Skip to main content
x
ክቡር ሚኒስትሩ በቅርቡ ከውጭ ከመጡ ፖለቲከኞች አንዱን አግኝተው እያወሩት ነው

ክቡር ሚኒስትሩ በቅርቡ ከውጭ ከመጡ ፖለቲከኞች አንዱን አግኝተው እያወሩት ነው

[ለክቡር ሚኒስትሩ የእህታቸው ልጅ ስልክ ይደውልላቸዋል]

  • እንኳን አደረሰህ ጋሼ፡፡
  • ጎረምሳው ሳልደውልልህ ቀደምከኝ፡፡
  • እኔማ ጤንነትህን በዚያው ላረጋግጥ ብዬ ነው፡፡
  • ኧረ እሱስ ደህና ነኝ፡፡
  • ታዲያ ምነው ረሳኸን?
  • ኧረ ረስቻችሁስ አይደለም፣ ልደውል እያሰብኩኝ ነበር፡፡
  • ምነው ታዲያ ድምፅህ ጠፋ?
  • ድምፅህ ጠፋ ስትለኝ?
  • ያው በፊት በዓል ከመድረሱ ከሳምንት በፊት ቀጠሮ ታስይዘኝ ነበር፡፡
  • የምን ቀጠሮ ነው?
  • ጋሼ በበዓል ያስለመድከን ነገር አለ እኮ?
  • ምንድነው ያስመለድኳችሁ?
  • በእውነት ጋሼ ሁሉም ነገር ጠፍቶብሃል ልበል?
  • ለምን ግልጽ አድርገህ አትነግረኝም?
  • ለበዓል ያስለመድከንን ረሳኸው እንዴ?
  • በዓል ደረሰ እንዴ?
  • እትዬ እኮ ምነው ዝም አለን ደውልለት ብላኝ ነው፡፡
  • እኔማ በዓል መድረሱን ራሱ ረስቸዋለሁ፡፡
  • ለነገሩ ሥራ እንደሚበዛብህ አውቃለሁ፡፡
  • ታዲያ ምን እንዳደርግላችሁ ነው የምንትፈልጉት?
  • የተለመደውን የበግና የዶሮ መግዣ ነዋ፡፡
  • እ. . .
  • እንዴ ጋሼ ሌላ ጊዜማ ለአዲሱ ዓመት እኮ ተጨማሪ ስጦታዎችን ትሰጠናለህ፡፡
  • ለእሱ ነው አሁን የደወልከው?
  • አዎን ጋሼ፡፡
  • እሱን የማደርግላችሁ የነበረው እኮ ያኔ የኢትዮጵያ ኢኮኖሚ 11 በመቶ እያደገ በነበረበት ወቅት ነው፡፡
  • አሁንስ ቢሆን የአገሪቱ ኢኮኖሚ እያደገ ነው እያላችሁ አይደል እንዴ?
  • ስማ ያኔ አገሪቱ ስታድግ በቀጥታ እኛ ነበርን የምናድገው፡፡
  • አሁንስ ጋሼ?
  • አሁንማ ኢኮኖሚው በቀጥታ ከእኛ ጋር እንደማይገናኝ ታውቃለህ፡፡
  • የእነዚያ የስኳር ፋብሪካዎች ፕሮጀክት መጓተታቸው በእርግጥ ጎድቶሃል ማለት ነው?
  • ምን እሱ ብቻ አሁንማ የግድቡም ተጨምሮበት ይኸው ባዶ ቀርቻለሁ፡፡
  • ስለዚህ ሁሉ ነገር የውሸት ነው ማለት ነው?
  • ምኑ ነው የውሸት?
  • አገሪቱ 11 በመቶ አድጋለች ምናምን የምትሉት?
  • ማደግ አድጋለች ግን አገር የሚለው ፍቺ ላይ ነው የማንስማማው፡፡
  • ምን ማለት ነው?
  • ድሮ አገር የምንለው ራሳችንን ብቻ ነው፡፡
  • እነማን?
  • ባለሥልጣናቱን፡፡
  • ለማንኛውም ጋሼ አሁን እኛ በዓል የምናሳልፍበት ምንም የለንም፡፡
  • ስማ እኔ ራሱ በዓል የማሳልፍበት የለኝም፡፡
  • እንዴ ጋሼ ምን እያልክ ነው?
  • አሁን ከለውጡ ጋር አንድ ላይ መራመድ አለባችሁ፡፡
  • ምን ማለት ነው?
  • መንግሥት ራሱ ለበዓል የሚወጣው ወጪ ይቀነስ የሚል መመርያ እንዳወጣ ታውቃለህ አይደል?
  • እንዲያውም መመርያው ከወጣ በኋላ እኮ ነው በመንግሥት በኩል ድግስ የበዛው፡፡
  • ቢሆንም እንዲህ ዓይነት በዓሎችን እኔ በየዓመቱ መደጎም አልችልም፡፡
  • ታዲያ በየስንት ጊዜው ነው የምትደጉመን?
  • በየሁለት ዓመቱ፡፡
  • እንደ አፍሪካ ዋንጫ?

[ክቡር ሚኒስትሩ ከደላላ ወዳጃቸው ጋር እያወሩ ነው]

  • በጣም ስፈልግዎት ነው ያገኘሁዎት ክቡር ሚኒስትር፡፡
  • ደግሞ ምን ተገኘ?
  • ስልክዎን ብለው ብሠራው እኮ በጣም አስቸገረኝ፡፡
  • ምን ፈልገህ ነው?
  • ለነገሩ ዘንድሮ ከእርስዎ ሊያቆራርጠኝ የተነሳው ይኼ ቴሌ የሚሉት ድርጅት ነው፡፡
  • ምን አድርጎ?
  • ሳይሉት ዋጋውን ቀንሶ በቃ ሁሉም ደዋይ ሆነና እርስዎን በየትኛው ኔትወርክ ላግኝዎት?
  • አሁን ለምንድነው የፈለግከኝ?
  • በመጀመርያ እንኳን አደረሰዎት፡፡
  • ምን ያደርሰኛል፣ ደረሰብኝ እንጂ?
  • ክቡር ሚኒስትር በሆነው ባልሆነው አይማረሩ፡፡
  • እንደዚህ አዲስ ዓመት የቀፈፈኝ የለም፡፡
  • ለምን ክቡር ሚኒስትር?
  • በቃ ሁሉ ነገር ተቆላልፎ በጣም ያስጠላል፡፡
  • ኧረ ክቡር ሚኒስትር አሁን አንድ አሪፍ ሐሳብ መጥቶልኛል፡፡
  • የምን ሐሳብ ነው?
  • ባለፈው ያስታውሳሉ የማይሆን የቢዝነስ ሐሳብ ነው ያሉኝ?
  • የትኛው?
  • ያ የቲሸርትና የባነር ማተሚያ ሥራ ነዋ፡፡
  • እሱን አታስታውሰኝ ምን ያህል እንዳከሰርከኝ ታውቃለህ?
  • ክቡር ሚኒስትር አሁን ያን መመርያ ማን ይወጣል ብሎ አስቦ ያውቃል?
  • ትንሽ እንኳን ሳልሠራ ነው እኮ መንግሥት ቲሸርትና ኮፍያ መታተም ይቅር ያለው፡፡
  • እሱማ አውቃለሁ፣ ግን የእርስዎም ጥፋት ነበረበት፡፡
  • ምን አጠፋሁ?
  • ማሽኑን መጋዘን ውስጥ ከሚቆልፉበት እኔ ብሠራበት ጥሩ ነው፡፡
  • አሁንማ ገዥ ፈልግልኝና ሸጬ ልገላገለው፡፡
  • ምን ነካዎት ክቡር ሚኒስትር?
  • ምን ሆንክ?
  • አሁንማ አሪፍ አጋጣሚ ተፈጥሮልናል፡፡
  • የምን አጋጣሚ?
  • ሕዝቡን አይመለከቱትም እንዴ በየሳምንቱ እኮ ነው ሠልፍ እየወጣ ያለው፡፡
  • እሱስ ልክ ነህ ግን አመለጠን እኮ?
  • ክቡር ሚኒስትር ገና ከዚህ በኋላ በጣም በርካታ የሕዝብ ሠልፎች ይኖራሉ፡፡
  • ታዲያ ሌሎቹ ቢዝነሱን ተቆጣጥረውት እንዴት እኛ እንሠራዋለን?
  • መጀመርያ ታዲያ ማሽኑን ለምን አስመጡት?
  • እኔማ ያለ ውድድር የመንግሥትን ሥራ አገኛለሁ ብዬ ነው፡፡
  • ለማንኛውም እኔ ተወዳዳሪ የምንሆንበትን ሐሳብ ይዤ ነው የመጣሁት፡፡
  • ምን ዓይነት ሐሳብ?
  • አዩ ሕዝቡ አሁን አንዴ ለመንግሥት ይወጣል፣ በሚቀጥለው ደግሞ ለተቃዋሚ ይወጣል፡፡
  • ምን እያልከኝ ነው?
  • ምን እሱ ብቻ ክቡር ሚኒስትር ለተቃዋሚዎች አክቲቪስቶች የወጣው ሕዝብ፣ በሚቀጥለው ለመንግሥት አክቲቪስቶች ይወጣል፡፡
  • ስለዚህ ቢዝነሱ አዋጭ ነው እያልከኝ ነው?
  • ክቡር ሚኒስትር ሕዝቡ በቲሸርት ወጪ ተማሯል፡፡
  • ሕዝቡ ወዶ መስሎኝ ሠልፍ የሚወጣው?
  • ሕዝቡ ሠልፍ የሚወጣው ወዶ ሳይሆን ፈርቶ ነው፡፡
  • ለመሆኑ ተወዳዳሪ የምንሆንበት ሐሳብህ ምንድነው?
  • ቲሸርቱን በላይ በኩል መንግሥትን የሚያወድስ፣ በውስጥ በኩል ደግሞ ተቃዋሚን የሚያወድስ አድርጎ ማተም ነዋ፡፡
  • ጥሩ ሐሳብ ነው፡፡ ስለዚህ ሕዝቡ በአንድ ድንጋይ ሁለት ወፍ ይመታል ማለት ነው?
  • አዎን ክቡር ሚኒስትር፡፡
  • ታዲያ ቲሸርቱን ምን የሚል ስም እናውጣለት?
  • ተለዋዋጭ ቲሸርት!

[ክቡር ሚኒስትሩ ከሚስታቸው ጋር እያወሩ ነው]

  • መቼም ቴሌቪዥን ላይ የማየው ነገር ያስገርመኛል፡፡
  • ምኑ ነው የሚያስገርምሽ?
  • ሰው ወረተኛ ብቻ አይገልጸውም፡፡
  • ምን እያልሽ ነው?
  • ጠቅላይ ሚኒስትሩ በጎ ሥራ ምናምን ካሉ በኋላ በቃ ግማሹ ቤት ይገዛል፣ ግማሹ ቤት አፍርሶ ይሠራል፡፡
  • ይኼ አሁን የምታይው ሆይ ሆይታ የሚቀጥል እንዳይመስልሽ፡፡
  • እኔ እሱ አስገርሞኝ አይደል እንዴ የምነግርህ?
  • ስሚ ሕዝቡ አንዴ መንግሥትን፣ ሌላ ጊዜ ተቃዋሚን ይደግፋል እኮ?
  • ለነገሩ አንተ ሁሌም ቢሆን የሕዝቡ አካሄድ አይጥምህም፡፡
  • ስሚ እኛ አሁን ከመንግሥት የተቀበልነውን ሐሳብ መተግበር አለብን፡፡
  • የምን ሐሳብ?
  • የመደመር ሐሳብ ነዋ፡፡
  • እኔም ተደምሬያለሁ ልትለኝ ባልሆነ?
  • መደመርን በሌላ ሐሳብ ነው የተረዳሁት፡፡
  • አንተ እንዴት ነው የተረዳኸው?
  • መደመር ማለት መጨመር ማለት አይደል?
  • አዎ ልክ ነው፡፡
  • ስለዚህ እነዚያ አምስት ቪላዎች ላይ የቤት ኪራይ መጨመር አለብን፡፡
  • ምን?
  • እሱ ብቻ ሳይሆን ሕንፃችን ውስጥ ያሉ ሱቆች ላይ ሒሳብ ይደመራል፡፡
  • በቅርቡ ነበር እኮ ኪራይ የጨመርንባቸው?
  • በቃ ከመንግሥት የተቀበልነው ሐሳብ እንደሆነ ንገሪያቸው፡፡
  • ስለዚህ የሠራተኞች ደመወዝም ሊጨመር ነው ማለት ነው?
  • በነገራችን ላይ መደመር ውስጥ እኮ መቀነስም አለ ተብሏል፡፡
  • ስለዚህ ምን እያልክ ነው?
  • በመጀመርያ የሠራተኞቻችንን ጥቅማ ጥቅሞች እንቀንሳለን፡፡
  • አባ መላ እኮ ነህ፡፡
  • ከተቻለ ደግሞ ሠራተኞቻችን ላይ ጫና መጨመር ነው፡፡
  • ሰውዬ ሕዝቡ ግን እንዳይጠምድህ?
  • ነገርኩሽ እኮ እኔ ከመንግሥት በተቀበልኩት አቅጣጫ ነው የምሠራው፡፡
  • እንደዚህ ካደረክ ግን በቅርቡ ስም ይወጣልሃል፡፡
  • ምን የሚል?
  • ሆዳም!

[ክቡር ሚኒስትሩ በቅርቡ ከውጭ ከመጡ ፖለቲከኞች አንዱን አግኝተው እያወሩት ነው]

  • ክቡር ሚኒስትር እንዴት ነዎት?
  • እንኳን ለአገርህ በሰላም አበቃህ፡፡
  • እናንተም እንኳን በደህና ጠበቃችሁን፡፡
  • ከዚህ በኋላ እኛም ውጭ ስንወጣ ከስድብ ተገላገልን፡፡
  • የሚያሰድባችሁ እኮ ሥራችሁ ነው፡፡
  • ይኸው እናንተ እዚህ ስትመጡ ደማቅ አቀባበል አይደል እንዴ የተደረገላችሁ?
  • ክቡር ሚኒስትር እኛ እኮ ለሕዝቡ ስንታገል ነው የቆየነው፡፡
  • እኛስ ለማን ነበር የታገልነው?
  • እናንተማ የራሳችሁን ሆድ ለመሙላት ነው የታገላችሁት፡፡
  • እዚህም ገብተህ ስድብ አላቆምክም ማለት ነው?
  • ለነገሩ አሁን ወደ አገር ቤት የገባሁት ለመሳደብ ሳይሆን ሕዝቡን ለማረጋጋት ነው፡፡
  • እናንተ ደግሞ ከስድብ ውጪ ለሕዝቡ መቼ ፕሮግራማችሁን አስታውቃችሁ ታውቃላችሁ?
  • እሱን እንግዲህ በምርጫው ሜዳ ላይ ይለያል፡፡
  • ሕዝቡማ ሁሌም ከእኛ ጎን ነው፡፡
  • ክቡር ሚኒስትር 97 ምርጫ ላይ እንዴት እንደተጫወትንባችሁ መቼም ያስታውሳሉ?
  • ሥራ እንጂ መኮፈስ አያዋጣም፡፡
  • ክቡር ሚኒስትር እኛ ብቸኛ ፀሎታችን ቀጣዩ ምርጫ ነፃ እንዲሆን ነው፡፡
  • ከምን?
  • ከኮሮጆ ሌባ!