Skip to main content
x

ዓቃቤ ሕግ በ49 ሰዎች ሞት በተጠረጠሩ 68 ግለሰቦች ላይ ክስ መሠረተ

ከ18.5 ሚሊዮን ብር በላይ የሚገመት ንብረት መውደሙ ተጠቁሟል

የኦሮሞ ነፃነት ግንባር (ኦነግ) አመራሮች መስከረም 5 ቀን 2011 ዓ.ም. ወደ ኢትዮጵያ ሲገቡ፣ በመስቀል አደባባይ አቀባበል ለማድረግ ወደ ‹‹አዲስ አበባ እንዳንገባ ተከልክለናል›› ባሉ ግለሰቦች በተፈጠረ ረብሻ ለ49 ሰዎች ሞት ምክንያት በመሆን ተጠርጥረዋል በተባሉ 68 ግለሰቦች ላይ የፌዴራል ዓቃቤ ሕግ ክስ ተመሠረተ፡፡

የፌዴራል ጠቅላይ ዓቃቤ ሕግ በሦስት የክስ መዝገቦች አዘጋጅቶ ለፌዴራል ከፍተኛ ፍርድ ቤት ያቀረባቸው ክሶች እንደሚያብራሩት፣ የኦነግ ከፍተኛ አመራሮች ወደ አገር ውስጥ መግባታቸውን አስመልክቶ በመስቀል አደባባይ በሚደረገው አቀባበል ላይ ለመሳተፍ ከተለያዩ አቅጣጫዎች ወደ አዲስ አበባ ‹‹እንዳንገባ፣ ሰንደቅ ዓላማችንን እንዳንሰቅል፣ የዓርማችንን ምልክት በቀለም እንዳንቀባ ተከልክለናል፤›› በማለት ባልተረጋጋጠ ወሬ ግጭት እንዲፈጠር በማድረግ የሰው ሕይወት እንዲያልፍ፣ ንብረት እንዲወድም፣ በሺዎች የሚቆጠሩ ነዋሪዎች እንዲፈናቀሉና ከባድና ቀላል የአካል ጉዳት እንዲደርስባቸው መደረጉን ዓቃቤ ሕግ በክሱ ገልጿል፡፡

በእነ ኃይለ ሚካኤል ታፈሰ የክስ መዝገብ የተካተቱ 33 ግለሰቦች፣ በእነ ተስፋዬ ጉልላት ሞላ የክስ መዝገብ የተካተቱ 18 ግለሰቦችና በእነ ቢኒያም ዘነበ የክስ መዝገብ የተካተቱ 17 ግለሰቦች የተጠረጠሩበት የወንጀል ድርጊት፣ በወንጀል ሕግ አንቀጽ 32(1ሀ)፣ 35፣ 38 እና 240 (3) ሥር የተደነገገውን መተላለፍ መሆኑ በክሱ ተጠቅሷል፡፡

ተከሳሾቹ ባልተረጋገጠና በሐሰተኛ ወሬ በመነሳሳት ማለትም የኦሮሞ ተወላጆች መስከረም 5 ቀን 2011 ዓ.ም. ወደ ኢትዮጵያ የገቡትን የኦነግ ከፍተኛ አመራሮች መቀበል፣ ሰንደቅ ዓላማ መስቀልና ዓርማን በቀለም መቀባት ተከልክሏል የሚል መረጃ እንደደረሳቸው በመግለጽ፣ ከመስከረም 2 እስከ 7 ቀን 2011 ዓ.ም. ድረስ ግድያ፣ ዘረፋ፣ ማፈናቀልና ንብረት ውድመት ማድረሳቸውን ክሱ ይገልጻል፡፡ በፊንፊኔ ዙሪያ ኦሮሚያ ልዩ ዞን ቡራዩ ከተማ በወረዳ አንድ፣ ሁለትና ሦስት ውስጥ መስከረም 6 ቀን 2011 ዓ.ም. በተፈጸመ ወንጀል የ37 ሰዎች ሕይወት መጥፋቱን፣ ከባድና ቀላል የአካል ጉዳት መድረሱንና 4,506 ነዋሪዎች መፈናቀላቸውን ዓቃቤ ሕግ በክሱ አስረድቷል፡፡ 17,538,744 ብር ግምት ያለው ንብረት እንዲወድም ማድረጋቸውንም አክሏል፡፡ ተከሳሾቹ ሽጉጥ፣ ክላሽ፣ ገጀራ፣ ጩቤ፣ ፌሮ፣ ዱላና ድንጋይ በመጠቀም የወንጀል ድርጊቱን እንደፈጸሙም ጠቁሟል፡፡

በእነ ቢኒያም ዘነበ የክስ መዝገብ የተካተቱ ተከሳሾች ደግሞ ከኮልፌ ቀራኒዮ፣ ከአዲስ ከተማና ከጉለሌ ክፍላተ ከተማ የተውጣጡ ሲሆን፣ ከመስከረም 2 እስከ 7 ቀን 2011 ዓ.ም. ድረስ ከላይ ከተገለጸው በተጨማሪ ‹‹የኦሮሞ ወጣቶችን በሏቸው፤›› በማለት በፈጸሙት ወንጀል የሰባት ሰዎች ሕይወት ማለፉን ዓቃቤ ሕግ በክሱ ገልጿል፡፡ በርካታ ሰዎች ከባድና ቀላል የአካል ጉዳት እንደደረሰባቸው፣ እንዲሁም ከ336,300 ብር በላይ የሚገመት ንብረት እንዲወድም ማድረጋቸውን አብራርቷል፡፡

በእነ ተስፋዬ ጉልላት የክስ መዝገብ የተካተቱ ተከሳሾች ደግሞ ‹‹ቄሮዎች የአዲስ አበባን ሕዝብ እየገደሉና እየዘረፉ ነው፤›› በማለት፣ መስከረም 4 ቀን 2011 ዓ.ም. አንዱ ወገን በሌላኛው ወገን ላይ የጦር መሣሪያ እንዲያነሳና የእርስ በርስ ጦርነት እንዲነሳ ለማድረግ በኮልፌ ቀራኒዮ ክፍለ ከተማ በተለያዩ አካባቢዎች በተፈጸመ ወንጀል የአምስት ግለሰቦች ሕይወት ማለፉን ዓቃቤ ሕግ በክሱ ገልጿል፡፡ በበርካታ ሰዎች ላይ ከባድና ቀላል የአካል ጉዳት ከመድረሱም በተጨማሪ 712,599 ብር ንብረት መውደሙንም በክሱ አክሏል፡፡