Skip to main content
x
ክቡር ሚኒስትሩ ከአንድ ሪሰርቸር ጋር እያወሩ ነው

ክቡር ሚኒስትሩ ከአንድ ሪሰርቸር ጋር እያወሩ ነው

[ክቡር ሚኒስትሩ ከአንድ ባለሀብት ጋር ተገናኝተው እያወሩ ነው]

  • ክቡር ሚኒስትር ምንድነው የሚሠራው?
  • ምንድነው የሚሠራው ማለት?
  • እኛ እኮ ሌላ አገር የለንም፡፡
  • አንተ አሁንም ትቀልዳለህ አይደል?
  • የምን ቀልድ ነው ክቡር ሚኒስትር?
  • ሦስት ፓስፖርት አይደለም እንዴ ያለህ?
  • ክቡር ሚኒስትር እትብቴ የተቀበረው ግን እዚሁ ነው፡፡
  • ለምን ታዲያ የሌላ አገር ዜግነት ኖረህ?
  • እኔ ፓስፖርቴን ለመቅደድም ዝግጁ ነኝ፡፡
  • እሱን እንኳን ተወው፡፡
  • ክቡር ሚኒስትር ሌሎቹ እኮ የወረቀት አገሮቼ ናቸው፣ ኢትዮጵያ ግን የልቤ አገር ናት፡፡
  • ታዲያ ኢትዮጵያ ምን ሆነች?
  • ከዚህች አገር የት እንድንሄድ ነው የምትገፋፉን?
  • ማን ገፋህ?
  • ትልቅ ቦታ ለመድረስ አይደል እንዴ የሁላችንም ጥረት ክቡር ሚኒስትር?
  • እውነት ነው፡፡
  • ታዲያ የት ሄደን ምን እንሥራ?
  • አልገባኝም፡፡
  • በጣም ነው ያዘንኩት ክቡር ሚኒስትር፡፡
  • ምኑ ነው ያሳዘነህ?
  • ወሰዱት እኮ ክቡር ሚኒስትር፡፡
  • ምኑን?
  • መሬቱን ነዋ፡፡
  • አንተ በየቦታው አይደል እንዴ መሬት ያለህ?
  • ይኸው ሁሉንም እኮ ነው ጠራርገው የወሰዱት፡፡
  • ታዲያ መገንባት ነበረብሃ?
  • እኔ እኮ በርካታ ዜጎችን ቀጥሬ የማሠራ ባለሀብት ነኝ፡፡
  • ለዚያ እኮ ነበር መሬቱ የተሰጠህ፡፡
  • ታዲያ መሥሪያ ጊዜ ሊሰጠኝ ይገባ ነበር፡፡
  • አንተ ግን አጥረህ ብድር ስትጠይቅበት ነበር፡፡
  • ክቡር ሚኒስትር የተወሰደብኝ መሬት እኮ አንድ ክፍለ ከተማ ያክላል፡፡
  • አሁን ምን ይደረግ ነው የምትለው?
  • ክቡር ሚኒስትር መሬቴ እንኳን ይወሰድ፣ በሁሉም ላይ እንደወሰናችሁት ገብቶኛል፡፡ እኔ ግን ምን በልቼ እንዳድር አስባችሁ ነው?
  • ማለት?
  • ቢዝነሴም ታግዷል፡፡
  • ታግዷል ስትል?
  • ምንም ዓይነት እንቅስቃሴ እንዳላደርግ ቢዝነሴ ታግዷል፡፡
  • ለምን?
  • እኔ ምን አውቃለሁ ክቡር ሚኒስትር? ምን ባጠፋ ነው እንደዚህ የምታደርጉት?
  • እንግዲህ ቢዝነስህ የታገደበት በቂ ምክንያት ይኖራል ብዬ ተስፋ አደርጋለሁ፡፡
  • እኮ ምን አጠፋሁ?
  • አሁንም አንተ ከቀድሞው ሥርዓት ጋር ያለህ ቁርኝት እንደጠነከረ ነው አይደል?
  • እሱማ ይኼ ሁሉ ሀብት የመጣው በዚያ ነው፡፡
  • ይኼን ሁሉ ሠርተህ እንዳማታመጣውማ ግልጽ ነው፡፡
  • ክቡር ሚኒስትር ከቀድሞው ሥርዓት ጋር እኮ በጋብቻ ሳይቀር የተዛመድኩ ነኝ፡፡
  • ከጋብቻው በላይ እኮ የሙስናው ዝምድና ይበልጣል፡፡
  • እሱስ ልክ ነዎት፡፡
  • ስለዚህ አሁንም ከድሮው ሥርዓት ጋር ያለህ ግንኙነት አልተቋረጠም፡፡
  • ምን ባደርግ ይሻላል?
  • ቶሎ ከአገር ውጣ፡፡
  • ክቡር ሚኒስትር ከኤርፖርት እኮ ነው የመለሱኝ፡፡
  • አንተ ሦስት ፓስፖርት አይደል እንዴ ያለህ?
  • በየትኛውም ፓስፖርቴ መውጣት አልቻልኩም፡፡
  • እኔ ምን ላድርግህ  ታዲያ?
  • የት ልትግባ ክቡር ሚኒስትር? ምከሩኝ እስኪ?
  • ለምን ገዳም አትገባም?
  • እዚያም አውቀውኝ አባረሩኝ፡፡
  • እንግዲያው መግባት ያለብህ አንድ ቦታ ነው፡፡
  • የት ክቡር ሚኒስትር?
  • ገደል!

[ክቡር ሚኒስትር ቢሮ አማካሪያቸው ገባ]

  • ምነው ክቡር ሚኒስትር ፊትዎ ጠቆረብኝ?
  • ኧረ ተወኝ፡፡
  • ምን ተፈጠረ?
  • እስኪ ተወው፡፡
  • ምን ሆኑ?
  • አንድ የሚያስደነግጥ ዜና ሰምቼ ነው፡፡
  • የምን ዜና?
  • አባረሩት እኮ፡፡
  • ማንን?
  • ዋናውን ቆራጡ መሪያችንን ነዋ፡፡
  • ለምንድነው የሚያስደነግጡኝ ክቡር ሚኒስትር ማን ነው የተባረረው?
  • አንተ ለመሆኑ ሚዲያ ትከታተላለህ?
  • ኧረ በጣም ነው የምከታተለው፡፡
  • ታዲያ እንዴት መባረሩን አልሰማህም?
  • እኔ እንግዲህ ዛሬም ሶሻል ሚዲያ ስከታተል ነበር የተባረረ ወሬ አልሰማሁም፡፡
  • ሁሌም ተዓማኒ የዜና ምንጮችን ተከታተል የምልህ ለዚህ ነው፡፡
  • ለመሆኑ ማን ነው የተባረረው?
  • ጆዜ ሞሪኖ ነዋ፡፡
  • ክቡር ሚኒስትር የእሱ መባረር ይኼን ያህል አንገብጋቢ ነው እንዴ?
  • ጉዳዩ የገባህ አይመስለኝም፡፡
  • እንዴት ክቡር ሚኒስትር?
  • ሰውዬው እኮ ክለቡን ወደ ተሻለ ዕድገት የሚያሸጋግረው መሪ እንደነበር ማንም ያውቀዋል፡፡
  • እኔ እንደሰማሁት ግን ቡድኑን ችግር ውስጥ የከተተው እሱ ነው የሚል ነው፡፡
  • እንዳትሳሳት፣ ሞሪኖ የባለ ዕራዩን መሪ አሌክስ ፈርጉሰንን ሌጋሲ ለማስቀጠል ወሳኝ ሥራ ሊሠራ የነበረ አሠልጣኝ ነው፡፡
  • እ. . .
  • በክለቡ ውስጥ ትክክለኛ ዴሞክራሲያዊ ማዕከላዊነትን ፍልስፍና ሰርፆ እንዲቀጥል አድርጓል፡፡
  • እንዴት?
  • ተጨዋቾቹ ከአሠልጣኙ ብቻ የሚሰጣቸውን ትዕዛዝ እንዲፈጽሙ በማድረግ የፈርጉሰንን አመራር አስቀጥሏል፡፡
  • ስለዚህ ሊባረር አይገባም ነበር እያሉ ነው?
  • የራስህ እግር ላይ እንደ መተኮስ ነው ስልህ?
  • ክቡር ሚኒስትር እርስዎ ግን ከዘመኑ ጋር መራመድ የቻሉ አልመሰለኝም፡፡
  • እንዴት?
  • በቃ የእርስዎ እኩዮችና እርስዎ እንደ ድሮው በአፈና በጭቆና ምናምን ነው መግዛት የምትወዱት፡፡
  • ምን እያልክ ነው?
  • አሁን የእግር ኳስ ፍልስፍና ተቀይሯል፡፡
  • ወደ ምን?
  • ወደ ፍቅር፣ መደመር፣ አንድነት ነዋ፡፡
  • የማታውቀውን ነገር አትዘባርቅ፡፡
  • ክቡር ሚኒስትር የሊቨርፑልና የማንቸስተር ሲቲ አሠልጣኞች በዚህ ፍልስፍና ነው ውጤታማ የሆኑት፡፡
  • ለእኔ ከሞሪኖ የሚበልጥ አሠልጣኝ የለም፡፡
  • ክቡር ሚኒስትር ሰውዬው እኮ የክለቡን ሀብት አባክኗል፡፡
  • እንዴት አድርጎ?
  • ይኸው ለስምንት ተጨዋቾች ከ300 ሚሊዮን ዶላር በላይ አውጥቶ ግዥ ፈጽሟል፡፡
  • ለክለቡ ሲል ነዋ፡፡
  • ስነግርዎት ያለዕቅድና ፍላጎት ነው የሚገዛው፡፡
  • ይኼን እንኳን አልቀበልም፡፡
  • እንዲያውም በዚህ ምክንያት ቅፅል ስም ወጥቶለታል፡፡
  • ማን ተባለ?
  • ሜቴክ!

[ክቡር ሚኒስትሩ ከአንድ ሪሰርቸር ጋር እያወሩ ነው]

  • ክቡር ሚኒስትር ለውጡን እንዴት እያዩት ነው?
  • ለውጡ ጥሩ ነው ግን የሚጎድሉት በርካታ ነገሮች አሉት፡፡
  • ምንድነው የሚጎድለው?
  • ትግሉ አሁንም አልቆመም፡፡
  • የምን ትግል?
  • በረሃም ታግለናል፣ አሁንም እንታገላለን፡፡
  • ለምንድነው የምትታገሉት?
  • የዕለት ተዕለት ኑሮን ከማሸነፍ ጀምሮ በአገሪቱ ዴሞክራሲያዊ ሥርዓት ለመገንባት ነዋ፡፡
  • አሁንም ዴሞክራሲያዊ ሥርዓት አልተገነባም ብለው ነው የሚያስቡት?
  • አንተ ተገንብቷል ልትለኝ ነው?
  • እየተገነባ ነው ክቡር ሚኒስትር፡፡
  • እንዴት ሆኖ?
  • በፊት እኮ ለየት ያለ የፖለቲካ አመለካከት የነበረው ዜጋ ምን እንደሚደረግ እናውቃለን?
  • እ. . .
  • የተቃዋሚ ፓርቲዎች አባላት እስር ቤት ነበር የሚኖሩት፡፡
  • ምን እያልክ ነው?
  • መንግሥትን የሚቃወሙ ጋዜጠኞች ወይም ብሎገሮች ማዕከላዊ ነበር ቤታቸው፡፡
  • ያኔ የነበረው አሠራር የዓለምን ፖለቲካ የሚያንፀባርቅ ነበር፡፡
  • ምን ማለት ነው?
  • ዓለም በአሸባሪዎች ላይ ጦርነት ስላወጀ እኛም የሚያሸብሩንን እስር ቤት እንከት ነበር፡፡
  • ክቡር ሚኒስትር እሱን እንኳን ተውት፡፡
  • ምን እያልክ ነው?
  • ይኸው አሁን ከበፊቱ በባሰ ሁኔታ መንግሥት ቢሰድብም፣ የትኛውም ግለሰብ በሐሳቡ ምክንያት እየታሰረ አይደለም፡፡
  • ምነው ጓደኞቻችን አንድ ክልል ውስጥ ታስረው አይደል እንዴ ያሉት?
  • እነሱን ያሰራቸው የራሳቸው ሐሳብ ነው፡፡
  • ስማ በአሁኑ ወቅት ሕገ መንግሥቱ እየተጣሰ መሆኑን አታውቅም?
  • መጀመርያ ሕገ መንግሥቱን ማን ነበረ የሚጥሰው?
  • እኛው፡፡
  • ታዲያ አሁን መጣሱ ምን ይገርማል?
  • ለሕዝቡ በአንዴ ዴሞክራሲን በአካፋ እየዛቅህ አትሰጥም፡፡
  • አልገባኝም?
  • ዴሞክራሲን በማንኪያ ለለመደ ሕዝብ በአንዴ በቡልዶዘር ዝቀህ ስትሰጠው ይኸው አገሪቱ ተተራመሰች፡፡
  • ክቡር ሚኒስትር ሕዝቡ ዴሞክራሲ በዛብኝ ብሎ አያውቅም፡፡
  • ዴሞክራሲ መቼ አግኝቶ ያውቅና?
  • አሁንማ ሕዝቡ የመናገር መብቱን ተጠቅሞ ዴሞክራሲያዊ መብቱን እያጣጣመ ነው፡፡
  • አገሪቱ ውስጥ ዴሞክራሲ አለ እያልክ ነው?
  • በሚገባ፡፡
  • አንተ ስለዴሞክራሲ ያለህ አመለካከት የተሳሳተ ነው፣ ለዚያ ነው እኛም እየታገልን ነው ያልኩህ፡፡
  • ቆይ ለእርስዎ ዴሞክራሲ ማለት ምን ማለት ነው?
  • አንድና አንድ ነገር ሲሆን ነው፡፡
  • ምን ሲሆን?
  • የድሮው ሥርዓት ሥልጣን ላይ ሲወጣ!

[ለክቡር ሚኒስትሩ አንድ ወዳጃቸው ደወለላቸው]

  • በቲቪ ዓይቼዎት ነው እኮ የደወልኩልዎት ክቡር ሚኒስትር፡፡
  • የትኛው ቻናል ላይ?
  • ምን ቻናል ላይ ብቻ አሁንማ በየሶሻል ሚዲያውም የእርስዎን ቪዲዮ ሕዝቡ እየተቀባበለው ነው፡፡
  • ምንድነው ያየኸው?
  • ፕሮቶኮል የሚባል ነገር አያውቁም እንዴ?
  • እኔ በፊትም ስለአለባበሴ ግድ እንደሌለኝ ታውቃለህ?
  • እኔ ስላለባበስዎ አይደለም፡፡
  • ታዲያ የምን ፕሮቶኮል ነው?
  • በአጠቃላይ ሥነ ሥርዓትዎና ሕዝብ ፊት ስለሚያደርጉት ድርጊት ሊጠነቀቁ ይገባል፡፡
  • ሳንቀላፋ ታየ እንዴ በቲቪ?
  • አላንቀላፉም ክቡር ሚኒስትር፡፡
  • ጥፍሬን መብላት ደግሞ ሚስቴ አስትታኛለች፡፡
  • እርስዎ ጥፍር ይነቅላሉ እንጂ መቼ ጥፍር ይበላሉ?
  • ታዲያ ስልኬን ስነካካ ዓይተኸኝ ነው?
  • እኔ እሱን አይደለም የምልዎት፡፡
  • ታዲያ ምንድነው?
  • ቲቪ ላይ በተደጋጋሚ ስለሚቀርቡ ፕሮቶኮልዎን መጠበቅ አለብዎ፡፡
  • እኮ የምን ፕሮቶኮል?
  • ለማንኛውም እኔ በራሴ ወጪ ላስተምርዎ ወስኛለሁ፡፡
  • ምንድነው የምታስተምረኝ?
  • ማጨብጨብ!