Skip to main content
x

የአዲስ አበባ ነዋሪዎች ሕገወጥ ይዞታዎችን እንዲጠቁሙ ጥሪ አቀረበ

ሥልጣን ከያዘ ማግሥት ጀምሮ በተለይ በመሬትና መሬት ነክ ይዞታዎች ላይ የሚስተዋሉ ሕገወጥ ተግባራትን በማስተካከል ላይ የሚገኘው አዲሱ የአዲስ አበባ ከተማ አስተዳደር፣ ከዕይታ የተሰወሩ ሕገወጥ ይዞታዎችን ኅብረተሰቡ እንዲጠቁም ጠየቀ፡፡

የአዲስ አበባ ከተማ አስተዳደር መሬት ልማትና ማኔጅመንት ቢሮ የመሬት ባንክና ማስተላለፍ ኤጀንሲ ዋና ሥራ አስኪያጅ አቶ ተስፋዬ ጥላሁን ለሪፖርተር እንደገለጹት፣ ከዕይታ ውጪ ያሉ ሕገወጥ ይዞታዎች ስለሚኖሩ ኅብረተሰቡ ጥቆማ እንዲያደርግ አስተዳደሩ ፍላጎቱ ነው፡፡

‹‹በአካል መምጣት የሚችሉ 22 ማዞሪያ አካባቢ በሚገኘው የመሬት ልማትና ማኔጅመንት ቢሮ ዋና መሥሪያ ቤት ሁለተኛ ፎቅ፣ በአካል መምጣት ለማይችሉ ደግሞ በስልክ ቁጥር 09 45 96 62 13 ወይም 09 11 54 57 83 መደወል ይችላሉ፤›› ብለዋል፡፡

በምክትል ከንቲባ ታከለ ኡማ (ኢንጂነር) የሚመራው የአዲስ አበባ ከተማ አስተዳደር ጠቅላላ ሥፋታቸው 250,413.89 ካሬ ሜትር የሆኑ 154 ይዞታዎች ካርታ ማምከኑ ይታወሳል፡፡

አስተዳደሩ የቦታዎቹን ካርታ ቢያመክንም 14 የሚሆኑ ባለይዞታዎች የግንባታ ዕቃቸውንና አጥራቸውን አንስተው ባለማስረከባቸው፣ አስተዳደሩ ግብረ ኃይል አቋቁሞ በቦታዎቹ ላይ የነበሩ የግንባታ ዕቃዎችንና አጥሮችን አንስቷል፡፡

አቶ ተስፋዬ ለሪፖርተር እንደገለጹት፣ በአሁኑ ወቅት ሁሉንም ቦታዎች አስተዳደሩ ተቆጣጥሯል፡፡ አስተዳደሩ በተለይ ከዲፕሎማቲክ ተቋማትና ከሚድሮክ ተቃውሞ ቢገጥመውም፣ በአቋሙ ፀንቶ ዕርምጃውን መውሰዱ አይዘነጋም፡፡ በውጭ ጉዳይ ሚኒስቴር አማካይነት ደግሞ ከዲፕሎማቲክ ተቋማት ጋር መነጋገሩ ታውቋል፡፡

አቶ ተስፋዬ እንዳሉት፣ በውይይቱ ወቅት የከተማ አስተዳደሩ ቦታውን መልሶ የወሰደው ለዓመታት ባለመልማታቸው መሆኑን በማስረዳት መተማመን ላይ ተደርሷል፡፡ የዲፕሎማቲክ ተቋማቱ ለግንባታ ዝግጁ በሚሆኑበት ወቅት ቦታ እንደሚሰጣቸውም አስተዳደሩ ገለጻ ማድረጉን እነሱም ፈቃደኛ መሆናቸውን አቶ ተስፋዬ ጨምረው አስረድተዋል፡፡

አስተዳደሩ መልሶ በተረከባቸው ቦታዎች ላይ በተለይ የትራንስፖርት ፍሰቱን ለማስተካከል የሚረዳ ጊዜያዊ የመኪና ማቆሚያ ሥፍራዎችን እየገነባ ነው፡፡

በአሁኑ ወቅት አብዛኛዎቹ ጊዜያዊ የመኪና ማቆሚያ ቦታዎች ግንባታ እየተገባደደ ሲሆን፣ ምክትል ከንቲባው ሥራውን በቀጥታ እየተከታተሉት እንደሆነ ለማወቅ ተችሏል፡፡

ከመኪና ማቆሚያ ቦታዎቹ በተጨማሪ ሁለት የሚድሮክ ይዞታዎች የሕዝብ መናፈሻ እንዲሆኑ ውሳኔ መተላለፉን መዘገባችን ይታወሳል፡፡