Skip to main content
x
በሶማሌ ክልል በተፈጸሙ የወንጀል ድርጊቶች የተጠረጠሩት ግለሰብ ከፕሬዚዳንቱ ጋር ግንኙነት እንደነበራቸው ተነገረ

በሶማሌ ክልል በተፈጸሙ የወንጀል ድርጊቶች የተጠረጠሩት ግለሰብ ከፕሬዚዳንቱ ጋር ግንኙነት እንደነበራቸው ተነገረ

በሶማሌ ክልል ከሐምሌ 26 እስከ 30 ቀን 2010 ዓ.ም. ተፈጥሮ በነበረው  ሁከትና ብጥብጥ ምክንያት ከተፈጸመ ግድያ፣ ከባድና ቀላል የአካል ጉዳት፣ ዘርን መሠረት ያደረገ ጥቃትና ማፈናቀል፣ የሃይማኖት ተቋማት ቃጠሎና ንብረት ዘረፋ ጋር በተያያዘ ተጠርጥረው የታሰሩት አቶ ቴዎድሮስ አዲሱ (ቴዲ ማንጁስ)፣ የክልሉ ፕሬዚዳንት ከነበሩት አቶ አብዲ መሐመድና ከሌሎች ባለሥልጣናት ጋር ግንኙነት እንደነበራቸው ለፍርድ ቤት ተነገረ፡፡

የፌዴራል ፖሊስ ወንጀል ምርመራ ቡድን ጥቅምት 23 ቀን 2011 ዓ.ም. ለፌዴራል ከፍተኛ ፍርድ ቤት ልደታ ምድብ አራተኛ ወንጀል ችሎት እንዳስረዳው፣ ግለሰቡ በክልሉ ታዋቂ ባለሀብት ናቸው፡፡ እሳቸው በፌስቡክና በተለያዩ መንገዶች ባደረጉት ቅስቀሳ በክልሉ ተፈጥሮ የነበረው ሁከትና ብጥብጥ እንዲባባስ አድርገዋል፡፡ አሁን በእስር ላይ ከሚገኙት የቀድሞ የክልሉ ፕሬዚዳንትና ሌሎች ባለሥልጣናት ጋርም ግንኙነት እንደነበራቸው፣ ማስረጃዎችን መሰብሰቡን መርማሪ ቡድኑ አስረድቷል፡፡

ባለሀብቱ አሁን በሥራ ላይ ከሚገኙ የቀድሞ ባለሥልጣናት ጋር ግንኙነት አላቸው ብሎ ስለሚያስብ ምስክሮችን ሊያባብሉ፣ ሊያስጠፉ፣ ሊያስፈራሩ፣ ሰነዶችንም ሊያጠፉ ስለሚችሉ የጠየቁትን ዋስትና እንደሚቃወም መርማሪ ቡድኑ ለፍርድ ቤቱ አስረድቷል፡፡

በተጠርጣሪው ላይ በተሰጠው የ14 ተጨማሪ ቀናት የሦስት ምስክሮችን ቃል መቀበሉን፣ የእሳቸውን የተከሳሽነት ቃል መቀበሉን፣ የጣት አሻራ ለፎረንሲክ ምርመራ መስጠቱን፣ የወንጀል ድርጊት እንዲፈጸም ሲነጋገሩባቸው የነበሩ ሁለት ሞባይል ስልኮች ለቴክኒክ ምርመራ መስጠቱን፣ ይጠቀሙባቸው የነበሩ ኮምፒዩተርና ላፕቶፕ ለምርመራ መስጠቱን፣ እሳቸው ባነሳሱት ሁከትና ብጥብጥ የሞቱ በርካታ ሰዎች በጅምላ ከተቀበሩበት አስከሬናቸው ወጥቶ እንዲመረመር ሰጥቶ ውጤት እየተጠባበቀ መሆኑን ለፍርድ ቤቱ አስረድቷል፡፡

ግብረ አበሮቻቸውን መያዝ፣ የቀሩ ምስክሮችን ቃል መቀበል፣ የአስከሬን ምርመራ ውጤት መቀበል፣ የተጎጂዎችን ምርመራ ውጤት መቀበል፣ ከክልሉ ወጣቶችና ስፖርት ቢሮ ወጪ ከተደረገው ገንዘብ እሳቸውም ተቋዳሽ በመሆናቸው ወጪ የተደረገበትን ሰነድ ማስተርጎም ስለሚቀረው፣ ተጨማሪ የ14 ቀናት ጊዜ እንዲፈቀድለት ፍርድ ቤቱን ጠይቋል፡፡

አቶ ቴዎድሮስ በጠበቃቸው አቶ ዳግም ተሾመ አማካይነት ባቀረቡት መቃወሚያ፣ ደንበኛቸው የተጠረጠሩበት ጉዳይ ግልጽ እንዳልሆነላቸው ተናግረዋል፡፡ ደንበኛቸው ከአስከሬን ምርመራ ጋር ምን እንዳገናኛቸው እንዳልገባቸው አክለዋል፡፡ አቶ ቴዎድሮስ ከታሰሩ አንድ ወር እንዳለፋቸውና በጅግጅጋ ቃላቸውን እንደሰጡም ተናግረዋል፡፡ ግብረ አበሮችን መያዝ የፖሊስ ሥራ በመሆኑ ደንበኛቸውን በማቆያ ቤት የሚያስቆይ አለመሆኑንም አስረድተዋል፡፡ ከሰነድ ማስተርጎም ጋርም ምንም ግንኙነት እንደሌለውና የኮምፒዩተራቸውንና የላፕቶፓቸውን የይለፍ ቃል ስለሰጡ፣ 14 ተጨማሪ ቀናት ለመጠየቅ የሚያስፈልግ ነገር እንደሌለና ተገቢ አለመሆኑም አስረድተዋል፡፡ ደንበኛቸው በክልሉ ባላቸው ድርጅት ውስጥ የሚሠሩ ሠራተኞች ወደ ሥራ እንዳይገቡ በፖሊስ መከልከላቸውን ጠቁመው፣ ፍርድ ቤቱ ትዕዛዝ እንዲሰጥላቸውና የዋስትና መብታቸውንም እንዲጠብቅላቸው ጠይቀዋል፡፡

መርማሪ ፖሊስ ዋስትናውን እንደሚቃወም ከላይ መጥቀሱን አስታውሶ፣ በጅግጅጋ ስለመታሰራቸውና ቃላቸውን ስለመስጠታቸው የሚያውቀው እንደሌለ በማስረዳት፣ የጠየቀው ጊዜ እንዲፈቀድለት ጠይቋል፡፡ ፍርድ ቤቱም የግራ ቀኙን ክርክር ከሰማ በኋላ፣ መርማሪ ቡድኑ በተሰጠው ጊዜ ሰፊ ሥራ መሥራቱን መገንዘቡን አስታውቆ፣ ለቀሪ ምርመራ የጠየቀው ጊዜ ተገቢ መሆኑን ስላመነበት የጠየቀውን 14 ቀናት በመፍቀድ የተጠርጣሪውን ጥያቄ ውድቅ አድርጎታል፡፡ ለኅዳር 7 ቀን 2011 ዓ.ም. ቀጠሮ ሰጥቷል፡፡