Skip to main content
x

አነስተኛና መካከለኛ የኢንዱስትሪ ፓርኮችን ለማስፋፋት የተያዘው ዕቅድ የበጀት ችግር ገጠመው

ፕሮጀክቶቹን ዕውን ለማድረግ 9.7 ቢሊዮን ዶላር ይጠይቃል

ከግዙፍ ኢንዱስትሪ ፓርኮች ጋር ተመጋጋቢ የሚሆኑ አነስተኛና መካከለኛ ኢንዱስትሪ ፓርኮችን በሁሉም የአገሪቱ ክልሎች ለማቋቋም የተቀረፀው ፕሮጀክት፣ የሚጠይቀውን ፋይናንስ ማግኘት አለመቻሉ ታወቀ። በፌዴራል መንግሥት የተቀረፀው ይህ ፕሮጀክት በባለቤትነት ተግባራዊ እንዲሆን የሚፈለገው በክልል መንግሥታት ነው፡፡

የፌዴራል መንግሥት ፋይናንስ በማፈላለግና የቴክኒክ ድጋፍ በማድረግ ቅድሚያ ተሰጥቶ ተግባራዊ እንዲሆን በጋራ ተወስኖ እንቅስቃሴ ቢጀመርም፣ ፕሮጀክቶቹን ለመፈጸም በአገር ውስጥ የበጀት ምንጭ ለማከናወን አዳጋች ሆኗል፡፡ ሌሎቹ የፋይናንስ ምንጮች ማለትም የውጭ ብድርና የውጭ መንግሥታት ድጋፍ ለማግኘት አገሪቱ የገባችበት ከፍተኛ የውጭ ብድር ጫና እክል መፍጠሩን፣ ለጉዳዩ ቅርበት ያላቸው የሪፖርተር ምንጮች ገልጸዋል።

አነስተኛና መካከለኛ ኢንዱስትሪ ፓርኮችን 34 የአገሪቱ አካባቢዎች ለማቋቋም ማስተር ፕላን መቀረፁን የሚናገሩት ምንጮች፣ የኢንዱስትሪ ፓርኮቹም በተለያየ የይዞታ መጠን እንዲገነቡ ዕቅድ መያዙን ገልጸዋል። በዚህም መሠረት የኢንዱስትሪ ፓርኮቹ 50 ሔክታር፣ 100 ሔክታርና 250 ሔክታር ይዞታ ላይ እንዲገነቡ ረቂቅ የግንባታ ዲዛይን መዘጋጀቱን፣ በኢንዱስትሪ ሚኒስቴር የተቀጠረ የውጭ አማካሪ ባደረገው ጥናትም የታቀዱትን ፕሮጀክቶች ዕውን ለማድረግ በአጠቃላይ 9.7 ቢሊዮን ዶላር እንደሚያስፈልግ ተረጋግጧል። ከዚህ አጠቃላይ ወጪ ውስጥ የመጀመርያውን ምዕራፍ ለማስጀመር 2.3 ቢሊዮን ዶላር የሚያስፈልግ መሆኑን ምንጮች ገልጸዋል።

ይሁን እንጂ ለመጀመርያው ምዕራፍ የሚያስፈልገውን ወጪ በአገር ውስጥ መሸፈን የማይቻል መሆኑን፣ ይኼንን ፕሮጀክት ለማስፈጸም የተቋቋመው ብሔራዊ ኮሚቴ በመገምገም ለጠቅላይ ሚኒስትሩ ማሳወቁን ይገልጻሉ። ሆኖም ፕሮጀክቶቹ የአገሪቱን ኢኮኖሚ ለማስቀጠል ወሳኝ በመሆናቸው ክልሎች ከዓመታዊ በጀታቸው ላይ ቅድሚያ በመስጠት ወደ ትግበራ እንዲገቡ በኮሚቴው ተገምግሞ አቅጣጫ መሰጠቱን፣ ተጨማሪ የፋይናንስ ፍላጎትን በተመለከተ የፌዴራል መንግሥት ከውጭ አጋሮች በየዓመቱ ለዘላቂ ልማት ግቦች (SDG) ማስፈጸሚያ የሚያገኘው ድጋፍ ለዚህ ፕሮጀክት ማስፈጸሚያ እንዲውል ውሳኔ እንዲሰጥበት፣ ለአገሪቱ ከፍተኛ አመራር መቅረቡን ምንጮች ገልጸዋል።

ለፕሮጀክቱ የሚያስፈልገው ፋይናንስ በውጭ ምንዛሪ ነው፡፡ አገሪቱ ደግሞ በገጠማት የውጭ ብድር ጫናና እያሽቆለቆለ በሚገኘው የውጭ ምንዛሪ ገቢ ሳቢያ አዙሪት ውስጥ መግባቷ ይታወቃል። በዚህም የተነሳ አዳዲስ የውጭ ብድሮችን ለማግኘት አለመቻሉ፣ በሌላ በኩል ደግሞ የውጭ ብድር የመክፈል ግዴታ ውስጥ መግባቷ በአጠቃላይ ለአገሪቱ ኢኮኖሚ አሳሳቢ ሁኔታን ፈጥሯል። የብሔራዊ ፕላን ኮሚሽነር ይናገር ደሴ (/) በዚህ ሳምንት ይፋ እንዳደረጉት፣ አገሪቱ ለቀጣይ ሁለት ዓመታት ብድር ለመክፈል ስድስት ቢሊዮን ዶላር፣ እንዲሁም የመንግሥት ፕሮጀክቶችን ለሁለት ዓመታት ለማከናወን ደግሞ ሰባት ቢሊዮን ዶላር ያስፈልጋታል። ይህ እንደ ነዳጅና ሌሎች የፍጆታ ሸቀጦችን ለማስገባት፣ ሌሎች የውጭ ምንዛሪ አቅርቦት የሚጠይቁ ዘርፎችን እንደማያካትት አስረድተዋል። መንግሥት እንደ ኢትዮጵያ አየር መንገድ፣ ኢትዮ ቴሌኮምና ሌሎች ግዙፍ ኩባንያዎቹን ለመሸጥ የወሰነበት ምክንያትም ከገጠመው አስቸጋሪ ሁኔታ ለመውጣት እንደሆነ ገልጸዋል።