Skip to main content
x
በታኅሳስ የተመዘገበው የዋጋ ግሽበት በአሥር በመቶ ጭማሪ አሳይቷል

በታኅሳስ የተመዘገበው የዋጋ ግሽበት በአሥር በመቶ ጭማሪ አሳይቷል

በዓላት ለጭማሪው ምክንያት ሆነዋል

የማዕከላዊ ስታትስቲክስ ኤጀንሲ ይፋ ያደረገው የሸማቾች ዋጋ መመዘኛ ሪፖርት፣ በተያዘው ወር የተመዘገው አጠቃላይ የዋጋ ግሽበት፣ በ2010 ዓ.ም. ከተመዘገው አኳያ በ10.4 ከመቶ ከፍ ማለቱን አስታውቋል፡፡ የምግብ ዋጋ ግሽበቱም ካለፈው ዓመት የታኅሳስ ወር ጋር ሲነፃፀር በ11.4 በመቶ ጭማሪ አሳይቷል፡፡

ከኅዳር ወር አኳያም ሲታይ፣ በታኅሳስ ወር ዳቦና እህል በተለይም በቆሎ፣ ገብስ፣ ሩዝ፣ ጤፍና ማሽላ በዋና ዋና አምራች ክልሎች ዘንድ መጠነኛ ቅናሽ ማሳየታቸውም ተጠቅሷል፡፡ ይህም ሆኖ ስታቲስቲክስ ኤጀንሲው እንዳመለከተው፣ አትክልት፣ ሥጋ፣ ቅቤ፣ ወተት፣ ዓይብና እንቁላል እንዲሁም ቅመማ ቅመም ዋጋ ላይ  ጭማሪ ታይቷል፡፡ ከዚህ ባሻገር ምግብ ነክ ባልሆኑ የዋጋ መመዘኛው ክፍሎች እንደሚያሳዩት ከሆነም፣ የታኅሳስ ወር 2ዐ11 ዓ.ም የዋጋ ግሽበት ካለፈው ዓመት ታኅሳስ ወር 2ዐ1ዐ ዓ.ም. ጋር ሲነፃፀር የ9.1 በመቶ ጭማሪ  አሳይቷል፡፡

ምግብ ነክ ያልሆኑ የዋጋ መመዘኛው ክፍሎች እንደሚያሳዩት ካለፈው ተመሳሳይ ወቅት ጋር ሲነፃፀር የዋጋ ግሽበቱ  ከፍ እንዲል ካደረጉት ዋና ምክንያቶች መካከል አልባሳትና መጫሚያዎች ዋጋ፣ የቤት እንክብካቤና ኢነርጂ በተለይም የከሰል ዋጋ መጨመር፣ የቤት ዕቃዎችና የቤት ማስጌጫዎች፣ የቤት ግንባታ ዕቃዎች፣ የትራንስፖርት፣ የሕክምና ዋጋ ጭማሪዎች እንዲሁም በሆቴሎች ጥቅም ላይ የዋሉ ምግቦችና መጠጦች ላይ የታየው የዋጋ ጭማሪ ተጠቃሾች ናቸው፡፡ በአጠቃላይ የታኅሳስ ወር የበዓል ወቅት በመሆኑ በዋጋ ግሽበት ላይ ከሌሎች ጊዜያት በተለየ መልኩ ጭማሪ መታየቱን ኤጀንሲው አስፍሯል፡፡

በታያዘው የታኅሳስ ወር የተመዘገበው የ12 ወራት ተንከባላይ አማካይ አገራዊ አጠቃላይ የዋጋ ግሽበት ካለፈው ዓመት ተመሳሳይ ወቅት ጋር ሲነፃፀር በ13.8 በመቶ ጭማሪ አሳይቷል፡፡ በታኅሳስ የተመዘገበው አገራዊ የ12 ወራት ተንከባላይ አማካይ የምግብ የዋጋ ግሽበትም በ12.8 በመቶ ዕድገት አስመዝግቧል፡፡ የ12 ወራት ተንከባላይ አማካይ አገራዊ ምግብ ነክ ያልሆኑ የዋጋ ግሽበትም በ15.4 ከመቶ ጭማሪ አሳይቷል፡፡ የ12 ወራት ተንከባላይ አማካይ የዋጋ ግሽበት ረዘም ያለ ጊዜ የዋጋ ግሽበት ሁኔታን የሚያሳይ መመዘኛ እንደሆነ ከኤጀንሲው ትርጓሜ ለመረዳት ይቻላል፡፡

የዋጋ ግሽበቱ ቀስ በቀስ በንፅፅር ሲታይ መጠነኛ ቅናሽ እየታበት ቢመጣም፣ ለረጅም ጊዜ በሁለት አኃዝ ውስጥ መቆየቱ ይታወቃል፡፡