Skip to main content
x
አዲስ አበባ ሁለት ፓርኮች ልታገኝ ነው

አዲስ አበባ ሁለት ፓርኮች ልታገኝ ነው

አዲስ አበባ ከተማ ሁለት አዳዲስ ፓርኮች በቅርቡ ልታገኝ እንደሆነ ምክትል ከንቲባ ታከለ ኡማ (ኢንጂነር) አስታወቁ፡፡

የአዲስ አበባ ከተማ አስተዳደር በቅርቡ ግንባታ ሳይካሄድባቸው ለዓመታት ታጥረው የተቀመጡ 250,413.89 ካሬ ሜትር ስፋት ያላቸው 154 ቦታዎች፣ የሊዝ ውላቸው እንዲቋረጥ ውሳኔ ማሳለፉ ይታወሳል፡፡

የሊዝ ውላቸው ተቋርጦ ወደ መሬት ባንክ እንዲገቡ ውሳኔ ከተላለፈባቸው ቦታዎች መካከል በአራዳ ክፍለ ከተማ ከማዘጋጃ ቤት ፊት ለፊት የሚገኘው የሚድሮክ ሲቲ ሴንተር ፕሮጀክት ቦታ፣ እንዲሁም በአራዳና በቂርቆስ ክፍለ ከተማ መካከል ለሸራተን ማስፋፊያ ተሰጥቶ የነበረው ሰፊ ቦታ ለፓርክ አገልግሎት እንዲውሉ ለማድረግ እንቅስቃሴ ተጀምሯል፡፡

የአዲስ አበባ ከተማ አስተዳደር ምክትል ከንቲባ ታከለ ኡማ (ኢንጂነር) በትዊተር ገጻቸው ላይ እንዳሉት፣ በሚቀጥሉት ሳምንታት ይፋ ከሚደረጉ ፕሮጀክቶች መካከል ለሸራተን ማስፋፊያ ተብሎ የተያዘው ክፍት ቦታና በቅርቡ ወደ መሬት ባንክ ገቢ የተደረገው ከማዘጋጃ ቤት ፊት ለፊት የሚገኝ ቦታ የሕዝብ መናፈሻና አረንጓዴ ቦታ (ፓርክ) ለማድረግ የከተማ አስተዳደሩ እየሠራ ነው፡፡

ሚድሮክ ለሲቲ ሴንተር ልማት የተረከበው የፒያሳ ቦታ 3.3 ሔክታር ስፋት ያለው ሲሆን፣ ለሸራተን ማስፋፊያ የተረከበው ቦታ ደግሞ 34.4 ሔክታር ስፋት አለው፡፡

በ2009 ዓ.ም. የፀደቀው የአዲስ አበባ ከተማ አስተዳደር ማስተር ፕላን በሸራተን ማስፋፊያ ላይ ፓርክ እንዲገነባ ውሳኔ ባያሳልፍም አጎራባች የሆኑት ግዮን ሆቴል፣ ብሔራዊ ቤተ መንግሥትና ፊንፊኔ አዳራሽ ያሉበትን ሰፊ ቦታ ጨምሮ የፍልውኃ አገልግሎት ድርጅት አንድ ላይ ሆነው ማዕከላዊ ፓርክ እንዲሆኑ ይደነግጋል፡፡

በማስተር ፕላኑ መሠረት የፕላን ማሻሻያ ካስፈለገ የሚከናወኑ ሒደቶች እንዳሉ በአዋጁ ተደንግጓል፡፡ በምክትል ከንቲባው የተገለጸው የሁለቱ ቦታዎች ወደ ፓርክነት መለወጥም የፕላን ማሻሻያ ስለሚያስፈልገው፣ በፕላን ኮሚሽን አማካይነት ቀርቦ በከተማው ምክር ቤት መፅደቅ እንዳለበት ይጠበቃል፡፡

ምክትል ከንቲባው ሁለቱ ቦታዎች ወደ ፓርክነት ይለወጣሉ ብለው ካሳወቁ በኋላ፣ በርካቶች በማኅበራዊ ሚዲያዎች ደስታቸውን ሲገልጹ ተስተውለዋል፡፡