Skip to main content
x
ለክቡር ሚኒስትሩ በቅርቡ ከእስር የተፈታ ደላላ ይደውልላቸዋል

ለክቡር ሚኒስትሩ በቅርቡ ከእስር የተፈታ ደላላ ይደውልላቸዋል

[ለክቡር ሚኒስትሩ ሌላ ሚኒስትር ስልክ ይደውሉላቸዋል]

  • ሰላም ክቡር ሚኒስትር፡፡
  • እንዴት ነህ ወዳጄ?
  • ምንድነው እየተካሄደ ያለው ክቡር ሚኒስትር?
  • ደግሞ ምን ተካሄደ?
  • እንደ አዲስ ማገርሸት ጀመረ እኮ?
  • ምኑ ነው እንደ አዲስ ያገረሸው?
  • ሚዲያ አይከታተሉም እንዴ ክቡር ሚኒስትር?
  • ሰውዬ እኔ የዓለም ዋንጫ ከጀመረ በኋላ ከእሱ ውጪ ምንም ነገር አልከታተልም፡፡
  • እየቀለዱ ነው ክቡር ሚኒስትር?
  • በዓለም ዋንጫ ቀልድ የለም፡፡
  • እርስዎ እኮ የአገር አመራር ነዎት?
  • ብሆንስ ታዲያ?
  • ጊዜዎን በንባብና በምርምር በማሳለፍ ለሕዝቡ አቅጣጫ መስጠት ሲገባዎት፣ የእግር ኳስ እያዩ ጊዜዎን ያጠፋሉ?
  • ሰውዬ እንዳትሳሳት፡፡
  • ክቡር ሚኒስትር ሳላውቅ የእግር ኳስ አሠልጣኝ ሆኑ እንዴ?
  • ስማ ከእግር ኳስ ብዙ የምንማረው ነገር አለ፡፡
  • ማለት?
  • አየህ አሥራ አንድ ተጨዋቾች እንዴት ለጋራ ግብ እንደሚሠሩ ብዙ የምንማርበት መድረክ ነው፡፡
  • ኧረ ይተው ክቡር ሚኒስትር?
  • በዚያ ላይ ደግሞ እግር ኳሳችን የወደቀ በመሆኑ እንዴት ማንሳት እንደምንችል የምንማርበት መድረክ ነው፡፡
  • ምን አሉኝ ክቡር ሚኒስትር?
  • ኳሳችንን ለማሳደግ ሙሉ የዓለም ዋንጫውን መመልከት አለብኝ፡፡
  • ክቡር ሚኒስትር መስመር ግን እየሳቱ ይመስለኛል፡፡
  • ያልገባኝ ነገር ግን ብላችሁ ብላችሁ ኳስ አትይ ልትሉኝ ነው?
  • ክቡር ሚኒስትር ኳስ ከማየት ይልቅ ሊሠሯቸው የሚገቡ በርካታ ሥራዎች አሉ፡፡
  • እኔ ግን እንዲያውም የፈለግኩት እዚያው ሩሲያ ሄዶ ማየት ነበር፡፡
  • እ. . .
  • ይኸው ዶላር የለም ምናምን በሚል ተልካሻ ምክንያት ነው ያስቀራችሁኝ፡፡
  • እኔ የሚገርመኝ በዚህ አቅምዎ እዚህ ኃላፊነት ላይ መቀመጥዎ ነው?
  • ለመሆኑ አንተን ማን ነው ደረጃ መዳቢ ያደረገህ?
  • ለማንኛውም ግን አገሪቱ ውስጥ እየተፈጸሙ ያሉ ነገሮች አሳስበውኛል፡፡
  • ምኑ ነው ያሳሰበህ?
  • ይኸው እንደገና ብጥብጥና ግጭቱ አገርሽቷል አይደል እንዴ?
  • የምን ግጭት ነው?
  • ደቡብ ክልል ግጭት ተከስቷል አይደል እንዴ?
  • ምን?
  • ሰዎች ሞተዋል እኮ?
  • ስማ ድሮ አገሪቱ ላትበጠበጥ ትችላለች ብለህ ታስብ ነበር?
  • ምን እያሉ ነው?
  • መጀመርያውኑ እኔ ይቅር ተው ብልም የሚሰማኝ አጥቼ እኮ ነው?
  • አልገባኝም ክቡር ሚኒስትር?
  • ይኼ ሁሉ አሸባሪ ተፈቶ አገር እንዴት ሰላም ይሆናል?
  • ምን እያሉ ነው ክቡር ሚኒስትር?
  • መጀመርያውኑ እኔ አይፈቱ ብዬ የተከራከርኩት ለዚህ ነው፡፡
  • አሁን ወደ ኋላ የማንመለስበት አዲስ ምዕራፍ ውስጥ ነን ያለነው፡፡
  • የአዲሱን ምዕራፍ ውጤትማ ይኸው እያየነው ነው፡፡
  • ክቡር ሚኒስትር ሰዎቹ የተለቀቁት እኮ በአገሪቱ ውስጥ ሰላም ለማስፈን ነው፡፡
  • አሸባሪ እየለቀቁ የምን ሰላም ነው?
  • ክቡር ሚኒስትር እነዚህ ሰዎች አሸባሪዎች ለመሆናቸው ምን ማስረጃ አለዎት?
  • ማስረጃ ስንፈልግ እኮ ነው አገሪቱ የተዘረፈችው፡፡
  • ለማንኛውም ክቡር ሚኒስትር ሕዝቡን አሸባሪ ነው ማለት ከባድ ይመስለኛል፡፡
  • ታዲያ ማን ነው አሸባሪ?
  • እኛው!

[ለክቡር ሚኒስትሩ በቅርቡ ከእስር የተፈታ ደላላ ይደውልላቸዋል]

  • ክቡር ሚኒስትር እናንተ ግን ታጥቦ ጭቃ ናችሁ?
  • ምን እያልክ ነው?
  • አድሮ ቃሪያ ናችሁ እያልኩ ነው፡፡
  • ምንም አልገባኝም?
  • አገር ተሻሻለ ስንል ጭራሽ ብሶባችሁ ቁጭ ይላለ እንዴ?
  • ምን ሆነህ ነው?
  • ይኼ መንግሥት የፍቅር መንግሥት ሆኗል ብለን ሳንጨርስ እንዴት ታሳፍሩናላችሁ?
  • የፍቅር መንግሥት ስለመሆናችን ትጠራጠራለህ?
  • በሚገባ እንጂ ክቡር ሚኒስትር፡፡
  • የፍቅር መንግሥት ስለሆንን አይደል እንዴ አንተን የፈታንህ?
  • ግን ምን ያደርጋል ክቡር ሚኒስትር?
  • እንዴት ማለት?
  • ይኸው ይቺ አገር ብዙ ተስፋ አላት ብዬ ገና ከእስር እንደወጣሁ ስንትና ስንት ፕሮጀክቶች ነድፌ ለመንቀሳቀስ እያሰብኩ ነበር፡፡
  • ይኼማ የሚበረታታ እንቅስቃሴ ነው፡፡
  • ታዲያ ምን ያደርጋል ክቡር ሚኒስትር?
  • ምን ሆንክ?
  • ያ ሁሉ መነቃቃቴ ላይ ቀዝቃዛ ውኃ እኮ ነው የቸለሳችሁብኝ፡፡
  • ማን ነው የቸለሰብህ?
  • ሰሞኑን ጠቅላይ ሚኒስትሩ ያሉትን አልሰሙም እንዴ?
  • ያው እሳቸው ብዙ ነገር ስለሚያወሩ ስለየትኛው ነው የምትለኝ?
  • ለፓርላማ ሪፖርታቸውን ያቀረቡ ቀን ሰው ሁሉ ኳሱን ትቶ እሳቸውን ሲያይ እኔም መከታተል ጀመርኩ፡፡
  • የፓርላማው ውይይት ጥሩ ነበር አይደል?
  • ክቡር ሚኒስትር እኔማ በንዴት ቲቪውን ልሰብረው ነበር፡፡
  • ለምን?
  • ስለእኔ ነበር እኮ ሲያወሩ የነበሩት፡፡
  • ስለአንተ ደግሞ ምን አሉ?
  • ይቅርታ የተደረገላቸው ሙሰኞች ዳግመኛ ሊታሰሩ ይችላሉ አሉ እኮ?
  • ታዲያ አንተ ንፁህ አይደለህ እንዴ?
  • ክቡር ሚኒስትር እሱንማ እኔም እርስዎም ጠንቅቀን እናውቀዋለን፡፡
  • ምኑን?
  • ምን ያህል በሙስና የተጨማለቅኩ መሆኔን ነዋ?
  • እሱማ ይታወቃል፡፡
  • ክቡር ሚኒስትር እኔ እኮ ብቻዬን ፋብሪካ የዋጥኩ ሰው ነኝ፡፡
  • እሱስ ልክ ብለሃል፡፡
  • ይኸው አሁን የዋጥኩትን ፋብሪካ እዚሁ አገሬ ላይ እተፋዋለሁ ብዬ ተነቃቅቼ ሳበቃ ጠቅላይ ሚኒስትሩ ውኃ ቸለሱብኝ፡፡
  • ስማ ዋናው ነገር አንድና አንድ ነው፡፡
  • ምንድነው ክቡር ሚኒስትር?
  • ይህች አገር እንድትለማ ትፈልጋለህ?
  • ምን ነካዎት ክቡር ሚኒስትር?
  • ማለት?
  • ይኸው የዋጥሁትን ፋብሪካ ለመትፋት ተዘጋጅቼያለሁ ስልዎት?
  • በቃ ለልማቱ ይኼን ያህል ተነሳሽነት ካለህ ችግር የለውም፡፡
  • እንዴት ማለት ክቡር ሚኒስትር?
  • አንተ በልማቱ የምትሳተፍበትን ቦታ እኔ አመቻችልሃለሁ፡፡
  • የማለማው ቦታ ያገኙልኛል?
  • በሚገባ፡፡
  • የትኛውን ቦታ እንዳለማ ፈልገው ነው?
  • ማረሚያ ቤቱን!

[ክቡር ሚኒስትሩ ከሚስታቸው ጋር እያወሩ ነው]

  • ስሚ ይኼን ሁሉ ሱፍ ታይዋለሽ አይደል?
  • ምን ሆነ?
  • ይኼን ቡትቶ ጠራርገሽ ከቁም ሳጥኑ ውስጥ አውጭልኝ፡፡
  • ምን?
  • እንደውም ለተቸገረ ያለበለዚያ ገጠር ላሉ ዘመዶችሽ ስጪያቸው፡፡
  • ለምን?
  • እንዲያውም የሚገዛሽ አገኘሽ ብትሸጪያቸው መልካም ነው፡፡
  • አልገባኝም ግን?
  • ከሁለት ሱፍ ውጪ ሌላው እኮ የሚረባ አይደለም፡፡
  • እስከዛሬ ስታደርጋቸው የነበሩ ሱፎች አይደሉ እንዴ?
  • ይኸው እነዚህ ሱፎች ብቻ ናቸው ጋዜጣዊ መግለጫ ሲኖረኝ የማደርጋቸው፣ ሌሎቹን አልፈልጋቸውም፡፡
  • ምን ነክቶህ ነው ግን?
  • አንቺ ሚዲያ አትከታተይም እንዴ?
  • ሰሞኑን ብዙም እየተከታተልኩ አይደለም፡፡
  • ስሚ አሁን ነገሮች በብርሃን ፍጥነት እየሄዱ ስለሆነ ከሚዲያ መራቅ የለብሽም፡፡
  • ለምን?
  • አገሪቱ ላይ በአንዴ ብዙ ነገሮች እየተፈጸሙ ስለሆነ፣ በንቃት መከታተል አለብሽ፡፡
  • ምንድነው የምታወራው?
  • ከዘመኑ ጋር መፍጠን አለብሽ፡፡
  • ምን ይደረግ ነው የምትለው?
  • ጠቅላይ ሚኒስትሩ ሰሞኑን ያሉትን አልሰማሽም እንዴ?
  • ምን አሉ ደግሞ?
  • የሥራ አስፈጻሚ ስብሰባ በቀጥታ ይተላለፋል ብለዋል፡፡
  • እና ታዲያ?
  •  ስብሰባዎቻችን በቲቪ ከተላለፉ ሕዝቡ ሊያየኝ ነዋ፡፡
  • ቢያይህስ?
  • ፕሮቶኮሌን መጠበቅ የለብኝም?
  • እሱማ አለብህ፡፡
  • አሁን እንደምንም ብዬ አንቺን ጣሊያን ሚላን እልክሻለሁ፡፡
  • እሺ?
  • ከዚያ ብራንድ ሱፎችን ይዘሽ ትመጫለሽ፡፡
  • ጤነኛ ነህ ግን ሰውዬ?
  • ምነው?
  • አሁን እንኳን ከስህተትህ ለመማር ዝግጁ አይደለህም ማለት ነው?
  • ምን አደረግኩ?
  • ጭልጥ ያለ እንቅልፍ ወስዶሃል ልበል?
  • የምን እንቅልፍ ነው?
  • አሁን እኮ ሙስናን መጠየፍ ካልጀመርክ መጨረሻህ የት እንደሆነ አታውቅም?
  • እኔ እኮ ለሥራዬ የሚያግዘኝን ነገር ነው እንድታደርጊልኝ የጠየቅኩሽ?
  • ምኑ ነው ለሥራህ የሚያግዝህ?
  • አለባበሴ ነዋ፡፡
  • ምን?
  • ጠቅላይ ሚኒስትሩ እንዴት እንደሚዘንጡ አታያቸውም?
  • ወይ ግሩም?
  • አለባበሴ የሚማርክ ከሆነ ለጥሩ ቦታ ልታጭ እችላለሁ፡፡
  • ስማ ቁም ነገሩ አለባበስ ሳይሆን ሌላ ነው፡፡
  • ነገርኩሽ ፖለቲካ ከዝነጣ ነው የሚጀመረው፡፡
  • ለማንኛውም ዘንጠህ የምታወራው ከሌለህ ስም እንዳያወጡልህ፡፡
  • ምን ብለው?
  • ትጥቅ ብቻ!

[ክቡር ሚኒስትሩ ከአማካሪያቸው ጋር እያወሩ ነው]

  • ሥራችን ከዚህ በኋላ በጣም ሊጠናከር እንደሚችል ታውቃለህ?
  • እንዴት ክቡር ሚኒስትር?
  • ያው አዲሱ ጠቅላይ ሚኒስትር ዙሩን አክረውታል፡፡
  • እሱማ ግልጽ ነው፡፡
  • ስለዚህ እኛም አፈጻጸማችንን በ11 በመቶ ማሳደግ አለብን፡፡
  • ክቡር ሚኒስትር ለአፈጻማችን ማነቆ የሆኑት እኮ እርስዎ ነዎት፡፡
  • እንዴት?
  • ይኸው ስንትና ስንት ሪፖርቶች ባስገባም የእርስዎን ጠረጴዛ ማሞቅ ሆኗል ሥራቸው፡፡
  • እ. . .
  • በተለይ የዓለም ዋንጫ ከተጀመረ በኋላ ሙሉ ጊዜዎን ኳስ ሲመለከቱ ነው የሚያሳልፉት፡፡
  • ለመሆኑ አንተን አማክረኝ እንጂ ተቆጣጠረኝ ብዬሃለሁ?
  • ኧረ እኔ ማማከር ነው ሥራዬ፡፡
  • ስለዚህ ይኼን መመርያ ለሁሉም ነው የምሰጠው፡፡
  • እሺ ክቡር ሚኒስትር፡፡
  • ምን ሆነህ ነው ግን አሥር ጊዜ እየተንጠራራህ በመስኮት የምትመለከተው?
  • አይ ያው ሰሞኑን ከፍተኛ ሥጋት ውስጥ ነኝ፡፡
  • ምን ሆነህ?
  • ሰሞኑን አልሰሙም እንዴ?
  • ምኑን?
  • ከተማ ውስጥ ተለቀዋል እየተባለ ነው፡፡
  • ምኖች ናቸው የተለቀቁት?
  • የቀን ጅቦች!