Skip to main content
x
የክቡር ሚኒስትሩን ቢሮ ደላላው በርግዶት ገባ

የክቡር ሚኒስትሩን ቢሮ ደላላው በርግዶት ገባ

[ክቡር ሚኒስትሩ ከሚስታቸው ጋር እያወሩ ነው]

  • ሰማሽ አይደል?
  • ምኑን?
  • አገሪቱ ውስጥ እየተፈጸመ ያለውን ግፍ ነዋ፡፡
  • እኔ በሕይወቴ አገራችን ውስጥ እንደዚህ ዓይነት ግፍ ይፈጸማል ብዬ አላስብም፡፡
  • እሱን እኮ ነው የምልሽ፡፡
  • እንደዚህ ዓይነት ነገር ሲካሄድ ዝም ነበር የሚባለው?
  • ዝም መባልማ የለበትም፡፡
  • ምን ማድረግ ይቻላል?
  • እስከ መጨረሻው ድረስ መታገል አለብን፡፡
  • ምንድነው የምትታገለው?
  • ግፉን ነዋ፡፡
  • ሰዎቹ በቁጥጥር ሥር ዋሉ አይደል እንዴ?
  • ስለምንድን ነው የምታወሪው?
  • ጠቅላይ ዓቃቤ ሕጉ የሰጡትን መግለጫ ሰምቼ አዘንኩ፡፡
  • ምኑ ነው ያሳዘነሽ?
  • በእውነት እኔ ኢትዮጵያ ውስጥ የተፈጸመ አልመሰለኝም፡፡
  • ምን እያልሽ ነው?
  • የእኛ ሕዝብ እኮ ፈሪኃ እግዚአብሔር አለው ብዬ ነበር የማስበው፡፡
  • እና የለውም ልትይ ነው?
  • እንደዚህ ዓይነት ግፍ እየተፈጸመ?
  • ምን ታካብጃለሽ?
  • ሰውዬ ሴቶች በእስር ቤት እንደሚደፈሩና ወንዶች ላይ ደግሞ ግብረ ሰዶም ይፈጸምባቸው እንደነበር አልሰማህም?
  • እንዳትሳሳቺ፡፡
  • ምን ማለት ነው?
  • ይኼ የኒዮሊብራሎች ሐሳብ መሆኑን አታውቂም?
  • ምን እያልክ ነው?
  • እነሱ ግብረ ሰዶም በአገራችን እንዲስፋፋ ስለሚፈልጉ የሚያስወሩት ወሬ ነው፡፡
  • አሁን በሚገባ አረጋግጫለሁ፡፡
  • ምኑን ነው ያረጋገጥከው?
  • 27 በመቶ ውስጥ እንዳለህበት ነዋ፡፡
  • የምን 27 በመቶ?
  • ከአገራችን ሕዝብ 27 በመቶ የአዕምሮ ሕመምተኛ ነው ተብሏል፡፡
  • ስድቡን አቆይው ሴትዮ፡፡
  • ምን እያልክ ነው ታዲያ?
  • ይኼ ፕሮፓጋንዳ ነው?
  • የምን ፕሮፓጋንዳ?
  • ሰዎቹ አልደመርም ስላሉ ነው፡፡
  • ምን ማለት ነው?
  • በቃ ሰዎቹ ለውጡን ስለማይደግፉ አልደመርም አሉ፣ ስለዚህ ያለመደመር መብታቸው ሊከበርላቸው ይገባል፡፡
  • ሰውዬ የታሰሩት በወንጀል ተጠርጥረው እንጂ አንተ እንደምትለው አልደመርም ብለው አይደለም፡፡
  • ነገርኩሽ እኮ ይኼ የሰዎች ሴራ ነው፡፡
  • ስማ ከሰብዓዊ መብት ጥሰቱ ባሻገር ሙስናውን ምን ልትለው ነው?
  • ፕሮፓጋንዳ ነው እኮ ነው የምልሽ?
  • የሌላውን ባላውቅ የራስህን ጉድ እኮ ጠንቅቄ ነው የማውቀው፡፡
  • ምን ነካሽ ይኼ እኮ ሙስና አይደለም፡፡
  • ታዲያ ምንድነው?
  • ዝም ብሎ የተቀመጠ ገንዘብ ሥራ ላይ ማዋል ነው፡፡
  • እ. .  .
  • እንዲያውም እነዚህ ሰዎች በሥራ ፈጠራ ሊሸለሙ በተገባቸው ነበር፡፡
  • እየቀለድክ ነው?
  • እኔ የምልሽ አሁን እነዚህ ሰዎች መርከብ ገዝተው ሥራ መሥራታቸው ያስመሠግናቸዋል እንጂ ያስጠይቃቸዋል?
  • ለዚያውም ገንዘብ ከአገር በማሸሽ ነዋ፡፡
  • ምንም አልሽ ምን እኔ ማቋቋሜ አይቀርም፡፡
  • ምንድነው የምታቋቁመው?
  • የሰብዓዊ መብት ተሟጋች ድርጅት፡፡
  • ለማን ልትሟገት?
  • ለታሰሩት ጓዶቼ!

[ክቡር ሚኒስትሩ ከሌላ አጭበርባሪ ሚኒስትር ጋር በስልክ እያወሩ ነው]

  • ሄሎ ክቡር ሚኒስትር፡፡
  • ሄሎ ወዳጄ፡፡
  • ድምፅዎን ስለሰማሁ ደስ ብሎኛል ክቡር ሚኒስትር፡፡
  • እንዴት ማለት?
  • ትናንትና ስደውልልዎት ስልክዎ እምቢ ብሎኝ ደንግጬ ነበር፡፡
  • ለምንድነው የደነገጥከው?
  • ገቢ ተደርገው ይሆናል ብዬ ነዋ፡፡
  • የት ነው ገቢ የምደረገው?
  • እስር ቤት ነዋ፡፡
  • ማን ነው እኔን የሚያስረኝ?
  • ክቡር ሚኒስትር የሰሞኑ ዕርምጃ አስደንግጦኝ ነው እኮ፡፡
  • ምን ያስደነግጥሃል?
  • ክቡር ሚኒስትር የሠሩትን እያወቁ?
  • ስማ ሲጀምር እኔ ተደምሬያለሁ፡፡
  • ቢሆንም ክቡር ሚኒስትር አካሄዱ ያስፈራል፡፡
  • አሁን የገቡት ሰዎች ያልተደመሩ ሰዎች ናቸው፡፡
  • ክቡር ሚኒስትር ይኼኛው ከመደመርና ከመቀነስ አጀንዳ ከፍ ያለ ይመስለኛል፡፡
  • ጠቅላይ ሚኒስትራችን እኮ በግልጽ ተናግረዋል፡፡
  • ምኑን?
  • ዘመኑ የይቅርታ፣ የፍቅርና የመደመር ነው ብለዋል፡፡
  • ምን እያሉ ነው ክቡር ሚኒስትር?
  • በቃ ይኼ ሐሳብ ያልገባቸው ጓዶቻችን ናቸው የታሰሩት፡፡
  • ክቡር ሚኒስትር የታሰሩት ሰዎች ይሠሩት የነበረውን መቼም አይረሱትም?
  • እኛ ከእነሱ ተለይተን ተደምረናል ስላልን ነው፡፡
  • ለዚያ አይደል እንዴ በጣም እየፈራሁ ያለሁት?
  • ለምን?
  • እኛም ላይ ትክክለኛው ማስረጃ ከተገኘ መታሰራችን አይቀርም፡፡
  • ለማንኛውም የተወሰደው ዕርምጃ ትክክል ነው ብዬ አላስብም፡፡
  • ኧረ ዝም ብለው አይንጫጩ ክቡር ሚኒስትር፡፡
  • የአገሪቱ ኢኮኖሚ በ11 በመቶ አደገ ሲባል እነዚህ የታሰሩ ሰዎች ዋነኛ የኢኮኖሚው ሞተር መሆናቸውን ረሳኸው?
  • እ. . .
  • ስለዚህ ሌላው ቢቀር ለአገር ኢኮኖሚ የምታስብ ከሆነ እነዚህ ሰዎች ላይ የተወሰደውን ዕርምጃ መቃወም አለብህ፡፡
  • አልገባኝም ክቡር ሚኒስትር?
  • እኔማ ለታሰሩ ጓዶቼ የሚሟገት ድርጅት ላቋቁም ነው፡፡
  • የምን ድርጅት?
  • የሰብዓዊ መብት ተሟጋች ድርጅት ነዋ፡፡
  • እንደዚህ ዓይነት ድርጅት ማቋቋም ከፈለጉ በመጀመርያ ስሙን ማስተካከል አለብዎት፡፡
  • ምን ይባል ልትል ነው?
  • የሙሰኞች መብት ተሟጋች ድርጅት ነዋ፡፡
  • ነገርኩህ ምንም በለው ምን ይህ ድርጅት መቋቋም አለበት፡፡
  • ለማንኛውም አርፈው ቢቀመጡ ጥሩ ነው፡፡
  • ከእሱም ሌላ ለጠቅላይ ሚኒስትሩ ሌላ ጥያቄ ላቀርብ ነው፡፡
  • ምን ዓይነት ጥያቄ?
  • እንደነገርኩህ ሰዎቹ የሚያንቀሳቅሱት ንብረት የአገር ኢኮኖሚ ላይ ተፅዕኖ የሚያሳድር በመሆኑ ጥንቃቄ ሊደረግ ይገባል፡፡
  • ምን ዓይነት ጥንቃቄ?
  • የማስተዳደሩ ሥልጣን ለእኔ ሊሰጠኝ ይገባል፡፡
  • ምኑን ሊያስተዳድሩ?
  • የጓዶቼን ሀብት!

[ክቡር ሚኒስትሩ ከአንድ ባለሀብት ወዳጃቸው ጋር እያወሩ ነው]

  • ክቡር ሚኒስትር ይኼኛውንም ዙር አለፍነው ማለት ነው?
  • እኔ እንደዚያ መስሎኝ ነበር  ሰዎች ግን እያስፈራሩኝ ነው፡፡
  • ከዚህ በኋላ ያስገቡናል ብለው ነው?
  • ሁልጊዜ ነገሮችን ከተለያዩ አቅጣጫዎች ማየቱ አይከፋም፡፡
  • እሱስ ልክ ነዎት፡፡
  • እኔ ግን ሕይወቴን ሙሉ በትግል ስላሳለፍኩ ሁሌም አልሸበርም፡፡
  • እሱንማ አውቃለሁ፡፡
  • በትግል ውስጥ ደግሞ መስዋዕት የሚሆኑ አይጠፉም፡፡
  • ስለዚህ አሁን የታሰሩ ስለእኛ መስዋዕት የሆኑ ናቸው እያሉኝ ነው?
  • እህሳ፡፡
  • እሱማ መስዋዕት ከመሆን መትረፍም ተመስገን ያስብላል፡፡
  • ባይሆን መስዋዕት ለሆኑት የሚሟገትላቸው ተቋም ለማቋቋም አስቤያለሁ፡፡
  • ምን ዓይነት ተቋም?
  • ስለታሰሩት ሰዎች ሰብዓዊ መብት የሚታገል ተቋም ነዋ፡፡
  • ማን ፈንድ ያደርገዋል ብለው ነው ክቡር ሚኒስትር?
  • እኔማ በዚህ ዘርፍ ከሚሠሩ ዓለም አቀፋዊ ተቋማት ጋር ለመሥራት ነበር ያሰብኩት፡፡
  • የምዕራብ ዓለም አገሮች ፈንድ እንዲያደርጉት አስበው ነው?
  • ከእነሱ ይልቅ ለእኛ ወዳጅ የሆኑና በእውነት ስለሰብዓዊ መብት ከሚታገሉ ተቋማት ጋር ነው የምንሠራው፡፡
  • ከምን አገር ድርጅቶች ጋር?
  • ለምሳሌ እንደ ኢራን ካሉ የሰብዓዊ መብት ተሟጋች ድርጅቶች ጋር፡፡
  • ክቡር ሚኒስትር ኢራን ግን በሰብዓዊ መብት ተሟጋችነት የሚታወቁ ድርጀቶች አሏት?
  • ቢያንስ ለእኛ ጓዶች ከልባቸው ይከራከራሉ ብዬ ነው፡፡
  • ክቡር ሚኒስትር እኔ ግን እነዚህ ጓዶቻችን በመታሰራቸው የቢዝነስ ሥራው ላይ ክፍተት የሚፈጠር ይመስለኛል፡፡
  • ለዚያ አይደል እንዴ ሀብታቸውን ለማስተዳደር ጥያቄ ያቀረብኩት?
  • እኛ ግን ይኼን ክፍተት ተጠቅመን ጥሩ ቢዝነስ መሥራት እንችላለን፡፡
  • ምን ዓይነት ቢዝነስ?
  • ለምሳሌ የመርከብ ቢዝነሱ አሪፍ የውጭ ምንዛሪ ያስገኝልናል፡፡
  • እሱ ግን ተነቅቶበታል፡፡
  • ምኑ ነው የተነቃበት?
  • መንግሥት በስማችን መርከብ ካገኘ ያስገባናል፡፡
  • ስለዚህ ብዙ አያስኬድም እያሉኝ ነው?
  • መንግሥት የባነነበትን ቢዝነስ መሥራት አንችልም፡፡
  • የአውሮፕላን ንግድ ውስጥ ብንገባስ?
  • እሱም በርካታ ባለሀብቶች ያሉበት ቢዝነስ ነው፡፡
  • እኔማ ጓዶቻችን የነበሩበት ቢዝነስ ነው ብዬ ነው፡፡
  • ስማ እንዲያውም የጠፋው አውሮፕላን ተገኘ ብለው ነው የሚያስገቡን፡፡
  • ታዲያ ምን ዓይነት ቢዝነስ እንጀምር?
  • አሁን መግባት ያለብን መንግሥት ያልደረሰባቸው ቢዝነሶች ውስጥ ነው፡፡
  • እኮ ምን ዓይነት ቢዝነስ?
  • በቅርቡ እንደሰማኸው መንግሥት የሕዋ የጦር ኃይል ለማቋቋም አስቧል፡፡
  • ምን?
  • ሕዋ ላይ የጦር ኃይል ለማቋቋም ታስቧል፡፡
  • ምን አሰቡ ታዲያ?
  • እኛም ኢንቨስት ማድረግ ያለብን እሱ ላይ ነው፡፡
  • ሕዋ ላይ?
  • አዎን፡፡
  • ታዲያ ምን እንግዛ?
  • መንኮራኩር!

[የክቡር ሚኒስትሩን ቢሮ ደላላው በርግዶት ገባ]

  • ምን ሆነሃል?
  • እስካሁን አልታሰሩም ክቡር ሚኒስትር?
  • ምንድነው የምትቀባጥረው?
  • ጓዶቻችን ተጠራርገው ገብተዋል አይደል እንዴ?
  • በቃ ታሰሩ ምን ይፈጠር?
  • በጣም ሰግቼ እኮ ነው ክቡር ሚኒስትር፡፡
  • ከቻልን ለጓዶቻችን የዋስ ገንዘብ ነው ማዘጋጀት ያለብን፡፡
  • ክቡር ሚኒስትር ከፊት ለፊታችን እኮ የሚታይ አደጋ ነው የተጋረጠብን፡፡
  • አንተ ዕድሜ ልክህን እንደተንቦቀቦቅህ ትኖራለህ እንዴ?
  • ለምን አልንቦቀቦቅ?
  • ግፋ ቢል እኮ ብትታሰር ነው፡፡
  • ክቡር ሚኒስትር የእስሩን ሁኔታማ ሰማነው እኮ፡፡
  • እንዴት?
  • እስር ቤት በዚህ አፍንጫዬ ውስጥ እስኪርቢቶ ሲከተትበት አስበውታል?
  • በአንተ አፍንጫ ውስጥማ አጠና ነው የሚከቱብህ፡፡
  • እሱን አይደል እንዴ የምልዎት?
  • በቃ ዝም ብለህ አትፍራ፡፡
  • እኔ ከዱር እንስሳት ጋር መታሰር አልፈልግም፡፡
  • ታይላንድ ከነብር ጎን ተነሳሁ ብለህ ፎቶ አሳይተኸኝ አልነበር?
  • ክቡር ሚኒስትር ቀልዱን ይተውት፡፡
  • መታሰርን እንደዚህ አትፍራ፡፡
  • ክቡር ሚኒስትር ከታሰርንማ አብረን ነው፡፡
  • ምን?
  • ለማንኛውም አሁን ሰዎች ደውለው ነግረውኛል፡፡
  • ምን ብለው?
  • ተቆርጦልናል፡፡
  • ምን?
  • የእስር ማዘዣ!