Skip to main content
x
ፓርላማው ሹመታቸውን ውድቅ ባደረገው በአቶ ሞቱማ መቃሳ ምትክ አቶ ተስፋዬ ዳባን ሾመ

ፓርላማው ሹመታቸውን ውድቅ ባደረገው በአቶ ሞቱማ መቃሳ ምትክ አቶ ተስፋዬ ዳባን ሾመ

በአቶ አጽብሃ በርሔ ምትክም ወ/ሮ ለምለም ሀድጉ ተሹመዋል

የሕዝብ ተወካዮች ምክር ቤት ከሁለት ሳምንት በፊት ውድቅ ባደረገው የአቶ ሞቱማ መቃሳ ሹመት ምትክ፣ አቶ ተስፋዬ ዳባን የምክር ቤቱ የውጭ ግንኙነትና የሰላም ጉዳዮች ቋሚ ኮሚቴ ሰብሳቢ አደርጎ ሾመ፡፡ አቶ ሞቱማ መቃሳ በመከላከያ ሚኒስትርነት ካገለገሉ በኋላ ተመልሰው በምክር ቤቱ ቋሚ ኮሚቴ አመራር ላይ መመደባቸው፣ ምክር ቤቱ ቦታ ማፈላለጊያ እንደሆነ የሚያስመስል ነው የሚል ቅሬታ ከምክር ቤት አባላት ተነስቶ ነበር።

አቶ ሞቱማ የቋሚ ኮሚቴው ሊቀመንበር እንዲሆኑ በአፈ ጉባዔው የቀረበው ጥያቄ በአብላጫ ድምፅ ውድቅ መሆኑን ተከትሎ፣ ዛሬ ኅዳር 13 ቀን 2011 ዓ.ም. ለቋሚ ኮሚቴው አዲስ ዕጩ ተሿሚ ቀርቧል። በዚህም መሠረት በምክር ቤቱ የውጭ ጉዳዮች ቋሚ ኮሚቴ ሰብሳቢ ሆነው ላለፋት ሰባት ዓመታት ሲያገለግሉ የነበሩት አቶ ተስፋዬ ዳባ፣ እንደ አዲስ ከፍተኛ ኃላፊነቶችን ማለትም የደኅንነት ተቋማትን የመከታተልና የመቆጣጠር ተግባርን ደርቦ እንዲደራጅ የተዋቀረው የውጭ ግንኙነትና የሰላም ጉዳዮች ቋሚ ኮሚቴ ሊቀመንበር ሆነው በአብላጫ ድምፅ ተሹመዋል።

ፓርላማው ከሁለት ሳምንት በፊት ባደረገው ስብሰባው ከአቶ ሞቱማ መቃሳ በተጨማሪ፣ የገቢዎችና የፋይናንስ ጉዳዮች ቋሚ ኮሚቴ ሰብሳቢ እንዲሆኑ የቀረቡትን አቶ አጽብሃ በርሔን በአብላጫ ድምፅ ውድቅ ማድረጉ የሚታወስ ሲሆን፣ በእሳቸው ምትክም ወ/ሮ ለምለም ሀድጉ ተሹመዋል።