Skip to main content
x
የኤሌክትሪክ ኃይል ድንገት ጠፍቶ ለቀናት መቆየትና መቆራረጥ ነዋሪዎችን እያማረረ ነው
ያረጁ የኤሌክትሪክ ኃይል መስመሮችን በአዲስ ለመተካት ባለመቻሉ ለዝናብና ለንፋስ በቀላሉ እንዲጋለጡ እያደረጋቸው ነው

የኤሌክትሪክ ኃይል ድንገት ጠፍቶ ለቀናት መቆየትና መቆራረጥ ነዋሪዎችን እያማረረ ነው

ከቅርብ ወራት ወዲህ የኤሌክትሪክ ኃይል በድንገት ጠፍቶ ለቀናት በመቆየቱና የኃይል መቆራረጡ በመደጋገሙ መማረራቸውን፣ የአዲስ አበባ ከተማ ነዋሪዎች ለሪፖርተር ገለጹ፡፡

የኤሌክትሪክ ኃይል እንደሚጠፋና እንደሚቆራረጥ ያመነው የኢትዮጵያ ኤሌክትሪክ አገልግሎት፣ ምክንያቶቹ ሁለት መሆናቸውን ገልጿል፡፡ ነባሩን ኔትወርክ ወይም የኤሌክትሪክ መስመር ወደ አዲስ የኤሌክትሪክ ኃይል መስመር የመቀየር ሥራ እየተካሄደ ስለሆነ፣ በወቅቱ ከባድ ዝናብና ንፋስ ሳቢያ ያረጁ የኤሌክትሪክ ኃይል መስመር ተሸካሚ ምሰሶዎች በመውደቃቸው መሆኑን አስረድቷል፡፡

በኤሌክትሪክ ኃይል መጥፋትና መቆራረጥ መማረራቸውን የገለጹት የየካ ክፍለ ከተማ ነዋሪዎች አቶ ትዕግሥቱ በቀለ፣ አቶ ተመስገን ጉርሜሳና ወ/ሮ ፀዳለ ገብራይ፣ በድንገት ተቋርጦ ከሁለት እስከ አምስት ቀናት ስለሚቆይ በፍሪጅ የሚቀመጡ መድኃኒቶች፣ የሕፃናት ምግቦችና የተለያዩ ነገሮች እንደሚበላሹ አስረድተዋል፡፡ በተለይ በጋራ ቤቶች (ኮንዶሚኒየም) ውስጥ የሚኖሩ፣ ማንኛውንም ነገር የሚሠሩት በኤሌክትሪክ ኃይል በመሆኑ፣ ለቀናት ተቋርጦ ሲቆይ ከፍተኛ ችግር እየገጠማቸው መሆኑን አስረድተዋል፡፡

አቶ ወንድምየ ስለሺ የተባሉ የሆቴል ባለቤትም እንደገለጹት፣ በፍሪጅ የሚቀመጡና የሚበስሉ ምግቦችን ለደንበኞቻቸው እንደ ልብ ባለማቅረባቸው ከፍተኛ ችግር ላይ መሆናቸውን አስረድተዋል፡፡ በድንገት የተቋረጠው የኤሌክትሪክ ኃይል በድንገት ሲለቀቅ ብዙ ንብረቶችን እያቃጠለባቸው መሆኑን የገለጹት ወ/ሮ ፀዳለ፣ የሚመለከተው ተቋም ቢያንስ ኃይል ሲለቅ እንኳን ተመጣጣኝ ቢያደርገው ወይም ለሕዝቡ በሚዲያ ቢያሳውቅ ከሁለቱ ጉዳቶች በአንዱ ሊድኑ ይችሉ እንደነበር አስታውቀዋል፡፡

በሁሉም ክፍላተ ከተሞች ተመሳሳይ ችግር መኖሩን ነዋሪዎች እየገለጹ ነው፡፡ በተለይ የሆቴል፣ የዳቦ ቤቶች፣ የአነስተኛ ማምረቻዎችና ሌሎችም በኤሌክትሪክ ኃይል የሚሠሩ ነዋሪዎች ተመሳሳይ ችግር እየገጠማቸው መሆኑን ተናግረዋል፡፡ በመሆኑም የሚመለከተው የመንግሥት አካልና ተቋም ለጉዳዩ ትኩረት ሰጥቶ አስቸኳይ ምላሽ እንዲሰጣቸው ጠይቀዋል፡፡

ነዋሪዎች ያነሱትን ቅሬታ በሚመለከት ምላሽ እንዲሰጡ ሪፖርተር ያነጋገራቸው በቅርቡ የኢትዮጵያ ኤሌክትሪክ አገልግሎት ዋና ሥራ አስፈጻሚ ሆነው የተመደቡት አቶ ሽፈራው ተሊላ፣ ነዋሪዎቹ ያነሱት ጥያቄ ትክክል መሆኑን ገልጸዋል፡፡ ዋና ሥራ አስፈጻሚው እንደገለጹት፣ ችግሩ እየተፈጠረ ያለው በሁለት ምክንያቶች ነው፡፡ አንደኛው ያረጁ የኤሌክትሪክ መስመሮች (ኔትወርክ) እየተቀየሩ በመሆኑ ነው፡፡ ሁለተኛው ደግሞ ከፍተኛ የሆነ ንፋስና ዝናብ ያረጁ መስመር ተሸካሚ ምሰሶዎችን እንዲወድቁ በማድረጉ መሆኑን አስረድተዋል፡፡

ሁሉንም ችግሮች ለመፍታት ተቋሙ ሌት ከቀን እየሠራ መሆኑን ጠቁመው፣ ኔትወርኩን ለማሳደግና ችግሩን እስከ መጨረሻው ለመፍታትም ፓወር ቻይና የተባለው ኩባንያ የመስመር ዝርጋታውን በማጠናቀቅ ላይ መሆኑን አቶ ሽፈራው ገልጸዋል፡፡ ኩባንያው ፕሮጀክቱን አጠናቆ የሚያስረክብበት ጊዜ የተጠናቀቀ ቢሆንም፣ እስካሁን አለማጠናቀቁንና ይኼንንም በሚመለከት ተቋሙ በቅርቡ ገምግሞ ለሕዝብ ይፋ እንደሚያደርግ አስታውቀዋል፡፡