Skip to main content
x
ክቡር ሚኒስትሩ ከሌላ ሚኒስትር ጋር እያወሩ ነው

ክቡር ሚኒስትሩ ከሌላ ሚኒስትር ጋር እያወሩ ነው

[ክቡር ሚኒስትሩ በጠዋት ከሚስታቸው ጋር ቁርስ እየበሉ ነው]

  • አልበዛም?
  • ምኑ?
  • አሁንስ ሰለቸኝ፡፡
  • ምኑ ነው የሰለቸህ?
  • አንገሸገሸኝ አልኩሽ፡፡
  • እኮ ምኑ ነው ያንገሸገሸህ?
  • ያልገባኝ እኮ አንድ ነገር ነው፡፡
  • ምኑ ነው ያልገባህ?
  • ለምን በግልጽ አትነግሪኝም?
  • ምኑን ነው የምንግርህ?
  • አስጠልተኸኛል ብለሽ በግልጽ ብትነግሪኝ ይሻላል እኮ?
  • ምንድነው የምታወራው?
  • እኔ እንድሞት ነው እንዴ የምትፈልጉት?
  • ማን ነን እኛ?
  • መንግሥት፣ አንቺም፣ ሁላችሁም፡፡
  • ሰውዬ ጤና የለህም እንዴ?
  • እናንተ እያላችሁ እኔ እንዴት ጤና ይኖረኛል?
  • ምንም አልገባኝም፡፡
  • መንግሥት በግምገማ ስኳርና ደሜን ሰቅሎታል፡፡
  • ለእሱማ መድኃኒት እየወሰድክ አይደል እንዴ?
  • መድኃኒቱ ራሱ አልሠራ ካለኝ ስንት ዘመኑ?
  • ታዲያ እኔ ምን ላድርግህ?
  • የመንግሥትን እሺ ተይው፣ አንቺ ደግሞ ሌላ አቃጣይ ሆነሻል፡፡
  • በጠዋቱ የምን ምሬት ነው?
  • ይኸው በጠዋቱ ያቀረብሽልኝ ቁርስ እኮ ለእኔ ጠላት ለመሆንሽ ጥሩ ማስረጃ ነው፡፡
  • ምንድነው የምታወራው?
  • ይኸው ይኼ ሁሉ በርበሬ ጨጓራዬን መለጠው እኮ?
  • ስማ ይኼንንም ያጣ ብዙ ሰው እንዳለ አትርሳ፡፡
  • አንቺማ ምኞትሽ እኔ በችግር እንድሞት ነው፡፡
  • አሁን ይኼ ፍርፍር ምን ይወጣለታል?
  • አንድ ድፍን ሳምንት ሙሉ ፍርፍር ልብላ?
  • ትናንትና ጨጨብሳ አይደል እንዴ የበላኸው?
  • ያው ነው፣ ቂጣ ተፈረፈረ እንጀራ ተፈረፈረ፣ ፍርፍር ፍርፍር ነው፡፡
  • ከመቼ ጀምሮ ያመጣኸው ባህሪ ነው? አንተ ለምግብ ግድ ኖሮህ አያውቅ?
  • ከአሁን በኋላ ግድ ይሰጠኛል፣ ሐኪም አስጠንቅቆኛል፡፡
  • ምን ላድርግ ታዲያ እኔ?
  • በርበሬና ጨው የበዛበት ምግብ ተከልክያለሁ አይደል?
  • ምን ይሠራልህ ታዲያ?
  • ምናለበት እንቁላልና ወተት ብትሰጪኝ?
  • ችግሩ አልገባህም?
  • አሁን ቢያንስ ቢያንስ ዳቦ ይጠፋል?
  • ዳቦ ከጠፋ ስንት ጊዜው እንደሆነ አታውቅም፡፡
  • ዳቦ ቢጠፋ እንቁላል ፍርፍር ወይ እንቁላል ቁጭ ቁጭ ማድረግ አቅቶሽ ነው?
  • እንቁላል ለመግዛት ያልዞርኩበት ሱፐርማርኬት የለም፡፡
  • አሁን ጨጓራዬ ስለተቃጠለ ወተት አምጪልኝ፡፡
  • እኔ ገበሬ መሰልኩህ እንዴ?
  • ወተት እኮ ነው የጠየቅኩሽ?
  • ወተትም ቢሆን በከተማው የለም፡፡
  • ለምን ተብሎ?
  • እንግዲህ ዶሮዎቹንና ላሞቹን ምን እንደነካቸው አላውቅም፡፡
  • ዶሮዎቹ እንቁላል ካልሰጡ፣ ላሞቹም ወተት ካልሰጡ የሚበሉትን ምግብ ቀይረዋል ማለት ነው፡፡
  • ምግባቸው ምን ሆነ ልትል ነው ደግሞ?
  • ዶላር!

[ለክቡር ሚኒስትሩ አንድ ሰው ደወለላቸው]

  • ሄሎ ክቡር ሚኒስትር፡፡
  • ማን ልበል?
  • በእውነት በጣም ነው ደስ ያለኝ፡፡
  • ለምን?
  • የእርስዎን ቁጥር ለማግኘት ያልገባሁበት ቦታ የለም፡፡
  • ማን ነህ አንተ?
  • እኔን እንኳን አያውቁኝም፡፡
  • ምን ፈልገህ ነው?
  • ከፍተኛ በደል ነው የደረሰብኝ፡፡
  • የምን በደል?
  • ክቡር ሚኒስትር በደረሰብኝ በደል በጣም አዝኛለሁ፡፡
  • እኮ ምን ሆንክ?
  • ይኸው እርስዎ ጋ የደወልኩት የደረሰብኝን ለማሰማት ነው፡፡
  • ምንድነው የደረሰብህ ነገር?
  • ከዛቻ ዛቻ፣ ዱላም ቢሆን ቦክስ የቀመስኩ ሰው ነኝ፡፡
  • የምን ዛቻና ቦክስ ነው?
  • ይኸው በየሳምንቱ ኑሮዬ ዛቻና ቦክስ ሆኗል፡፡
  • ምንድነው የምታወራው?
  • በቃ እኔ ሥራዬን ተረጋግቼ መሥራት አልቻልኩም፡፡
  • የምን ሥራ ነው?
  • ከአሁን አሁን ሞቼ ልጆቼ ሊበተኑ ነው እያልኩ እየሠጋሁ ነው፡፡
  • በአገሪቷ ሕግ አለ አይደል እንዴ?
  • እኔማ በአገሪቷ ሕግ ስለመኖሩ እጠራጠራለሁ፡፡
  • እንዴት ነው ሕግ የሌለው?
  • ይኸው በተደጋጋሚ የደረሰብኝን ዛቻና ድብደባ ባመለክትም የሚሰማኝ አጣሁ፡፡
  • ለመሆኑ ይኼ ሁላ ዛቻና ድብደባ ለምንድነው የሚደርስብህ?
  • እኔማ በሙያዬ ሕዝቡን አገልግላለሁ ብልም፣ በየቅዳሜውና በየእሑዱ መፈንከት ሆኗል ዕጣዬ፡፡
  • ታዲያ እኔ ምን ልርዳህ?
  • ክቡር ሚኒስትር እርስዎን የምጠይቅዎት አንድ ነገር ብቻ ነው፡፡
  • ምንድነው እሱ?
  • እኔ በሙያዬ እንዴት ነው መቀጠል የምችለው?
  • ማንም ሰው በሚወደው ሙያ አገሩን ማገልገል ይችላል፡፡
  • እኔ ግን ሕዝብን ባገለገልኩ መፈንከትና ዛቻ ሆኗል ደመወዜ፡፡
  • ለመሆኑ በየጊዜው የሚያስፈነክትህ ሙያ ምን ይሆን?
  • እኔማ ዳኛ ነኝ፡፡
  • የዳኞችን ችግርማ ስለተረዳነው በአፋጣኝ መፍትሔ ይሰጠዋል፡፡
  • ክቡር ሚኒስትር ሁሌም እንደዚህ እኮ ነው የምንባለው፡፡
  • የአሁኑማ ለየት እንዳለ እኔ ራሴ በቲቪ ተመልክቸዋለሁ፡፡
  • ድብድቡ በቲቪ ተላልፏል እንዴ?
  • ሚዲያዎች ሁሉ የዳኛውን መደብደብ ሲያስተላልፉ አልነበር እንዴ?
  • ስለምንድነው የሚያወሩት ክቡር ሚኒስትር?
  • ስለእግር ኳስ ዳኛው ነዋ፡፡
  • እኔ እኮ የእግር ኳስ ዳኛ አይደለሁም፡፡
  • ምን?
  • በሙያ መመሳሰል ነው በየሳምንቱ የምቀጠቀጠው፡፡
  • አንተ የምን ዳኛ ነህ?
  • የዕቁብ ዳኛ!

[ክቡር ሚኒስትሩ ከደላላ ወዳጃቸው ጋር እያወሩ ነው]

  • ክቡር ሚኒስትር እኔ በጣም እየተጨናነቅኩ ነው፡፡
  • ምን ሆነህ?
  • በቃ ሥራ መሥራት አልቻልኩም፡፡
  • እኮ ምን ሆነህ?
  • እንደምታዩት ከተማ ውስጥ ምንም እንቅስቃሴ የለም፡፡
  • እንዴት ማለት?
  • ምንም ዕቃ ኢምፖርት ማድረግ አልቻልንም፣ በዚያ ላይ ሁሉ ነገር ተቀዛቅዟል፡፡
  • ሁሉ ነገር ስትል?
  • በቃ የመሬቱም ገበያ ቀዝቅዟል፣ ቤትም የሚገዛ ጠፍቷል፣ ብቻ ሁሉ ነገር ደስ አይልም፡፡
  • አንተ ደግሞ ቶሎ ነው ተስፋ የምትቆርጠው፡፡
  • አገሪቷ እኮ አውቶ ፓይለት ላይ ነው ያለችው፡፡
  • ምን ማለት ነው እሱ?
  • ዝም ብላ ያለ መሪ ነዋ እየሄደች ያለችው፡፡
  • አዲስ ጠቅላይ ሚኒስትር በቅርቡ አይደል እንዴ የተሾመላት?
  • እሱ አይደል እንዴ ችግሩ?
  • የምን ችግር አመጣህ ደግሞ?
  • በቃ ሁሉ ነገር ተቆላልፎ እንዴት እንንቀሳቀስ?
  • ማን ነው የቆላለፈው?
  • እውነት እናውራ ከተባለ ክቡር ሚኒስትር፣ እኔና እርስዎ ያለ ሌብነት ምን እንችላለን?
  • እ…
  • በየቀኑ እየተሳቀቅኩ መኖርም አልቻልኩም፡፡
  • አንዳንዴ ሞኝ ነህ ልበል?
  • ምነው ክቡር ሚኒስትር?
  • ካፊያ ነው ብለህ ከቤት ላትወጣ ነው እንዴ?
  • ምን እያሉ ነው ክቡር ሚኒስትር?
  • አሁን ያለው ካፊያ ነው፣ ዣንጥላ ይዘህ መውጣት ነው ዋናው፡፡
  • ክቡር ሚኒስትር እኔ ግን የመጣብን ጠራርጎ የሚወስድ ነው ባይ ነኝ፡፡
  • ዝም ብለህ አትሞቦቅቦቅ፡፡
  • እኔ ግን ድርሻዬን ሰጥተውኝ ብንለያይ ባይ ነኝ፡፡
  • ምን አልክ?
  • እኔ ሁኔታው ስላላማረኝ ከአገር ብወጣ ይሻላል፡፡
  • ለምንድነው የምትወጣው?
  • እዚህ ለእኛ ምንም ተስፋ እየታየኝ አይደለም፡፡
  • ለምን ተስፋ የለንም?
  • ሁሉም ሥራችን እኮ መስመሩን ያልፋል፡፡
  • የምን መስመር?
  • የጠቅላይ ሚኒስትሩን ቀይ መስመር ነዋ፡፡
  • ታዲያ ምን ችግር አለው?
  • እንዴት የለውም ክቡር ሚኒስትር?
  • በሌሎች መስመሮች መጫወት እንችላለን፡፡
  • አልገባኝም?
  • ለምሳሌ አረንጓዴ መስመር አልተከለከለም፡፡
  • ምንድነው እሱ?
  • የጫት ንግድ ውስጥ መግባት እንችላለን፡፡
  • አይ ክቡር ሚኒስትር?
  • ከእሱ ይልቅ ግን ለእኛ የሚያዋጣን ሌላ መስመር ነው፡፡
  • የትኛው መስመር?
  • ጥቁሩ መስመር፡፡
  • እሱ ደግሞ ምንድነው?
  • በአፋጣኝ እሱን መጀመር አለብን፡፡
  • ምንድነው እሱ?
  • ጥቁር ገበያ!

[ክቡር ሚኒስትሩ ከሌላ ሚኒስትር ጋር እያወሩ ነው]

  • ክቡር ሚኒስትር የእርስዎ ነገር ግራ እያጋባኝ ነው፡፡
  • ምኑ ነው ግራ የሚያጋባው?
  • አገር በአንድነት እየዘመረ እርስዎ ለምን እእንደሚያፈነግጡ አይገባኝም?
  • ምን እያልከኝ ነው?
  • ሰው አገሬ አገሬ ሲል፣ እርስዎ እኔ እኔ እያሉ ነው፡፡
  • ተረቱን አታውቀውም እንዴ?
  • የትኛውን ተረት?
  • ከራስ በላይ ንፋስ የሚለውን ነዋ፡፡
  • እኔ እንኳን ያስታወስኩት ያችን አህያ ነው፡፡
  • የትኛዋን አህያ?
  • እኔ ከሞትኩ ሰርዶ አይብቀል ያለችውን አህያ ነዋ፡፡
  • ሰውዬ እየተሳደብክ እኮ ነው? ብንከባበር አይሻልም?
  • ስንተዋወቅ አንተናነቅ አሉ፡፡
  • ምን እያልክ ነው?
  • እርስዎ አሁን እየፈጠሩት ያለው ችግር አዲሱ ጠቅላይ ሚኒስትር እንዳይሠሩ ለማድረግ ነው፡፡
  • ታዲያ የማን ሥራ ቆሞ የማን ይቀራል?
  • እሱማ የእርስዎ ዋነኛ ሥራ ሌብነት መሆኑ ይታወቃል፡፡
  • እኔ ብሰርቅ እኮ መልሼ አገሬን ነው የማለማው፡፡
  • ትንሽ እንኳን አያፍሩም ክቡር ሚኒስትር?
  • አገሬን ማልማት ምን ያሳፍራል?
  • አገር በስርቆት አይለማም፡፡
  • ለመሆኑ ምን አጠፋህ ነው የምትለኝ?
  • በየካቢኔ ስብሰባው የሚፈጥሩት ችግር ለምን እንደሆነ ተደርሶበታል፡፡
  • አሁንም እቀጥልበታለሁ፡፡
  • እኔ ግን ከዚህ አፍራሽ ተግባርዎ እንዲቆጠቡ እመክርዎታለሁ፡፡
  • እያስፈራራኸኝ መሆኑ ነው?
  • ይህን አፍራሽ ተግባርዎን ከቀጠሉበት እኛም የዘጋነውን እስር ቤት መክፈታችን አይቀርም፡፡
  • የትኛውን እስር ቤት?
  • ማዕከላዊን!