Skip to main content
x
የክቡር ሚኒስትሩ ሚስት ወዲያው ባላቸው ጋ ደወሉ

የክቡር ሚኒስትሩ ሚስት ወዲያው ባላቸው ጋ ደወሉ

[ክቡር ሚኒስትሩ ለደላላ ወዳጃቸው ስልክ ይደውላሉ]

  • ሰላም ክቡር ሚኒስትር፡፡
  • እንኳን አደረሰህ ወዳጄ፡፡
  • የምን በዓል አለ ደግሞ?
  • ምን ዓይነት ጥያቄ ነው የምትጠይቀኝ?
  • ክቡር ሚኒስትር እርስዎ የሠራተኞች ቀንን ሲያከብሩ ዓይቼ አላውቅም ብዬ ነዋ፡፡
  • በአሽሙር ሠራተኛ አይደለህም እያልከኝ ነው?
  • እውነቱን ካወራንማ እኔና እርስዎ ዘራፊዎች እንጂ ሠራተኞች አይደለንም፡፡
  • ታዲያ ሌሎቹ የሠራተኛ ቀንን ሲያከብሩ እኛም ደግሞ ማክበር አይገባንም?
  • ምንድነው የምናከብረው ክቡር ሚኒስትር?
  • የዘራፊዎችን ቀን ነዋ፡፡
  • መቼም ቀልደኛ ነዎት ክቡር ሚኒስትር?
  • ቀልዱን ተወውና ቀኑን እንዴት አታስታውሰውም?
  • ልደትዎ ደረሰ እንዴ ክቡር ሚኒስትር?
  • ምን ይላል ይኼ?
  • ታዲያ የምን ቀን ክቡር ሚኒስትር?
  • ሜይ 3 ምን እንደሆነ አታውቅም?
  • የእኔም ልደት አይደለም ክቡር ሚኒስትር፡፡
  • የፕሬስ ነፃነት የሚከበርበት ቀን ነው፡፡
  • ምን አሉኝ ክቡር ሚኒስትር?
  • የዓለም የፕሬስ ነፃነት ቀን የሚከበርበት ነው፡፡
  • ክቡር ሚኒስትሩ አይደለም እንዴ የሚያወሩኝ?
  • ምን ሆነሃል ሰውዬ?
  • ክቡር ሚኒስትር የፕሬስ ነፃነት ነው ያሉኝ?
  • አዎን፣ ምነው?
  • ክቡር ሚኒስትር እርስዎ እኮ የሚዲያ ጠላት ነበሩ?
  • አሁን ጊዜው የፍቅር ነው፡፡
  • ይኼን ከእርስዎ መስማት ይገርማል፡፡
  • ስማ የለውጡ ንፋስ አግኝቶኝ ነዋ፡፡
  • ሚዲያ ለአገር አይጠቅም፣ መጥፋት አለበት ብለው እኮ ሲሟገቱ የነበሩ ሰው ነዎት?
  • ጠቅላይ ሚኒስትሩ ሰሞኑን ስለሚዲያው ያወሩትን አልሰማህም እንዴ?
  • ምን አሉ?
  • የአገሪቷ ሚዲያ ሊጠናከር ይገባዋል እያሉ በተደጋጋሚ ሲናገሩ ነበር፡፡
  • ይህ እኮ ታዲያ ለእኛ መጥፎ ዜና ነው፡፡
  • ለምን ተብሎ?
  • ሚዲያው ነፃና ጠንካራ በሆነ ቁጥር ለእኛ የእግር እሳት መሆኑ አይቀርማ፡፡
  • ሁልጊዜ እንደ ነጋዴ ነው ማሰብ ያለብህ፡፡
  • ምን እያሉኝ ነው ክቡር ሚኒስትር?
  • ሚዲያ ነፃ ሆኖ ይጠናከር ሲባል ምን ማለት እንደሆነ ታውቃለህ?
  • ምን ማለት ነው?
  • ለሚዲያው የኢንቨስትመንት ማበረታቻ ይደረጋል ማለት ነው፡፡
  • አይ እርስዎ!
  • ስለዚህ የሚዲያ ተቋማት በማበረታቻነት በነፃ የሚያስገቧቸው ዕቃዎች ይኖራቸዋል ማለት ነው፡፡
  • ስለዚህ ምን እናድርግ?
  • በአስቸኳይ ማማረጥ አለብን፡፡
  • ምኑን ነው የምናማርጠው?
  • ከጋዜጣ፣ ከቲቪና ከሬዲዮ ነዋ፡፡
  • ምን ለማድረግ?
  • ለማቋቋም ነዋ፡፡
  • ምንድነው የምናቋቁመው?
  • የራሳችንን ሚዲያ!

[ለክቡር ሚኒስትሩ አንድ ባለሙያ ይደውልላቸዋል]

  • ጤና ይስጥልኝ ክቡር ሚኒስትር?
  • ዛሬ እንዴት ደወልክልኝ?
  • አንድ ጥናት እየሠራሁ ነበር ክቡር ሚኒስትር፡፡
  • የምን ጥናት ነው?
  • በአገሪቷ ስላለው ችግር ጥናት እያደረግኩ ነበር፡፡
  • እኔ ጋ የደወልከው የአገሪቷን ችግር መንስዔ ሆኜ ነው?
  • ኧረ አልወጣኝም ክቡር ሚኒስትር፡፡
  • ታዲያ ምን ፈልገህ ነው የደወልከው?
  • ያው ስለጥናቱ ለመነጋገር ብዬ ነው፡፡
  • ምንድነው የምንነጋገረው?
  • የአገሪቷ ችግር እጅግ ውስብስብና ዘርፈ ብዙ ነው፡፡
  • እሱማ የአገሪቷን ችግር የሚፈታ ከጠፋ ሰነባበተ፡፡
  • አሁን ግን አገሪቷ ተስፋ ያላት ይመስለኛል፡፡
  • እንደዚህ ለምን አልክ?
  • ያው አዲሱ ጠቅላይ ሚኒስትር ሕዝቡ ላይ ተስፋ ዘርተውበታል፡፡
  • ተስፋው ተዘርቶ ካልታጨደ ምን ይጠቅማል?
  • ክቡር ሚኒስትር የአገሪቷን ችግር እኮ አንድ ሰው ሊፈታው አይችልም፡፡
  • ምን እያልከኝ ነው?
  • አዲሱ ተስፋ ሊታጨድ የሚችለው ከላይ ወደ ታች ከወረደ ነው፡፡
  • እንዴት ማለት?
  • ከላይ ካሉት ባለሥልጣናት ይልቅ ሕዝቡን ማግኘት የሚችሉት ከታች የተቀመጡት ስለሆነ ነዋ፡፡
  • ከላይ ያላችሁት ምንም አትጠቅሙም እያልከኝ ነው?
  • ኧረ አልወጣኝም ክቡር ሚኒስትር፡፡
  • ታዲያ ምንድነው የምትለው?
  • ከእናንተ ይልቅ ቀን በቀን ሕዝቡን የሚያገኙት ከታች ያሉት አመራሮች ናቸው፡፡
  • እነሱ አይደል እንዴ ሕዝቡን እያማረሩት ያሉት?
  • ለዚያ ነው እነሱ ላይ በሚገባ መሠራት ያለበት፡፡
  • ምንድነው የምንሠራው?
  • ጠቅላይ ሚኒስትሩ ያወሩትን ከታች ያለው ሰው ካልተገበረው፣ ውኃ ቢወቅጡት እምቦጭ ነው የሚሆነው፡፡
  • እሱስ ልክ ነህ፡፡
  • አንድ ገበሬ ዳመና ስለመጣ ብቻ ፍሬ ሊያገኝ አይችልም፡፡
  • እንዴት ማለት?
  • ገበሬው ፍሬ የሚያገኘው ከላይ የታየው ዳመና ወደ ምድር ዝናብ ሆኖ ከመጣ ብቻ ነው፡፡
  • ምን እያልከኝ ነው ታዲያ?
  • የጠቅላይ ሚኒስትሩን ንግግር እንደ ዳመና ብናየው፣ ታች ያለው መዋቅር ውስጥ ካልወረደ ፍሬ አልባ ነው እያልኩዎት ነው፡፡
  • ተፈላሳፊ ነህ ልበል?
  • እየተፈላሰፍኩ ሳይሆን፣ የታየኝን እየነገርኩዎት ነው፡፡
  • አሁን ዳመና ብቻ ነው የታየው እያልከኝ ነው?
  • ወደታች ካልዘነበ ከንቱ ልፋት ነው ክቡር ሚኒስትር፡፡
  • ምን እያልክ ነው ታዲያ?
  • ከታች ካለው አመራር ጋር በአስቸኳይ ማወራረድ አለባችሁ፡፡
  • ምኑን ነው የምናወራርደው?
  • ሐሳቡን!

[አንድ ባለጉዳይ ወደ ክቡር ሚኒስትሩ ቢሮ ለመግባት ከጸሐፊያቸው ጋር እያወራ ነው]

  • ክቡር ሚኒስትሩን ፈልጌ ነበር፡፡
  • ቀጠሮ አለህ?
  • የምን ቀጠሮ ነው?
  • ክቡር ሚኒስትሩ ጋር ለመግባት ነዋ፡፡
  • ያለቀጠሮ መግባት አልችልም?
  • እዚህ ቢሮ ለሁለት ዓመት ተመላልሰህ እንዴት ይኼን አታውቅም?
  • ለሁለት ዓመት እኮ አግኝቻቸው አላውቅም፡፡
  • ታዲያ ዛሬ እንደምታገኛቸው ምን እርግጠኛ አደረገህ?
  • አሠራራችሁ ተቀይሯል ስለተባለ ነዋ፡፡
  • የምን አሠራር ነው የተቀየረው?
  • በፊት ክቡር ሚኒስትር የሚሰጡት ምክንያት ጥቅም አልባ ተደርጓል ብዬ ነዋ፡፡
  • ምን እያልክ ነው ሰውዬ?
  • ሁሌ ስመጣ ወይ ከአገር ውጭ ናቸው ወይም ስብሰባ ላይ ናቸው፡፡
  • አሁን ስብሰባ ላይ አለመሆናቸውን በምን አወቅክ?
  • ስብሰባ ከሥራ ሰዓት በኋላ ይካሄድ ተብሏል እኮ?
  • ቀጠሮ ከሌለህ ግን ክቡር ሚኒስትሩ ጋ ዝም ብሎ አይገባም፡፡
  • ያማ በድሮ ሥርዓት ቀረ፡፡
  • ወይ ጉድ?
  • መቼም አንቺ የድሮ ሥርዓት ናፋቂ አይደለሽም?
  • ምን እያልከኝ ነው ታዲያ?
  • ገብተሽ ንገሪያቸው፡፡
  • እሺ፡፡

[የክቡር ሚኒስትሩ ጸሐፊ ቢሯቸው ገባች]

  • ባለጉዳይ ነበር ክቡር ሚኒስትር፡፡
  • ዛሬ እኮ ቀጠሮ የለኝም፡፡
  • ባለጉዳዩ ካልገባሁ እያለ ነው፡፡
  • እኔን ያለቀጠሮ ማናገር እንደማይቻል ንገሪው፡፡
  • ክቡር ሚኒስትር ላለፉት ሁለት ዓመታት የተመላለሰ ሰው ነው፡፡
  • ገና ሌላ ተጨማሪ ዓመታት ይመላለሳል፡፡
  • እንደዚያ እንኳን ማድረግ የምንችል አልመሰለኝም፡፡
  • አንድ ምክንያት ስጪው፡፡
  • ምክንያቶች መስጠት እንደማንችል የሚያውቅ ሰው ስለሆነ ቢያናግሩት ይሻላል፡፡
  • እሺ አስገቢው፡፡

[ባለጉዳዩ ክቡር ሚኒስትሩ ቢሮ ገባ]

  • ያለቀጠሮ እኔን ማናገር አትችልም እኮ?
  • ክቡር ሚኒስትር የመጣሁት እኮ ጉዳይ ኖሮኝ ነው፡፡
  • ቢሆንም ቀጠሮ ያስፈልግሃል፡፡
  • እዚህ የተቀመጡት ሕዝብ ሊያገለግሉ መስሎኝ?
  • እሱን አንተ አትነግረኝም፡፡
  • ስለዚህ ጉዳዬን ያዳምጡ፡፡
  • የአንተን ጉዳይ አሁን ላዳምጥ አልችልም፡፡
  • ለምንድነው የማያዳምጡት?
  • ስብሰባ አለኝ፡፡
  • የምን ስብሰባ?
  • ከጠቅላይ ሚኒስትሩ ጋር ስብሰባ አለኝ፡፡
  • ከጠቅላይ ሚኒስትሩ ጋርማ በሥራ ሰዓት እንደማይሰበሰቡ አውቃለሁ፡፡
  • ሰውዬ አንተ እኔን ልትቆጣጠረኝ አትችልም፡፡
  • ወዴት ሊሄዱ ነው አሁን?
  • ወደ ጠቅላይ ሚኒስትሩ ጋ አልኩህ?
  • እንግዲያው እኔም ሪፖርት ላደርግ እሄዳለሁ፡፡
  • ወዴት?
  • ወደ ጠቅላይ ሚኒስትሩ!

[የክቡር ሚኒስትሩ ሚስት ወደ ውጭ ሊወጡ ሲሉ ኤርፖርት ላይ ተከለከሉ]

  • መውጣት አይችሉም እመቤቴ፡፡
  • ምን?
  • ከአገር መውጣት አይችሉም፡፡
  • ቪዛ እኮ አለኝ፡፡
  • ቪዛ ቢኖርዎትም ከአገር መውጣት አይችሉም፡፡
  • ለምን ተብሎ?
  • ከበላይ ነው የተላለፈልኝ፡፡
  • ማን እንደሆንኩ አውቀሃል?
  • አላወኩም እመቤት፡፡
  • የክቡር ሚኒስትሩ ሚስት ነኝ፡፡
  • ቢሆኑም አይወጡም!

[የክቡር ሚኒስትሩ ሚስት ወዲያው ባላቸው ጋ ደወሉ]

  • ስማ በተከበርኩበት አገር ልዋረድ?
  • ምን ሆንሽ?
  • ከአገር አትወጪም ተባልኩ እኮ?
  • ማን ነው ያለሽ?
  • የቁም እስረኛ ተደርጌያለሁ፡፡
  • ማን ነው ያሰረሽ?
  • አንተ እያለህ እንዴት ይህ ይፈጸምብኛል?
  • ምንድነው የሆንሽው?
  • ከአገር አትወጪም ተባልኩ፡፡
  • ለምንድነው የማትወጪው?
  • ሊስት ውስጥ አለሽ ተብዬ ነዋ፡፡
  • ምን ላድርግልሽ ታዲያ?
  • በአስቸኳይ ከአገር እንድወጣ አስደርገኝ፡፡
  • እሱንማ ማድረግ አልችልም፡፡
  • ለምን ሲባል?
  • መመርያ ከተላለፈ ምንም ማድረግ አልችልም፡፡
  • እና እኔ ከአገር አልውጣ?
  • የአንቺ ከአገር አትውጪ መባል ይገርምሻል እንዴ?
  • ለምን አይገርመኝም?
  • እኔ ከየት እንዳልወጣ እንደተከለከልኩ ታውቂያለሽ?
  • ከየት አትውጣ ተባልክ?
  • ከቢሮ!