Skip to main content
x
ክቡር ሚኒስትሩ ከአንድ ጋዜጠኛ ጋር እየተጨቃጨቁ ነው

ክቡር ሚኒስትሩ ከአንድ ጋዜጠኛ ጋር እየተጨቃጨቁ ነው

[የክቡር ሚኒስትሩ ጸሐፊ ቢሯቸው ገባች]                 

  • እንዴት ዋሉ ክቡር ሚኒስትር?
  • ሰላም ነኝ፡፡
  • ክቡር ሚኒስትር ሰብሰብ ብለው መጥተዋል፡፡
  • ፖሊሶች ናቸው?
  • ምነው ደነገጡ?
  • ምን ፈልገው ነው ብዬ ነዋ?
  • ኧረ ይረጋጉ፡፡
  • እኔ እኮ ተደምሬያለሁ ብያቸው ነበር?
  • ቆይ ተረጋጉ እንጂ፡፡
  • ሳልደመር ብታሰር ይሻለኝ ነበር፡፡
  • መደመር እኮ አሪፍ ነገር ነው ክቡር ሚኒስትር?
  • እየታሰርኩኝ የምን መደመር ነው?
  • ማነው የሚያስርዎት?
  • ፖሊሶቹ ናቸዋ፡፡
  • የምን ፖሊሶች?
  • ሰብሰብ ብለው መጥተዋል አላልሽኝም እንዴ?
  • ወቅቱን ረሱት እንዴ ክቡር ሚኒስትር?
  • የምን ወቅት ነው?
  • የበዓል ወቅት ነዋ፡፡
  • ታዲያ ምነው በዓልን እንኳን ባሳልፍ?
  • ኧረ ይረጋጉ ክቡር ሚኒስትር?
  • ቢሮ የለም በያቸው፡፡
  • እነማንን?
  • ፖሊሶቹን፡፡
  • ክቡር ሚኒስትር ፖሊስ እኮ የለም፡፡
  • ታዲያ ማነው ተሰብስቦ የመጣው?
  • ስጦታዎቹ ናቸዋ፡፡
  • ነው እንዴ?
  • ይኼን ያህል ይፈራሉ እንዴ?
  • ኧረ እኔ ምንም አልፈራሁም፡፡
  • እኔማ እርስዎ እንዲህ የሆኑ የተሸሸጉት ምን ይሆናሉ ብዬ አሰብኩ?
  • ኑሮ መሰለሽ የሚኖሩት?
  • እንዴት?
  • በቃ እንደተባለው ብርጭቆ ሲወድቅ አልጋ ሥር ነው መገኛቸው፡፡
  • ታዲያ ከአልጋ ሥር ሊያመልጡ ነው?
  • መስሏቸው፡፡
  • እንቅልፍ ላይወስዳቸው ያን ሁሉ ብር ለሆቴል ከሚከፍሉ አንደኛቸውን እንቅልፍ ያለበት ቦታ ቢገቡ ጥሩ ነው፡፡
  • የት ነው እሱ?
  • ቃሊቲ፡፡
  • መቼ ይቀርላቸዋል ብለሽ ነው?
  • ለማንኛውም ስጦታዎቹን ተቀብያቸዋለሁ፡፡
  • ስለዚህ ልደውል?
  • የት ነው የሚደውሉት ክቡር ሚኒስትር?
  • አይሱዙ ጋ ነዋ፡፡
  • የምን አይሱዙ ነው?
  • ስጦታዎቹን ቤት እንዲያደርስልኝ ነዋ፡፡
  • አይ ስጦታዎቹን ቤት ለመውሰድ አይሱዙ አያስፈልግም ክቡር ሚኒስትር፡፡
  • ምን ነካሽ? አምስት በሬ፣ አሥር በግ፣ ሰባት ፍየል፣ 30 ዶሮ በምን ይዤው ልሂድ?
  • የዘንድሮ ስጦታ የተለየ ነው ክቡር ሚኒስትር?
  • እንዴት?
  • ዘንድሮ በሬው ሳይሆን የመጣው ቆዳው ላይ የተሳለው የእርስዎ ፎቶ ነው፡፡
  • እ…
  • በጉ ሳይሆን ቡልኮው ነው፡፡
  • ምንድነው የምታወሪው ሴትዮ?
  • እንዲሁም በርከት ያሉ ፖስት ካርዶች ናቸው፡፡
  • ፖስት ካርድ እንደ ስጦታ እንዳትቀበይ አላልኩሽም ነበር?
  • ክቡር ሚኒስትሩን የሚያነቃቃ ጽሑፍ ነው የጻፍንበት እያሉኝ ነው፡፡
  • ለማንኛውም ስጦታዎቹን አልቀበላቸውም፡፡
  • ምን ላድርጋቸው ታዲያ?
  • አከፋፍያቸው፡፡
  • ለማን?
  • ለሠራተኞቹ!

[ለክቡር ሚኒስትሩ ስጦታዎችን የሚሰጡ ግለሰቦችን የሚያስተባብረው ግለሰብ ጋ ደወሉ]

  • ምን እየተካሄደ ነው?
  • ሪፎርም ነዋ ክቡር ሚኒስትር፡፡
  • እ…
  • ሪፎርም ክቡር ሚኒስትር፡፡
  • ይኼ በቀላሉ ያገኘኸው ሹመት እንዳልሆነ ታውቀዋለህ?
  • የምን ሹመት ክቡር ሚኒስትር?
  • የእኔ የስጦታ ግዢና ሰጪ አደራጅ ኮሚቴ ሰብሳቢ ስትሆን ዝም ብለህ እንዳላገኘኸው ታውቃለህ?
  • ክቡር ሚኒስትር እኔ እኮ የተከበርኩ ነጋዴ ነኝ፡፡
  • ለዚያ አይደል እንዴ ይኼን ሹመት የሰጠሁህ?
  • ክቡር ሚኒስትር እኔ ባለኝ ችሎታ አገሬን የማገለግል ነጋዴ መሆኔን ነው የማውቀው፡፡
  • ለማንኛውም የተሾምክበትን ምክንያት የዘነጋኸው መሰለኝ፡፡
  • ምን እያሉ ነው ክቡር ሚኒስትር?
  • እኔ ለበዓል የምፈልገው ስጦታ ድምፅ የሚያወጣና ሳር የሚበላ እንስሳ፣ አሊያም ዘመኑ ያመጣው የኤሌክትሮኒክስ ዕቃ፣ ከዚያም ከዘለለ ዘመናዊ ተሽከርካሪ መሆኑን ረሳኸው?
  • አሁን እኮ ነገሮች ስለተቀያየሩ ነው፡፡
  • እንዴት ማለት?
  • የስጦታዎች ሁሉ ስጦታ ምን እንደሆኑ አያውቁም?
  • ምንድናቸው?
  • ጋቢ፣ ጦርና ጋሻ፣ ካባ፣ ፈረስና የመሳሰሉት ናቸው፡፡
  • ምን እያልከኝ ነው?
  • እኛ እርስዎ ከሌሎቹ ባለሥልጣናት ሊያንሱ አይገባም በማለት አምስት ጋቢ፣ ጦርና ጋሻ፣ እንዲሁም ካባ ነው ያመጣንልዎት፡፡
  • እየቀለድክ ነው ሰውዬ?
  • ክቡር ሚኒስትር አዲሱ ፖለቲካችን እኮ ስጦታዎቻችን ላይ እንድንወስድ አስገድዶን ነው፡፡
  • ምን?
  • ሪፎርም!

[ለክቡር ሚኒስትሩ አንድ ደላላ ወዳጃቸው ደወለላቸው]

  • ክቡር ሚኒስትር ጉድ ሆንኩኝ፡፡
  • ምን ሆንክ?
  • ሕይወቴ አከተመለት በቃ ክቡር ሚኒስትር፡፡
  • ምንድነው የምትለው?
  • እጅ ከፍንጅ ተያዝኩ፡፡
  • ምን ስታደርግ?
  • ሳሸሽ ነዋ፡፡
  • ምኑን?
  • ዶላሩን፡፡
  • እ…
  • አለቀልኝ በቃ ክቡር ሚኒስትር?
  • የት ነው ያለኸው?
  • ድንበር ላይ፡፡
  • እ…
  • በድንበር ነበር ላሸሸው የነበረው፡፡
  • ቦሌ ምን አለህ?
  • ክቡር ሚኒስትር በየቀኑ በቦሌ የሚያዘውን የዶላር መዓት ስመለከት በድንበር ይሻላል ብዬ ነዋ፡፡
  • ለነገሩ የኤርፖርት ጠባቂዎች በሙሉ ተቀይረው ሰው በምን ያሳልፍ?
  • እሱን ፈርቼ ነበር እኮ የድንበሩን መላ ያመጣሁት?
  • ታዲያ ምን ተሻለ?
  • ክቡር ሚኒስትር መላ ይፈልጉልኝ፡፡
  • ምን ዓይነት መላ?
  • እንደ አኳኋናቸው የሚለቁኝ አይመስልም፡፡
  • ይለቁኛል ብለህ አስበህ ነበር?
  • እኔማ የተወሰነ አቅሜያቸው አመልጣለሁ ብዬ ነበር፡፡
  • አሁን እኮ እንደ ድሮው አይደለም፡፡
  • ክቡር ሚኒስትር በጣም እያስፈራሩኝ ነው፡፡
  • ምን እያሉ?
  • የተያዘብኝ ዶላር በርካታ ስለሆነ ሕገወጥ የውጭ ባንክ ነህ እያሉኝ ነው፡፡
  • በቃ በሰበስክ ማለት ነው?
  • ክቡር ሚኒስትር በአፋጣኝ ያስፈቱኝ፡፡
  • እሱን ማድረግ አልችልም፡፡
  • ይኼ አካሄድ አያዋጣዎትም ክቡር ሚኒስትር፡፡
  • እንዴት?
  • እኔ ቅርንጫፍ ባንኩ ነኝ ብዬ ዋናውን ማጋለጤ አይቀርም፡፡
  • ማነው ዋናው ባንክ?
  • እርስዎ፡፡
  • እ…
  • በቃ ደዋውለው ያስፈቱኝ፡፡
  • እሱ እኮ ድሮ ቀረ፡፡
  • የፈለጉትን ጉዳይ በአንድ ስልክ አልነበር እንዴ የሚጨርሱት?
  • አልሰማህም እንዴ?
  • ምኑን?
  • One call ተቀየረ እኮ?
  • ወደ ምን?
  • ወደ Missed call!

[ክቡር ሚኒስትሩ ከአንድ ጋዜጠኛ ጋር እየተጨቃጨቁ ነው]

  • ለምንድነው የእኛ ሚኒስቴር መሥሪያ ቤት ዜና ያልተሠራው?
  • ክቡር ሚኒስትር የምንሠራውና የማንሠራውን ዜና እርስዎ ሊነግሩን አይችሉም እኮ?
  • ከዚህ በላይ ምን ዜና አለ?
  • ማለት?
  • ያን ሁሉ ሰው ጠርተን፣ ያን ሁሉ ድግስ ደግሰን እንዴት ዜናው አልተሠራም?
  • ድግስ ሁሉ እኮ ዜና አይሆንም፡፡
  • እ…
  • በዚያ ላይ በትንሹም ቢሆን የራሳችን ነፃነት አለን እኮ?
  • ዲስኩርህን ትተህ ለምን እንዳልተዘገበ ንገረኝ?
  • ክቡር ሚኒስትር ያው ለሕዝቡ ዜና ይሆናል የምንለውን መዝነን እኮ ነው ዜና የምንሠራው፡፡
  • ኪኪኪ…
  • ምን ያስቅዎታል?
  • ደግሞ እናንተ ዜና ትመርጣላችሁ እንዴ?
  • አልገባኝም ክቡር ሚኒስትር?
  • በየቀኑ በገቡ ዜና ትቀልዱብናላችሁ አይደል እንዴ?
  • ምንድነው የገቡ ዜና?
  • ስማ አንድ የግጥም መድብል አሳትሞ የማያውቅ ሰው ሳይቀር ከውጭ ገባ ብላችሁ አይደል እንዴ ዜና የምትሠሩት?
  • እ…
  • አንድ ነጠላ ዜማ ያለው ሰው አገሩ ገባ ብላችሁ እኮ በቀጥታ ታስተላልፋላችሁ?
  • እሱን አላውቅም፡፡
  • ታዲያ በምን መሥፈርት ነው የእኛን ዜና ሳታስተላልፉ የቀራችሁት?
  • እኔ እንጃ ክቡር ሚኒስትር፡፡
  • የፖለቲካ ፓርቲ መሪዎቹንስ ቢሆን በየጊዜው አይደል እንዴ ገቡ እያላችሁ የምታስተላልፉት?
  • እሱ እኮ ያው መንግሥት ባስቀመጠው አቅጣጫ ፓርቲዎቹ እየተመለሱ ስለሆነ ነው፡፡
  • ቢሆንስ የአንድ ፓርቲ አመራሮች ስንቴ ነው ገቡ ተብሎ የሚዘገብላቸው?
  • አንዴ ነዋ፡፡
  • እናንተ ግን እንደ ተከታታይ ድራማ በየጊዜው ገቡ እያላችሁ ነው የምትዘግቡት፡፡
  • ምን እናድርግ ታዲያ ክቡር ሚኒስትር?
  • እንዴት?
  • እናንተ ራሳችሁ ምርጥ የፖለቲካ ድራማ ነው የምትሠሩት፡፡
  • እ…
  • የፓርቲ አመራሮቹን እንደ ተከታታይ ድራማ በፓርት በፓርት ስታስገቧቸው እኛም ክፍል አንድ፣ ክፍል ሁለት እያልን እንዘግባቸዋለን፡፡
  • ለማንኛውም እናንተ ትኩረት የምትሰጡት ዜና ገብቶኛል፡፡
  • ምንድነው?
  • ገቡ የሚለው ዜና ነዋ፡፡
  • እ…
  • ስለዚህ አንድ ዜና ልንገርህ፡፡
  • ምን ዓይነት ዜና?
  • እኔም ከረጅም ጊዜ በኋላ ጂም ጀምሬያለሁ፡፡
  • ጥሩ ነው፡፡
  • ታዲያ ሚኒስትሩ ገቡ ብለህ ዜናው ለምን አትሠራውም?
  • የት?
  • ጂም ነዋ፡፡
  • ይኼ ዜና አይደለም፡፡
  • የገቡ ዜና ነው የምትሠሩት ብዬ ነው እኮ?
  • በቅርቡ ሲገቡ ዜናውን እንሠራዋለን፡፡
  • የት ስገባ?
  • እስር ቤት!