Skip to main content
x
ለክቡር ሚኒስትሩ ደላላ ወዳጃቸው ይደውልላቸዋል

ለክቡር ሚኒስትሩ ደላላ ወዳጃቸው ይደውልላቸዋል

[የክቡር ሚኒስትሩ ሚስት በጣም ተጨናንቀው ተክዘው ቁጭ እንዳሉ ክቡር ሚኒስትሩ ቤት ገቡ]

  • አንተ ምን ሆነሃል ዛሬ?
  • ምን ሆንኩኝ?
  • እንደዚያ ስልክ ስቀጠቅጥልህ የማታነሳው ለምንድነው?
  • ቀኑን ሙሉ ስብሰባ ላይ ነበርኩ፡፡
  • ጠቅላይ ሚኒስትሩ ስብሰባ ቅዳሜ ቅዳሜ ብቻ ነው ብለዋል አይደል እንዴ?
  • እኔ እኮ አሁንስ በጣም ግራ ግብት እያለኝ ነው፡፡
  • ምኑ ነው ግራ የገባህ?
  • አንቺ ደግሞ ቤቱ ውስጥ ሌላ አለቃ ልትሆኚብኝ ነው?
  • እሱ የእኔ ችግር አይደለም፡፡
  • አለቃ ስለበዛብኝ ሰልችቶኛል እያልኩሽ ነው፡፡
  • እኔ እኮ አለቃ ልሆንብህ ፈልጌ አይደለም፡፡
  • ታዲያ ምን ፈልገሽ ነው?
  • በጣም አንገብጋቢ ጉዳይ ላማክርህ ነው፡፡
  • የምን አንገብጋቢ ጉዳይ?
  • እየተወራ ያለውን ነገር አልሰማህም እንዴ?
  • አገሩ ሁሉ ወሬኛ ብቻ አይደለም እንዴ? ከእኛ ውጪ ማን የሚሠራ አለ ብለሽ ነው? የምን ወሬ ነው?
  • አደገኛ ነገር መጥቷል፡፡
  • እኮ ምኑ ነው አደገኛው ነገር?
  • ቤት ውስጥ በካዝና ያስቀመጥነውን ገንዘብ ምንድነው የምናደርገው?
  • የራሳችን ገንዘብ እኮ ነው፣ እዚሁ ነዋ የሚቀመጠው፡፡
  • የራሳችን ገንዘብ ነው ስትል ትንሽ እንኳን አታፍርም?
  • እና የማን ገንዘብ ነው?
  • የደሃው ሕዝብ ገንዘብ ነዋ፡፡
  • ሴትዮ ዝም ብለሽ አትመፃደቂ፡፡
  • ስማ ያኛው ካዝና የስንት ሺሕ ሰው ኮንዶሚኒየም፣ ያኛው ካዝና ደግሞ የስኳር ፋብሪካዎችን፣ ይኼኛው ደግሞ የማዳበሪያ ፋብሪካውን ገንዘብ የያዙ መሆኑን ረሳኸው?
  • ስሚ አንቺም ከእኔ ጋር መሰለኝ የዘረፍሽው?
  • እኔ አልዘረፍኩም እያልኩህ አይደለም?
  • ታዲያ አንቺን ማን ነው የካዝና ኦዲተር ያደረገሽ?
  • ዋናው ኦዲተር ከመምጣቱ በፊት ራሳችንን ኦዲት ብናደርግ ይሻላል ብዬ ነው፡፡
  • ለምን ዝም ብለሽ ነገር ትቆሰቁሻለሽ?
  • ሰውዬ ጣጣ ሳይመጣብን ይኼን ብር ወደ ዶላር እንቀይረው፡፡
  • እሱንማ ፈጽሞ አላደርገውም፡፡
  • ለምን?
  • ስሚ የዶላር ዋጋ መውደቁን አልሰማሽም እንዴ?
  • እሱማ ሰምቻለሁ፡፡
  • በዚያ ላይ ደግሞ ይኼንን ብር አራጣ እያበደርኩበት መሆኑን ታወቂያለሽ አይደል እንዴ?
  • አራጣ ወንጀል መሆኑን ረሳኸው እንዴ?
  • ሴትዮ እኔ እንዲያውም በቅርቡ ባንክ ለመክፈት እያሰብኩ ነው፡፡
  • የምን ባንክ?
  • ሚኒስትሩ የሚባል ባንክ፡፡
  • ስማ እንደዚህ ዓይነት ዓይን ያወጣ ሌብነት ውስጥ ገብተህ መማማሪያ እንዳያደርጉህ ነው የምፈራው?
  • ምንም ሊያደርጉኝ አይችሉም ስልሽ?
  • የቤት ለቤት አሰሳ ሊጀመር ነው ሲሉ ሰምቻለሁ?
  • የምን አሰሳ ነው?
  • ጠቅላይ ሚኒስትሩ ሕገወጥ ባንኮች አገሪቱ ውስጥ እንዳሉ ደርሰንበታል ብለዋል፡፡
  • የእኛ በድብቅ ኔትወርክ ስለሚሠራ ማንም አይደርስበትም፡፡
  • ብቻ እኔ ከመዋረዳችን በፊት ዕርምጃ ብንወስድ ጥሩ መሰለኝ፡፡
  • ምን ዓይነት ዕርምጃ?
  • ከቻልን በዶላር መቀየር ካልሆነ ደግሞ ንብረት መግዛት ይሻለናል፡፡
  • ቆይ ገንዘቡን ቆፍረን ብንቀብረውስ?
  • ጠቅላይ ሚኒስትሩ እኮ ወደ ባንክ ካመጣችሁት ሳትጠየቁ በምሕረት ትቀጥላላችሁ ብለዋል፡፡
  • ስሚ ‹ሊበሏት ያሰቧትን ጅግራ ቆቅ ናት ይሏታል› አሉ፡፡
  • ምን ማለት ነው?
  • አሁን እኛ ገንዘባችንን ወደ ባንክ ብናስገባ ማን ይለቀናል?
  • ማን ይነካናል?
  • ስሚ ገንዘባችንን ወደ ባንክ ከተው፣ እኛን ወደ ቂሊንጦ ነው የሚልኩን፡፡
  • ሰውዬ በዚህ አካሄዳችን ግን ባዶአችንን ነው የሚያስቀሩን፡፡
  • እንዴት አድርገው?
  • ሊቀየር ነው እየተባለ ነው፡፡
  • ምን?
  • የብር ኖት!

[ክቡር ሚኒስትሩ ከአንድ የዓረብ አገር ዲፕሎማት ጋር እያወሩ ነው]

  • በጣም ረዥም ጊዜ ሆነን ክቡር ሚኒስትር?
  • ምን እባክህ ሥራ ስለሚበዛብኝ ነው፡፡
  • ለነገሩ ኢትዮጵያ ያለችበት ሩጫ ይገባኛል፡፡
  • የአትሌት አገር ናት ብለው ነው መሰለኝ ይኸው እኛንም እያሯሯጡን ነው፡፡
  • ያው መቼም ሩጫው ለእርስዎ አይከብድዎትም፡፡
  • ኧረ አንዳንዴ ከአቅሜ በላይ እየሆነ ነው፡፡
  • ለነገሩ ዕድሜዎም ስለገፋ ሊያስቸግርዎት እንደሚችል አውቃለሁ፡፡
  • ልባችንን ሊያስተፉን እኮ ነው፡፡
  • ግን ክቡር ሚኒስትር አሁን ያለው አመራር በእውነት የሚያስደስት ነው፡፡
  • እንዴት ማለት?
  • አሁን የአገሪቱ ዋነኛ ችግር የተፈታ ይመስለኛል፡፡
  • ምንድነው የአገሪቱ ዋነኛ ችግር?
  • እኛ ሁሌም የኢሕአዴግ ችግር፣ የችግሩን መንስዔ ውጫዊ ማድረጉ ነው እንላለን፡፡
  • ምን ማለት ነው?
  • ሁሌም ቢሆን እኮ የኢሕአዴግ ዋነኛ ጠላት ኢሕአዴግ ነው ስንላችሁ አትሰሙም ነበር፡፡
  • እየተሳሳትክ እኮ ነው፡፡
  • ኧረ በፍፁም ክቡር ሚኒስትር፡፡
  • ምን እያልክ ነው ታዲያ?
  • ችግራችሁ ውስጣችሁ ሆኖ የምትጠቁሙት ግን ወይ ወደ ግብፅ፣ ካልሆነ ደግሞ ኤርትራና ሶማሊያ ላይ ነበር፡፡
  • እነሱማ አሁንም ጠላቶቻችን ናቸው፡፡
  • አይ ክቡር ሚኒስትር አዲሱ አመራር እኮ ይኼን አመለካከት ቀይሮታል፡፡
  • እንዲያውም ዋነኛ ችግራችን የውጭ ኃይሎች እየመጣችሁ በውስጣችን ስለምትፈተፍቱ ነው፡፡
  • አዲሱ አመራር እኮ ከውስጣችሁ የበሰበሰውን ቆርጦ ስለጣለ ነው ሰላም የመጣው፡፡
  • ሰውዬ ብንከባበር አይሻልም? እኔ ነኝ የበሰበስኩት?
  • ኧረ እንደዚያ ለማለት ፈልጌ አይደለም ክቡር ሚኒስትር፡፡
  • ኢሕአዴግን እዚህ ያደረስነው እኮ እኛ አንጋፋዎቹ ነን፡፡
  • እሱማ ሀቅ ነው፣ እኔ እንደዚያ አይደለም ያልኩት፡፡
  • ታዲያ ምን እያልክ ነው?
  • የውስጣችሁ ችግር ሲፈታ ይኸው የአካባቢያችሁንም ሰላም በማስጠበቅ ኃያልነታችሁን እያስመሰከራችሁ ናችሁ፡፡
  • የምን ኃያልነት ነው?
  • ይኸው የደቡብ ሱዳን መሪዎችን ከስንት ጊዜ በኋላ አዲሱ ጠቅላይ ሚኒስትር ናቸው ያጨባበጧቸው፡፡
  • ምን ይጠበስ ታዲያ?
  • ከዚያም አልፎ ኢትዮጵያ ከኤርትራ ጋር ያላት ጠላትነት አብቅቶ ሁለቱ አገሮች በፍቅር ወድቀዋል፡፡
  • እሱ ላይ እኔ ተቃውሞ አለኝ፡፡
  • ክቡር ሚኒስትር መሪዎቹ እንዴት ሲፍለቀለቁ እንደነበሩ ሲታይ እኮ ምን ያህል በፍቅር እንደወደቁ ያስታውቃል፡፡
  • እኔ ግን ከኢሕአዴግ ያፈነገጡ አካሄዶችን እያየሁ ነው፡፡
  • የተባለውን ሰምተዋል ግን ክቡር ሚኒስትር?
  • ምን ተባለ?
  • ኤርትራውያን እኮ ባድመን ወስዳችሁ ዓብይን ስጡን እያሉ ነው፡፡
  • ቀልዱን ብትተወው ጥሩ ነው፡፡
  • ለማንኛውም ክቡር ሚኒስትር እኔ አንድ ነገር ሆኛለሁ፡፡
  • ምን?
  • ተደምሬያለሁ!

[ለክቡር ሚኒስትሩ ደላላ ወዳጃቸው ይደውልላቸዋል]

  • እንዴት ነዎት ክቡር ሚኒስትር?
  • ሰላም ነህ?
  • ምነው ድምፅዎ ኮስተርተር አለብኝ?
  • እንዴት አልኮሳተር?
  • አሁንማ ሊስቁበትና ሊፈነድቁበት የሚገባ ጊዜ ነው፡፡
  • ምን ተገኘ ብዬ?
  • ከኤርትራ ጋር ሰላም ወረደ አይደል እንዴ?
  • ታዲያ ሰላም መውረዱ እኔን ለምን ያስፈነድቀኛል?
  • ክቡር ሚኒስትር አየር መንገዱ እኮ ሥራ ሊጀምር ነው፡፡
  • ሰውዬ እኔ እኮ ፓይለት አይደለሁም፡፡
  • ወደቡም በቅርቡ ሥራ መጀመሩ አይቀርም፡፡
  • እኔን መርከበኛ ነው ብሎ የነገረህ ሰው አለ እንዴ?
  • ክቡር ሚኒስትር አንዳንዴ ነገሮችን ሰፋ አድርገው ማየት አለብዎት፡፡
  • ምን እያልክ ነው?
  • ይኼ እኮ ለእኔና ለእርስዎ ትልቅ አጋጣሚ ነው፡፡
  • አልገባኝም?
  • ሁለቱ አገሮች ሰላም ከሆኑ እኮ አዳዲስ ቢዝነሶች አቆጠቆጡ ማለት ነው፡፡
  • የምን አዳዲስ ቢዝነስ?
  • ክቡር ሚኒስትር ኢትዮጵያን በ11 በመቶ ስናሳድጋት ምን ያህል እንደተጠቀምን ያውቃሉ አይደል?
  • እሱማ ልክ ነህ፡፡
  • ኤርትራንም በዚሁ ፍጥነት አሳድገን የድርሻችንን መጠቀም አለብን፡፡
  • እኔ የኤርትራ ማደግ መቼ አስጨነቀኝ አልኩህ?
  • ክቡር ሚኒስትር የኤርትራ ዕድገት ያስጨንቅዎታል ብዬ ሳይሆን የእርስዎን ጥቅም አስቤ ነው፡፡
  • የእኔ ጥቅም ምንድነው?
  • እርስዎ እንደ ምንም ብለው የኢትዮጵያ ገንዘብ ኤርትራ ውስጥ እንዲሠራ ያስደርጉ፡፡
  • ለምን ተብሎ?
  • እዚህ በጥሬው የያዝነውን ገንዘብ እዚያ ይዘን ሄደን መሥራት እንችልበታለና፡፡
  • እንዴት? እንዴት?
  • አዩ ቤት ያለው ገንዘባችን ሕገወጥ ነው ሊባል ስለሚችል፣ ኤርትራ ወስደነው ኢንቨስት ልናደርገው እንችላለን፡፡
  • ለሚስቴ ጭንቀት መፍትሔ  ተገለኘት ነው የምትለኝ?
  • ክቡር ሚኒትር ቆሻሻው ብራችን እዚያ ታጥቦ ይነፃል፡፡
  • የት?
  • ቀይ ባህር!

[ለክቡር ሚኒስትሩ አንድ ዳያስፖራ ይደውልላቸዋል]

  • ክቡር ሚኒስትር እንዴት ነዎት?
  • እንዴት ነህ?
  • ያው እኛም ይመጣሉ ብለን ዝግጅቱን አጧጡፈነዋል፡፡
  • ማን ነው የሚመጣው?
  • ጠቅላይ ሚኒስትሩ ሊመጡ አይደል እንዴ?
  • አዎ ይመጣሉ፣ እውነትህን ነው፡፡
  • እርስዎ አይመጡም እንዴ?
  • ያው የዶላር እጥረት ስላለ እንደ ድሮው ተግተልትለን መሄድ ቀርቷል፡፡
  • ለነገሩ እርስዎ እዚህ ከመጡ ከፍተኛ ተቃውሞ ነው የሚገጥምዎት፡፡
  • ዋናው የአገሬ ሕዝብ ከወደደኝ ችግር የለውም፡፡
  • ለማንኛውም እዚህ የሕዝቡ ደስታ ወደር የለውም፡፡
  • ምን ተገኝቶ?
  • ልትበተን የነበረችው ኢትዮጵያ ይኸው ሰላሟ ተጠብቆ በሚገርም ፍጥነት እየሄደች ነዋ፡፡
  • እ. . .
  • ክቡር ሚኒስትር የውስጥ ችግራችን ተፈትቶ በአካባቢው ላይ ተፅዕኖ ፈጣሪ መሆናችን እየታየ ነው፡፡
  • እሱን እንኳን ተወው፡፡
  • ክቡር ሚኒስትር ከግብፅ ቢሉ ከኤርትራ ጋር በምናደርገው ነገር በዓለም አቀፍ ደረጃ እየተደነቅን ነው፡፡
  • ተደምረሃል ልበል?
  • ከተደመርኩማ ቆየሁ፡፡
  • አሁን ገባኝ፡፡
  • ክቡር ሚኒስትር እዚህ አገር የፕሬዚዳንቱ አንድ መቶ ቀናት የሚባል ነገር አለ፡፡ የእኛም ጠቅላይ ሚኒስትር በዚህ ሳምንት መቶ ቀናት ይሞሉዋቸዋል፡፡
  • ታዲያ ምን ይጠበስ?
  • መቼም ኢሕአዴግ ነፃ ምርጫ ሳያደርግ መቶ በመቶ አሸንፌያለሁ ማለቱን ያምናሉ?
  • ሰውዬ እኛ በትክክለኛ ምርጫ ነው ያሸነፍነው፡፡
  • እሱን ይተውትና ሕዝቡ አዲሱን ጠቅላይ ሚኒስትር በመቶ ቀናት ውስጥ ፈትኖ ውጤት ሰጥቷል፡፡
  • ስንት ተሰጣቸው?
  • መቶ በመቶ!