Skip to main content
x
ክቡር ሚኒስትሩ ከስብሰባ በኋላ የሻይ ዕረፍት ላይ ከሌላ ሚኒስትር ጋር እያወሩ ነው

ክቡር ሚኒስትሩ ከስብሰባ በኋላ የሻይ ዕረፍት ላይ ከሌላ ሚኒስትር ጋር እያወሩ ነው

[ለክቡር ሚኒስትሩ የቀድሞ ወዳጃቸው ይደውሉላቸዋል]

  • እንዴት ነዎት ክቡር ሚኒስትር?
  • እኔ ሰላም ነኝ አንተ እንዴት ነህ?
  • ክቡር ሚኒስትር ዕረፍት አለዎት?
  • ይህች አገር እስክትለወጥ ምን ዕረፍት አለ ብለህ ነው?
  • ያው እርስዎ መሥራት የሚችሉትን ብቻ ስለሚሠሩ፣ ለሌላ ቢያስተላልፉ አይሻልዎትም?
  • እሱማ ፈጽሞ ሊሆን አይችልም፡፡
  • ለምን ክቡር ሚኒስትር?
  • ይህችን አገር ለዚህ ያበቃናት ሌት ከቀን እየሠራን ነው እኮ፡፡
  • ያው አሁን አገሪቱ ተስፋ ቢጤ እያየች ነው ብዬ ነዋ፡፡
  • እኮ ይኼንንስ ተስፋ ያመጣነው እኛ አይደለን እንዴ?
  • እሱን እንኳን ይተውት?
  • መቼም እናንተ ወርቅ ቢነጠፍላችሁም ፋንድያ አማረን ትላላችሁ፡፡
  • እኔ እንደዚያ እያልኩ አይደለም፡፡
  • ታዲያ ከዚያም ጨቋኝ ሥርዓት አገሪቱን ያላቀቅነው እኛ አይደለን?
  • ምን እያሉ ነው ክቡር ሚኒስትር?
  • ይኸው ኢኮኖሚው ተመንድጎ አገሪቷ የምታስጎመጅ አገር ሆናለች አይደል?
  • ስለኢትዮጵያ ነው የሚያወሩት?
  • ሰውዬ አገሪቱን ለዚህ ደረጃ ያበቃናት እኛ ነን፡፡
  • አይሳሳቱ ክቡር ሚኒስትር፡፡
  • እንዴት ማለት?
  • አገሪቱ ለዚህ የበቃችው በሕዝቡ ትጋት ነው፡፡
  • ምን?
  • ትግላችሁ ራሱ ፍሬ ማፍራት የቻለው ይህ ሕዝብ ስለረዳችሁ ነው፡፡
  • እሱንማ አንክድም፡፡
  • ስለዚህ ያለሕዝቡ የትም ልትደርሱ አትችሉም ነበር፡፡
  • ስማ ይኼ ሁሉ ሀብታም እኛ በገነባነው ሥርዓት እንደተፈጠረ መዘንጋት የለብህም፡፡
  • የተፈጠሩት ሀብታሞች እነማን እንደሆኑ ሁላችንም እናውቃቸዋለን፡፡
  • አንተ ለነገሩ ሁልጊዜ መተቸትና መንቀፍ ነው የምትወደው፡፡
  • ክቡር ሚኒስትር እኔ የመተቸትና የመንቀፍ አባዜ ኖሮኝ አይደለም፡፡
  • ታዲያ ምንድነው የምታወራው?
  • እርስዎ እንደሚሉት ተሠርቶ ቢሆን ኖሮ አገሪቱ የት በደረሰች ነበር፡፡
  • ቆይ ግን ምንም አልተሠራም እያልከኝ ነው?
  • እንደዚያ አልወጣኝም፣ ግን ከዚህ የበለጠ መሥራት ይቻል ነበር ነው ያልኩት፡፡
  • ይኼን ሁሉ ልማት እያለ አፍራሽ ነገር የምታወራ ከሆነ ፀረ ልማት ነህ ማለት ነው?
  • ኧረ እንደዚህ አይመፃደቁ ክቡር ሚኒስትር?
  • እኔ እየተመፃደኩ ሳይሆን፣ ከዲክሽነሪ ላይ የረሃብ ምሳሌ መሆኗ እንዲቀር ያደረግን ሰዎች ነን እኮ?
  • እሱን እንኳን ይተውት፡፡
  • ሰውዬ እኔ የምለውን ተውና አንተ የምትቀበላቸውን ሪፖርቶች መመልከት ትችላለህ፡፡
  • የትኞቹ ሪፖርቶች?
  • ይኸው ዓለም ባንክም ሆነ አይኤምኤፍ የመሰከሩልን አለ፡፡
  • ምንድነው እሱ?
  • የአገሪቱ ኢኮኖሚ ላለፉት አሥር ዓመታት በሁለት አኃዝ እያደገ እንደሆነ መስክረዋል፡፡
  • በዚያው ልክ ዝርፊያውና ስርቆቱም በሁለት አኃዝ እያደገ ነው፡፡
  • አንተ አፍራሽ ነ­­ህ ያልኩህ ለዚህ ነው፡፡
  • ኢኮኖሚውም አደገ ከተባለ ያደገው የአገሪቱ አይደለም፡፡
  • ታዲያ የማን ኢኮኖሚ ነው ያደገው?
  • የእርስዎና የቤተሰብዎ!

[ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው]

  • ሰላም ነህ ወዳጄ?
  • ምን ሰላም አለ ክቡር ሚኒስትር?
  • ምን ሆንክ ደግሞ?
  • የአገሪቱ አካሄድ በጣም እያሠጋኝ ነው፡፡
  • ምኑ ነው የሚያሠጋህ?
  • እርስዎ ግን በአገር አሉ?
  • የት እሄዳለሁ ብለህ ነው? ሰሞኑን ብቻ ለቼክአፕ ወጣ ብዬ ነበር፡፡
  • አዲሱ ጠቅላይ ሚኒስትር እያደረጉ ያሉትን ነገር መቼም ይከታተላሉ?
  • እንግዲህ አገሪቱ ውስጥ ብዙ ነገር ይደረጋል፣ ዋናው በልማት ጎዳና ላይ መሆናችን ነው፡፡
  • ክቡር ሚኒስትር ጉድ እየፈላ ነው፡፡
  • የምን ጉድ ነው?
  • በቅርቡ ሊበረበሩ ነው፡፡
  • ማን ነው የሚበረብረኝ?
  • ጠቅላይ ሚኒስትሩ ያሉትን አልሰሙም እንዴ?
  • ምን አሉ ደግሞ?
  • ባለሥልጣናት በውጭ ያስቀመጡት ገንዘብ እየተመረመረ ነው፡፡
  • ኧረ ሰውዬ ትንሽ አስብልኝ?
  • ምን አደረኩዎት ክቡር ሚኒስትር?
  • ለምን እንደዚህ ዓይነት ወሬ እየነገርከኝ ደሜን ከፍ ታደርገዋለህ?
  • ምን ላድርግ እንዲጠነቀቁ ብዬ ነው?
  • ምንድነው ግን ያሉት
  • ባለሥልጣኖቻችን አካውንት ከከፈቱባቸው አገሮች ጋር እየተወያየን ነው ብለዋል፡፡
  • ምንድነው የሚሻለኝ?
  • እኔማ እዚያ የተለመደው ባንክ ደውዬ ብጠይቅ፣ በጉዳዩ ላይ ምንም ምላሽ አንሰጥህም አሉኝ፡፡
  • ኧረ ተው ሌላ በሽታ አታምጣብኝ?
  • ክቡር ሚኒስትር አካሄድዎ ጥንቃቄ የተሞላበት ሊሆን ይገባል፡፡
  • ኧረ በሰላም ልኑርበት ተውኝ፡፡
  • ክቡር ሚኒስትር እኔ እኮ እርስዎን ላወዛግብዎት ፈልጌ አይደለም፡፡
  • አሁን ምንድነው ማድረግ የምችለው?
  • ከፍተኛ ጥንቃቄ ነዋ፡፡
  • ስማ ያ ሁላ ዶላር በእኔና በቤተሰቤ ስም እኮ ነው የተቀመጠው፡፡
  • አዝማሚያው አላማረኝም እያልኩዎት ነው፡፡
  • ታዲያ አንደኛዬን ጠቅልዬ ልጥፋ?
  • የት ነው የሚጠፉት?
  • ውጭ ልገዛው ያሰብኩት ቤት ስላለ ቤተሰቤን ይዤ ልጥፋ?
  • ክቡር ሚኒስትር አካውንትዎ ከተበረበረ ንብረትዎትም መበርበሩ አይቀርም፡፡
  • ውጭ ቤት አትግዛ እያልከኝ ነው?
  • ክቡር ሚኒስትር እስር ቤት መግባትዎ ስለማይቀር ውጭ የመሄዱን ሐሳብ ቢተውት ይሻላል፡፡
  • ምን?
  • ቤት መግዛት ከፈለጉም አካባቢውን ከአሁኑ እንዲለምዱት እኔ ጥሩ ቤት እፈልግልዎታለሁ፡፡
  • የት አካባቢ?
  • ቂሊንጦ!

[ክቡር ሚኒስትሩ ለጠቅላይ ሚኒስትሩ ሪፖርት አቅርቡ ተብለው ተደናግጠው አማካሪያቸውን አስጠሩት]

  • ያን ሪፖርት አዘጋጀህ?
  • የትኛውን ሪፖርት ክቡር ሚኒስትር?
  • ባለፈው ያዘዝኩህን ነዋ?
  • ኧረ ምንም አላዘዙኝም ክቡር ሚኒስትር?
  • አሁን በአንድ ሰዓት ውስጥ ሪፖርት እንድትሠራልኝ እፈልጋለሁ፡፡
  • እየቀለዱ ነው ክቡር ሚኒስትር?
  • የምን ቀልድ ነው?
  • ሪፖርት እንዴት ነው በአንድ ሰዓት ውስጥ የሚዘጋጀው?
  • ሌላ ጊዜ በሰላሳ ደቂቃ አልነበር እንዴ የምታቀርብልኝ?
  • አሁን ብዙ ነገር እንደተቀየረ ያውቃሉ አይደል ክቡር ሚኒስትር?
  • እሱማ አውቃለሁ፡፡
  • በአንድ ሰዓት ውስጥ ሪፖርት ማዘጋጀት አይቻልም፡፡
  • ለምን ሲባል?
  • እንደበፊቱ ኮፒ ፔስት ማድረግ አይቻልማ?
  • አሁን ኮፒ ፔስት ቀረ እያልከኝ ነው?
  • አሁንማ እያንዳንዱ መስመር ነው የሚነበበው፡፡
  • ቢነበብስ ታዲያ?
  • ሁሉንም ነገር አመንጭተን ነው መጻፍ ያለብን፡፡
  • ስማ አመንጭተህም ቢሆን ኮፒ ፔስት አድርገህ፣ በአንድ ሰዓት ውስጥ ሪፖርቱን እንዳገኘው፡፡
  • እሱ የማይሆን ነገር ነው ክቡር ሚኒስትር፡፡
  • አንተ የታዘዝከውን ሥራ ለምንድነው የማትሠራው?
  • ክቡር ሚኒስትር የማይሠራ ነገር እንዴት እሠራለሁ?
  • በጣም ተናንቀናል ልበል?
  • የመናናቅ ጉዳይ አይደለም ክቡር ሚኒስትር፡፡
  • ስማ ጠዋት ስንት ሰዓት ገብተህ ለምሳ ስንት ሰዓት እንደምትወጣ አውቃለሁ፡፡
  • ምን አጠፋሁ ታዲያ?
  • ከሥራ የምትወጣበትንም ሰዓት ሆነ የምታመሽበትን ቤት በሚገባ ነው የማውቀው፡፡
  • አልገባኝም ክቡር ሚኒስትር?
  • ሪፖርቱን መሥራት ያልፈለግከው የመጠጥ ሰዓትህን ስለሚነካብህ ነዋ፡፡
  • አይሳሳቱ ክቡር ሚኒስትር፡፡
  • ስማ ታታሪ ሠራተኛ ብትሆንማ ኖሮ ቀን ተሌት ሠርተህ ሪፖርቱን ታዘጋጅ ነበር፡፡
  • ያሉት ሪፖርት እኮ እንዲህ ቀላል አይደለም?
  • ቅዳሜና እሑድ በመሥሪያ ቤት መኪና ደብረ ዘይት እንደምትዝናና አውቃለሁ፡፡
  • ምን ችግር አለው?
  • ከዚያም ባለፈ ፊልድ ስትወጣ ከሾፌሩ ጋር ተመሳጥረህ ከሰል ጭነህ እንደምትመጣም አውቃለሁ፡፡
  • አሁን ግራ እያጋቡኝ ነው ክቡር ሚኒስትር?
  • ለምንድነው ግራ የተጋባኸው?
  • ይኼ ሁሉ ከሪፖርቱ ጋር ምን አገናኘው?
  • ይገናኛል እንጂ፡፡
  • እኮ እንዴት?
  • ሪፖርቱን መሥራት ያልፈለግከው ለምን እንደሆነ እየነገርኩህ እኮ ነው፡፡
  • ክቡር ሚኒስትር ሪፖርቱ እኮ እንደ ድሮ ዝም ተብሎ ስለማይሠራ ነው፡፡
  • ታዲያ ከእኔ ምንድነው የምትፈልገው?
  • ሐሳብ እንዲያመነጩ ነዋ፡፡
  • ከዚህ በላይ ምን ዓይነት ሐሳብ ላመንጭልህ?
  • ለነገሩ እርስዎ ሐሳብ አመንጪ እንዳልሆኑ አውቃለሁ፡፡
  • ታዲያ ምንድነኝ?
  • አቃቂር አውጪ!

[ክቡር ሚኒስትሩ ከስብሰባ በኋላ የሻይ ዕረፍት ላይ ከሌላ ሚኒስትር ጋር እያወሩ ነው]

  • በሰላም ነው ክቡር ሚኒስትር?
  • አልገባኝም?
  • ማታ አመሹ እንዴ?
  • ምን ለማለት ፈልገህ ነው? መጠጥ እንደማልጠጣ ታውቃለህ አይደል?
  • ጤንነትዎስ ሰላም ነው?
  • ኧረ ፍጹም ጤነኛ ሰው ነኝ፡፡
  • አልመሰለኝም ክቡር ሚኒስትር?
  • ምን እያልክ ነው ሰውዬ?
  • ከጠዋት ጀምሮ ስብሰባው ላይ እያንቀላፉ እኮ ነው፡፡
  • ለምን አንከባበርም?
  • ይኸው ፎቶ አንስቼዎታለሁ፡፡
  • ማሸለብ ብርቅ ነው?
  • ኧረ ሙሉ ስብሰባውን ነው የተኙት፡፡
  • አሁን አንተ ንቁ ነኝ እያልክ ነው?
  • እኔማ ስብሰባው የእርስዎን መሥሪያ ቤት ስለሚመለከት ብዙ አስተያየት ይሰጣሉ ብዬ ጠብቄ ነበር፡፡
  • ስማ እኔ ተኝቼ ሳይሆን እያሰላሰልኩ ነበር፡፡
  • ኪኪኪ…
  • ምን ያስቅሃል?
  • ለማንኛውም ሁኔታዎን ሳየው እንዲያው የደከምዎት ይመስለኛል፡፡
  • ማን ነው የደከመው?
  • እርስዎ ነዎታ፡፡
  • ለዚህ ሥርዓት እኮ እኔ አድራጊ ፈጣሪ ነኝ፡፡
  • ክቡር ሚኒስትር አሁን ግን አድራጊ ፈጣሪ አይደሉም፡፡
  • እና ምንድነኝ?
  • ተጧሪ!