Skip to main content
x
ገቢዎች ሚኒስቴር የጉምሩክ ፖሊስ እንደሚያሰማራ አስታወቀ

ገቢዎች ሚኒስቴር የጉምሩክ ፖሊስ እንደሚያሰማራ አስታወቀ

በአገሪቷ እየተባባሰ የመጣውን የኮንትሮባንድ ንግድ ለመቀነስና ለማስቆም ገቢዎች ሚኒስቴር ለጉምሩክ ሥራዎች ብቻ የሚመደብ የፖሊስ ኃይል እንደሚያሰማራ አስታወቀ።

የገቢዎች ሚኒስትሯ ወ/ሮ አዳነች አቤቤ እንዳስታወቁት፣ ተቋሙ የኮንትሮባንድ ንግድ ላይ አዲስ ዘመቻ ማካሄድ ጀምሯል። ‹‹ሥር የሰደደውን የኮንትሮባንድና የሕገወጥ ንግድ እንቅስቃሴ እናስቆመዋለን፤ ግን በምን ያህል ፍጥነት እንደምናስቆመው ነው እርግጠኛ መሆን የቀረን፤›› ያሉት ሚኒስትሯ፣ ይህንን ከሕዝቡ ከተገኘው ድጋፍና ትብብር ባሻገር ሕገወጥ የወጪና ገቢ ምርቶችን ዱካ ለማስቆም፣ ተጠሪነቱ ለፌደራል ፖሊስ ሆኖ የሚንቀሳቀስና ብቸኛ ሥራውም የኮንትሮባንድ ንግድን የሚመክት ‹‹የጉምሩክ ፖሊስ›› እንዲቋቋም የሚኒስትሮች ምክር ቤት ሰሞኑን እንደወደወሰነ ኃላፊዋ አስታውቀዋል።

ከቅርብ ጊዜ ወዲህ በኮንትሮባንድ መንገድ ከሚወጡ ሸቀጦች ይልቅ ትልቅ ቦታ ይዞ የሚታየው የውጭና የአገር ውስጥ የመገበያያ ገንዘቦች ናቸው።

ይህ እንዳለ ሆኖ፣ ገቢዎች ትኩረት ከሚሰጥባቸው መካካል የታክስ እፎይታና የታክስ ነፃ መብቶች ላይ የሚታዩ ችግሮች ይገኙበታል። ከ2007 ዓ.ም. ጀምሮ ከ400 ቢሊዮን ብር የታክስ እፎይታና የታክስ ዕድል መሰጠቱን ሚኒስትሯ አስታውሰው፣ አብዛኛው የታክስ እፎይታና ነፃ ዕድሎች ላልተገባ ተግባር ይውል እንደነበር ገልጸዋል። በምሳሌነት ከጠቀሷቸው ውስጥ በአፋር ክልል ሃባላ በምትባልና 2000 የማይበልጡ ነዋሪዎች በሚገኙባት ከተማ ውስጥ 55 ዓለም አቀፍ ደረጃ ያላቸውን ሆቴሎች ለመገንባት በሚል ሰበብ የቀረቡ የታክስ ነፃና ጥያቄዎች ይገኙባቸዋል። እንዲህ ባለው መንገድ በርካታ ብረት፣ የቤትና የቢሮ ዕቃዎችና ሌሎችም ያለቀረጥ እየገቡ ሲቸበቸቡ ቆይተዋል።