Skip to main content
x
ሲያወዛግብ የቆየው የአሠሪዎች ኮንፌዴሬሽን ጉዳይ እልባት አገኘ
አቶ ጌታሁን ሁሴን

ሲያወዛግብ የቆየው የአሠሪዎች ኮንፌዴሬሽን ጉዳይ እልባት አገኘ

በአምስት ፌደሬሽኖች የተመሠረተው ፌዴሬሽን ዕውቅና ተሰጠው

ብዥታ ያስነሳውና በአንድ ቀን ልዩነት በተመሳሳይ ስያሜ ሁለት የአሠሪዎች ኮንፌዴሬሽን የተመሠረቱበት ክስተት መዘገቡ አይዘነጋም፡፡ ሁለቱም ኮንፌዴሬሽኖች ኢትዮጵያ አሠሪዎች ኮንፌዴሬሽን የሚባሉ ነገር ግን በተለያዩ አደራጆች ይፋ የተደረጉ ነበሩ፡፡

አንደኛው ኮንፌዴሬሽን ስለመመሥረቱ ይፋ የተደረገው ግንቦት 15 ቀን 2010 ዓ.ም. ሲሆን፣ ይህንን ኮንፌዴሬሽኑን የመሠረቱትም ስድስት የአሠሪዎች ፌዴሬሽኖች ስለመሆናቸው ተገልጾ መዘገቡ ይታወሳል፡፡ በዚህኛው ኮንፌዴሬሽን ምሥረታ ሥነ ሥርዓት ላይ የተገኙት የኮንፌዴሬሽኑ አባላት፣ ለመጪዎቹ ሦስት ዓመታት በፕሬዚዳንትነት፣ በተቀዳሚ ምክትል ፕሬዚዳንትነትና በሥራ አመራር ቦርድ አባልነት የሚያገለግሏቸውን 11 አመራሮችን መርጠዋል፡፡ አቶ ጌታሁን ሁሴን (ኢንጂነር) ፕሬዚዳንት ሆነው እንዲሠሩ ተመርጠዋል፡፡

ስድስት ፌዴሬሽኖችን አካቶ የተመሠረተው ይህ ኮንፌዴሬሽን ይፋ ከመደረጉ አንድ ቀን ቀደም ብሎ ግን፣ የኢትዮጵያ አሠሪዎች ፌዴሬሽን የኢትዮጵያ አሠሪዎች ኮንፌዴሬሽን እንዳቋቋመ ማስታወቁም አይዘነጋም፡፡ በኢትዮጵያ አሠሪዎች ፌዴሬሽን ፕሬዚዳንት አቶ ታደለ ይመር ተጠንስሶ ድንገት ስለመመሥረቱ የተሰማው ይኼኛው ኮንፌዴሬሽን፣ ግንቦት 15 ቀን 2010 ዓ.ም. እንደተቋቋመ የተገለጸውም የአሠሪዎች ፌዴሬሽን 65ኛ ዓመቱን ባከበረበት ሥነ ሥርዓት ወቅት ነበር፡፡ ፌዴሬሽኑ 65ኛ ዓመቱን የሚያከብረው የኢትዮጵያ አሠሪዎች ኮንፌዴሬሽን በተመሠረተ ማግስት ነው በሚል እሳቤ እንደነበርም የተደረገ ስለመሆኑም ሲገለጽ ነበር፡፡

ስድስት ፌዴሬሽኖችን በማካተትና የሚመለከታቸውን መንግሥታዊና ሌሎች የአገር ውስጥና የውጭ ድርጅቶችን በመጋበዝ ምሥረታው ይፋ የተደረገው አዲሱ ኮንፌዴሬሽን፣ በምሥረታው ውስጥ እንዲካተት ለኢትዮጵያ አሠሪዎች ፌደሬሽን ጥሪ ማድረጉን፣ ይሁንና ፌደሬሽኑ በራሱ መንገድ በመጓዝ ሌላ ተመሳሳይ ስያሜ ያለውን ኮንፌዴሬሽን ስለመመሥረቱ ይፋ ባደረገበት ወቅት ብዥታ ተፈጥሮ እንደነበር ይታወሳል፡፡ ተመሳሳይ ስያሜ ይዘው ለምሥረታ የተነሱት ሁለቱ ኮንፌደሬሽኖች ጉዞ እንዴት ሊታይ ይገባዋል ለሚለው ጉዳይ መቋጫ የሚሰጠው፣ እንዲህ ላሉ ተቋማት ዕውቅና የሚሰጠው የሠራተኛና ማኅበራዊ ጉዳይ ሚኒስቴር በመሆኑ የሚኒስቴሩን ምላሽ መጠበቅ ግድ ብሎ ሰንብቷል፡፡ በአንድ ቀን ልዩነት ስላቋቋሙት ኮንፌዴሬሽን መረጃ የሰጡት በአቶ ጌታሁንና በአቶ ታደለ የሚመሩት ሁለቱ ወገኖች፣ ኮንፌዴሬሽኖቻቸው ዕውቅና እንዲሰጣቸው ማመልከቻ በማስገባት ውሳኔ ሲጠብቁ ቆይተዋል፡፡

ከሁለቱም ወገኖች የቀረቡትን ማመልከቻዎች ሲመለከት መቆየቱ የተጠቀሰው የሠራተኛና ማኅበራዊ ጉዳይ ሚኒስቴርም ግንቦት 15 ቀን 2010 ዓ.ም. ስድስት ፌዴሬሽኖችን አካቶ መቋቋሙን ላሳወቀውና በአቶ ጌታሁን ለሚመራው የኢትዮጵያ አሠሪዎች ኮንፌዴሬሽን ዕውቅና ሰጥቷል፡፡

በሠራተኛና ማኅበራዊ ጉዳይ ሚኒስትሯ ሒሩት ወልደ ማርያም (ዶ/ር) ተፈርሞ ሰኔ 1 ቀን 2010 ዓ.ም. የወጣው ደብዳቤ የሚከተለውን አስፍሯል፡፡ ‹‹የኢትዮጵያ የአስፈጻሚ አካላትን ሥልጣንና ተግባር ለመወሰን ባወጣው አዋጅ ቁጥር 916/2008 አንቀጽ 34 እና በአሠሪና ሠራተኛ ጉዳይ አዋጅ 377/96 መሠረት ኮንፌዴሬሽኑ ሕጋዊ ሆኖ የተመዘገበ መሆኑን እናሳውቃለን፤›› ይላል፡፡  

የሚኒስትሯ ደብዳቤ የምዝገባ ሠርተፊኬቱንም በአባሪነት አያይዞ መላኩን ይጠቅሳል፡፡ ኮንፌዴሬሽኑ ሕጋዊ ምዝገባ እንዳደረገ ለዚህም ማረጋገጫ ሠርተፊኬት ከሚኒስቴሩ መረከቡን፣ የኢትዮጵያ አሠሪዎች ኮንፌዴሬሽን ፕሬዚዳንት አቶ ጌታሁን ለሪፖርተር ገልጸዋል፡፡ ከዕውቅና ሠርተፊኬቱ በተጨማሪም በምሥረታው ወቅት ኮንፌዴሬሽኑ በፕሬዚዳንትነት፣ በተቀዳሚ ምክትል ፕሬዚዳንትነትና በሥራ አሠራር ቦርድ አባልነት የመረጣቸውን አሥራ አንድ አባላት የምርጫ ውጤት ተቀብሎ እስከ ግንቦት 2014 ዓ.ም. ድረስ በአመራርነት እንዲያገለግሉ ፈቃድ መስጠቱን ሚኒስቴሩ ለኮንፌዴሬሽኑ በላከው ደብዳቤ አስታውቋል፡፡

በተመሳሳይ ስያሜ ግንቦት 14 ቀን 2010 ዓ.ም. ስለመቋቋሙ አስታውቆ የነበረውና በአቶ ታደለ የሚመራው ኮንፌዴሬሽን፣ በአቶ ጌታሁን የሚመራው ኮንፌዴሬሽን ዕውቅና ያገኘበት በመሆኑ በተመሳሳይ ስያሜ መጠቀም እንደማይችል ታውቋል፡፡

የኢትዮጵያ አሠሪዎች ፌዴሬሽን፣ የኢትዮጵያ ሆቴልና መሰል አገልግሎት አሠሪዎች ፌዴሬሽን፣ የኢትዮጵያ ጥቃቅን፣ አነስተኛና መካከለኛ ኢንተርፕራይዞች አሠሪዎች ፌዴሬሽን፣ የኢትዮጵያ ከተሞች ውኃና ፍሳሽ አገልግሎት አሠሪዎች ፌዴሬሽን፣ የአማራ ክልል አሠሪዎች ፌዴሬሽን፣ እንዲሁም የአዲስ አበባ ከተማ አሠሪዎች ፌዴሬሽን የሚባሉት ተቋማት በአሁኑ ወቅት በኢትዮጵያ ሕጋዊ ዕውቅና አግኝተውና በአሠሪዎች ማኅበራት ተወክለው የሚንቀሳቀሱ ስለመሆናቸው ይታወቃል፡፡ ከእነዚህ ፌዴሬሽኖች ውስጥ በምሥረታ ቀዳሚው እንደሆነ የሚነገርለት የኢትዮጵያ አሠሪዎች ፌዴሬሽን ሲሆን፣ ቀሪዎቹ የዚህን ፌዴሬሽን ተከትለው የመጡ ናቸው፡፡ በአሁኑ ወቅትም ሦስት የአሠሪዎች ፌዴሬሽኖች በምሥረታ ላይ እንደሚገኙ ለማወቅ ተችሏል፡፡