Skip to main content
x

የሰነዶች ማረጋገጫ ኤጀንሲ ባለፉት ስድስት ወራት ከ170 ሚሊዮን ብር በላይ ሰበሰበ

የፌዴራል የሰነዶች ማረጋገጫና ምዝገባ ኤጀንሲ በ2011 በጀት ዓመት በመጀመርያዎቹ ስድስት ወራት ከአገልግሎትና ከቴምብር ሽያጭ 171.4 ሚሊዮን ብር መሰብሰቡን አስታወቀ፡፡ በመጀመርያዎቹ ስድስት ወራት 195.5 ሚሊዮን ብር ለመሰብሰብና ለመንግሥት 130 ሚሊዮን ብር ፈሰስ ለማድረግ አቅዶ እንደነበርም የአፈጻጸም ሪፖርቱ ያሳያል፡፡

ኤጀንሲው በግማሽ ዓመት ውስጥ 433,775 ጉዳዮችን አይቷል፣ 671,093 ባለጉዳዮችንም አስተናግዷል፡፡ ካለፈው ተመሳሳይ በጀት ዓመት የስድስት ወራት ዕቅድ አፈጻጸም ጋር ሲነፃፀር፣ ከቴምብር ቀረጥ ሽያጭ የሰበሰበው ብር በ12.7 ሚሊዮን ብር አንሷል፡፡

ከዚህም ባሻገር በከተማው በሚገኙ በሁሉም ቅርንጫፎች ውክልና የመስጠትና የመሻር እንዲሁም የሚንቀሳቀሱና የማይንቀሳቀሱ ንብረቶችን ለሦስተኛ ወገን በስጦታ ወይም በሽያጭ ለማስተላለፍ የሚያስችሉ የውል ስምምነቶችን በኦንላይን መፈጸም የሚያስችል አገልግሎት መጀመሩ ታውቋል፡፡