Skip to main content
x
ክቡር ሚኒስትሩ ከውጭ ከመጣ ደላላ ጋር ተገናኝተው እያወሩ ነው

ክቡር ሚኒስትሩ ከውጭ ከመጣ ደላላ ጋር ተገናኝተው እያወሩ ነው

[ክቡር ሚኒስትሩ የፋይናንስ ኃላፊውን ቢሯቸው ያስጠሩታል]

  • ፈለጉኝ ክቡር ሚኒስትር?
  • አሁን አንድ ወሳኝ ጉዞ አለኝ፡፡
  • ወደ ፊልድ ሊወጡ ነው ክቡር ሚኒስትር?
  • የምን ፊልድ ነው ወደ ውጭ ነው እንጂ?
  • ምን አሉኝ ክቡር ሚኒስትር?
  • ውጭ አገር ልሄድ ነው፡፡
  • የምን ውጭ አገር ነው ክቡር ሚኒስትር?
  • ስማ ዓለም ሁሉ የሚሰበሰብበት ቦታ ላይ ኢትዮጵያን ወክዬ ነው የምገኘው፡፡
  • ክቡር ሚኒስትር አንድ ሚኒስትር እንዴት ነው አገር ወክሎ ውጭ የሚሄደው?
  • ምን ዓይነት ንቀት ነው ያለብህ?
  • ኧረ እኔ ምንም ንቀት የለብኝም፡፡
  • እኔ ኢትዮጵያን ወክዬ ስንት ዓለም እንደዞርኩ አታውቅም?
  • አይ እኔማ በዓለም አቀፍ ደረጃ ኢትዮጵያን ወክለው መጓዝ ያለባቸው ጠቅላይ ሚኒስትሩ ናቸው ብዬ ነው፡፡
  • እኔ እኮ ስለማታውቀው ነገር ለምን እንደምትዘባርቅ ነው የሚገርመኝ፡፡
  • ይቅርታ ክቡር ሚኒስትር፡፡
  • ካላወቅክ ደግሞ መጠየቅ ይሻላል፡፡
  • ለማንኛውም ክቡር ሚኒስትር ወድጄ አይደለም እንደዚህ የምሆነው፡፡
  • የማዝህን ነገር ብቻ ለምን አትፈጽምም?
  • ቢያዙኝም እኔንም ያስጠይቀኛል፡፡
  • ማን ነው የሚጠይቅህ?
  • መመርያ የወጣበት ጉዳይ እኮ ነው፡፡
  • ስማ እኔ ሳዝህ አትሰማም ማለት ነው?
  • ክቡር ሚኒስትር ስለሚያስጠይቀኝ እኮ ነው?
  • ስለምን መመርያ ነው የምታወራው?
  • ውጭ አገር ዝም ብሎ መሄድ አይቻልም፡፡
  • ታዲያ እየጮህኩ ልሂድ?
  • ጉዞ ለአገሪቷ አስፈላጊነቱ በሚገባ መጣራት አለበት፡፡
  • ለአገሪቷማ በጣም አስፈላጊ ጉዞ ነው ስልህ?
  • ስለዚህ ከበላይ ትዕዛዝ ሊመጣልኝ ይገባል፡፡
  • የምን ትዕዛዝ?
  • ለእርስዎ አበል በዶላር እንድሰጥ ትዕዛዝ ሊሰጠኝ ይገባል፡፡
  • በቃ አንተም በእኔ ላይ አለቃ እየሆንክ ነው?
  • ክቡር ሚኒስትር እኔ እዚህ ያለሁት ላስፈጽም ነው፡፡
  • ምኑን?
  • መመርያውን!

[ክቡር ሚኒስትር ሌላ ሚኒስትር ጋ ይደውላሉ]

  • እንዴት ነው አገሪቷን እየመራን ያለነው?
  • ምነው ክቡር ሚኒስትር?
  • እኛን እየተበቀላችሁን ነው እንዴ?
  • የምን በቀል ነው ክቡር ሚኒስትር?
  • ስንቱን አይደል እንዴ እየፈታችሁ ያላችሁት?
  • ጥሩ አይደል እንዴ ክቡር ሚኒስትር?
  • ታዲያ እኛን ግን የቁም እስረኛ አደረጋችሁን፡፡
  • ምን ሆነው ነው ክቡር ሚኒስትር? ተረጋግተው ያስረዱኝ እስቲ?
  • ሰሞኑን አንድ ወሳኝ የሆነ የውጭ ጉዞ አለብኝ፡፡
  • ምን ዓይነት ጉዞ?
  • በቃ አገሪቷን በመላው ዓለም የሚያስተዋውቅ መድረክ ነው፡፡
  • ይኼማ ጥሩ ነው፡፡ ካቢኔ ላይ ያቅርቡትና ይወሰንበታ?
  • ይኼ ቢሮክራሲ እኮ ነው ያሰለቸኝ፡፡
  • የምን ቢሮክራሲ?
  • እኔ እንደ ሚኒስትርነቴ በዚህ ጉዞ ላይ እንኳን መወሰን አልችልም?
  • ክቡር ሚኒስትር ያኔ መመርያው ሲወጣ ዝም ብለው አሁን እንደዚህ የሚሆኑት ለምንድነው?
  • ለአንድ የውጭ ጉዞ መወሰን የማልችል ከሆነ ብለቅ ይሻለኛል፡፡
  • ምኑን ነው የሚለቁት?
  • ሚኒስትርነቱን፡፡
  • እሱማ ግልግል ነበር፡፡
  • እኔ እንኳን ልብህን ልየው ብዬ ነው እንጂ መቼም አለቅም፡፡
  • የት ለመጓዝ ነው ግን ይኼ ሁሉ ግርግር?
  • ዓለም የተሰበሰበበትና ኢትዮጵያን ላሳይ የምችልበት ቦታ ነው፡፡
  • እኮ የት ነው?
  • የዓለም ዋንጫ!

[ክቡር ሚኒስትሩ ፊታቸው ላይ በጣም የድካም ገጽታ ይታያል፡፡ ቢሯቸው ውስጥ ከአማካሪያቸው ጋር እያወሩ ነው]

  • ክቡር ሚኒስትር ፊትዎ ላይ በጣም የድካም ስሜት ይነበባል፡፡
  • ትናንትና እንቅልፍ አልተኛሁም ነበር፡፡
  • ምነው ክቡር ሚኒስትር?
  • የድሮ የአርሴናል ጨዋታዎችን በቲቪ ሳይ ነበር፡፡
  • ምን ተገኝቶ ክቡር ሚኒስትር?
  • አይ አሠልጣኙ ባለራዕይ ስለሆነ ታሪኩ ስለሚመስጠኝ ነው፡፡
  • ለነገሩ ጥሩ አሠልጣኝ ነበር፡፡
  • የሚገርምህ ምንም የማይታወቁ ተጫዋቾችን በዓለማችን ታዋቂ አድርጓቸዋል፡፡
  • ግን ለክለቡ ውድቀትም ተጠያቂ ነው ይባላል፡፡
  • እንዴት ማለት?
  • ማለት አርሴናል በፊት ከነበረው ዝናና አቋም አሁን ወርዷል፡፡
  • የጊዜ ጉዳይ ነው፡፡
  • ምን ማለት ነው?
  • ሁልጊዜ ልማታዊ ስትሆን በየመንገዱ የተለያዩ እንቅፋቶች ሊገጥሙህ ይችላሉ፡፡
  • ምን እያሉ ነው ክቡር ሚኒስትር?
  • ቬንገር ልማታዊ አሠልጣኝ ነው፡፡
  • ቡድኑን ለዚህ ውድቀት የዳረጉት ቬንገር ናቸው የሚሉም አሉ እኮ?
  • እነሱ አፍራሽ ኃይሎች ናቸው፡፡
  • ሰውዬው ጡረታ መውጣት በነበረባቸው ጊዜ አልወጣም ብለው ነበር፡፡
  • ምን እያልክ ነው?
  • ጓደኛቸው አሌክስ ፈርጉሰን በቃኝ ብለው ሲወጡ፣ ይኸው እሳቸው የሙጥኝ ብለው ነበር፡፡
  • እንደ እሱ ዓይነት የኳስ መሐንዲስ ጡረታ አልወጣም ቢል ምን ችግር አለው?
  • ለነገሩ የኢትዮጵያን ፖለቲካ ያስቸገረው ብዙ ቬንገሮች በመኖራቸው ነው፡፡
  • እንዴት?
  • ይኸው ብዙዎች ሥልጣን ላይ ለ20 ዓመታት የሙጥኝ ብለው አለቅም ብለዋል፡፡
  • በአሽሙር እኔን ለመናገር ፈልገህ ነው?
  • ይቅርታ አድርጉልኝና እርስዎም አንደኛው ቬንገር ነዎት፡፡
  • እ…
  • ይኸው ዴስክዎ ላይ እያንቀላፉ ለወጣቱ ሥልጣኑን ማሳለፍ አይፈልጉም፡፡
  • ምን?
  • ያደለውማ እንደ ቬንገር ሳይሆን እንደ ዚዳን በአጭር ቆይታው ሦስት ዋንጫ በልቶ ሥልጣኑን ይለቃል፡፡
  • ምን ለማለት ፈልገህ ነው?
  • ጡረታ ቢወጡ ጥሩ ነው፡፡
  • እኔማ ጡረታ መውጣት አልፈልግም፡፡
  • በፍላጎት ካላደረጉት በግዴታም ቢሆን ይወጣሉዋ፡፡
  • ስማ ከመንግሥት ፔሮል ብወጣም ከእንትኑ ግን አልወጣም፡፡
  • ከምኑ?
  • ከትግሉ!

[ክቡር ሚኒስትሩ በቅርቡ ከእስር ከተፈታ ባለሀብት ጋር ተገናኙ]

  • እንኳን ለቤትህ አበቃህ ወዳጄ፡፡
  • አመሰግናለሁ ክቡር ሚኒስትር፡፡
  • ሰላም ነህ ግን ወዳጄ?
  • ሰውን ማመን ቀብሮ ነው አሉ፡፡
  • ምነው?
  • እንዲያው አንድ ቀን እንኳን መጥተው አይጠይቁኝም?
  • አሁን እኔ ቂሊንጦ አካባቢ ብትይ ምን ሊፈጠር እንደሚችል እያወቅክ?
  • ሌላው ቢቀር እንዴት ቤተሰቤን አይጠይቁም?
  • አገሪቷ በደኅንነት የተሞላች አይደለች እንዴ?
  • ለማንኛውም ግን ቅር ብሎኛል፡፡
  • ምንም ቅር እንዳይልህ፡፡
  • ለምን ክቡር ሚኒስትር?
  • ለዚህ እንድትበቃ ያልፈነቀልኩት ድንጋይ የለም፡፡
  • ማለት?
  • በየጊዜው ዓቃቤ ሕጎቹንና ዳኞቹን ሳገኝ እንደተሟገትኩልህ ነው፡፡
  • ምን ብለው?
  • ፍጹም ንፁህ መሆንህን ነዋ፡፡
  • እሱን እንኳን ተውት፡፡
  • ስማ አምነስቲ ኢንተርናሽናል በል፣ ሂዩማን ራይትስ ዎች፣ ሪፖርተርስ ዊዝ አውት ቦርደርስ ብትል፣ ሁሉም ሲያነጋግሩኝ አንተ በፖለቲካ እንደታሰርክ ነበር የምነግራቸው፡፡
  • እኔ እኮ ጋዜጠኛ አይደለሁም፡፡
  • ያው ነው ኤንጂኦ ኤንጂኦ ነው፡፡
  • እና ከጎንህ ነበርኩ እያሉኝ ነው?
  • ይኼንን ማንንም መጠየቅ ትችላለህ?
  • ለማንኛውም ላደረጉልኝ ነገር በጣም አመሰግናለሁ፡፡
  • አንተም ግን ከእስር ቤት የወጣህ አትመስልም፡፡
  • እንዴት ክቡር ሚኒስትር?
  • በጣም ነዋ ያማረብህ፡፡
  • እሱን እንኳን ተውት ክቡር ሚኒስትር፡፡
  • እስር ቤት ራሱ ጥሩ ቦታ እንዲያስሩህ ለኃላፊዎቹ በተደጋጋሚ አስረድቻቸዋለሁ፡፡
  • አመሰግናለሁ ክቡር ሚኒስትር፡፡
  • እኔ እኮ አመጣጤም ላደረኩልህ ነገር ትክሰኛለህ ብዬ ነው፡፡
  • ምን ችግር አለው ክቡር ሚኒስትር?
  • ኧረ እባክህ?
  • በደስታ ነው እርስዎን የምክስዎት፡፡
  • ምን ልታደርግልኝ?
  • የምሰጥዎትን እኔ ነኝ የማውቀው፡፡
  • ምንድነው የምትሰጠኝ?
  • የነዳጅ!

[ክቡር ሚኒስትሩ ከውጭ ከመጣ ደላላ ጋር ተገናኝተው እያወሩ ነው]

  • ክቡር ሚኒስትር መንግሥት እያደረገው ያለው ለውጥ በጣም ያስደስታል፡፡
  • ማለት?
  • አገሪቷ ላይ እየነፈሰ ያለው የተስፋ ንፋስ ያስደስታል፡፡
  • ምን ማለት ነው?
  • እስረኞች እየተለቀቁ ነው፣ ፖለቲከኞች እየተፈቱ ነው፡፡ በዚህ ላይ ከመንግሥት ጋር የሚቃረኑ ፓርቲዎች ራሳቸው ጥሪ እየተደረገላቸው ነው፡፡
  • ከዚህ በኋላ እኛ ሰላምና ልማት ላይ ብቻ ነው የምናተኩረው፡፡
  • እኔም አገሬ የገባሁት ይህንን ተረድቼ ነው፡፡
  • ለመሆኑ ምንድነው የምትሠራው?
  • እኔ ፈረንጆቹ አገር የታወቅኩኝ ደላላ ነኝ፡፡
  • ኒዮሊብራል ነህ ማለት ነው?
  • እኔ አገር ወዳድ ሰው ነኝ፡፡
  • ለምንድነው የመጣሁት አልከኝ?
  • መጀመርያ ራሴን ለማሳደግ፣ ቀጥሎ ደግሞ አገሬን ለማሳደግ ነው፡፡
  • እሱስ ጥሩ ሐሳብ ነው፡፡
  • ክቡር ሚኒስትር ከእርስዎ ጋር ብዙ ሥራ መሥራት እፈልጋለሁ፡፡
  • ምን ዓይነት ሥራ?
  • እኔ ብዙ ኢንቨስተሮች ማምጣት እችላለሁ፣ እርስዎ ደግሞ እዚህ መሬቱንም ሆነ ሌላውን ማመቻቸት ይችላሉ፡፡
  • እኔ ምን እጠቀማለሁ?
  • እንዴ ክቡር ሚኒስትር በኮሚሽን እንጠቃቀማለን፡፡
  • ችግሩ እኮ አንተ ኒዮሊብራል መሆንህ ነው፡፡
  • ለምን ክቡር ሚኒስትር?
  • ኒዮሊብራል ሳይ ሰውነቴን ይወረዋል፡፡
  • እኔም እኮ አብዮታዊ ዴሞክራሲ የሚባለውን ነገር ሳስበው ሰውነቴን ይወረዋል፡፡
  • ምን እያልከኝ ነው?
  • እርስዎም አብዮታዊ ዴሞክራት እንደሆኑ፣ እኔም ኒዮሊብራል እንደሆንኩኝ መቀጠል እንችላለን፡፡
  • ለነገሩ አሁን በምትለው መንገድ መሥራት የምንችልበት ዕድል አለ፡፡
  • እንዴት?
  • ያው መንግሥታችንም አቅጣጫ አስቀምጦልናላ፡፡
  • የምን አቅጣጫ?
  • ከእኛ ጋር ከሚቃረኑ ፖለቲከኞች ጋር አብረን እንድንሠራ አቅጣጫ ስለሰጠን በዚያ መንገድ ማስኬድ እንችላለን፡፡
  • ምን እያሉኝ ነው ክቡር ሚኒስትር?
  • እኔና አንተም በዚህ መንገድ ነው የምንሠራው፡፡
  • በምን?
  • በጥምረት!