Skip to main content
x
ለኩላሊት ሕሙማን የገና ሥጦታ

ለኩላሊት ሕሙማን የገና ሥጦታ

የዛሬ ዘጠኝ ዓመት ደም ግፊትና ስኳር ሕመም ቢያጋጥማቸውም ትኩረት ሰጥተው አለመታከማቸው ለኩላሊታቸው ከጥቅም ውጪ መሆን ምክንያት እንደሆነ ይናገራሉ፡፡ በወቅቱ ባይዘናጉ ኖሮም ‹‹ዝብርቅርቅ ያለ ሕይወት›› ለሚሉት ኑሮ ባልተዳረጉም እንደነበር ይገምታሉ፡፡

በቶም ዲያሊስስ ሴንተር የኩላሊት እጥበት ሕክምና ሲከታተሉ ያገኘናቸው አቶ ኢብራሂም አህመድ፣ የኩላሊት እጥበት ሕክምና ከጀመሩ ሰባት ዓመት ከስድስት ወር ሆኗቸዋል፡፡

አሁን የኢንዱስትሪ ግብዓቶች ግብአት ድርጅት በሚባለውና በቀድሞው የሸቀጦች ንግድ አከፋፋይ ድርጅት (ጅንአድ) ሠራተኛም ነበሩ፡፡ ኩላሊታቸው መሥራት ካቆመና ዲያሊስስ ከጀመሩ በኋላ ግን ተቀጥሮ መሥራቱ ቀርቷል፡፡

አቶ ኢብራሂም እንደሚሉት፣ የዲያሊስስ ሕክምናን መከታተል ለሕሙማኑ ሁሉ መከራ ነው፡፡ ታማሚዎችም በችግር ውስጥ ይገኛሉ፡፡ በአገሪቱ ለዲያሊስስ በቂ የሕክምና ማዕከል አለመገኘቱ፣ ያለውም ቢሆን ዋጋው ለአብዛኛዎቹ ሕሙማን ከባድ መሆኑ፣ ታማሚዎች አብዛኛውን ጊዜ በሕክምና ስለሚያሳልፉ ሥራ መሥራት አለመቻላቸውና በየመንገዱ ለመለመን መዳረጋቸው ኑሯቸውን ቅጥ አልባ አድርጎታል፡፡

የኩላሊት እጥበት የሚያስፈልጋቸው ሕሙማን በሳምንት ሦስት በወር 12 ጊዜ የእጥበት ሕክምናውን ማግኘት ያለባቸው ሲሆን፣ አብዛኛው ታካሚ ግን ይኼንን ለማድረግ አቅም የለውም፡፡ በወር 15,600 ብር ያህል አውጥቶ መታከም ከባድ በመሆኑም አብዛኞቹ በሳምንት አንዴ አንዳንዶች ደግሞ ሁለቴ ብቻ ሕክምናው እንዲከታተሉ ምክንያት ሆኗል፡፡ አቅማቸው ያልቻለውም ሕክምናውን በማጣት አርፈዋል፡፡

አቶ ኢብራሂም ሕክምናውን ከአቅማቸው በላይ በመሆኑ በመስጊድና በአብያተ ክርስቲያናት አካባቢ በመገናኘትና ድምፅ ማጉያ በመጠቀም እስከመለመን የደረሱበት ጊዜም ነበር፡፡

‹‹የኩላሊት ሕመምተኞች እጥበት በጎ አድራጎት ድርጅት ባይደግፈን መዝለቅም አንችልም ነበር›› የሚሉት አቶ ኢብራሂም፣ መንግሥት የኩላሊት እጥበት የሚሹ ሕሙማንን ችግር እንዲቀርፍ ጠይቀዋል፡፡

ከታኅሣሥ 25 እስከ 28 ቀን 2011 ዓ.ም. በሚቆየውና የኩላሊት እጥበት ሕሙማን በእነዚህ ቀናት ለአንድ ጊዜ በነፃ እንዲታከሙ የገና በዓል ሥጦታቸው ይሆን ዘንድ ያዘጋጀው የኩላሊት ሕመምተኞች እጥበት በጎ አድራጎት ድርጅት ዋና ሥራ አስኪያጅ አቶ ሰሎሞን አሰፋ እንደነገሩን፣ በእነዚህ ቀናት 600 የሚደርሱ ሕሙማን በሁለት የመንግሥትና በ12 የግል ሆስፒታሎች ሕክምናውን ለአንድ ጊዜ በነፃ አግኝተዋል፡፡

ለእያንዳንዱ ታካሚ የተያዘው በጀት አንድ ሺሕ ብር በመሆኑ በመንግሥት የሚታከሙት ሁለት ጊዜ ሊታጠቡ እንደሚችሉ አቶ ሰሎሞን ገልጸው፣ የግል ሆስፒታሎች ማኅበሩ ለአንድ ታካሚ ከመደበው አንድ ሺሕ ብር በላይ ያለውን ገንዘብ በራሳቸው ሸፍነዋል ብለዋል፡፡

በመንግሥት ሆስፒታል የሚከናወን የኩላሊት እጥበት ለአንድ ጊዜ ከነመድኃኒቱ 600 ብር ሲሆን በግል ሆስፒታሎች ለአንድ ጊዜ ከ1,300 ብር እስከ 1,600 ብር ነው፡፡

የገና በዓልን አስመልክቶ ማኅበሩ የኩላሊት እጥበት የሚፈልጉ የኩላሊት ሕሙማንን ለአንድ ጊዜ በነፃ እንዲታከሙ ቢያደርግም፣ ዓላማው የኩላሊት እጥበት የሚፈልጉ ሕሙማን በሙሉ በነፃ የሚታከሙበትን ተቋማዊ ሥርዓት መዘርጋት መሆኑን አቶ ሰሎሞን ተናግረዋል፡፡

ባለፈው ሳምንትም የኩላሊት እጥበት የሚፈልጉ ሕሙማን ጎዳና ላይ ወጥተው ሳይለምኑ መታከም የሚችሉበትን ሥርዓት ለመዘርጋት በኢትዮጵያ ካሉት 17 ባንኮች ዋና መሥሪያ ቤቶችና ከ4,193 ቅርንጫፍ መሥሪያ ቤቶች ጋር አብረው መሥራት መጀመራቸውን አስታውቀው ነበር፡፡

በየባንኮቹ በተከፈተው የሒሰብ ደብተር ኅብረተሰቡ ለሕሙማኑ መርጃ በመለገስም ሕሙማኑን ከልመና ለማውጣትና ሙሉ ለሙሉ በማኅበሩ አቅም በነፃ ለማሳከም ለኅብረተሰቡ ጥሪ ማቅረባቸውም ይታወሳል፡፡