Skip to main content
x
ክቡር ሚኒስትሩ በቅርቡ የታሰሩ ከፍተኛ ባለሥልጣንን ለመጠየቅ እስር ቤት ሄዱ

ክቡር ሚኒስትሩ በቅርቡ የታሰሩ ከፍተኛ ባለሥልጣንን ለመጠየቅ እስር ቤት ሄዱ

[ክቡር ሚኒስትሩ የአንድ ሀብታም አቀንቃኝ ግለሰብ ይደውልላቸዋል]   

  • እንኳን ደስ አለዎት ክቡር ሚኒስትር፡፡
  • ምን ተገኘ?
  • ያው የእኛ ደስታ የእናንተም ደስታ ነው ብዬ ነው፡፡
  • ምንድነው ያስደሰታችሁ?
  • የደስታችን ምክንያትማ እናንተም ናችሁ፡፡
  • እኛማ ሁሌም ሕዝቡን ለማስደሰት እንተጋለን፡፡
  • ያለእናንተ ትግል እኮ የሚቻል አልነበረም፡፡
  • ምኑ?
  • የስንቶች አባት የሆኑት እንዲፈቱ እኮ ያደረጋችሁት ጥረት ቀላል አይደለም፡፡
  • የዜጎቻችን መጎዳት እኮ ሁሌም ይቆረቁረናል፡፡
  • በተለይ ደግሞ እንደ እሳቸው ዓይነት አባት የሆነ ሰው ሲታሰር ያማል፡፡
  • አንተ ግን የምር ለእሳቸው አዝነህ ነው ወይስ ጥቅምህ ቀርቶ?
  • እንዴት ክቡር ሚኒስትር?
  • ማለቴ በእሳቸው መታሰር ምክንያት ብዙ ጥቅማ ጥቅሞች ስለቀረብህ ነው እንጂ በእርግጥ ስለ እሳቸው ያሳስብሃል?
  • ምንም ቢሆን ስንት ነገር አሳልፈናል እኮ ክቡር ሚኒስትር፡፡
  • ለማንኛውም እንኳን ደስ አለህ፡፡
  • እኛማ ደስታውን ምክንያት አድርገን አንድ ኮሚቴ አቋቁመናል፡፡
  • የምን ኮሚቴ?
  • ለአባታችን ደማቅ አቀባበል ለማድረግ ነዋ፡፡
  • ከመቼው?
  • የሚገርምዎት እኔ የኮሚቴው ሰብሳቢ ነኝ፡፡
  • ምን ልታደርጉ ነው ታዲያ?
  • በመጀመርያ ያሰብነው ከውጭ ታዋቂ ባንድ ለማስመጣት ነበር፡፡
  • የምን ባንድ?
  • ለግብዣው የሚሆን የሙዚቃ ባንድ ነዋ፡፡
  • ተሳካላችሁ ታዲያ?
  • ጊዜ ስለሌለን አገር ውስጥ ያለ ታዋቂ ባንድ እንዲሆን ወስነናል፡፡
  • ሌላስ?
  • ፕሮግራሙ ላይ ውስኪ በቧንቧ እንዲቀዳ ነው ያሰብነው፡፡
  • አልገባኝም፡፡
  • በቃ ተጋባዦቹ እጃቸውን በውስኪ እንዲታጠቡ ነው የምናደርገው፡፡
  • እሺ፡፡
  • ለድግሱ የሚሆን ሼፍ ከፈረንሣይ ነው የምናስመጣው፡፡
  • ይገርማል፡፡
  • በአገር ውስጥ ደግሞ አሉ ከሚባሉ ሥጋ ቤቶች ጋር እየተነጋገርን ነው፡፡
  • ትልቅ ድግስ ነዋ የምታዘጋጁት?
  • ክቡር ሚኒስትር በዝግጁቱ ላይ ለየት ያለ ፕሮግራምም አዘጋጅተናል፡፡
  • ምን ዓይነት ፕሮግራም?
  • አባታችን በእስር ላይ በነበሩበት ወቅት በማኅበራዊ ሚዲያ ሲታገሉና ለእሳቸው ሲደግፉ ለነበሩ ሰዎች ሽልማት አዘጋጅተናል፡፡
  • የገንዘብ ሽልማት ነው?
  • ኧረ የዕውቅና ሠርቲፊኬት በቂ ነው፡፡
  • እንዴ እሳቸው እኮ ገንዘብ በመሸለም ነበር የሚታወቁት?
  • ያው አሁን ሀብታቸው በጣም ስለቀነሰ ሽልማት የለም፡፡
  • ታዲያ በዚህ ዓይነት እንደዚህ ትልቅ ድግስ ከየት አምጥታችሁ ነው የምታደርጉት?
  • እሳቸው ሁሌም ለበርካቶች እጃቸው ስለሚዘረጋ፣ የድግሱን ወጪ ለመሸፈን ከዚያ በፊት አንድ ፕሮግራም እናዘጋጃለን፡፡
  • የምን ፕሮግራም?
  • የገቢ ማሰባሰቢያ!

[ክቡር ሚኒስትሩ በቅርቡ የታሰሩ ከፍተኛ ባለሥልጣንን ለመጠየቅ እስር ቤት ሄዱ]

  • እንዴ ክቡር ሚኒስትር?
  • ምነው?
  • በጣም ነው የገረመኝ፡፡
  • ምኑ ነው የገረመህ?
  • መጥተው ስለጠየቁኝ ነዋ፡፡
  • ምንም ችግር የለውም፡፡
  • ከሰው ጋር ግን ተዛዘብኩ ክቡር ሚኒስትር፡፡
  • እንዴት?
  • ከቤተሰቤ ውጪ እኮ እርስዎ ነዎት ሁለተኛ የጠየቁኝ ሰው፡፡
  • ምን ታደርገዋለህ?
  • ያ ሁሉ ባለሥልጣንና ባለሀብት ያሸረግድልኝ ነበር እኮ?
  • የሚያሸረግድልህ ወዶህ መስሎህ ነው ታዲያ?
  • ክቡር ሚኒስትር ጫማህን ካልጠረግንልህ ነበር እኮ የሚሉኝ?
  • ፈርተውህ ነዋ፡፡
  • አሁን ደስ ብሏቸዋል በሉኛ?
  • ሕዝቡ እየፈነደቀ ነው፡፡
  • ችግር የለውም ጊዜ ጥሎኝ ነው፡፡
  • ታዲያ ጥሩ ሰው ነኝ ልትል ነው?
  • ምነው ክቡር ሚኒስትር?
  • አገሪቱን ለዚህ ያበቃሃት እኮ አንተ ነህ፡፡
  • ምን አድርጌ?
  • ምን ያላደረከው ነገር አለ?
  • እርስዎም በመታሰሬ ተደስተዋል?
  • መቼም በሰው ችግር መደሰት ባህላችንም አይደለም፡፡
  • እንጂ ይገባሃል እያሉኝ ነው?
  • ምኑ?
  • እስሩ ነዋ ክቡር ሚኒስትር፡፡
  • ከሠራኸው አንፃርማ ሲያንስህ ነው፡፡
  • ምነው ክቡር ሚኒስትር?
  • ምነው?
  • ሊጠይቁኝ የመጡ መስሎኝ?
  • እሱማ ልጠይቅህ ነው የመጣሁት፡፡
  • የመጡት ሊጠይቁኝ ሳይሆን ሊያሳቅቁኝ ነው፡፡
  • እሱም ሲያንስህ ነው፡፡
  • ኧረ ይተው ክቡር ሚኒስትር፡፡
  • ምን አጠፋሁ?
  • እኔ እኮ ባለውለታዎት ነኝ፡፡
  • የምን ውለታ?
  • እዚህ እንዲደርሱ ብዙ ነገር አድርጌልዎታለሁ እኮ?
  • ጥረቴ ነው እዚህ ያደረሰኝ፡፡
  • ክቡር ሚኒስትር እንዲያው በአብዮታዊ ዴሞክራሲ ይዤዎታለሁ አንድ ነገር ይርዱኝ፡፡
  • ምን?
  • ስልክ እንዲገባልኝ ያስደርጉ፡፡
  • ምን?
  • ስልክ እፈልጋለሁ፡፡
  • እስር ቤት ውስጥ?
  • እዚህ ብዙ ስልክ ያላቸው እስረኞች አሉ፣ ስለዚህ ችግር የለውም፡፡
  • በቃ ሕገወጥነት ተጠናውቶሃል አይደል?
  • የእውነቴን ነው ክቡር ሚኒስትር፡፡
  • ለማንኛውም አርፈህ ተቀመጥ፡፡
  • ለምን?
  • ባለብህ ክስ ላይ ሌላ እንዳይጨምሩብህ፡፡
  • ሌላ ምን?
  • ኮንትሮባንዲስትነት!

[ለክቡር ሚኒስትሩ አንድ ባለሀብት ደወለላቸው]

  • ምንድነው ክቡር ሚኒስትር?
  • ምነው?
  • ዱባይ ለልጄ ሠርግ ሾፕ ለማድረግ ልሄድ ብዬ ከኤርፖርት መለሱኝ፡፡
  • ለምን?
  • ምን አውቃለሁ ክቡር ሚኒስትር?
  • መመለስ ነዋ ምን ይደረጋል?
  • ክቡር ሚኒስትር ነፃ ነህ ተብዬ በቅርቡ አይደል እንዴ አገር የገባሁት?
  • ሲጣራ ችግር ከተገኘብህማ ድጋሚ ትጠየቃለሃ?
  • ይኼ ነው ሪፎርሙ ክቡር ሚኒስትር?
  • እንዴት?
  • ሰላም ነው ብለን አገር ስንገባ አባብላችሁ ልትከቱን?
  • የት ነው የምትገባው?
  • እስር ቤት ልትከቱን ነዋ?
  • ምን ያለበት ምን አይችልም አሉ፡፡
  • እኔ እኮ ለአገሬ ስንትና ስንት ውለታ የዋልኩ ሰው ነኝ፡፡
  • የምን ውለታ?
  • ክቡር ሚኒስትር ለስንቶች የሥራ ዕድል መፍጠሬን ረሱት?
  • እንዴት አድርገህ?
  • ይኸው በጣም በርካታ ግዙፍ ድርጅቶችን አቋቁሜ የስንቶችን ጉሮሮ እየደፈንኩ ነው፡፡
  • ለምን እንወሻሻለን?
  • ምነው ክቡር ሚኒስትር?
  • እዚህ እንዴት እንደደረስክ እኮ ይታወቃል፡፡
  • በሥራዬ ነው እዚህ የደረስኩት፡፡
  • ስማ እዚህ የደረስከው ከቱባ ባለሥልጣናት ጋር ባለህ ግንኙነት እንጂ በሥራህ አይደለም፡፡
  • አይሳሳቱ ክቡር ሚኒስትር፡፡
  • እኔ የምልህ የሕዝቡን ጤና የሚጎዳ ዘይት በግፍ ቸብችበህ አይደል እንዴ እዚህ የደረስከው?
  • እ…
  • ስንትና ስንት ለጤና ፀር የሆኑ ጁሶችን አምጥተህ ከብረህ ስታበቃ፣ በሥራዬ ነው የከበርኩት ስትል አታፍርም?
  • ቢሆንም ክቡር ሚኒስትር እኔ የሥራ ሰው ነኝ፡፡
  • እኮ ሥራህ ሌብነት ነዋ፡፡
  • ይተው እንጂ ክቡር ሚኒስትር፡፡
  • እውነቴን ነው፡፡
  • እኔም እናንተን አምኜ መምጣቴ ነው ጥፋቴ፡፡
  • ለማንኛውም የአገሪቱ ባለሀብት ሁሉም ይመረመራል፡፡
  • ምኑ ነው የሚመረመረው?
  • የሀብቱ አመጣጥ ነዋ፡፡
  • አልገባኝም?
  • የሀብታችሁ ትክክለኛ ምንጭና በአግባቡ መገኘቱ ይመረመራል፡፡
  • እኔ እኮ በሥራ ነው ያመጣሁት አልኩዎት?
  • እሱን ተወው ለባለሥልጣን በማጨብጨብ ነው ያመጣኸው፡፡
  • ወይኔ?
  • ስለዚህ መንግሥት የሀብታችሁን ምንጭ ያጣራና ይወስናል፡፡
  • ምንድነው የሚወስነው?
  • ሲጣራ ሀብታችሁ በትክክለኛ መንገድ ካልተገኘ ዕርምጃ ይወስዳል፡፡
  • እ…
  • ሀብቱ በትክክል ያልተገኘ ከሆነ ምን እንደሚደረግ ታውቃለህ?
  • ምን ይደረጋል?
  • ይወረሳል!

[ክቡር ሚኒስትሩ ወደ አገር ውስጥ ከገቡ ባለሀብት ጋር ተገናኙ]

  • እንኳን ለአገርህ አበቃህ?
  • እንኳን በሰላም ቆዩኝ ክቡር ሚኒስትር፡፡
  • እኔ እኮ ተመልሰህ አገርህ ትገባለህ ብዬ አላሰብኩም?
  • ብዙዎች እንደዚያ ነበር የሚያስቡት፡፡
  • ጤንነትህም ጥሩ አይደለም እያሉ ነበር የሚያወሩት፡፡
  • እነሱ እንኳን ሀብቴን ለመውረስ ብለው ነው የሚያስወሩት፡፡
  • ዋናው እንኳን በደህና ተመለስክ፡፡
  • እኔ እኮ ገና እንደገባሁ ብዙ ለውጥ አለ ስለተባልኩ ቀጥታ ከኤርፖርት ወደ እርስዎ ነው የመጣሁት፡፡
  • አገሪቱማ በከፍተኛ ሪፎርም ውስጥ ናት፡፡
  • ምንድነው ሁሉም ሪፎርም ሪፎርም እያለ ነው የሚያወራው? ህዳሴው ቀረ እንዴ?
  • ህዳሴው በሪፎርም ተቀይሯል፡፡
  • ለመሆኑ አለቃችሁ ደህና ነው?
  • የትኛው አለቃ?
  • የምናቀው የድሮ አለቃችሁ ነዋ?
  • አሁን ሌላ ቆፍጣና አለቃ መጥቶልናል፡፡
  • ለነገሩ ያኔ እኔም የቀድሞው አለቃችሁ ብዙም እንደማይዘልቁ ተናግሬ ነበር፡፡
  • ለማን ነው የተናገርኸው?
  • ለእኔ ቅርብ ጓደኛና ወዳጅ ባለሥልጣኑ ነዋ፡፡
  • ውይ እሳቸው እኮ እስር ቤት ገቡ፡፡
  • ምን?
  • በቅርቡ ነው እንዲያውም የገቡት?
  • እንዴ የደኅንነት ኃላፊው ወዳጃችን ይኼን ያውቃሉ?
  • ለእሳቸው የእስር ቤት ማዘዣ ተቆርጦላቸዋል፡፡
  • እንዴ ምን እየተካሄደ ነው?
  • ሪፎርም፡፡
  • በቃ በዚህ ዓይነት እኔንም ሳታስገቡኝ ልመለስ፡፡
  • እሱማ አይቻልም፡፡
  • እኔ እኮ ነፃ ሰው ነኝ ክቡር ሚኒስትር፣ በቅርቡ ነው ከእስር የተለቀቅኩት፡፡
  • ከእስር አልተለቀክም፡፡
  • እንዴት?
  • ቀይረህ ነው፡፡
  • ምን?
  • እስር ቤት!