Skip to main content
x
የክቡር ሚኒስትሩ ዘመድ ከውጭ ይደውልላቸዋል

የክቡር ሚኒስትሩ ዘመድ ከውጭ ይደውልላቸዋል

[ክቡር ሚኒስትሩ ከአንድ ዳያስፖራ ጋር እያወሩ ነው]

  • እንኳን አገርህ በሰላም ለመግባት አበቃህ፡፡
  • አመሠግናለሁ ክቡር ሚኒስትር፡፡
  • አገሪቱን እንዴት አገኘሃት?
  • በእውነት ክቡር ሚኒስትር አዲስ አበባ የማላውቃት ከተማ ነው የሆነችብኝ፡፡
  • ለመሆኑ ስንት ጊዜ ሆነህ ከአገር ከወጣህ?
  • ሰላሳ ዓመት እየተጠጋኝ ነው፡፡
  • ታዲያ ዕድገቱን እንዴት አየኸው?
  • ከተማዋ እኮ በፎቅ ጫካ ተውጣለች፡፡
  • ስለዚህ ዕድገት መኖሩን አረጋገጥክ ማለት ነው?
  • አይ ክቡር ሚኒስትር፣ እኔ እኮ ዕድገት የለም ብዬ ሳይሆን ስታገል የነበርኩት ዴሞክራሲያዊ መብት የለም ብዬ ነበር፡፡
  • ይኸው አገርህ እንድትገባ ያደረገህ ዴሞክራሲያዊ መብትህ አይደል እንዴ?
  • እሱን እንኳን ተውት ክቡር ሚኒስትር፡፡
  • ለምን ሲባል?
  • በፊት ይኼን ሥርዓት በመቃወሜ የደረሰብኝን መከራ እኔ ነኝ የማውቀው፡፡
  • ምን ተደረግኩ ልትል ነው?
  • እኔ ላይ በቀጥታ ባይደርስም፣ እዚህ የነበሩ ቤተሰቦቼ ላይ ምን ያህል መከራ ሲደርስባቸው እንደነበር መቼም አይዘነጉትም፡፡
  • አንተ እኛ ውጭ በወጣን ቁጥር ስለምታደርስብን ግፍ ይኼ ሲያንስህ ነው፡፡
  • ምን ማለት ነው?
  • እንደ አንተ ዓይነቱን ሰው ስናስብ እኮ ነበር የውጭ ጉዞ የሚያንገፈግፈን፡፡
  • ለምን ያስመስላሉ ክቡር ሚኒስትር?
  • የምን ማስመሰል ነው?
  • እንደዚህ ቢያንገፈግፍዎት በየወሩ ውጭ ባልወጡ ነበር፡፡
  • ውጭ የምወጣውማ ጥቅማ ጥቅሜን አስቤ እንጂ ለሌላ ለምን መስሎህ ነው?
  • እኛም እኮ እንደዚያ አምርረን የምንቃወማችሁ ለሕዝቡ ሳይሆን ለጥቅማችሁ እንደቆማችሁ ስለምናውቅ ነበር፡፡
  • አየህ መርሳት የሌለብህ ነገር እኛም እኮ የሕዝቡ አካል ነን፡፡
  • ምን ማለት ነው ክቡር ሚኒስትር?
  • እኛ ስንጠቀም ሕዝቡ እንደተጠቀመ ይቆጠራል፡፡
  • በእውነት ክቡር ሚኒስትር ዘመኑ የምሕረት በመሆኑ እንጂ ለእናንተ እኮ የሚገባችሁ ጓንታናሞ ነበር፡፡
  • እኛ የሠራነው ልማት ፈጽሞ አይታይህም ማለት ነው?
  • ነገርኩዎት እኮ ከልማታችሁ ጥፋታችሁ ነው የሚብሰው፡፡
  • ለመሆኑ እዚህ ምን ልታደርግ ነው የመጣኸው?
  • አገሬ አይደል እንዴ ክቡር ሚኒስትር?
  • አይ ያው እዚያ ቢያንስ እኛን እየተሳደብክ ገንዘብ መሰብሰብ ትችል ነበር ብዬ ነው፡፡
  • ክቡር ሚኒስትር እኔ እኮ ለዓመታት የታገልኩት ለገንዘብ ብዬ ሳይሆን ለሕዝቤ ተቆርቁሬ ነው፡፡
  • ስለዚህ ለሕዝብ ከተቆረቆርክ እዚህ ፓርቲ መሥርተህ ሕዝብን ትታገላለህ ማለት ነው?
  • የምን ፓርቲ ክቡር ሚኒስትር?
  • ያው ውጭም ፖለቲከኛ ስለነበርክ እዚህም በዚያው ትቀጥላለህ ብዬ ነዋ፡፡
  • ክቡር ሚኒስትር እኔ እኮ ወደ አገር ቤት የተመለስኩት የጠቅላይ ሚኒስትሩን ጥሪ ተቀብዬ ነው፡፡
  • ገብቶኛል ስለዚህ አገር ውስጥ ስትገባ ፖለቲከኛ ሆነህ ነው የምትቀጥለው ወይ እያልኩህ እኮ ነው?
  • ክቡር ሚኒስትር መቼም ባለፈው ጠቅላይ ሚኒስትሩ ሁሉም በውጭ አገር ያለ ኢትዮጵያዊ ለአገሩ አምባሳደር ነው ሲሉ ሰምተዋል፡፡
  • ምን እያልከኝ ነው ታዲያ?
  • የአምባሳደርነትን ሥራ ዕድሜ ልኬን ስሠራው የቆየሁት ሥራ ነው፡፡
  • አሁን ግራ እያጋባኸኝ ነው፡፡
  • ከዚህ በኋላ መንግሥትን እየተቃወምኩ መኖር አልፈልግም፡፡
  • ወዴት? ወዴት?
  • ዘመኑ የመደመር በመሆኑ እኔም ተደምሬያለሁ፡፡
  • የምን ጠጋ ጠጋ ነው?
  • ክቡር ሚኒስትር መንግሥት አንድ ነገር እንዲያደርገኝ ነው የምፈልገው?
  • ምን?
  • አምባሳደር!

[ክቡር ሚኒስትሩ አንድ ባለሀብት ጋ ይደውላሉ]

  • ሄሎ ክቡር ሚኒስትር፡፡
  • አንተ ዝም ስልህ ዝም ትላለህ እንዴ?
  • ምኑን ክቡር ሚኒስትር?
  • በፊት በዚህ ሰሞን እየደወልክ ታጨናንቀኝ አልነበር እንዴ?
  • ምን ብዬ ክቡር ሚኒስትር?
  • እንኳን አደረሰህ ለማለት ማን ቀደመኝ እያልክ ትፎካከር አልነበር እንዴ?
  • እንኳን አደረሰዎት ክቡር ሚኒስትር?
  • በቃ?
  • ምነው ክቡር ሚኒስትር?
  • ያኔ ቤቴ የከብት ማደሪያና ቄራ እስኪመስል ድረስ አልነበረ እንዴት የምታጨናንቀኝ?
  • ምን አሉኝ ክቡር ሚኒስትር?
  • በሬው አይቀርህ በጉ፣ ፍየሉ ብትል ዶሮውን አግተልትለህ አልነበር እንዴ የምታመጣልኝ?
  • መቼም በዚህኛው ዓመት በዓል ያን አይጠብቁም?
  • ለምን አልጠብቅም?
  • ሥርዓቱ እኮ ተቀይሯል፡፡
  • የምን ሥርዓት ነው የምታወራው?
  • አሁን እኮ የፍትሐዊነትና የእኩልነት ዘመን ነው፡፡
  • ቆይ! ቆይ! ቆይ! በፊት እኮ ወዳጅ ስለነበርን የምታመጣልኝ መስሎኝ?
  • እንደዚያ እንዳልሆነ መቼም ጠንቅቀው ያውቁታል፡፡
  • ታዲያ ለምን ነበር?
  • እኔ በየጊዜው ለእርስዎ ስጦታውን አዥጎደጉደዋለሁ፣ እርስዎ ደግሞ በምላሹ ለእኔ ሕንፃ አይሉ መሬት፣ ፋብሪካ አይሉ ሌላውን ያመቻቹልኛል፡፡
  • እ. . .
  • ክቡር ሚኒስትር ግንኙነታችን እኮ እከክልኝ ልከክልህ በሚለው መርህ ላይ የተመሠረተ ነበር፡፡
  • አሁን የመርህ ለውጥ አለ እያልከኝ ነው?
  • አሁንማ የፍቅር፣ የይቅርታና የመደመር ጊዜ ነው፡፡
  • እነዚህን ቃላት የማልሰማበት የት ልሂድ?
  • ክቡር ሚኒስትር ፍቅርና መደመር የሚሉት እኔ ይስማሙኛል፣ ግን ይህች የይቅርታ የምትለው ብዙም አትጥመኝም፡፡
  • እንዴት?
  • እርስዎ አሁን ያጠፉት ጥፋት በይቅርታ ብቻ የሚታለፍ አይደለም፡፡
  • ምን እያልክ ነው?
  • ስለራሴ ባወራ በዓል በመጣ ቁጥር እንዲሁ ስባንን ነበር የማሳልፈው፡፡
  • ምን ሆነህ?
  • ለእርስዎ ስጦታ የማወጣውን ወጪ እያሰብኩ ነዋ፡፡
  • ይኼን ያህል?
  • ክቡር ሚኒስትር ሥርዓቱ በመቀየሩ ነው እኮ አሁንም ከዚህ ጭንቀት የተገላገልኩት፡፡
  • ስለዚህ ስጦታ አላመጣም እያልከኝ ነው?
  • ትንሽ  ግን አያፍሩም ክቡር ሚኒስትር?
  • በምኑ ነው የማፍረው?
  • ይኸው መሪያችን በየሆስፒታሉ እየሄዱ ደም በሚሰጡበትና ቤት ለፈረሰባቸው ቤት በሚገነቡበት ዘመን፣ እርስዎ አሁንም ሊያስጨንቁን ሲሞክሩ እንዴት አያፍሩም?
  • ሰውዬ ተረጋጋ፡፡
  • ለዚያ ነው ይቅርታ ምናምን በሚሉት አላምንም የምለው፡፡
  • ምን እንዳደርግልህ ፈልገህ ነው?
  • እርስዎን ይቅርታ እንድልዎት አንድ ነገር ማድረግ አለብዎት፡፡
  • ምን?
  • ለሚቀጥሉት ሃያ ዓመታት የበዓል ወጪዬን ሊሸፍኑ ይገባዎታል፡፡
  • ማን?
  • እርስዎ!

[ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው]

  • ምነው ተከዙ ክቡር ሚኒስትር?
  • ተወኝ እባክህ፡፡
  • ምን  ተፈጠረ? አዲስ ዓመት እየመጣ መነቃቃት ነው እንጂ የምን መቆዘም ነው?
  • ግራ ገብቶኝ ነው ምን ላድርግ?
  • ክቡር ሚኒስትር የመደመር ዘመን አይደል እንዴ?
  • ጭራሽ የባሰ ደም ግፊቴን አታብስብኝ?
  • ምን ሆነዋል ክቡር ሚኒስትር?
  • ስማ እኔ ሕይወት ራሱ እየመረረኝ ነው፡፡
  • ኧረ እንደዚህ አይባልም ክቡር ሚኒስትር፡፡
  • ይኸው የወጣትነት ዘመናችንን መስዋዕት አድርገን የተረፈን የሕዝብ ጥላቻ ነው፡፡
  • ይረጋጉ ክቡር ሚኒስትር፡፡
  • በየሄድንበት እኮ መሳለቂያ እየሆንን መዋረድ ነው የተረፈን፡፡
  • እንዲህማ መሆን የለበትም፡፡
  • ሻይና ቡና የምጠጣበት ቦታ እንኳን አጣሁ፡፡
  • ከጎረቤት ጋር አይጠጡም እንዴ?
  • ይህ የሚመጣ ሳይመስለኝ በልማት ሰበብ አስነስቼያቸው መቼ ጎረቤት አለኝ ብለህ ነው?
  • እሱስ እውነት ብለዋል፡፡
  • ከተማ ውስጥ ደግሞ ያኔ ቤት ተዘግቶልን እንዳልተዝናናን አሁን ግልምጫውን አልቻኩትም፡፡
  • እሱማ እኔም ሰምቻለሁ፡፡
  • በዚያ ላይ ሊያጠቁኝ ይችላሉ ብዬ ስለምሠጋ የቁም እስረኛ ሆኛለሁ፡፡
  • ለነገሩ ሰው የዘራውን ነው የሚያጭደው ሲባል ሰምቻለሁ፡፡
  • ምን እያልከኝ ነው?
  • አገሪቱ ሙሉ እስር ቤት አልነበረች እንዴ በዚህ ብቻ ካለፈልዎት ጥሩ ነው፡፡
  • ስማ ባለቤቴን ከዕድር አባረሯት፡፡
  • ዕድር ደግሞ ምን ያደርግላችኋል ብለው ነው?
  • ለማንኛውም ቢሆን ማኅበራዊ ሕይወት ያስፈልጋል፡፡
  • ለነገሩ ዕድር የሚያስፈልግዎት ዋናው ጊዜ አሁን ሊሆን ይችላል፡፡
  • እሱን እኮ ነው የምልህ፡፡
  • ክቡር ሚኒስትር ለእኔ ምን ጊዜም ቢሆን ባለውለታዬ ነዎት፡፡
  • ምን ያደርጋል ሕዝቡ ጠላኝ፡፡
  • እርስዎ ባይኖሩ ኖሮ እንደ እኔ ዓይነቱ ያልተማረና ብቃት የሌለው ግለሰብ ሚሊየነር መሆን ይችል ነበር?
  • እሱማ እንደ አንተ ዓይነቱን መኃይም ሚሊየነር ያደረገ ሥርዓት መገንባታችን የሚያሸልመን እንጂ የሚያስወቅሰን መሆን አልነበረበትም፡፡
  • ክቡር ሚኒስትር እኔ መቼም ቢሆን ውለታዎትን አልረሳም፡፡
  • አንተ ብቻህን ምን ታደርግልኛለህ ብለህ ነው?
  • እኔማ ለዋሉልኝ ውለታ ማሸለም አለብኝ ብዬ ቆርጬ ተነስቻለሁ፡፡
  • ምንድነው የምታሸልመኝ?
  • እንዲያው ካጣሁ ገዝቼም ቢሆን አሸልምዎታለሁ፡፡
  • ምን?
  • የክቡር ዶክትሬት!

[የክቡር ሚኒስትሩ ዘመድ ከውጭ ይደውልላቸዋል]

  • ክቡር ሚኒስትር ደስ የሚል ዜና ልነግርዎት ነው፡፡
  • ምንድነው እሱ?
  • ወደ አገሬ ልገባ ነው፡፡
  • ምን አልክ?
  • ወደ አገሬ ልመለስ ነው፡፡
  • ይኼማ ፈጽሞ የማልቀበለው ነገር ነው፡፡
  • ምነው ክቡር ሚኒስትር?
  • ስማ ውጭ ያለኝን ቤት አይሉ የባንክ አካውንት የምታንቀሳቅስልኝ ሰው እንዴት ነው አገር ቤት እመለሳለሁ የምትለኝ?
  • ክቡር ሚኒስትር ከዚህ በኋላ በዚህ ሥራ አልቀጥልም፡፡
  • ምን ማለት ነው?
  • ዘመኑ መቼም የፍቅር፣ የይቅርታና የመደመር መሆኑን ያውቃሉ?
  • ለአንተ የሚጠቅምህ እነሱ ሳይሆኑ የእኔ ሀብት መሆኑን ረሳኸው?
  • ክቡር ሚኒስትር ከዚህ በኋላ በቃኝ፡፡
  • ውጭ አገር ሃያ ምናምን ዓመት አንደላቅቄ ካኖርኩህ በኋላ እንደዚህ ስትል አታፍርም?
  • ከዚህ በኋላ በቃኝ አልኩዎት እኮ?
  • ስማ ያ ገንዘብ በአንተ ስም መሆኑን ታውቃለህ አይደል?
  • ክቡር ሚኒስትር ገንዘቡ የእርስዎ እንዳልሆነ አያውቁም እንዴ?
  • ምን ማለት ነው? ለዘመናት የለፋሁበት ሀብት እኮ ነው?
  • ለዘመናት የዘረፍኩት ማለትዎ ነው?
  • ሰውዬ አብደሃል እንዴ?
  • ኧረ በፍፁም ክቡር ሚኒስትር፡፡
  • በቃ በአፋጣኝ መጥቼ ገንዘቡን ወደ እኔ ታዘዋውረዋለህ፡፡
  • እኔ ቀድሜ አዘዋውሬዋለሁ፡፡
  • ወዴት?
  • ወደ ትረስት ፈንዱ!