Skip to main content
x
ክቡር ሚኒስትሩ አማካሪያቸውን ቢሮ አስጠሩት

ክቡር ሚኒስትሩ አማካሪያቸውን ቢሮ አስጠሩት

  • አቤት ክቡር ሚኒስትር?
  • ሪፖርቱን ከምን አደረስከው?
  • የቱን ሪፖርት ክቡር ሚኒስትር?
  • ሳምንታዊ የሥራ ሪፖርት አቅርብልኝ ብዬህ አልነበር?
  • ብለውኝ ነበር ክቡር ሚኒስትር?
  • ሥራውን እርግፍ አድርገህ ትተኸዋል ልበል?
  • ኧረ በፍፁም ክቡር ሚኒስትር፡፡
  • ታዲያ ምን እያልከኝ ነው?
  • ትንሽ ሥራ ስለሚበዛብኝ ነው፡፡
  • የለውጥ ጊዜ ላይ መሆናችንን ረሳኸው?
  • እሱማ እንዴት ይረሳል?
  • ስለዚህ 24 ሰዓት መሥራት ነው ያለብን፡፡
  • ለዛ እኮ ነው ሌት ተቀን የምሠራው፡፡
  • እንደዛማ ቢሆን ሪፖርቱን በሠራኸው ነበር፡፡
  • ኃላፊነት ተደራርቦብኝ ነው እኮ፡፡
  • የምን ኃላፊነት ነው?
  • ክቡር ሚኒስትር እርስዎን ከማማከር በተጨማሪ ሌሎች ኃላፊነቶችን ወስጃለሁ፡፡
  • ምን ዓይነት የተለያዩ ኃላፊነቶች?
  • ለምሳሌ የሕዝብ ክንፉን የምመራው እኔ ነኝ፡፡
  • እሱ አደረጃጀት አልቀረም እንዴ?
  • ክቡር ሚኒስትር እንደውም ተጠናክሮ እኔን የሕዝብ ክንፉ መሪ አድርገውኛል፡፡
  • እንደዛም ቢሆን ይኼን ኃላፊነት ያገኘኸው እኮ የእኔ አማካሪ በመሆንህ ነው፡፡
  • ልክ ነው ሌላም ተጨማሪ ኃላፊነት አለብኝ፡፡
  • ምን ዓይነት ኃላፊነት?
  • የመሥሪያ ቤታችን ዕድር ዋና ሰብሳቢ ሆኛለሁ፡፡
  • እሱ እኮ የማኅበራዊ ሕይወትህ ኃላፊነት መስሎኝ?
  • ቢሆንም ክቡር ሚኒስትር ወደፊት ሹመት ሲመጣ የማኅበራዊ ሕይወቴ ስለሚታይ እሱንም ወደ ጎን መተው የምችለው ኃላፊነት አይደለም፡፡
  • ሰውዬ ሥራ ሌላ ነው ማኅበራዊ ሕይወት ሌላ ነው፡፡
  • ግን ሌላም ኃላፊነት አለብኝ፡፡
  • የምን ኃላፊነት?
  • እንደሚያውቁት ከለውጡ በፊት የመሥሪያ ቤታችን ሠራተኞች እርስ በርሳቸው ሊባሉ ነበር፡፡
  • ይኼ እኮ በመላ አገሪቷ የነበረ ችግር ነው፡፡
  • ልክ ነው ግን አገራዊ ችግሩን ለመፍታት ከራሳችን ቢሮ መጀመር አለብን፡፡
  • ምን እያልክ ነው?
  • በሠራተኞች መካከል የተፈጠረውን መቃቃር ለመፍታት የተቋቋመው የእርቅ ኮሚቴም ሰብሳቢ ነኝ፡፡
  • እ. . .
  • ስለዚህ ይህ ኮሚቴ ስኬታማ እንዲሆን ለሠራተኞቹ መቃቃር ችግር የሆነው አመለካከታቸው ይቀየር ዘንድ ፀሎት አደርጋለሁ፡፡
  • እየቀለድክ ነው ሰውዬው?
  • ክቡር ሚኒስትር እንደውም ፀሎት የሚደረገው እንደየእምነቱ ስለሆነ ሁሉንም የማስተባበር ኃላፊነት አለብኝ፡፡
  • ጤነኛ አልመሰልከኝም?
  • ክቡር ሚኒስትር ከዚህም ውጪ የመሥሪያ ቤታችን ልሳን የኤዲቶሪያል ቦርድ ሰብሳቢ ሆኛለሁ፡፡
  • እኔ ጠፋሁ?
  • ክቡር ሚኒስትር ሚዲያውን ካልተቆጣጠርነው አካሄዳችን ከባድ ይሆናል ብዬ ነው፡፡
  • ስማ አንተ የተመደብክበትን የማማከር ኃላፊነት ትተህ ከአቅም በላይ የሆኑ ኃላፊነቶችን እየወሰድክ እኮ ነው፡፡
  • ክቡር ሚኒስትር ለውጡን ለማሳለጥ ብዬ ነው እኮ?
  • ታዲያ ያለንተ ሰው የለም እንዴ?
  • እ. . .
  • ለማንኛውም መዋጥ ከምትችለው በላይ እየጎረስክ መሆኑን ተረድተኸዋል?
  • ምን አሉኝ ክቡር ሚኒስትር?
  • የጎረስከው ኃላፊነት እንዳያንቅህ እፈራለሁ፡፡
  • እ. . .
  • ከአቅሙ በላይ የሚጎርስ ምን እንደሚባል ታውቃለህ?
  • ምንድነው የሚባለው?
  • ሜቴክ!

[ክቡር ሚኒስትሩ ከልጃቸው ጋር እያወሩ ነው]

  • በዚህ ሰዓት ቤት ምን ታደርጋለህ?
  • ምነው ዳዲ?
  • ትምህርት የለም እንዴ?
  • አልሄድም ዳዲ፡፡
  • ለምን?
  • በጣም ደብሮኛል ዳዲ፡፡
  • ምኑ ነው የደበረህ?
  • የተሠራውን ስለማታውቅ ነው ዳዲ፡፡
  • ምን ተሠራ?
  • ትምህርት ቤት አንድ አሪፍ አስተማሪ ነበር አባረሩብን፡፡
  • ለምን?
  • ቅናት ነዋ ዳዲ፡፡
  • የምን ቅናት ነው?
  • ተማሪ ሁሉ ስለሚወደው ነዋ፡፡
  • ተማሪ ስለወደደው ለምን ይባረራል?
  • በቃ ሁሉም ተማሪ ሲወደው አስተዳዳሪዎቹ ቀኑ መሰለኝ አባረሩት፡፡
  • እንዴት እንደዚህ ይደረጋል?
  • የሚገርምህ ዳዲ እኔ ትምህርት ቤታችንን ራሱ እንድወደው ያደረገኝ አስተማሪ እሱ ነው፡፡
  • ምን አድርጎ ነው እንድትወደው ያደረገህ?
  • ፈታ አድርጎ ነዋ የሚያስተምረን፡፡
  • ምን ማለት ነው?
  • በቃ በጣም እያዝናና ነው የሚያስተምረን፡፡
  • የሚያስተምረው ግን ይገባህ ነበር?
  • ከእሱ ውጪ እንደውም የሌሎቹ ምንም አይገባኝም፡፡
  • ታዲያ እንዴት ያባርሩታል?
  • የሚገርምህ ደግሞ በኅብረት ሥራ በጣም ነው የሚያምነው፡፡
  • እንዴት ማለት?
  • ፈተና እንኳን ተጋግዛችሁ ሥሩ ነው የሚለን፡፡
  • በጣም የሚገርም አስተማሪ ነው፡፡
  • ታዲያ ዳዲ እንደዚህ ዓይነት አስተማሪ መባረር ነበረበት?
  • ኧረ በፍፁም፡፡
  • ለእሱ እንደውም የሚገባው ዕድገት ነበር፡፡
  • ልክ ብለሃል፡፡
  • የትምህትርት ቤታችንን አስተዳዳሪ ብታወራቸው ደስ ይለኛል፡፡
  • አሁን ነው የምደውልላቸው፡፡
  • እስከዚያ ግን እኔ እቀጥላለሁ፡፡
  • ምኑን?
  • እምቢተኝነቴን!

[ክቡር ሚኒስትሩ የትምህርት ቤት አስተዳዳሪ ጋር ደወሉ]

  • ጤና ይስጥልኝ?
  • እንዴት ነህ?
  • ማን ልበል?
  • ክቡር ሚኒስትር ነኝ፡፡
  • እንዴት ነዎት ክቡር ሚኒስትር? ምን ልርዳዎት?
  • ምንድነው የምሰማው?
  • ምን ሰሙ ክቡር ሚኒስትር?
  • ልጄ ትምህርት ቤት አልሄድም እያለኝ ነው፡፡
  • ክቡር ሚኒስትር ከትምህርት ለሚቀሩ ልጆች ወላጆች ደብዳቤ ለመጻፍ እየተዘጋጀን ነው፡፡
  • ለመሆኑ ለምንድነው ተማሪ የሚወደውን መምህር የምታባርሩት?
  • ይቅርታ አድርጉልኝና ክቡር ሚኒስትር መምህር የሚለው መጠሪያ ለእሱ አይገባውም፡፡
  • እንዴት?
  • ይኼ ሰውዬ ላለፉት አምስት ዓመታት ትምህርት ቤቱ የለየላቸው ዱርዬዎች እንዲያፈራ ዋናውን ሚና ሲጫወት የነበረ ነው፡፡
  • ምን ማለት ነው?
  • ክቡር ሚኒስትር ተማሪዎቹን ማስተር ሳይሆን ማበላሸት ነበር የያዘው፡፡
  • ምን እያልከኝ ነው?
  • በርካታ ተማሪዎች ጫት ቃሚዎችና ሱሰኞች እንዲሆኑ ከማድረጉም ባሻገር በትምህርታቸው ግድ የለሽ እንዲሆኑ አድርጓቸዋል፡፡
  • ታዲያ ይኼን ሁሉ ዓመት ለምን ዝም አላችሁት?
  • ክቡር ሚኒስትር ትምህርት ቤት ውስጥ የማፊያ ቡድን አደራጅቶ በጣም ይፈራ ነበር፡፡
  • አሁን ምን ተገኘ?
  • አሁንማ ለትምህርት ቤቱ አዲስ አስተዳደር ሆኜ ስለተሾምኩ ለውጥ እያደረግኩ ነው፡፡
  • ለማንኛውም ተማሪ የሚወደውን አስተማሪ ማባረር አትችልም፡፡
  • ለትምህርት ቤቱ የሚሻለውን የማውቀው እኔ ነኝ፡፡
  • ስማ ያለበለዚያ እኔም ከልጆቹ ጋር መውጣቴ አይቀርም፡፡
  • ምንድነው የሚወጡት?
  • ሠልፍ!

[ክቡር ሚኒስትሩ ከአንድ ታዋቂ ፓርቲ ኃላፊ ጋር ተገናኝተው እያወሩ ነው]

  • ክቡር ሚኒስትር አሁን ትክክለኛ ለውጥ እያረጋችሁ እንደሆነ አውቄያለሁ፡፡
  • እንዴት አወቅክ?
  • በቃ የምርጫ ቦርድ ላይ ያመጣችሁት ለውጥ ተቀባይነት ያለው ነው፡፡
  • ዋናው እናንተ ዝግጁ ናችሁ ወይ የሚለው ነው?
  • ለምኑ ነው ዝግጅቱ?
  • ለምርጫው ውድድር ነዋ፡፡
  • በቃ አለቀላችሁ እኮ ክቡር ሚኒስትር፡፡
  • ምኑ ነው ያለቀልን?
  • ምርጫ ቦርድን ነፃ ካደረጋችሁት በራሳችሁ ላይ ነው የፈረዳችሁት፡፡
  • ኪኪኪ. . .
  • ምን ያስቆታል?
  • ፖለቲካ ወኔ ብቻ ቢሆን ኖሮ ሥልጣን ላይ ትወጡ ነበር፡፡
  • ክቡር ሚኒስትር እስከ ዛሬ የመጫወቻ ሕጉ ይዞን እንጂ በዝረራ እንደምናሸንፋችሁ መቼም ያውቁታል፡፡
  • እናንተ እኮ በጣም ትንሽ ፓርቲ ናችሁ፡፡
  • ክቡር ሚኒስትር ትልቅ ቦታ የሚደረሰው ከትንሽ ተነስቶ ነው፡፡
  • አባባሉ ለጊዜው ይቅርብህና ለምርጫው ምን ዓይነት ዝግጅት እያደረጋችሁ ነው?
  • ክቡር ሚኒስትር እናንተን ያለዝግጅት ነው የምንዘርራችሁ፡፡
  • የምትወዳደሩት በፕሮግራማችሁ ብቃት ነው ወይስ በጉራችሁ ብዛት?
  • ክቡር ሚኒስትር እኛ ሁሌም የሕዝቡ ልብ ውስጥ ነን፡፡
  • ይቅርታ አድርግልኝና እናንተ እንኳን የሕዝቡ ልብ ውስጥ ልትሆኑ ቀርቶ የራሳችሁ ልብ ራሱ ያለው ሌላ ቦታ ነው፡፡
  • ምን እያሉ ነው?
  • ፖለቲካውን እንደ ቢዝነስ ነው እንጂ የምታስቡት ሕዝብን ለማገልገል ቁርጠኝነቱ ያላችሁ አይመስለኝም፡፡
  • ክቡር ሚኒስትር በጣም በቁርጠኝነት ነው የተነሳው፡፡
  • እንደዚያ ከሆነ ለምን ተደራጅታችሁ ከእኛ ጋር በደንብ ለመፎካከር አትጥሩም?
  • መደራጀት ሳይሆን መበታተን ነው የሚያዋጣው፡፡
  • እ. . .
  • ከተደራጀንማ ለጥቃት እንመቻለን፣ ከተበታተንን ግን ለመያዝ ስለምናስቸግር ለእናንተም ፈተና ነው የምንሆነው፡፡
  • ይኼ አካሄዳችሁ ግን የትም አያደርሳሁችም?
  • ይኸው እናንተ አገር እየከፋፈላችሁ አይደል እንዴ ይኼን ያህል የገዛችሁት?
  • የመከርኩህን ግን ብትቀበል ጥሩ ነው፡፡
  • ፈጽሞ አልቀበለውም፡፡
  • እንግዲያው ዕጣ ፈንታችሁ አንድ ነው ነው የሚሆነው፡፡
  • ምንድነው?
  • መዋጥ!

[ክቡር ሚኒስትሩ ከሚስታቸው ጋር እያወሩ ነው]

  • በጣም ደስ የሚል ዜና ልንገርህ?
  • የምን ዜና?
  • ለመንግሥት ልማት ድርጅት የቦርድ አባል እንድሆን ተጠየኩ፡፡
  • ምን?
  • ለቦርድ አባልነት ተጠየኩ፡፡
  • ፈጽመሽ ጥያቄውን እንዳትቀበይ፡፡
  • ለምን?
  • የያዝሽው ፓስፖርት የውጭ አገር መሆኑን ረሳሽው?
  • ታዲያ ምን ችግር አለው?
  • ሚዲያዎቹ ወሬውን ካገኙት በኋላ ችግር ነው፡፡
  • ገና ለገና ትፎካከረኛለች ብለህ ነው አይደል?
  • ወሬው ከተሰማ ለእኔም ሳይቀር ችግር ነው፡፡
  • እኔ ግን ሳስበው በእኔ መሾም የቀናህ መሰለኝ፡፡
  • ሴትዮ መሾም ከፈለግሽ ያለሽ ምርጫ አንድ ነው፡፡
  • ምንድነው?
  • የውጭውን ፓስፖርት መቅደድ፡፡
  • እሱንማ ከምቀድ ሌላ ነገር ብቀድ ይሻለኛለ፡፡
  • ሌላ ምን?
  • ሰማኒያዬን!