Skip to main content
x
ክቡር ሚኒስትሩ ከአንድ አክቲቪስት ነኝ ባይ ጋር ተገናኝተው እያወሩ ነው

ክቡር ሚኒስትሩ ከአንድ አክቲቪስት ነኝ ባይ ጋር ተገናኝተው እያወሩ ነው

[ክቡር ሚኒስትሩ በቅርቡ ከታሰሩ ወዳጆቻቸው መካከል አንዱን ሊጠይቁት እስር ቤት ይሄዳሉ]

  • ሰላም ወዳጄ፡፡
  • ከየት ተገኙ ክቡር ሚኒስትር?
  • ተው እንጂ ወዳጄ?
  • ምነው ክቡር ሚኒስትር?
  • አንተን የመሰለ ወዳጄ እስር ቤት ገብቶ ሳልጠይቅ የምከርም ይመስልሃል?
  • ምን ይታወቃል ብለው ነው ክቡር ሚኒስትር?
  • በየሳምንቱ እየመጣሁ ብጠይቅህ ደስ ይለኛል፡፡
  • ለነገሩ የእርስዎም ፋይል ከተገላበጠ በየሳምንቱ መምጣት አይጠብቅብዎትም፡፡
  • ምን እያልክ ነው?
  • ያው እኔን ይቀላቀሉኛል ብዬ ነዋ፡፡
  • እኔ እኮ እንዳንተ አልዝረከረክም፡፡
  • ክቡር ሚኒስትር በሕግ ከለላ ሥር ስላለሁ ወንጀለኛ መሆኔ እስኪረጋገጥብኝ ድረስ ንፁህ መሆኔን እንዳይዘነጉ፡፡
  • እየተዋወቅን?
  • ክቡር ሚኒስትር እርስዎስ ቢሆን ስለተደመሩ እንጂ ሳይዝረከረኩ ቀርተው ነው?
  • እኔም እስክከሰስ ንፁህ ነኝ፡፡
  • ስለዚህ ሁለታችንም ያለንበት ቦታ ተለያየ እንጂ ያው ነን፡፡
  • እኔ ግን አንድ ጥያቄ አለኝ?
  • ምን ክቡር ሚኒስትር?
  • ሁላችሁም አቋም ይዛችሁ ነው እንዴ እስር ቤት የገባችሁት?
  • የምን አቋም ነው?
  • ጠበቃ መቅጠር ስለማንችል መንግሥት ያቁሙልን የምትሉት ነዋ?
  • ክቡር ሚኒስትር የእኔን ፀባይ መቼም ያውቁታል፡፡
  • ማለት?
  • እኔ ባገኘሁት አጋጣሚ አንጠፍጥፌ ነው የምጠቀመው፡፡
  • እ. . .
  • ከእርስዎ ጋር ስንገናኝ ያዘዝኩን ምግብና መጠጥ መቼ አስተርፌ አውቃለሁ?
  • ለነገሩ ለዚህም ያበቃህ ይኸው ፀባይህ ነው፡፡
  • የትኛው ፀባዬ?
  • ስትበላ ጥርግርግ አድርገህ ነው እኮ፡፡
  • ምን ችግር አለው?
  • እኔ ስበላ በመጠኑ ነው የምበላው፣ አንተ ግን በሬ በአንድ ጉርሻ መዋጥ ነው የምትፈልገው፡፡
  • ክቡር ሚኒስትር የፈለገ ነገር ቢመጣ እኔ ነፃ ወጪ ነኝ፡፡
  • በምን ሒሳብ ነው ነፃ የምትወጣው?
  • ምንም ሀብት በስሜ የለም፡፡
  • ምን?
  • ያለኝን ነገር ሁሉ አሸሽቼ እዚህ ምንም የለኝም፡፡
  • ይኼ ነፃ የሚያወጣ ይመስልሃል?
  • ማስረጃ ከሌለ ምን ይመጣብኛል?
  • ስማ በሚዲያ እንደሰማነው በርካታ መረጃዎች አሉ፡፡
  • ለማንኛውም እኔ እዚሁ ተመችቶኛል፡፡
  • የአገራችንን እስር ቤት እኮ እናውቀዋለን፡፡
  • ምን ሆነ እስር ቤቱ?
  • ስንት ቶርቸርና ግፍ የሚደረግበት አይደል እንዴ?
  • እንግዲህ በድሮ ሥርዓት እንደዚያ ሊሆን ይችላል፡፡
  • አሁንስ?
  • አሁንማ ከገባሁ እንኳን ዝንብ አርፎብኝ አያውቅም፡፡
  • እንዴት?
  • እንዲያውም ውጭ ያተረፍኩት ድካም፣ ሴራ፣ ክፋት ምናምን ነው፡፡
  • ምን እያልክ ነው?
  • እዚህ መጽሐፌን እያነበብኩ ተመችቶኛል፡፡
  • ምን ትቀልዳለህ?
  • ስነግርዎት ለእኔ ጥሩ ቫኬሽን ነው፡፡
  • እ. . .
  • እኔ የምመክርዎት አንድ ነገር ነው፡፡
  • ምን?
  • ቦታ ሳይሞላ. . .
  • እ. . .
  • እጅዎን ይስጡ!

[ክቡር ሚኒስትሩ ከአንድ አክቲቪስት ነኝ ባይ ጋር ተገናኝተው እያወሩ ነው]

  • ክቡር ሚኒስትር አገሪቱ ላይ ምን እየተካሄደ ነው?
  • ምን  ተካሄደ?
  • እናንተ እያላችሁ አገር እንደዚህ መቀለጃ ትሁን?
  • የምን ቀልድ ነው?
  • ለዚህች አገር ደማቸውን አፍስሰው አጥንታቸውን የከሰከሱ ሰዎች ሲቀለድባቸው እንዴት ዝም ትላላችሁ?
  • ምንድነው የምታወራው?
  • ለአገሪቱ ከፍተኛ መስዋዕትነት የከፈሉ ሰዎች ግፍና በደል እየተፈጸመባቸው ነው፡፡
  • ኧረ ሰውዬ ተረጋጋ፡፡
  • ይኼንንማ እስከ መጨረሻው የምታገለው ጉዳይ ነው፡፡
  • ምን ልታደርግ?
  • በተገኘው አጋጣሚ ኡኡታዬን አሰማለሁ፡፡
  • ተልባ ቢንጫጫ በአንድ ሙቀጫ አሉ፡፡
  • እንዳይመስልዎት ክቡር ሚኒስትር በተለያዩ ሙቀጫዎች ነው የምንጫጫው፡፡
  • አልገባኝም?
  • ሲያስፈልግ በሶሻል ሚዲያ፣ ሲያስፈልግ ደግሞ በሜንስትሪሙ መንጫጫቴን እቀጥላለሁ፡፡
  • ሌላስ?
  • ካልቻልኩ ደግሞ በማይክራፎን መንገድ ላይ ኡኡታዬን አሰማለሁ፡፡
  • ውሻ በበላበት ይጮኸል ነው ነገሩ?
  • እንዳይሳሳቱ ክቡር ሚኒስትር?
  • እንዴት?
  • እኔ የምጮኸው እንዲያውም ስላልበላ ነው፡፡
  • አልገባኝም?
  • በደህና ጊዜ በልቼ ቢሆን ኖሮ አሁን አልንጫጫም ነበር፡፡
  • ብሶብሃል ልበል?
  • ክቡር ሚኒስትር ልክ ተራዬ ሊደርስ ሲል እኮ ነው የተያዙት፡፡
  • የምን ተራ?
  • እኔ የምበላበት ተራ ነዋ፡፡
  • ሰው ዓይን አውጥቷል ልበል?
  • ክቡር ሚኒስትር የቀድሞው ሥርዓት ተመልሶ እኔ ልብላና ከዚያ እንደፈለገው ይሁን፡፡
  • ወይ  ጉድ ከእኛም የባሰ ሰው አለ ማለት ነው?
  • እናንተማ በልታችሁ ጠግባችሁ ነው፣ እኛ እኮ የድርሻችንን አልወሰድንም፡፡
  • እ. . .
  • እናንተ ሆዳችሁ ሞልቶ ነው፣ እኛ በባዶ ሆዳችን ነው የምንጮኸው፡፡
  • አንተ ጥሩ ትምህርት አለህ፣ ለምንድነው ሠርተህ የማትበላው?
  • እንደዚህ እያላችሁ ሸወዳችሁን፣ ልክ የእኛ መብያ ተራ ሲደርስ መታጠፍማ አያዋጣም፡፡
  • በነገራችን ላይ ብዙ ሰዎች እየታዘቡህ ነው፡፡
  • ለምንድነው የሚታዘቡኝ?
  • አንተ አክቲቪስት ነኝ ካልክ ለሕዝብ ነው እንጂ መታገል ያለብህ እንዴት ግፍ ለሠሩ ሰዎች ትከራከራለህ?
  • እንዳይሳሳቱ ክቡር ሚኒስትር?
  • እንዴት?
  • They are innocent until proven guilty.
  • እሱን እንኳን ተወው፡፡
  • እርስዎ አንድ ላይ ታግለው እነዚህን ሰዎች ወንጀለኛ ማድረግ ነበረብዎት?
  • መቼም አንተ መረጃ አለህ ብዬ ስለማስብ ሰዎቹ የሠሩትን አልነግርህም፡፡
  • ቢሆንም ሁሉንም ነገር ያደረጉት ለአገር ጥቅም ነው እንጂ ለራሳቸው ሲሉ አይደለም፡፡
  • አውሮፕላንና መርከብ የገዙት ለአገር ጥቅም ነው?
  • እነሱ አውሮፕላንና መርከብ ባይገዙ አገሪቱ 11 በመቶ ታድግ ነበር?
  • ለማንኛውም ለጤና ያድርግልህ፡፡
  • ክቡር ሚኒስትር በዚህ ወቅት ከእርስዎ የምንፈልገው ድጋፍ እንዲያደርጉልኝ ብቻ ነው፡፡
  • የምን ድጋፍ?
  • ለአክቲቪዝም ሥራዬ መጠነኛ የገንዘብ ድጋፍ እንዲያደርጉልኝ ነዋ፡፡
  • እኔ ደመወዜ አነስተኛ ስለሆነ ልደግፍህ አልችልም፡፡
  • አዲሱ ስታይል እየተጠቀሙብኝ ነው?
  • ለማንኛውም ይኼ አካሄድህ ስለማያዋጣ ብትተወው ይሻልሃል፡፡
  • በፍፁም አልተወውም፡፡
  • ያለበለዚያማ መቀላቀልህ አይቀርም፡፡
  • ከማን ጋር ነው የምቀላቀለው?
  • ከገቡት ጋር!

[ክቡር ሚኒስትሩ ከአማካሪያቸው ጋር እያወሩ ነው]

  • ክቡር ሚኒስትር ሰሙ?
  • ምኑን?
  • ገቢ ተደረጉ እኮ?
  • ማን ነው ገቢ የተደረገው?
  • ሁለት መቶ የሚሆኑ ሰዎች ታሰሩ፡፡
  • ከየት ነው የሰማኸው ደግሞ?
  • እሱ ብቻ እንዳይመስልዎት 100 ቢሊዮን ብርም ተመዝብሯል፡፡
  • ከየት ነው የተመዘበረው?
  • ከአገርና ከሕዝብ ነዋ፡፡
  • ስማ ይኼን ወሬ ለመልቀም ሥራህን ትተህ ከተማዋን ስትዞር ነበር?
  • ክቡር ሚኒስትር እርስዎ እኮ በድንጋይ ዘመን ነው የሚኖሩት፡፡
  • ምን እያልክ ነው?
  • እኛ እኮ መረጃ እጃችን ላይ ነው ያለው፡፡
  • እጃችን ላይ ነው ስትል ደኅንነት ቢሮ ገባህ እንዴ?
  • መረጃው ሁሉ ስልኬ ላይ ነው፡፡
  • የደወለልህ ሰው ነበር?
  • ክቡር ሚኒስትር አሁን የጀነሬሽን ጋፕ እንዳለን ተጋለጠ፡፡
  • የምን የጀነሬሽን ጋፕ ነው?
  • ሶሻል ሚዲያ ላይ ያለዎትን ፕረዘንስ ይጨምሩ ያልኩዎት እኮ ለዚህ ነው፡፡
  • መረጃውን ከፌስቡክ ነው የሰማሁት እንዳትለኝ?
  • ምን ችግር አለው?
  • የተጻፈ ሁሉ እውነት ነው ያለህ ማነው?
  • ክቡር ሚኒስትር ጽሑፉን እኮ ብዙ ሰዎች ሼር አድርገውታል፡፡
  • ስለዚህ እውነት ነው ማለት ነው?
  • እውነት ባይሆንማ ሰዎች አይቀባበሉትም ነበር፡፡
  • ለመሆኑ ፌስቡክ ላይ በርካታ የሐሰት አድራሻ ያላቸው ሰዎች የተለያዩ ጽሑፎች እንደሚጽፉ አታውቅም?
  • እሱማ አውቃለሁ፡፡
  • ብታውቅማ ያልተጣራ መረጃ ዝም ብለህ ባላናፈስክ ነበር፡፡
  • መረጃ አይናቅም ክቡር ሚኒስትር፡፡
  • እንዳንተ ግን የሥራ ፈቶችን መረጃ ማናፈስ በኋላ ትርፉ ኪሳራ ነው፡፡
  • ለምን ክቡር ሚኒስትር?
  • እንደዚህ ዓይነት የሐሰት ዘገባ የሚያሠራጩትን ካበረታታህ አገር ላይኖረን ይችላል፡፡
  • እ. . .
  • ለማንኛውም እንደዚህ ዓይነት ሰዎችን መከተል አቁም፡፡
  •  ለምን?
  • ምክንያቱም እነሱ አንድ ነገር ስለሆኑ፡፡
  • ምን?
  • ፀረ አገር!

[ክቡር ሚኒስትሩ ከአንድ ሀቀኛ ሚኒስትር ጋር እያወሩ ነው]

  • ክቡር ሚኒስትር ሰሞኑን ጠፍተዋል፡፡
  • ያው አለቃችን ኮንትራት አስፈርመው አይደል ሥራ ያስጀመሩን፡፡
  • ልክ ነው፡፡
  • ስለዚህ በኮንትራቱ መሠረት ሥራችንን ለማጠናቀቅ ደፈ ቀና እያልን ነው፡፡
  • ሰሞኑን የተከሰተውን ነገር መቼም ሚዲያ ላይ እየተከታተሉ ነው?
  • ያልጠበቅነው ነገር እኮ ነው እየሆነ ያለው አይነኬዎቹ እኮ ነው የተነኩት፡፡
  • ከዚህም በላይ የሚነኩ ይኖራሉ፡፡
  • በዚህ አካሄድማ የግሉ ዘርፍ ቢፈተሽ ራሱ በርካታ ችግሮች እንዳሉ እርግጠኛ ነኝ፡፡
  • ክቡር ሚኒስትር ስኳር ብለው አሸዋ፣ ስንዴ ብለው ኮረት ሲገባልን ነበር እኮ?
  • በጣም ነው የሚገርመው፣ ገና ከዚህም የባሰ ግፍ እንሰማለን ማለት ነው?
  • ክቡር ሚኒስትር ገና ብዙ ጉዶች ይወጣሉ፡፡
  • ስለዚህ በዚህ ጉዳይ ላይ ቁጭ ብለን መነጋገር አለብን፡፡
  • በየቱ ጉዳይ?
  • በዚህ ከቀጠልን የአገሪቱ እስር ቤቶች አይበቁንም፡፡
  • ምን እያሉ ነው?
  • አሁን እንደገባኝ ይህ ጉዳይ የእያንዳንዳችንን ቤት ሊያንኳኳ ይችላል፡፡
  • ሕዝብ የበደለማ ለፍርድ መቅረብ አለበት፡፡
  • አሁን ችግሩ የማረሚያ ቤት እጥረት ነው፡፡
  • ምን ይደረግ ታዲያ?
  • እኔ የመፍትሔ ሐሳብ አለኝ፡፡
  • ምን ዓይነት?
  • የመጀመርያው እስር ቤት መከራየት ነው፡፡
  • ከየት ነው የምንከራየው?
  • ከጎረቤት አገሮች?
  • እሺ፡፡
  • ሁለተኛው ደግሞ ታጥረው የተቀመጡ ቦታዎችንና የተለያዩ መጋዘኖችን ወደ ማረሚያ ቤት መቀየር ነው፡፡
  • እሺ፡፡
  • ሦስተኛውና እኔ የማምንበት ነው፡፡
  • ምንድነው?
  • የኢንዱስትሪ ፓርክ ሞዴልን መከተል አለብን ባይ ነኝ፡፡
  • ትንሽ ቢያብራሩት?
  • አዳዲስ ፓርኮችን መገንባት አለብን፡፡
  • የምን ፓርክ?
  • የታራሚዎች ፓርክ!