Wednesday, February 1, 2023
- ማስታወቂያ -
- ማስታወቂያ -

ባንኮች ዕዳቸውን መክፈል ባልቻሉ ሆቴሎች ላይ ለጊዜው ሐራጅ እንዳያወጡ ተጠየቀ

- ማስታወቂያ -

ተዛማጅ ፅሁፎች

ዕዳቸውን መክፈል ባልቻሉ ሆቴሎች ላይ ባንኮች የሚያወጡት ሐራጅ ለጊዜው እንዲያቆሙ፣ የኢትዮጵያ ሆቴልና መሰል አገልግሎት ሰጪዎች አሠሪዎች ፌደሬሽን ጠየቀ።

የኮሮና ወረርሽኝ ከተከሰተ ጀምሮ በአገልግሎት ዘርፉ ላይ በደረሰው ጉዳት ሳቢያ፣ ሆቴሎች ከነበረባቸው መደበኛ ብድር በተጨማሪ ለድጋፍ የሚሆን ብድር በአነስተኛ ወለድ መውሰዳቸው ይታወሳል። አብዛኞቹ ሆቴሎችም መደበኛ ብድሮች ያሉባቸው ሲሆን፣ በተለይም ከኮሮና ወረርሽኝ በተጨማሪ በጦርነቱ ምክንያት የገበያ መቀዛቀዝን ጨምሮ ውድመት የደረሰባቸው ሆቴሎችም መኖራቸው ታውቋል።

በዚህም ምክንያት ሆቴሎች ያለባቸውን የባንክ ዕዳ መክፈል እንደማይችሉና በኮሮና ወረርሽኝ ሳቢያ የተበደሩት ገንዘብ እስከ አምስት ዓመት፣ እንዲሁም መደበኛ ብድሮች እስከ 20 ዓመት እንዲራዘምላቸው በተደጋጋሚ ቢጠይቁም ምላሽ አለማግኘታቸውን የሆቴልና መሰል አገልግሎት ሰጪዎች አሠሪዎች ፌደሬሽን ፕሬዚዳንት ፍትሕ ወልደሰንበት (ዶ/ር) ለሪፖርተር ገልጸዋል።

ለብሔራዊ ባንክ ያቀረቡት የኮሮና ወረርሽኝ ወቅት ብድር መክፈያ ጊዜ ማራዘሚያ ውድቅ የተደረገ ሲሆን፣ የመደበኛ ብድሩ ማራዘሚያም ተቀባይነት አለማግኘቱን፣ በተለይም በጦርነቱ ምክንያት በአዲስ አበባ ያሉትም ሆኑ በሌሎች የአገሪቱ አካባቢዎች ያሉ ሆቴሎች ተጎጂ ሆነዋል ብለዋል። የብድር ማራዘሚያ ጥያቄዎቹ ውድቅ ከተደረጉ በኋላ፣ ከቱሪዝም ሚኒስቴር ጋር በመሆን ሆቴሎቹ በሚደገፉበት ሁኔታ ላይ እየሠሩ መሆኑን ፍትሕ (ዶ/ር) ገልጸዋል።

በሆቴሎቹ ላይ በተለይም በጦርነቱ ምክንያት የደረሰውን ጉዳት ለይተው እንዲያቀርቡ በተሰጣቸው መመርያ መሠረት፣ ሁሉም የሆቴል ማኅበራት የጉዳቱን መጠን አጥንተው እንዲያቀርቡ እያደረጉ መሆኑን አብራርተዋል።

ነገር ግን ይህ ሥራ በሒደት ላይ እያለ ብድራቸውን ባልከፈሉ ሆቴሎች ላይ ባንኮች ሐራጅ እያወጡ መሆኑን ገልጸዋል። በመሆኑም ሆቴሎች የሚያስፈልጋቸውን ድጋፍ እስኪያገኙና ወደ መክፈል አቅም እስኪመለሱ ድረስ፣ ባንኮቹ እንዲታገሱና ሐራጅ እንዳያወጡ ተጠይቀዋል ብለዋል።

የቱሪዝም ሚኒስትር ደኤታ አቶ ስለሺ ግርማ በበኩላቸው፣ ሆቴሎች በጦርነቱ ምክንያት የደረሰባቸው ጉዳት ተለይቶ እንዲቀርብ መመርያ መሰጠቱንና በቀጣይ በሚቀርበው ሪፖርት መሠረት ስለሚደረገው ድጋፍ ውሳኔ ይሰጥበታል ብለዋል። የብድር ማራዘሚያውንም ሆነ በጦርነቱ የወደሙ ሆቴሎችን መደገፍ በሚመለከት ከብሔራዊ ባንክ፣ ከገንዘብ ሚኒስቴርና ከሌሎችም አካላት ጋር በመሆን የሚቀርበውን ሪፖርት መሠረት ተደርጎ ንግግር ይደረጋል ብለዋል። ጉዳዩ በማክሮ ኢኮኖሚክ ቡድን ታይቶ ውሳኔ ይሰጥበት ወይስ እዚያ ሳይደርስ ይፈታ የሚለውም እንደሚወስን አስረድተዋል።

spot_img
- Advertisement -spot_img

የ ጋዜጠኛው ሌሎች ፅሁፎች

- ማስታወቂያ -

በብዛት ከተነበቡ ፅሁፎች