[ክቡር ሚኒስትሩ ከምግብ ዘይት ዋጋ መናር ጋር በተገናኘ ከአገር ውስጥ አምራቾች ጋር ውይይት እያደረጉ ነው] 

• እንደምታውቁት በምግብ ዘይት ላይ ያልተገባ የዋጋ ንረት ሰሞኑን በገበያው ተስተውሏል።
• ልክ ነው ክቡር ሚኒስትር፡፡
• ልክ አይደለም። 
• እ…
• አዎ፣ የጠራናችሁ በዘይት ላይ የታየው የዋጋ ንረት ልክ ስላልሆነ ነው፣ ተገቢ አይደለም። 
• ክቡር ሚኒስትር ምን መሰለዎት…
• ቆይ ልጨርስ፣ በመጀመሪያ የዋጋ ንረቱ ትክልል አለመሆኑን ማመን አለባችሁ። 
• እንዴት ክቡር ሚኒስትር? 
• እንዴት ጭራሽ? 
• እንዴት አልኩኝ እንዴ ክቡር ሚኒስትር? 
• ለዚያውም ቁጣ የተቀላቀለበት ነዋ፡፡ 
• ለማለት የፈለግኩት ግን ‹‹እንዴት?›› ለማለት አልነበረም ክቡር ሚኒስትር። 
• ታዲያ ምን ለማለት ፈልገህ ነበር?
• እንዴት በዘይት ዋጋ ንረት ላይ አንወያይም? መወያየት አለብን ለማለት ነበር፡፡ 
• ማን አንወያይም አለ? 
• እ… የተባለ መስሎኝ ነው ክበር ሚኒስትር፣ ይቅርታ ይደረግልኝ። 
• ለማንኛውም ዓመት በዓሉ ይለፍ ብለን ነው ውይይቱን ያዘገየነው፣ ዛሬ ግን የግድ መወያየት አለብን። 
• ትክክል ነው ክቡር ሚኒስትር መወያየት አለብን፣ እንዲያውም ዘግይቷል። 
• ጥሩ፣ አብዛኞቻችሁ የምግብ ዘይት ለማምረት ፈቃድ ስትጠይቁን ያቀረባችሁት ፕሮፖዛል ላይ የአገር ውስጥ የዘይት ምርት ፍላጎትን ለማሟላትና ዋጋን ለማረጋጋት ነበር። 
• ልክ ነው፣ አሁንም ዕቅዳችን ያው ነው ክቡር ሚኒስትር።
• ያው አይደለም፣ ከወራት በፊት ሦስት መቶና አራት መቶ ብር ይሸጥ የነበረውን ዘይት በአንድ ጊዜ አንድ ሺሕ ብር አስገብታችሁታል።
• ክቡር ሚኒስትር ችግሩ የተፈጠረው…
• የተፈጠረ ችግር የለም፣ አብዛኞቻችሁ ፈቃድ ስትወስዱ የገባችሁትን ቃል አትዘንጉ። ለምሳሌ አንተ እዚያ ጋር ያለኸው…?
• አቤት… እኔን ነው?
• አንተም ያው ነህ፣ ግን ቅድም ልናገር ልናገር ስትል የነበርከው… እዚያ ጋ…
• እኔን ነው ክቡር ሚኒስትር?
• አዎ አንተ። 
• አቤት ክቡር ሚኒስትር?
• ለምሳሌ አንተ በቅርቡ ነው ወደ ምርት የገባኸው፣ አይደለም?
• ትክክል ነው ክቡር ሚኒስትር፡፡
• ወደ እዚህ ሥራ ስትገባ ከመንግሥት የጠየቅከው ድጋፍ ብዙ እንደነበረ አስታውሳለሁ። 
• እውነት ነው ክቡር ሚኒስትር።
• ለምሳሌ መሬት በአነስተኛ የሊዝ ዋጋ ሊፈቀድልኝ ይገባል ብለህ ተፈቅዶልሃል። 
• እውነት ነው።
• የኤሌክትሪክ ኃይል በአካባቢው የለም ብለህ ከረዥም ርቀት ተስቦ እንድታገኝ ተደርጓል አይደለም?
• እውነት ነው ክቡር ሚኒስትር፡፡
• የውጭ ምንዛሪ ወረፋ መጠበቅ የለብኝም ብለህ ቅድሚያ እንድታገኝ ተደርጓል፣ አይደለም?
• ልክ ነው፡፡
• የካፒታል ብድርም እንድታገኝ ተደርጓል፣ አይደለም?
• እውነት ነው፡፡
• ታዲያ አንተ በምን ምክንያት ነው ዘይት በአንድ ጊዜ አንድ ሺሕ ብር ለመሸጥ የወሰንከው?
• ክቡር ሚኒስትር…
• ክቡር ሚኒስትር ማለቱን ተውና የወሰንክበትን ምክንያት አስረዳኝ፡፡
• እ… በውሳኔ አይደለም ክቡር ሚኒስትር፡፡
• እና ምን ሆነህ ነው?
• ባርቆብኝ ነው፡፡
• ምን?
• ክቡር ሚኒስትር በስህተት… ባረቀብኝ፡፡
• መጀመሪያ ካልተቀባበለ እንዴት ይባርቃል?
• እሱማ ተቀባብሎ ነበር። 
• ተቀባብሎ ነበር? እንዴት?
• ክቡር ሚኒስትር ምን ማድረግ እችላለሁ? 
• እንዴት?
• ሁሉም ተቀባብሎ ነው ያለው፣ እኔ ብቻዬን ጉዳት ከሚደርስብኝ ብዬ ባቀባብል ድንገት ባረቀብኝ።
• እህ… እንደዚያ ነው?
• እንደዚያ ነው ክቡር ሚኒስትር። 
• አንተ ያን ሁሉ ድጋፍ ከመንግሥት አግኝተህ ከባረቀብህ ሌሎቹማ አነጣጥረዋል ማለት ነው። 
• እሱን መንግሥት ቢያጣራው ይሻላል… መፍትሔው ግን…
• እሺ… መፍትሔው ምን?
• የተቀባበለ ነገር ሁሉ ወደ ቦታው መመለስ አለበት!

[ክቡር ሚኒስትር ወደ መኖሪያ ቤታቸው ሲገቡ ባለቤታቸው በቴሌቪዥኑ መስኮት ላይ ትኩረታቸው ተስቦ አላስተዋሏቸውም ነበር]

• ኧረ እንዴት አመሻችሁ እያልኩ ነው?
• ውይ… ውይ… በሞትኩት፣ ደህና አመሸህ?
• ምንድነው እንደዚህ ትኩረትሽን የሳበው ነገር?
• አንተው ነሃ… ሌላ ምን ይሆናል ብለህ ነው?
• ኦ… በኑሮ ውድነት ላይ ያደረግኩት ንግግር እየተላለፈ ነው እንዴ? 
• እህ… ግርም ብሎኝ እየተከታተልኩ ነበር።
• ምንድነው ያስገረመሽ?
• እርግጠኝነትህ ነዋ? መቼም ደፋር ነህ፡፡
• እንዴት? ምንድነው እሱ?
• ዘንድሮ የበጋ ስንዴ ባናመርት ኖሮ በግብፅ የሆነው እዚህም መደገሙ አይቀርም ነበር እንዴት ይባላል?
• እንዴት አይባልም? ምን ችግር አለው? 
• እንዴት ይባላል?
• በእኔ ዕይታ እንደዚያ ማለቴ ችግር የለውም። 
• በአንተ ዕይታማ ችግር ስለሌለው ነው እንደዚያ ያልከው፣ እኔን የገረመኝ ለማስተላለፍ የፈለግከው መልዕክት ነው።
• እኔ ምንም መልዕክት ማስተላለፍ ፈልጌ አይደለም እንደዚያ ያልኩት። 
• እና ምን ማስተላለፍ ፈልገህ ነው? ሕዝቡ እንደ ግብፅ ሕዝብ ባለማድረጉ ማመስገን ፈልገህ ነው? ወይስ እንደ ግብፅ ስንዴ አጣሁ፣ የምበላው አጣሁ ብሎ አደባባይ ስላልወጣ እያሾፍከበት ነው። 
• ምንድነው የምታወሪው? እንዴት እንደዚያ ዓይነት መልዕክት አስተላልፋለሁ?
• የበጋ ስንዴ ባይደርስ በግብፅ የሆነው እዚህም መምጣቱ አይቀርም ነበር ማለት ለምን አስፈለገ፣ የስንዴ ችግር ሙሉ በሙሉ ተቀርፎ ነው?
• አልተቀረፈም፣ ግን የበጋ ስንዴ መድረሱ ችግሩን አቅሎታል። 
• እሺ ክረምቱን የበጋ ስንዴ ከየት ልታመጡ ነው? ክረምቱ እንደሆነ ይኸው እየገባ ነው። 
• ከተናገርኩት በኋላ ቆይቼ ሳስበው ነው ክረምት መምጣቱን ያስታወስኩት። 
• አየህ እንዲህ ዓይነት ኃላፊነት ላይ ስትቀመጥ ከመናገርህ በፊት በጥልቀት ማሰላሰል ጥሩ ብቻ ሳይሆን የግድ ነው። 
• እሱስ ልክ ነሽ። 
• እና ስለመፍትሔው እያሰብክ ነው?
• ስለምኑ?
• የተመካህበት የበጋ ስንዴ ክረምቱን ያሻግረናል? 
• ሰሞኑን ወደ ውጭ ተጉዘው ከነበሩ የመንግሥት ኃላፊዎች ጋር ስለዚህ ጉዳይ እየተወያየሁ ነበር። 
• ምን አሉህ? መፍትሔ አለው? 
• አታስብ ብለውኛል።
• አታስብ ማለት?
• አጋሮቻችን ቃል ገብተዋል፣ የእኛ ባይደርስ የእነሱ ይደርሳል ብለውኛል። 
• የእነርሱ ምን?
• የበጋ ስንዴ!