Skip to main content
x
ክቡር ሚኒስትሩ አንድ የእስር ቤት ኃላፊ ጋ ደወሉ

ክቡር ሚኒስትሩ አንድ የእስር ቤት ኃላፊ ጋ ደወሉ

[ለክቡር ሚኒስትሩ ደላላ ወዳጃቸው ደወለላቸው]

  • ክቡር ሚኒስትር በጣም እፈልግዎታለሁ፡፡
  • ምን ተገኘ?
  • ቁጭ ብለን ማውራት አለብን፡፡
  • በምን ጉዳይ?
  • የሚገርም ሐሳብ መጥቶልኛል፡፡
  • የአንተ ሐሳብ መቼ መቆሚያ አለው?
  • ክቡር ሚኒስትር ይኼኛው የሚገርም የቢዝነስ ሐሳብ ነው፡፡
  • ሰውዬ ጊዜውን ረሳኸው እንዴ?
  • ክቡር ሚኒስትር ከለውጡ ጋር የሚሄድ የቢዝነስ ሐሳብ ነው፡፡
  • እየቀለድክ መሆን አለበት?
  • የምን ቀልድ ነው ክቡር ሚኒስትር?
  • ስማ ካሁን አሁን እስር ቤት ገባን እያልን በምንጨነቅበት ወቅት ሌላ የሌብነት ሐሳብ አምጥተህ ጉድ ልታደርገኝ ነው?
  • ክቡር ሚኒስትር በቢዝነሱም ቢሆን እኮ መደመር ያስፈልጋል፡፡
  • እኔ ይኼ መደመርና መቀነስ የሚሉት ነገር አይገባኝም፡፡
  • ማለቴ ተደምሬያለሁ ምናምን ካሉ እኮ ችግር የለውም፡፡
  • ነገርኩህ እኮ ተደመርኩ ስትል ቀንሰውህ ቁጭ ልትል ትችላለህ፡፡
  • ክቡር ሚኒስትር የሚገርም የቢዝነስ ሐሳብ እኮ ነው ያለኝ፡፡
  • ለመሆኑ ሰሞኑን ጠቅላይ ሚኒስትሩ የሰጡትን መግለጫ ሰምተኸዋል?
  • ምን አሉ?
  • ማንም ወንጀለኛ ለዘለዓለም ተደብቆ አይቀርም ብለዋል፡፡
  • እሱ ለሚዲያ ፍጆታ ነው የተናገሩት፡፡
  • ምን ማለት ነው?
  • ያው ባለፈው ጊዜ ዶላር ምናምን የደበቁት ላይ ዕርምጃ እንወስዳለን ብለው በተግባር ግን ተቸግረዋል፡፡
  • ምን እያልከኝ ነው?
  • አሁን እንደዚያ ይበሉ እንጂ እርስዎ ተነኩ ማለት ከሚያጋልጡዋቸው ሰዎች ብዛት አንፃር ያሉት እስር ቤቶች ሊበቁን አይችሉም፡፡
  • ለመሆኑ ምን ዓይነት የቢዝነስ ሐሳብ መጥቶልህ ነው?
  • ሰሞኑን ሚዲያ ከተከታተሉ ሐሳቡ በጣም ይገባዎታል፡፡
  • እኮ ምንድነው?
  • የቴሌ ቢዝነስ ውስጥ እንድንገባ ነው፡፡
  • ሰውዬ አሁን እንደለየልህ ነው የገባኝ፡፡
  • ምነው ክቡር ሚኒስትር?
  • ጠቅላይ ሚኒስትሩ አንድ ኩንታል ሲም ካርድ ተይዟል ሲሉ አልሰማህም?
  • ምን ችግር አለው ታዲያ አንዳንዱ ሰው ጤፍ ይበላል፣ ለአንዳንዱ ደግሞ ሲም ካርድ ነው እንጀራው፡፡
  • እኔን እዚህ ውስጥ እንዳታስገባኝ፡፡
  • ለነገሩ ቢዝነሱ ከቴሌ ጋር የተገናኘ እንጂ የሲም ካርድ አይደለም፡፡
  • ስማ ትንሽ ያካበትነው ሀብት በአንዴ ድምጥማጡ እንዲጠፋ ነው?
  • ለምን ክቡር ሚኒስትር?
  • ቴሌ በከፍተኛ መጠን ታሪፉን ቀንሶ እኛም እንድንከስር ነው የቴሌ ቢዝነስ ውስጥ እንግባ የምትለኝ?
  • ምን ነካዎት ክቡር ሚኒስትር?
  • አንተ ምን ነካህ ልበል እንጂ?
  • ቴሌ ታሪፉ በመቀነሱ እኮ በርካታ ሰው የቴሌ ደንበኛ መሆኑ አይቀርም፡፡
  • ያ ታዲያ ለእኛ ምን ይፈይዳል?
  • ክቡር ሚኒስትር በዚህ ወቅት የስልክ ገበያ ይደራል፡፡
  • እኛ እኮ ከስልክ ቢዝነስ የወጣነው ቴሌ አንድ ሰው ከውጭ ሲመጣ ከአንድ ስልክ በላይ ይዞ መግባት አይችልም ስላለ ነው፡፡
  • እሱም መመርያ ተነሳ እኮ፡፡
  • ቢነሳስ ከሌሎች ነጋዴዎች ጋር እንዴት መወዳደር እንችላለን?
  • ገበያውን ሰብረን የምንገባበትን መንገድማ መቼም አይጠፋዎትም?
  • ሒሳብ ቀንሰን እናምጣ እያልከኝ ነው?
  • እንደዚያ አልወጣኝም፡፡
  • ታዲያ ፎርጂድ ስልክ እንድናመጣ አስበህ ነው?
  • የለም የለም፡፡
  • እንዴት ነው ታዲያ ገበያውን ሰብረን የምንገባው?
  • በኮንትሮባንድ!

[ለክቡር ሚኒስትሩ አንድ ስልክ ከውጭ ተደወለላቸው]

  • ሄሎ ክቡር ሚኒስትር?
  • ማን ልበል?
  • ረስተውኝ ሊሆን ይችላል ድሮ እንተዋወቅ ነበር፡፡
  • ይቅርታ አላወቅኩህም?
  • ሃይ ስኩል አንድ ላይ ተምረን ነበር፡፡
  • ያው ጊዜው ረዥም በመሆኑና በወቅቱም በርካታ ተማሪዎች በመኖራቸው አላስታወስኩህም፡፡
  • ለማንኛውም እኔም በትግል ውስጥ ነበርኩ፡፡
  • ከእኛ ጋር ጫካ ገብተህ ነበር?
  • አይ ከእናንተ በተቃራኒው ጎራ ሆኜ ስታገል ነበርኩ፡፡
  • አሁን የት ነው ያለኸው?
  • እኔ ከአገር ከወጣሁ ወደ 30 ዓመት እየተጠጋኝ ነው፡፡
  • ውጭ አገር ነው ይኼን ያህል ዓመት የታገልከው?
  • አዎን ክቡር ሚኒስትር አሁን ግን በጠቅላይ ሚኒስትሩ ጋባዥነት ወደ አገር ቤት ልመለስ ነው፡፡
  • ጠቅላይ ሚኒስትሩ ያውቁሃል እንዴ?
  • ማለቴ ዳያስፖራዎች ወደ አገራችሁ ግቡ ባሉት መሠረት ወደ አገር ቤት ለመመለስ አስቤ ነው፡፡
  • ስለዚህ እዚህ መጥተህ ሥራ ልትጀምር አስበሃል?
  • ሥራውንማ እናንተ ናችሁ የምትሰጡን፣ ከእኔ የሚጠበቀው ወደ አገር ቤት መመለስ ነው፡፡
  • ለመሆኑ ውጭ አገር ምንድን ነበር የምትሠራው?
  • እኔ ሥራ ወዳድ ስለሆንኩ ምንም ሥራ አልመርጥም፡፡
  • በጣም ደስ ይላል፡፡
  • አሁን አገሪቱ ውስጥ እየተደረገ ያለውን ለውጥ ለመደገፍ ነው የምመጣው፡፡
  • እኛም ሁሌም አገራችንን የሚደግፍልን ዜጋ እንፈልጋለን፡፡
  • እኔ ወደ አገር ቤት ከመምጣቴ በፊት ግን ማወቅ የምፈልጋቸው ነገሮች አሉ፡፡
  • ምንድነው ማወቅ የምትፈልገው?
  • ማለቴ አገር ቤት ከመጣሁ ወደ 30 ዓመታት ሊሆነኝ ስለሆነ፣ ስለአጠቃላይ የአገሪቱ ሁኔታ ማወቅ እፈልጋለሁ፡፡
  • መቼም በሚዲያ እንደምትሰማው አገሪቱ በከፍተኛ ዕድገት ላይ ናት፡፡
  • እንግዲህ የእኔም አመጣጥ እዚህ ዕድገት ላይ ተጨማሪ ዕድገት ለማምጣት ነው፡፡
  • ይቅርታ እዚያ ምንድን ነበር የምሠራው ያልከኝ?
  • አብዛኛውን ጊዜዬን በዌልፌር ነበር ያሳለፍኩት፡፡
  • እ. . .
  • አጋሚውን ባገኘሁባቸው ጊዜያት ደግሞ ከሳህን አጠባ እስከ ታክሲ ሾፌርነት ሠርቻለሁ፡፡
  • በእውነት ሥራ አክባሪ ሰው ነህ፡፡
  • ለማንኛውም አሁን የደወልኩልዎት አንድ ነገር ሰምቼ ነው፡፡
  • ምን ሰምተህ?
  • ከውጭ ለሚመጡ ዳያስፖራዎች አቀባበል የሚያደርጉት እርስዎ ነዎት ሲባል ሰምቼ ነው፡፡
  • አልገባኝም ምን እያልክ ነው?
  • ማለቴ ለእኔም አቀባበል እንዲደረግልኝ ነው፡፡
  • ምን ዓይነት አቀባበል?
  • ያው በምመጣበት ቀን ኤርፖርት የመንግሥት ልዑክ እንዲጠብቀኝ ነው፡፡
  • እሺ?
  • በዚያ ላይ እዚያው ኤርፖርት የአገር ውስጥ ሚዲያዎች ተጋብዘው መግለጫ እንድሰጥ ነው፡፡
  • ኪኪኪ. . .
  • ምን ያስቅዎታል?
  • ለመሆኑ ምን ስለሆንክ ነው አቀባበል የሚደረግልህ?
  • ሌሎቹ ምን ስለሆኑ ነው አቀባበል የተደረገላቸው?
  • እ. . .
  • ለማንኛውም ስለኔ አቀባበል ምላሽዎን እፈልጋለሁ፡፡
  • አትቀልድ እንጂ ሰውዬ?
  • ለነገሩ እኔም አሁን ነው የገባኝ፡፡
  • ምኑ ነው የገባህ?
  • መንግሥት አቀባበል እንዲያደርግልኝ መጀመርያ መግባት አለብኝ፡፡
  • የት ነው የምትገባው?
  • ጫካ!

[ክቡር ሚኒስትሩ ከሚስታቸው ጋር እያወሩ ነው]

  • አንተ ምንድነው የሰማሁት?
  • ምን ሰማሽ ደግሞ?
  • ሚዲያ ላይ የሚወራው ሁሉ አሥጊ ነገር ነው፡፡
  • ምን ተወራ?
  • በርካታ የንግድ ቤቶች እየታሸጉ ነው እኮ፡፡
  • ምን ሆነው?
  • ጥቁር ገበያ ላይ የተሰማሩ ንግድ ቤቶች እየታሸጉ ነው፡፡
  • ምን ትቀልጃለሽ?
  • ለነገሩ እኔ በትውውቅ ስለምሠራ ችግር የለውም፡፡
  • ቢሆንም መጠንቀቅ አለብሽ፡፡
  • አሁን ያሳሰበኝ ሌላ ነገር ነው፡፡
  • ምንድነው እሱ?
  • አዲሱ ከንቲባ የሚያደርጉት እንቅስቃሴ ምንም አልተመቸኝም፡፡
  • አንቺ ደግሞ አሁን እሳቸው ደሃዎችን ረዱ እንጂ ምን አደረጉ?
  • ስለእሱ እኔ ምን አገባኝ?
  • ታዲያ ምንድነው የምትይው?
  • ከተማ ውስጥ በርካታ ሕንፃዎች አሉ እየተባለ ነው፡፡
  • እሱማ ግልጽ ነው፣ ሕንፃዎቹ እኮ የኢኮኖሚው ዕድገት ማሳያ ናቸው፡፡
  • አንተ ምንም አልገባህም፡፡
  • ምን እያልሽ ነው?
  • በሕንፃዎች ላይ አሰሳ እየተደረገ ነው፡፡
  • እኛ ታዲያ ምን አገባን?
  • ከተማው ውስጥ ከአንድ አይሉ ሦስት ሕንፃዎች እንዳሉን ረሳኸው እንዴ?
  • ቢኖሩን ምን ችግር አለው?
  • ከየት አምጥተው ሠሩት ተብለን መዋረዳችን አይቀርም፡፡
  • ስለእሱ አታስቢ?
  • ለምን አላስብም?
  • ሕንፃዎቹን እኮ ያለባለቤት ነው የሠራናቸው፡፡
  • እሱ አይደል እንዴ እኔን ያሳሰበኝ፡፡
  • ምኑ ነው ያሳሰበሽ?
  • ከተማዋ ውስጥ ባለቤት የሌላቸው ሕንፃዎች መኖራቸው ተረጋግጧል እያሉ ናቸው፡፡
  • እ. . .
  • ስማ ያ ሁሉ ሀብት ከንቱ ሊቀር ነው፡፡
  • ይኼማ አይሆንም፡፡
  • ምናለ ገንዘቡን በዶላር ቀይረን በያዝነው ኖሮ?
  • ሴትዮ ልታሳብጂኝ ነው እንዴ?
  • እሱማ የተሻለ ነበር፡፡
  • እና ተደርሶብናል ነው የምትይው?
  • እስካሁን የሚታወቅ ነገር የለም፣ ሕንፃዎቹ ግን ተደርሶባቸዋል፡፡
  • ሕንፃዎቹ ምን ሊደረጉ ነው ታዲያ?
  • እኔማ መንግሥት እንትን እንዳይለን ነው የፈራሁት፡፡
  • ምን እንዳይለን?
  • እሟ ቀሊጦ!

[ክቡር ሚኒስትሩ አንድ የእስር ቤት ኃላፊ ጋ ደወሉ]

  • አቤት ክቡር ሚኒስትር፡፡
  • እንዴት ነህ ወዳጄ?
  • ዛሬ ከየት ተገኙ ክቡር ሚኒስትር?
  • በእውነት በጣም አዝኜ ነው የደወልኩልህ፡፡
  • ምነው ክቡር ሚኒስትር?
  • እስር ቤታችሁ ውስጥ ይኼን ያህል የሰብዓዊ መብት ጥሰት እንደሚፈጸም አላውቅም ነበር፡፡
  • እንዴት ማለት?
  • ይኸው በየሚዲያው ታሳሪዎች የተለያዩ ችግሮች እንደሚገጥማቸው ሲናገሩ ሰምቼ ነው፡፡
  • ክቡር ሚኒስትር ታዲያ ይኼ ምን አዲስ ነገር ነው? እርስዎ በሚገባ ጠንቅቀው ያውቁታል፡፡
  • ለመሆኑ ታሳሪዎቹ ኢቲቪ ብቻ ነው የሚያዩት?
  • ከኢቲቪ ውጪ ሌሎቹን የአገር ውስጥ ሚዲያዎች ያያሉ፡፡
  • ስማ ፕሪሚየር ሊግ አያዩም ማለት ነው?
  • እ. . .
  • ናሽናል ጆግራፊክና ሌሎች ፊልሞችንም አይመለከቱም እያልከኝ ነው?
  • ምን ሆነዋል ክቡር ሚኒስትር?
  • ቆይ ቆይ ሌላው ቢቀር እስር ቤቱ የተሟላ ፈርኒቸር አለው?
  • ምንም አልገባኝም ክቡር ሚኒስትር?
  • ማለቴ ታሳሪዎቹ ሶፋ ምናምን አላቸው?
  • እየቀለዱ ነው ክቡር ሚኒስትር?
  • የእውነቴን ነው እንጂ፡፡
  • እኔ እኮ የእስር ቤት ኃላፊ እንጂ የሆቴል ኃላፊ አይደለሁም፡፡
  • ስማ አሁን ከለውጡ ጋር መራመድ አለብህ፡፡
  • አልገባኝም?
  • ምናለበት እስር ቤቱን ሆቴል ብታስመስለው?
  • አሁን ነው የገባኝ ክቡር ሚኒስትር፡፡
  • ምኑ ነው የገባህ?
  • በቅርቡ ሊመጡ ነው ማለት ነው፡፡
  • የት?
  • እኛው ጋ!