Skip to main content
x
የትራንስፖርት አሠሪዎች ፌዴሬሽን ተቋቋመ

የትራንስፖርት አሠሪዎች ፌዴሬሽን ተቋቋመ

የትራንስፖርት አሠሪዎች ፌዴሬሽን መመሥረቱ ጥቅምት 1 ቀን 2011 ዓ.ም. በይፋ ተበሰረ፡፡ በካፒታል ሆቴል በተከናወነው ሥነ ሥርዓት ላይ መቋቋሙ የተበሰረው ይኼው ፌዴሬሽን ከሠራተኛና ማኅበራዊ ጉዳይ ሚኒስቴር ሕጋዊ ውቅና ተችሮታል፡፡

የፌዴሬሽን ፕሬዚዳንት አቶ ብርሃኔ ዘሩ እንደገለጹት፣ በፌዴሬሽን አማካይነት የትራንስፖርት ባለሀብቶችን በማደራጀት የኢንዱስትሪው ምርታማነት እንዲረጋገጥ፣ የአባላቱም መብትና ጥቅም እንዲከበር፣ በዘርፉ የተደራጁ ከአገር ውስጥና ከውጭ ፌዴሬሽኖች ጋር ግንኙነት በመፍጠር ጠንካራ ተቋም እንዲሆን አስፈላጊው ሥራ ይከናወናል፡፡

አሁን በሥራ ላይ ያሉ የትራንስፖርት አዋጆች፣ ሕጎች፣ ደንቦችና መመርያዎች በሁሉም ባለድርሻ አካላት ተሳትፎ እንዲሻሻሉ፣ እንዲለወጡና እንዲጠናከሩ በማድረግ የትራንስፖርት አገልግሎቱ ዘምኖ በውጭም ጭምር ተወዳዳሪ ሆኖ እንዲገኝ ፌዴሬሽኑ ከሚመለከታቸው አካላት ጋር በመተባበር እንደሚሠራ ፕሬዚዳንቱ አውስተዋል፡፡