Skip to main content
x

ስድስተኛው የምርት ገበያው የመደበኛ አባልነት መቀመጫ ጨረታ

የኢትዮጵያ ምርት ገበያ የአባላት መቀመጫዎችን ለመሸጥ ባካሄደው ጨረታ ሦስት የመደበኛ አባልነት መቀመጫዎችን እስከ 3.2 ሚሊዮን ብር በሚደርስ የጨረታ ዋጋ መሸጡን ገለጸ፡፡

የኢትዮጵያ ምርት ገበያ አባልነት መቀመጫዎቻቸው እንዲሸጡላቸው ለሚጠይቁ አባላት በየሩብ ዓመቱ ጨረታ በማውጣት የሚሸጥ ሲሆን፣ ይህ ሽያጭም በዚህ መሠረት የተከናወነ መሆኑንም አስታውቋል፡፡ ሰሞኑን ያካሄደው ስድስተኛው ጨረታ ነው፡፡ በዚህ ጨረታ ላይ ሦስት ተጫራቾች የምርት ገበያውን የአባልነት ወንበር ለመግዛት ዋጋ ያቀረቡ መሆኑን የሚገልጸው የምርት ገበያው መረጃ፣ ለጨረታ የቀረበው ከፍተኛው ዋጋ 3.2 ሚሊዮን ብር፣ ዝቅተኛው ደግሞ 2.2 ሚሊዮን ብር ነበር፡፡ ምርት ገበያው ሥራውን በጀመረበት ወቅት የአንድ የአባልነት መቀመጫ በ50,000 ብር ይሸጥ እንደነበር የሚያስታውሰው ይኸው መረጃ፣ ለአባልነት መቀመጫ ለጨረታ የቀረበው ከፍተኛው ገንዘብ ካለፈው ዙር የአባልነት መቀመጫ ሽያጭ ጨረታ ውጤት ጋር ሲነፃፀር የ36 ሺሕ ብር ብልጫ እንዳለውም ለማወቅ ተችሏል፡፡

የኢትዮጵያ ምርት ገበያ በአሁኑ ወቅት 347 አባላት አሉት፡፡ በኢትዮጵያ ምርት ገበያ ደንብ አንቀፅ አራት መሠረት የአባልነት መቀመጫ ማንኛውም ሕጋዊ ሰው ወይም ድርጅት በኢትዮጵያ ምርት ገበያ የመገበያየት መብት ይሰጣል፡፡ ይህ የመገበያያ መቀመጫ ተገበያዩና አገናኙን አባል በመባል የሚታወቁ ሁለት ዓይነት የአባልነት መደቦች አሉት፡፡ ተገበያዩ አባል የሚገበያየው በራሱ ስም ሲሆን፣ አገናኙን አባል ደግሞ በራሱ ወይም በደንበኞች ስም መገበያየት የሚያስችል የአባልነት ዓይነት ነው፡፡ ደንበኛ ደግሞ ማንኛውም ሕጋዊ ሰው ወይም ድርጅት በአገናኝ አባላት በኩል በምርት ገበያው የሚገበያይ እንደሆነ ይታወቃል፡፡

መደበኛ ተገበያይ አባላትና አገናኙን አባላት የአባልነት መቀመጫቸውን በምርት ገበያው ተቀባይነት ላገኘ ሰው ሊያስተላልፉ ይችላሉ፡፡ የአባልነት መቀመጫውን የሚያስተላልፍ አባል አስፈላጊውን ዕውቅና ካገኘ በኋላ ቢያንስ ለሦስት ዓመታት በምርት ገበያው በአባልነት የመቆየትና በምርት ገበያው ደንብ የተቀመጡ ሌሎች መሥፈርቶችን ማሟላት ይጠበቅበታል፡፡

በአዲሱ የቡና ግብይት ሞዴል መሠረትም የኢትዮጵያ ምርት ገበያ ከሐምሌ ወር 2009 ዓ.ም. ጀምሮ አዲስ የአባልነት ምዝገባ አባል ያልሆነ ቀጥታ ተገበያይ የሚል አዲስ የአባላት ዘርፍ አዘጋጅቶ ወደ ሥራ መግባቱ ይታወሳል፡፡ አባል ያልሆኑ ቀጥታ ተገበያዮች በምርት ገበያው የመገበያያ ቋሚ መብት የሚያጎናፅፍ የግብይት ፈቃድ ያላቸው ሲሆን፣ በራሳቸው ወይም በተፈቀደለት አንድ ተወካዩ ብቻ የመግዛት ብቻ ወይም የመሸጥ ብቻ መብት ይኖራቸዋል፡፡ ምርት ገበያው ሰባተኛውን የአባልነት መቀመጫ የጨረታ ሽያጭ በቅርቡ እንደሚያካሂድም አስታውቋል፡፡