Skip to main content
x
የታክስና የጉምሩክ ጉዳዮችን የሚመለከቱ ከ15 በላይ መመርያዎች ይፋ ሊሆኑ ነው

የታክስና የጉምሩክ ጉዳዮችን የሚመለከቱ ከ15 በላይ መመርያዎች ይፋ ሊሆኑ ነው

አዳዲስና የተሻሻሉ ረቂቅ መመርያዎች ሊመከርባቸው ነው

የኢትዮጵያ ገቢዎችና ጉምሩክ ባለሥልጣን ከ15 በላይ አዳዲስ ረቂቆችና ማሻሻያ የተደረገባቸውን መመርያዎች ለመተግበር ዝግጅት እያደረገ ነው፡፡

ባለሥልጣኑ ከጉምሩክና ከታክስ አስተዳደር ጋር ተግባራዊ ያደርጋቸዋል ተብሎ በሚጠበቁት በእነዚህ አዳዲስ መመርያዎችና ማሻሻያዎች ላይ፣ ከንግድ ኅብረተሰቡ ጋር እንደሚመክርባቸው ተገልጿል፡፡ ተግባራዊ ይደረጋሉ ተብለው ከሚጠበቁ መመርያዎች ውስጥ፣ ያልተከፋፈለ ትርፍ ላይ የሚጣል ግብርን ለማስፈጸም የተዘጋጀው ረቂቅ ይገኝበታል፡፡ ይህ የረቂቅ መመርያ ያልተከፋፈለ ትርፍ ላይ ግብር እንዴት ሊጣል እንደሚችልና ተፈጻሚ እንደሚሆን የሚደነግግ ነው ተብሏል፡፡

የካፒታል ሀብቶችን በማስተላለፍ በሚገኝ ጥቅም ላይ ስለሚከፈል ግብር አፈጻጸም አዲስ ረቂቅ መመርያ ላይ ምክክር ከተደረገበት በኋላ፣ በአጭር ጊዜ ውስጥ ተግባራዊ ይሆናል ተብለው ከሚጠበቁት ውስጥ ተካቷል፡፡

በቅድመ ግብር ክፍያ ሥርዓት አፈጻጸምና በተቀናሽ ወጪዎች ላይ የወጣው አዲስ ረቂቅ መመርያም በገንዘብና ኢኮኖሚ ትብብር ሚኒስቴር መሰናዳቱ ታውቋል፡፡

ከዚህም በተጨማሪ የታክስ አስተዳደር ቅጣት አነሳስ ረቂቅ መመርያ፣ የግምት ታክስ ሥሌት አፈጻጸም ረቂቅ መመርያ፣ ከውጭ ምንዛሪ ግብይት የተገኘ ጥቅም ወይም የደረሰ ኪሳራ የሚሠላበት አሠራር ረቂቅ መመርያ ውይይት ተደርጎባቸው ተግባራዊ ይሆናሉ ተብለው ከሚጠበቁ ረቂቅ መመርያዎች ውስጥ ይገኙበታል፡፡ የታክስ ክፍያ ጊዜ ማራዘሚያ፣ የደረሰኝ አስተዳደር፣ የሒሳብ መዝገብና ሰነድ አያያዝ ሥርዓትን ለመወሰን ረቂቅ መመርያዎች ተሰናድተዋል፡፡

ምክክር ከተደረገባቸው በኋላ በአጭር ጊዜ ተግባራዊ ይሆናሉ ተብለው ከሚጠበቁት መመርያዎች መካከል አንዱ የሆነው ስለተቀናሽ ወጪዎች የወጣው ረቂቅ መመርያ፣ ቀድሞ የነበረውን መመርያ በማሻሻል የሚወጣ መሆኑ ታውቋል፡፡ እንደ አዲስ ከተሰናዱት ውስጥ ደግሞ ቅጥር ሠራተኞች ቀጣሪ መሥሪያ ቤታቸው ታክስ ስለመክፈላቸው የሚያረጋግጥ ደረሰኝ እንዲሰጥ የሚያስገድድ ረቂቅ መመርያ ይገኝበታል፡፡

ሌላው አዲስ ረቂቅ መመርያ ነው የተባለው ደግሞ ግብር ከፋዮችን ወክሎ ከጉምሩክ ባለሥልጣን ጋር መደራደር የሚያስችለውን አሠራር የሚፈጥር ነው የተባለው፣ ‹‹የታክስ ወኪልነት ፈቃድ አሰጣጥ ለመወሰን የወጣ ረቂቅ አዋጅ››ም ይመከርበታል ተብሏል፡፡  

እነዚህን ከ15 በላይ የሚሆኑት ማሻሻያ የተደረገባቸውና አዳዲስ ረቂቅ መመርያዎች ይዘት ለኢትዮጵያ ንግድ ምክር ቤት የደረሰ ሲሆን፣ ማክሰኞ ሰኔ 5 ቀን 2010 ዓ.ም. ውይይት ይደረግበታል ተብሎ ይጠበቃል፡፡ በዚህ የውይይት መድረክ ላይ ላይ 100 ያህሉ የግሉ ዘርፍ ተወካዮች ይገኛሉ ተብሏል፡፡ እነዚህ ረቂቅ መመርያዎች በባለሥልጣኑና በገንዘብና ኢኮኖሚ ትብብር ሚኒስቴር የተዘጋጁ ናቸው፡፡

በአሁኑ ወቅት የኢትዮጵያ ገቢዎችና ጉምሩክ ባለሥልጣን እንደ ማስፈጸሚያ የሚጠቀምባቸው ከ350 በላይ የተለያዩ አዋጆች፣ መመርያዎች፣ ደንቦችና ሰርኩላሮች እንዳሉት ሐሙስ ግንቦት 30 ቀን 2010 ዓ.ም. በንግዱ ኅብረተሰብና በባለሥልጣኑ መካከል ተደርጎ በነበረ ውይይት ላይ ተገልጿል፡፡