Skip to main content
x

ማሾና አኩሪ አተር የምርት ገበያውን አስገዳጅ ምርቶች ተቀላቀሉ

በኢትዮጵያ ምርት ገበያ ሲስተናገዱ ከቆዩ ምርቶች በተጨማሪ አኩሪ አተርና አረንጓዴ ማሾም በምርት ገበያው በኩል በአስገዳጅነት ከሚገበያዩ መካከል እንዲካተቱ ተወሰነ፡፡ በታኅሳስ ወር 3.8 ቢሊዮን ብር ዋጋ ያላቸውን ምርቶች ተገብይተዋል፡፡

ምርት ገበያው እንዲያገበያይ የተወሰኑለትን ምርቶች አስመልክቶ እንዳስታወቀው የአኩሪ አተርና የአረንጓዴ ማሾ ምርቶች በአስገዳጅነት በምርት ገበያው እንዲገበያይ ውሳኔ ያሳለፈው የንግድና ኢንዱስትሪ ሚኒስቴር ነው፡፡

ከታኅሳስ 22 ቀን 2011 ዓ.ም. ጀምሮ በአስገዳጅነት በምርት ገበያው በኩል መገብየት የጀመረው አኩሪ አተር፣ በአንድ ቀን የገበያ ውሎው ብቻ 1,042 ኩንታል ወደ ምርት ገበያው መጋዘን ለማስባት ማስቻሉን ምርት ገበያው አስታውቋል፡፡ የማሾ ምርት ከዚህ ቀደም በአማራጭነት ሲስተናገድ ቢቆይም፣ ከአሁን በኋላ ግን በምርት ገበያው በኩል ብቻ እንዲገበያይ መወሰኑን የምርት ገበያው መረጃ አመልክቷል፡፡ አኩሪ አተርና ሽምብራ ወደ ምርት ገበያው ከታኅሳስ 22 ቀን 2011 ዓ.ም. ጀምሮ እንዲገቡ የተደረገ ሲሆን፣ ሽምብራ ከአስገዳጅነት ይልቅ በአማራጭ ግብይት እንዲስተናገድ ተወስኗል፡፡

የተወሰኑ ምርቶች ግብይት በምርት ገበያ በኩል ብቻ መካሄዱ የጥራጥሬ ምርቶችን በጥራትና በብዛት በማቅረብ ከዘርፉ የሚገኘውን የውጭ ምንዛሪ ገቢ ለማሳደግ ታስቦ እንደሆነ የሚጠቅሰው ምርት ገበያው፣ አቅራቢው ነጋዴ ላመጣው ምርትም ተገቢውን የምርት ዋጋ ማግኘት እንዲችል ያደርጋል ተብሏል፡፡ አስገዳጅ የግብይት ውሳኔው የሚኒስትሮች ምክር ቤት የጥራጥሬ ምርቶች ግብይትን አስመልክቶ በደንብ ቁጥር 377/2008 ባወጣው ሕግና በማስፈጸሚያ መመርያ ቁጥር 010/2009 መሠረት የሚተገበር ነው፡፡ የንግድና ኢንዱስትሪ ሚኒስቴር በሚያወርደው በዚህ ውሳኔ መሠረት፣ ማሾና አኩሪ አተርን ጨምሮ ቡና፣ ሰሊጥና ነጭ ቦሎቄ ሲታከሉበት በምርት ገበያው ብቻ የሚያገበያዩትን የግብርና ምርቶች ቁጥር አምስት አድርሶታል፡፡ የምርት ገበያው ምርት መቀበያ መጋዘኖች ወደ ግብይት ሥርዓቱ የሚቀላቀሉ ምርቶችን በበቂ አቅም ለመቀበል ዝግጅቱን አጠናቆ እየተጠባበቀ እንደሚገኝም ምርት ገበያው ገልጿል፡፡

ይህ በእንዲህ እንዳለ ምርት ገበያው በታኅሳስ ወር 39,240 ቶን ሰሊጥ፣ 27,773 ቶን ቡናና 10,995 ቶን ነጭ ቦሎቄ በ3.8 ቢሊዮን ብር አገበያይቷል፡፡ ሰሊጥ የግብይት መጠኑን 51 በመቶ ሲይዝ፣ በግብይት ዋጋ ደግሞ 40 በመቶ በመያዝ ግብይቱን አስተናግዷል፡፡

የቡና ግብይት ካለፈው ወር ጋር ሲነፃፀር በመጠን የ29 በመቶና በዋጋ የ36 በመቶ ጭማሪ አሳይቷል፡፡ የሰሊጥ ግብይት ደግሞ በመጠን በ22 በመቶና በዋጋ በ27 በመቶ ጨምሯል፡፡ በተመሳሳይም ነጭ ቦሎቄ ካለፈው ወር ተመሳሳይ ወቅት ጋር ሲነፃፀር በመጠን 36 በመቶ እንዲሁም በዋጋ 50 በመቶ ጭማሪ አሳይቷል፡፡

በ21 የግብይት ቀናት ሁሉም የቡና ዓይነቶች ግብይት የተፈጸመ ሲሆን፣ ለውጭ ገበያ የሚቀርብ ቡና መጠኑን 40 በመቶ እንዲሁም ዋጋውን 40 በመቶ ይዟል፡፡ በታኅሳስ ወር 2011 ዓ.ም. 10,018 ቶን ያልታጠበ ለውጭ ገበያ የሚቀርብ ቡና 692.06 ሚሊዮን ብር፣ 998 ቶን የታጠበ ለውጭ ገበያ የሚቀርብ ቡና በ62.6 ሚሊዮን ብር፣ 6,603 ቶን ለአገር ውስጥ ፍጆታ የሚውል ቡና በ393 ሚሊዮን ብር እንዲሁም 10,153 ቶን ስፔሻሊቲ ቡና 736.5 ሚሊዮን ብር ተገበያይቷል፡፡

በታኅሳስ ወር 39,240 ቶን ሰሊጥ 1.77 ቢሊዮን ብር የተገበያየ ሲሆን፣ የሁመራ/ጎንደር ሰሊጥ መጠኑን 84 በመቶና ዋጋውን 85 በመቶ በመያዝ ቀዳሚ ሆኗል፡፡ 10,995 ቶን ነጭ ቦሎቄ በ189.5 ሚሊዮን ብር ያገበያየ ሲሆን፣ ካለፈው ወር ተመሳሳይ ወቅት ጋር ሲነፃፀር 35.8 በመቶ በመጠንና 50 በመቶ በዋጋ ጭማሪ አሳይቷል፡፡ ከባለፈው ዓመት ተመሳሳይ ወቅትም ጋር ሲነፃፀር በግብይት ዋጋ የአሥር በመቶ ጭማሪ እንዳሳያ የኢትዮጵያ ምርት ገበያ ይገልጻል፡፡