ ‹‹ዱቤ ፔይ›› የተሰኘውን ዘመናዊ አገልግሎት በመጠቀም ከሦስት ወር እስከ ሁለት ዓመታት በሚደርስ ጊዜ ተከፍሎ የሚያልቅ ብድር በመውሰድ አቅሙ የሚፈቅደውን ማንኛውንም ግዥ መፈጸም የሚያስችለው እንደሆነ ተገልጿል፡፡ በተለይም ደመወዝተኞች በደመወዛቸው ልክ የሚፈልጉትን ዕቃ በዱቤ መግዛት እንደሚያስችላቸው ተጠቁሟል፡፡ 

አንድ ደንበኛ በወቅቱ ገንዘብ ባይኖረው ‹‹የዱቤ ፔይ›› አባል በመሆን ብቻ የሚፈልገውን ዕቃ ባንኩ በሚያመቻችለት ብድር በዱቤ ገዝቶ እስከ ሁለት ዓመታት ድረስ ዕዳውን መክፈል የሚችልበት አማራጭ አገልግሎት እንደሆነ የዳሸን ባንክ ቺፍ ዲጂታል ባንኪንግ ኦፊሰር አቶ ዮሐንስ ሚሊዮን ገልጸዋል፡፡ እንደ አቶ ዮሐንስ ገለጻ አገልግሎቱ ምንም ዓይነት ወለድ የማይከፈልበት በመሆኑ፣ ከሌሎች የባንክ ብድር አገልግሎቶች ልዩ ያደርገዋል። 

‹‹ዱቤ ፔይ›› በሚል መተግበሪያ የዱቤ አገልግሎት ለመስጠት የሚያስችለው ይህ አሠራር በተለምዶ ሲሠራበት የነበረውን የዱቤ ግብይት ማዘመን ከማስቻሉም በላይ፣ ዕቁብ በመጣልና በመቆጠብ አንድ ዕቃ ለመግዛት ይፈጅ የነበረውን ጊዜ የሚያሳጥር ጭምር መሆኑን፣ አገልግሎቱን በተመለከተ ከተሰጠው ማብራሪያ ለመረዳት ተችሏል፡፡

ቴክኖሎጂውን ያበለፀገው የኤግል ላይን  ሲስተም ቴክኖሎጂ ዋና ሥራ አስኪያጅ አቶ እሱፍቃድ ጌታቸው እንደገለጹትም፣ በኢትዮጵያ ይህንን የዱቤ ግብይት ለመተግበር አንዱ መነሻ ምክንያት ዜጎች ዕቁብ እስኪደርሳቸው ሳይጠብቁ በፈለጉት ጊዜ የሚፈልጉትን ዕቃ እንዲገዙ ማድረግ ነው። ይህንንም ታሳቢ በማድረግ ለኢትዮጵያ ተስማሚ በሆነ መንገድ ሲስተሙ እንዲዘጋጅ መደረጉን ተናግረዋል።

አምራቾች ምርቶቻቸውን ከሸማች ጋር በቀላሉ ለማገናኘትም ቢሆን ‹‹ዱቤ ፔይ›› ሁኔታዎችን የሚያመቻች መሆኑን የተናገሩት አቶ እሱፍቃድ፣ በሻጭና በገዥ መካከል ሕጋዊ ውል ኖሮ ግብይቱ እንዲፈጸም የሚያስችል መሆኑንም ገልጸዋል፡፡ ከዚህ ቀደም ከዱቤ ግብይት ጋር በተያያዘ የሚታየውን አለመተማመን በማስቀረትና ሕጋዊ ሥርዓት እንዲኖር የሚያስችል ዘመናዊ አሠራር እንደሚፈጥርም አመልክተዋል።

አገልግሎቱ ሁሉንም ወገን እንደሚጠቅም የተናገሩት አቶ ዮሐንስ፣ ባንኩ በሻጭና ገዥ መካከል በመሆን ግብይቱ እንዲፈጸም ከማድረግ ባለፈ ለነጋዴው መቶ በመቶ ማረጋገጫ የሚሰጠው እንደሚሆን ገልጸዋል፡፡  

ከዚህ ቀደም በነጋዴዎችና በሸማቾች መካከል ሕጋዊ መተማመኛ የሚሰጥ የዱቤ ግብይት ሥርዓት ባለመኖሩ ‹‹ዱቤ ፔይ›› ይህንን ጉድለት በመሙላት አስተማማኝ የዱቤ ግብይት እንደሚፈጥርና ማንኛውም ግብይት የሚከናወንበት እንደሚሆን ተገልጿል።   

የቤት ዕቃዎች፣ የኤሌክትሮኒክስ ዕቃዎች፣ የአየር መንገድ ቲኬቶች፣ በዚህ የግብይት ሥርዓት ውስጥ የተካተቱ ናቸው፡፡ እንደ የቴሌኮሙዩኒኬሽን፣ የሆስፒታል፣ የትምህርት ቤት ክፍያዎችም በዱቤ ፔይ በሚሰጥ ብድር ክፍያ መፈጸም እንደሚቻልም የአገልግሎቱ አቅራቢዎች ገልጸዋል፡፡ የማንኛውም አምራች ኩባንያዎች ምርቶቻቸውንና አገልግሎቶቻቸውን በማስመዝገብና አባል በመሆን ደንበኞቻቸው የዱቤ አገልግሎት ተጠቃሚ እንዲሆኑ ማድረግ የሚችሉበት ዕድል እንዲሚፈጠር ታውቋል፡፡ እንደ ኩባንያዎቹ የሥራ ኃላፊዎች ገለጻ፣ በዱቤ ዕቃ ለመግዛት የሚፈልጉ የባንኩ ደንበኞች የ‹‹ዱቤ ፔይ›› አባል መሆን እንደሚጠበቅባቸው ሁሉ ማንኛውም አምራች ኩባንያና አገልግሎት ሰጪ ተቋማትም አባል በመሆን ምርትና አገልግሎታቸውን በማስመዝገብ አገልግሎቱን መስጠት ይችላሉ ተብሏል፡፡   

አገልግሎት አሰጣጡን በተመለከተ ከተሰጠው ማብራሪያ መገንዘብ እንደተቻለው ማንኛውም በደመወዝ የሚተዳደር የወር ገቢ ያላቸው በሙሉ የ‹‹ዱቤ ፔይ›› መተግበሪያን ተጠቅመው አባል በመሆን በረዥም ጊዜ ክፍያ ወይም በተከፋፈለ የክፍያ ጊዜ ማንኛውንም ዕቃና አገልግሎት መግዛት የሚያስችላቸው ይሆናል፡፡ በቴክኖሎጂ የተደገፈው ይህ አገልግሎት በኢትዮጵያ የመጀመርያ ቢሆንም፣ በሌሎች አገሮች የተለመደ የክፍያ መተግበሪያ መሆኑን የገለጹት አቶ እሱፍቃድ፣ ከጫማ ጀምሮ እስከ መኪና ድረስ በብድር ዕቃና አገልግሎት የሚገዙበትና ከደመወዛቸው በተቀመጠው ጊዜ ክፍያ እንዲፈጽሙ በማድረግ ተጠቃሚ መሆን የቻሉበት እንደሆነ አስረድተዋል፡፡ በተለይም እንደ ኢትዮጵያ ላሉ አገሮች አገልግሎቱ ጠቃሚ እንደሆነ የሚገልጹት አቶ እሱፍቃድ፣ ከወቅታዊ ሁኔታ አንፃር በካሽ ለመክፈል የሚታየውን የሸማቾች ችግር በመቅረፍ አብዛኛውን የኅብረተሰብ ክፍል የሚጠቅም አገልግሎት ይሆናል ብለው ያምናሉ፡፡    

አገልግሎቱ ለነጋዴዎችም ቢሆን አስተማማኝ ገበያ የሚፈጥር ነው ያሉት አቶ ዮሐንስ ደግሞ፣ በባንኩ በኩል የሚመጡ የብድር ጥያቄዎችን በማስተናገድ ለሻጭ ኩባንያዎች ወዲያው ክፍያ እንዲፈጸም ማስቻሉ አንደኛው ጠቀሜታ ነው፡፡ ከዚህም ሌላ የግብይት መጠናቸው እንዲጨምር የሚያግዝ በመሆኑ ትርፋማነታቸውንም በዚሁ ልክ ከፍ የማድረግ ዕድል የሚሰጥ እንደሆነ ተናግረዋል።

እንደ አገር ከታየም ማክሮ ኢኮኖሚውን ይደግፋል የሚል እምነታቸውን ያንፀባረቁት አቶ በእርሱ ፈቃድ ደግሞ፣ አገልግሎቱ ዘመናዊ የግብይት ሥርዓትን በማስረፅ ሕጋዊ ግብይትን የሚያሰፍን በመሆኑ የጎላ ጠቀሜታ እንደሚኖረው አስረድተዋል፡፡  

የዱቤ ፔይ ተጠቃሚ ለመሆን በዳሸን ባንክ ዱቤ የሚባለውን ሒሳብ መክፈትና ‹‹ዱቤ ፔይ›› የተሰኘውን መተግበሪያ ከአንድሮይድ ወይም ከአፕል ስቶር አውርዶ በመመዝገብ አባል መሆንን ይጠይቃል፡፡ እነዚህ በመጀመርያ መሟላት ያለባቸው መሥፈርቶች ከተጠናቀቁ በኋላ የመንግሥትና የግል ተቋማት ሠራተኞች ከሆኑ ደመወዛቸውን የሚገልጽ ደብዳቤ ለባንኩ ማቅረብ ይኖርባቸዋል፡፡ 

መተግበሪያው በተለያዩ አምስት ቋንቋዎች የተዘጋጀ በመሆኑ ደንበኞች በቀላሉ እንዲጠቀሙ የሚያስችል መሆኑም ተገልጿል፡፡  

ከዚህ አገልግሎት አሰጣጥ ጋር በተያያዘ ግን አገልግሎቱ በአብዛኛው ከወለድ ነፃ ሆኖ የሚሠራበት እንደሆነ መግለጹ ብዥታ የሚፈጥር ቢሆንም፣ የዳሸን ባንክና የኤግል ላይን የሥራ ኃላፊዎች አገልግሎቱ በአመዛኙ ከወለድ ነፃ ስለመሆኑ እርግጠኞች ነን ይላሉ፡፡ 

 አንድ በዱቤ ፔይ ዕቃ መግዛት የሚፈልግ ተገልጋይ በዱቤ ዕቃ ለመግዛት የሚሰጠው ብድር ለጊዜው ምንም ዓይነት ወለድ የማይከፈልበት መሆኑን የገለጹት አቶ እሱፍቃድ፣ ‹‹ዱቤ ፔይ››ን ልዩ የሚያደርገውም ይኼው ከወለድ ነፃ በሆነ መንገድ የዱቤ ግብይቱ እንዲፈጸም ማስቻሉ እንደሆነ ተናግረዋል፡፡ ነገር ግን ወደፊት እየታየ ወለድ የሚያስከፍሉ ግብይቶች ሊኖሩ እንደሚችሉ አልሸሸጉም፡፡ ይህን አባባላቸውን ለማጠናከርም አንድ ደንበኛ አሥር ሺሕ ብር የሚያወጣ ዕቃ በዱቤ ቢገዛ ግዥ የፈጸመበትን ገንዘብ መጠን በአሥር ወራት እንዲከፍል ቢደረግ በየወሩ የሚከፍለው አንዲ ሺሕ ብር ብቻ ነው በማለት ወለድ የማይታሰብበት አገልግሎት እንደሆነ አስረድተዋል፡፡  

ለዱቤ አገልግሎቱ የሚወሰድ ብድር ግን በኢትዮጵያ ሕግ መሠረት እንደ ደመወዝ መጠኑ ተሠልቶ የሚፈቀደውን ያህል የሚቆረጥ መሆኑን አስረድተዋል፡፡ ‹‹ዱቤ ፔይ›› ለደመወዝተኞች ብቻ የሚያገለግል ሳይሆን ማንኛውም ደንበኛ ባንኩ የሚጠይቀውን የብድር ማስያዣ ንብረት በማቅረብ ማንኛውንም ዓይነት ግብይት በዱቤ መፈጸም የሚያስችል እንደሆነም ታውቋል፡፡ 

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች