Skip to main content
x
ክቡር ሚኒስትሩ በቅርቡ አገር ውስጥ ከገባ ሪሰርቸር ጋር ሆቴል ውስጥ ተገናኝተው እያወሩ ነው

ክቡር ሚኒስትሩ በቅርቡ አገር ውስጥ ከገባ ሪሰርቸር ጋር ሆቴል ውስጥ ተገናኝተው እያወሩ ነው

[ክቡር ሚኒስትሩ በጣም ተናደው ከሾፌራቸው ጋር እያወሩ ነው]

  • ሰውዬ ለመሆኑ ጤነኛ ነህ?
  • ክቡር ሚኒስትር ያጋጠመኝን እኮ ስላላወቁ ነው፡፡
  • ሁለት ቀን ሙሉ ስልክህን አጥፍተህ?
  • በእነዚህ ሁለት ቀናት የደረሰብኝን መከራ ስለማያውቁ እኮ ነው?
  • የላኩህ ቦታ ብጥብጥ አለ እንዴ?
  • ብጥብጥ እንኳን አልነበረም ክቡር ሚኒስትር፡፡
  • ታዲያ ምን ሆነህ ነው ልትገኝ ያልቻልከው?
  • የላኩኝን መልዕክት ለማድረስ ስንት መስዋዕት ስከፍል ነበር፡፡
  • የምን መስዋዕትነት ነው የምታወራው?
  • ክቡር ሚኒስትር የሰጡኝ ሥራ ከፍተኛ መስዋዕት የሚያስከፍል ነበር፡፡
  • እህቴ የምትበላው ስለተቸገረች ለእሷ ጤፍ አድርስ አይደል እንዴ የተባልከው?
  • እሱማ ልክ ነው ክቡር ሚኒስትር፡፡
  • ታዲያ ይኼን መሥራት ካልቻልክ ምኑን ሾፌር ሆንክ?
  • ክቡር ሚኒስትር ሥራው እንዲህ ቀላል አይደለም እኮ?
  • ምን ታካብዳለህ ሴትዮዋ በረሃብ ትሙት?
  • ኧረ ክቡር ሚኒስትር ማንም ኢትዮጵያዊ በረሃብ መሞት የለበትም፡፡
  • ስማ ይቺ ሴትዮ ብትሞት ግን አንተ እንደገደልካት ማወቅ አለብህ፡፡
  • የተባለውን አልሰሙም እንዴ ክቡር ሚኒስትር?
  • ምን ተባለ?
  • መግደል መሸነፍ ነው ተብሏል፣ ስለዚህ እኔ መሸነፍ አልፈልግም፡፡
  • የፖለቲካ ዲስኩርህን እዚያው፡፡
  • ክቡር ሚኒስትር እኔማ የሰጡኝ ሥራ በቴክኖሎጂ ሳይቀር ታግዤ ለመሥራት አስቤያለሁ፡፡
  • ምንድነው የምታወራው?
  • ይኸው እህሉን እንዴት ለእህትዎ በድሮን ማድረስ እችላለሁ ብዬ እየተንቀሳቀስኩ ነው፡፡
  • የምትበላው የላት የምትከናነበው አማራት አሉ፡፡
  • ክቡር ሚኒስትር ለሥራችን እኮ ዘመኑ ያመጣውን ቴክኖሎጂ መጠቀም አለብን፡፡
  • ሰውዬ ለመሆኑ ስለድሮን ታውቃለህ?
  • እንዴ ይኸው በአገራችን ድሮን በመጠቀም የተለያዩ ነገሮች ለሰዎች እየተላኩ እኮ ነው፡፡
  • እና አንተም በድሮን 100 ኪሎ ጤፍ ልታደርስ አስበህ ነው?
  • ምን ችግር አለበት ክቡር ሚኒስትር?
  • ለመሆኑ አንተ ስለቴክኖሎጂ ታውቃለህ?
  • ክቡር ሚኒስትር ቀኑን ሙሉ ፌስቡክ ላይ ተቀምጬ አይደል እንዴ የምውለው?
  • ስለዚህ ቴክኖሎጂ በሚገባ ታውቃለህ ማለት ነው?
  • ምን ነካዎት ክቡር ሚኒስትር ይኼንን የድሮን ቴክኖሎጂ ራሱ እሱ ላይ አይደል እንዴ ያየሁት?
  • እንደ አንተ ዓይነቱ እኮ ነው ሁሉን አውቃለህ እያለ አገር የሚያጠፋው፡፡
  • ቴክኖሎጂ ብዙ አይመችዎትም መሰለኝ ክቡር ሚኒስትር?
  • ስማ ለማንኛውም እስካሁን እህሉን ባለማድረስህ ቅጣት ይጠብቅሃል፡፡
  • የምን ቅጣት ነው ክቡር ሚኒስትር?
  • የደመወዝ ቅጣት፡፡
  • ምን አጥፍቼ ክቡር ሚኒስትር?
  • ይኸው ለእህቴ አድርስ የተባልከውን እህል ሳታደርስ ሁለት ቀን የት ቆይተህ እንደመጣህ አይታወቅም፡፡
  • ምክንያቴን ቢያውቁት እኮ እንደዚህ አይሉም ክቡር ሚኒስትር፡፡
  • ምንድነው ምክንያትህ?
  • የእህትዎት ቤት ለመድረስ በጣም አስቸጋሪ ነው፡፡
  • አካባቢውን አውቀኸዋል አይደል እንዴ?
  • አካባቢውን ባውቀውም ቤታቸው ለመግባት ዘዴ ስዘይድ ነበር፡፡
  • ቤቷ ለመግባት ለምን አልቻልክም?
  • ቤታቸው ለመግባት የሠፈሩ አቀማመጥ አይመችም፡፡
  • ምን ሆነብህ?
  • አባጣ  ጎርባጣ!

[ክቡር ሚኒስትሩ ከደላላው ጋር ተገናኝተው እያወሩ ነው]

  • ምነው ተከፍተሃል?
  • እንዴት አልከፋ ክቡር ሚኒስትር?
  • እኮ ምን ሆንክ?
  • ክቡር ሚኒስትር ብዙ የቢዝነስ አጋጣሚዎች እኮ እያለፉን ነው፡፡
  • አገሪቱ እንደዚህ እየታመሰች እንዴት ቢዝነስ መሥራት ይቻላል?
  • አዩ ክቡር ሚኒስትር ሁለታችንም አርጅተናል ማለት ነው፡፡
  • ምን እያልክ ነው?
  • በፊት እኮ በብጥብጥ ውስጥ ሳይቀር ቢዝነስ እንሠራ ነበር፡፡
  • ያኔማ የእኛ ሰዎች ሁሉም ቦታ ተቀምጠው ስለነበር ነው፡፡
  • ግን ክቡር ሚኒስትር በዚህ ከቀጠለ ዋጋ የለንም፡፡
  • ምን እያልክ ነው?
  • እንደዚህ ማሰብ ካቃተን የያዝናቸውን ቢዝነሶች ራሱ እንዳናጣቸው እሠጋለሁ፡፡
  • ምን ሆነህ ነው ይኼን ያህል?
  • ክቡር ሚኒስትር ምን ምን የመሳሰሉ ዕድሎች እኮ እያለፉን ነው፡፡
  • ከቲሸርትና ከባነሩ ቢዝነስ ሌላ ምን አመለጠን?
  • ክቡር ሚኒስትር እንደዚህ የተደበርኩት እኮ ሌላ ቢዝነስ ስላመለጠን ነው፡፡
  • እኮ የምን ቢዝነስ ነው?
  • የቀለም ቢዝነስ ነዋ፡፡
  • ሰውዬ እኔ መቼም ቢሆን የቀለም ፖለቲካን ስታገል እንደኖርኩ ታውቃለህ፡፡
  • እኔም እሱን ብዬ ነበር ክቡር ሚኒስትር፡፡
  • ስለዚህ መቼም ቢሆን የቀለም ፖለቲካን አልደግፍም፡፡
  • ክቡር ሚኒስትር ዝም ብለው ከበሩ እኮ?
  • እነማን ናቸው የከበሩት?
  • ምነው ያን ዝም ብሎ የተቆለፈ መጋዘን የቀለም ፋብሪካ አድርገነው ቢሆን ኖሮ?
  • ምንድነው የምታወራው?
  • ክቡር ሚኒስትር ከአዲስ አበባ ወጣ ሲሉ እኮ ሁሉ ነገር ቀይና አረንጓዴ ነው የተቀባው፡፡
  • በነገራችን ላይ በእሱ ነገር በጣም ነው የተቃጠልኩት፡፡
  • ክቡር ሚኒስትር ብቻ ምን አለፋዎት በቀላሉ የምንከብርበት አጋጣሚ ነው ያለፈን፡፡
  • ይኸው አሁን መንግሥት ማንም እንዳይቀባ ከልክሏል አይደል እንዴ?
  • ቢሆንም ክቡር ሚኒስትር፣ ስልክ እንጨቱ አይሉ አጥሩ ምን አለፋዎት ሰው ራሱ ረዘም ላለ ሰዓት ቆመው ካገኙ ይቀቡ ነበር አሉ፡፡
  • ነገርኩህ እኮ ከዚህ በኋላ ቢዝነሱ ያከትምለታል፡፡
  • እኔስ ያናደደኝ ምንም ሳንሠራ ቢዝነሱ በመሞቱ አይደል እንዴ?
  • አሁን ስናወራ ግን አንድ ሐሳብ መጣልኝ፡፡
  • የምን ሐሳብ ክቡር ሚኒስትር?
  • ለምን መንግሥት የፅዳቱን ፕሮጀክት እንዲሰጠኝ አላደርግም?
  • የምን የፅዳት ፕሮጀክት?
  • በቃ የተቀባውን ቀለም ለማጥፋት እኛ ሥራውን እንውሰደዋ፡፡
  • አባ መላ እኮ ነዎት፡፡
  • ስለዚህ እንዲያውም በአፋጣኝ ማምጣት ነው፡፡
  • ምንድነው የምናመጣው?
  • ኬሚካሉን ነዋ፡፡
  • የምን ኬሚካል?
  • የቀለም ማስለቀቂያ!

[ክቡር ሚኒስትሩ የፋይናንስ ኃላፊውን ቢሯቸው አስጠሩት]

  • ሪፖርቱን ተመለከቱት ክቡር ሚኒስትር?
  • እስኪ ቁጭ በል፡፡
  • ችግር አለ እንዴ?
  • ሥርዓት አልበኝነት እኮ እዚህ እኛ ቢሮ እንደገባ አላወቅኩም ነበር?
  • የምን ሥርዓት አልበኝነት?
  • ከዚህ በላይ ምን ዓይነት ሥርዓት አልበኝነት እንዲመጣ ነው የምንጠብቀው?
  • ምነው ክቡር ሚኒስትር?
  • እኔ ያዘዝኩት ነገር ካልተከበረ ከዚህ በላይ ሥርዓት አልበኝነት የት አለ?
  • ኧረ ይረጋጉ ክቡር ሚኒስትር?
  • ትዕዛዜ ሳይከበር እንዴት ልረጋጋ?
  • የትኛው ትዕዛዝ?
  • ከዚህ በፊት መመርያ አላወጣንም?
  • የምን መመርያ?
  • ማንም ሰው እኔን ሳያስፈቅድ ፊልድ እንዳይወጣ አላልኩም?
  • ብለዋል ክቡር ሚኒስትር፡፡
  • ታዲያ ይኼ መመርያ የወጣው ለጨዋታ ነው?
  • ኧረ በፍፁም ክቡር ሚኒስትር፡፡
  • ለምንድነው ተፈጻሚ ያልሆነው?
  • እየተፈጸመ እኮ ነው ክቡር ሚኒስትር፡፡
  • አያውቅም ብለህ ልትጫወትብኝ ነው?
  • እኔ እንደዚህ ዓይነት ንቀት ለእርስዎ የለኝም፡፡
  • ታዲያ ይኼን ወጪ አይተኸዋል?
  • የቱን ወጪ ክቡር ሚኒስትር?
  • ለፊልድ የወጣውን ወጪ ነዋ፡፡
  • ተመልክቼዋለሁ ክቡር ሚኒስትር፡፡
  • ካቀረብክልኝ ወጪ ከ30 በመቶ በላይ ነው እኮ?
  • አውቃለሁ ክቡር ሚኒስትር፡፡
  • ታዲያ መመርያውን ከማውጣታችን በፊት ከነበረው በላይ ሆኗል እኮ ወጪው?
  • ምን ላድርግ ክቡር ሚኒስትር?
  • መመርያውን ለመተግበር ምንድነው ያስቸገረህ?
  • መመርያውንማ ተግባራዊ አድርጌዋለሁ አልኩ እኮ ክቡር ሚኒስትር?
  • ምን ይላይ ይኼ? ወጪውን ዓይተኸዋል?
  • ክቡር ሚኒስትር ሪፖርቱን በደንብ ያነበቡት አልመሰለኝም?
  • ይኸው ፊት ለፊት እያየሁት አይደል እንዴ?
  • በደንብ ቢያዩትማ እንደዚህ አይጮሁብኝም ነበር?
  • ይኼ ለፊልድ የወጣ ወጪ አይደለም እያልከኝ ነው?
  • እሱማ ነው፡፡
  • ታዲያ እኔ ሳላውቅ ይኼ ሁሉ ወጪ እንዴት ይወጣል?
  • ክቡር ሚኒስትር ወጪውንማ በሚገባ ያውቁታል፡፡
  • እኔ እኮ እስከ ዛሬ ማንም ፊልድ እንዲወጣ ፈቅጄ አላውቅም፡፡
  • እውነት ነው ክቡር ሚኒስትር፡፡
  • ታዲያ ማን ፊልድ ወጥቶ ነው ይኼ ሁላ ወጪ?
  • እርስዎ!

[ክቡር ሚኒስትሩ በቅርቡ አገር ውስጥ ከገባ ሪሰርቸር ጋር ሆቴል ውስጥ ተገናኝተው እያወሩ ነው]

  • ኢትዮጵያን መቼም እንደጠበቅካት አይደለም ያገኘሃት አይደል?
  • አዎ እንደጠበቅኳት አይደለም ያገኘኋት ክቡር ሚኒስትር፡፡
  • ብዙ ለውጥ አለ አይደል?
  • በጣም ብዙ ለውጥ አለ ክቡር ሚኒስትር፡፡
  • የአገሪቱ ልማት፣ ዕድገትና ሥልጣኔ አላስደነቀህም?
  • የምን ዕድገት? የምን ልማት? የምን ሥልጣኔ?
  • አሁን በሚገባ ነው ያረጋገጥኩት፡፡
  • ምንድነው ያረጋገጡት?
  • እናንተ ዳያስፖራዎች ጨለምተኛ መሆናችሁን፡፡
  • ክቡር ሚኒስትር ለእኔ የታየኝ ዕድገት ሳይሆን አገሪቱ የኋሊት መሄዷን ነው፡፡
  • ድሮም ጨለምተኛ ናችሁ እኮ፡፡
  • ሰሞኑን አገሪቱ ውስጥ የሚካሄደውን ነገር አላስተዋሉትም ማለት ነው?
  • ምን እያልክ ነው?
  • ለምን ሌላ ቋንቋ ተናገርክ ተብሎ ሰው የሚገደልባት አገር የምን ሥልጣኔ ነው ያለው?
  • እ. . .
  • ክቡር ሚኒስትር ለምን ለየት ያለ ልብስ ለበስክና ለምን ለየት ያለ ምግብ በላ ተብሎ ሰው ሲገደል እያየን ስለልማት ያወራሉ?
  • ስማ ይህች አገር የሦስት ሺሕ ዓመት ታሪክ ያላት ናት፡፡
  • ክቡር ሚኒስትር ፈረንጆቹ ከዛሬ 500 ዓመት በፊት በሚጣሉበት ነገር እየተጣላን ስለዕድገትና ስለልማት እንዲሁም ስለሥልጣኔ ማውራት አንችልም፡፡
  • እስኪ ቀና ለመሆን ሞክር፡፡
  • ነገርኩዎት ክቡር ሚኒስትር አክቲቪስቶችና ፖለቲከኞች ሕዝብ በሚናገረው ቋንቋ፣ በሚለብሰው ልብስና በሚበላው ምግብ እየለያዩ የሚያጋድሉበት አገር ዜጋ ነኝ ለማለት አፍራለሁ፡፡
  • እ. . .
  • ስለዚህ ኢትዮጵያ የሦስተኛ ዓለም አገር መሆን አይገባትም፡፡
  • እሱማ ካደጉት አገሮች ተርታ ለማሠለፍ ወጥረን እየሠራን ነው፡፡
  • ወዴት ወዴት ክቡር ሚኒስትር?
  • ምነው?
  • ኢትዮጵያ መመደብ ያለባት ሌላ ዓለም ውስጥ ነው፡፡
  • የትኛው ዓለም?
  • አራተኛው ዓለም!