Skip to main content
x

የኤርትራ ሠራተኞች ማኅበራት ኮንፌዴሬሽን ከኢትዮጵያ አቻው ጋር ለመሥራት0 በአዲስ አበባ ስምምነት ያደርጋል

በኢትዮጵያና በኤርትራ ሠራተኛ ማኅበራት ኮንፌዴሬሽኖች መካከል የሁለትዮሽ ግንኙነት ለመፍጠር የሚያስችል ስምምነት መደረጉን ተከትሎ የኤርትራ ሠራተኛ ማኅበራት ኮንፌዴሬሽን ልዑካን ቡድን ወደ ኢትዮጵያ እንደሚመጣ ተገለጸ፡፡ የምሥራቅ አፍሪካ ሠራተኞች ኮንፌዴሬሽን ሊመሠረት ነው፡፡

የኢትዮጵያ ሠራተኞች ማኅበራት ኮንፌዴሬሽን (ኢሠማኮ) እንዳስታወቀውበሁለቱ አገሮች የሠራተኛ ማኅበራት ኮንፌዴሬሽኖች መካከል የሁለትዮሽ ግንኙነት ለመፍጠር የሚያስችል ስምምነት ባለፈው ሳምንት የኢሠማኮ ልዑካን ቡድን አስመራ በነበረበት ወቅት ደርጓል።

በኢሠማኮ ፕሬዚዳንት አቶ ካሳሁን ፎሎ የተመራውና 44 ልዑካን አባላት በማካተትና በኤርትራ የአራት ቀናት ቆይታ በማድረግ ከኤርትራ አቻው ጋር አብረው ሊሠሩ ስለሚችሉባቸው ጉዳዮች መምከራቸው ታውቋል፡፡

እንደ ኢሠማኮ መረጃ ሁለቱ ኮንፌዴሬሽኖች ግንኙነታችን ከማጠናከር ባሻገር የሁለቱም አገሮች ሰላምና መቀራረብ ሥር እንዲሰድ የኢትዮጵያና የኤርትራ መንግሥታትን የጋራ ስምምነት ተከትለው የበኩላቸውን በጋራ ለመሥራት ተስማምተዋል፡፡ በተለይ በአፍሪካ ቀንድ ካባቢ ያሉ አገሮች የሠራተኞች ማኅበራት ኮንፌዴሬሽን ለማቋቋም በተጀመረው እንቅስቃሴ ዙሪያ በመነጋገር የቀጣናውን ኮንፌዴሬሽን ለመመሥረት በጋራ እንደሚሠሩ ስለመግባባታቸው ይኸው መረጃ ይጠቅሳል።

የኢሠማኮ የአመራ ጉዞ በተመለከተ እንዲሁም በኮንፌዴሬሽኖች መካከል በተደረጉ ውይይቶች ዙሪያ የኢሠማኮ ፕሬዚዳንት አቶ ካሳሁን ፎሎ ለሪፖርተር እንደገለጹት እንደ አሁኑ በሁለቱ ማኅበራት መሪዎች መካከል ይፋዊ ግንኙነት ባይፈጠርም፣ በዓለም የሥራ ድርጅት (በአይኤልኦ) ሰብሳባዎችና በሌሎችም ዓለም አቀፋዊ መድረኮች ላይ ሲገናኙ ቆይተዋል።

በአስመራ በተደረገፈው ስምምነት መሠረት በጋራ ለመሥራት በሚያስችሉ ጉዳዮች ላይ ሁለቱ አገሮች አዲስ አበባ ላይ የመግባቢያ ሰነድ እንደሚፈራረሙም አቶ ካሳሁን ገልጸዋል፡፡ ለስምምነቱም በቅርቡ ወደ ኢትዮጵያ ሚመጣ የኤርትራ ሠራተኞች ማኅበራት ኮንፌዴሬሽን አመራ ልዑክ እየተዘጋጀ እንደሚገኝ ከተሰጠው ማብራሪያ ለመረዳት ተችሏል፡፡ የኤርትራን ሠራተኞች ማኅበራት ኮንፌዴሬሽን ፕሬዚዳንት አቶ ተከስተ ባህረእክ የተመራ የልዑካን ቡድን እንደሚመጣ ለማወቅ ተችሏል፡፡

የኢትዮጵያ ሠራተኞች ማኅበራት ኮንፌዴሬሽን የልዑካን ቡድን በኤርትራ ቆይታቸው የኢንዱስትሪ ዞንን፣ የተለያዩ ማምረቻ ኩባያዎችን ጨምሮ የሠራተኞች ማሠልጠኛ ተቋማትን ጎብኝተዋል፡፡ ወደ ምጽዋ ወደብ በመሄድም ጉብኝት ያረገ መሆኑም ተገልጿል፡፡ በአስመራ የኤርትራ ሠራተኞች ማኅበራት ኮንፌዴሬሽን አመራር የከተማው ነዋሪ ያልጠበቁት አቀባበል እንዳደረጉላቸው አቶ ካሳሁን ገልጸዋል፡፡

ይህ በእንዲህ እንዳለ የምሥራቅ አፍሪካ ሠራተኞች ማኅበራት ኮንፌዴሬሽን በጥቅምት 2011 ዓ.ም. አዲስ አበባ ላይ እንደሚመሠረት ታውቋል፡፡

ይህ ኮንፌዴሬሽን ስምንቱንም የኢጋድ አባል አገሮች ያካተተ ሲሆን፣ የምሥራቅ አፍሪካ ሠራተኞች ማኅበራት ኮንፌዴሬሽን የማስተባበሩን ሥራ ኢሠማኮ በመውሰድ ምሥረታው ዕውን መሆን አስፈላጊ የሆኑ ዝግጅቶች በመጠናቀቅ ላይ መሆናቸውን ከአቶ ካሳሁን ገለጻ ለመረዳት ተችሏል፡፡

ይህ ከኢጋድ ጋር ጭምር ይሠራል ተብሎ የሚጠበቀው የምሥራቅ አፍሪካ ሠራተኞች ማኅበራት ኮንፌዴሬሽን፣ የኤርትራ ሠራተኞች ማኅበራት ኮንፌዴሬሽንን በማካተት የሚመሠረት ነው፡፡ ኮንፌዴሬሽኑ በአጠቃላይ በምሥራቅ አፍሪካ የሠራተኞችን ጉዳዮች በተመለከቱ ጉዳዮች በጋራ የሚሠራበትን ዕድል የሚፈጥርና በምሥራቅ አፍሪካ ሠራተኞችን የሚወክል ጠንካራ ተቋም እንዲኖር ያለመ ነው፡፡